‘Badilongolole bua mudimu muimpe wonso’

‘UBAVULUIJE bua kukokelabu bamfumu ne bakokeshi, batumikile dîyi diabu, bikale [badilongolole] bua mudimu muimpe wonso.’ (Tito 3:1) Mmudimu muimpe kayi uvua mupostolo Paulo wamba pakafundilaye bena Kristo nende mêyi aa? Earnest Scott, mumanyi wa malu a Bible, wakatela umue mushindu wa mudimu muimpe, wamba ne: “Bena Kristo kabavua anu ne bua kutumikila bakokeshi, kadi bavua kabidi ne bua kuikala badilongolole bua mudimu muimpe wonso. . . . Pavuabi bikengedibua, bena Kristo bavua ne bua kuikala munkatshi mua bantu ba kumpala bavua bambuluisha bantu nabu. Kuvua ne bikondo bivua midilu ikutuka, bivua makenga ne bipupu bia mishindu kabukabu bienzeka, bivua bena muabu bonso ba muoyo muimpe mua kujinga bua kuambuluisha bena mutumba nabu.”

Bena Kristo batu benza amue malu atu ambuluisha bantu padiwu kaayi abengangana ne mikenji ya Nzambi. (Bienzedi 5:29) Tshilejilu, biro bia filiale wa Bantemu ba Yehowa bia mu Japon (bidi mu tshimenga tshia Ebina) bitu bileja ku tshidimu tshionso dinaya dia tshia kuenza ne mushindu wa kujima mudilu, bilondeshile mibelu ya tshibambalu tshia malu a dijima midilu tshia mu tshimenga etshi. Mu bikondo ebi, bena dîku dijima dia Betele batu badisangisha bua kuteleja mibelu itu muleji mpala wa tshibambalu tshia malu a dijima midilu ufila.

Pashishe, munkatshi mua bidimu bipite pa dikumi, biro bia filiale bivua bieleshangana diboko ne bamfumu ba mu tshimenga atshi mu dileja dia mushindu wa kumanya mua kudikuba ne kupangisha dikutuka dia midilu. Mu dileja edi, biapu bia mu tshimenga bitu bileja mutubi biluisha ne bijima midilu ne lukasa. Misangu ya bungi batu bele biro bia filiale kalumbandi bua dimanya ne mushindu udi benamu batuishangana maboko mu dienza mudimu eu. Mu tshidimu tshia 2001 bakatuka ba kumpala mu dileja adi. Mbadilongolole bua kuenza mudimu muimpe udi mua kupandisha mioyo ya bantu mu tshikondo tshidi midilu ikutuka.

Mudimu wa mushinga mukole

Kadi Bantemu ba Yehowa batu batamba kuenza mudimu mukuabu muimpe wa mushinga mukole, utu kabidi upandisha mioyo ya bantu. Batu baya pa tshibidilu ku nzubu ya bena mutumba nabu bua kubambila lumu luimpe lua Bukalenge bua Nzambi. (Matayo 24:14) Bantemu batu bakankamija bantu bua kulonga ne kutumikila mêyi a mu Bible bua buobu kumona mua kulengeja nsombelu wabu mpindieu ne bua kupeta ditekemena dia muoyo wa kashidi mu bukua-panu muikala ditalala ne bupole bia bushuwa.

Imue misangu bamue bantu kabena bajingulula mushinga wa mudimu udi Bantemu ba Yehowa benza to, babangata bu bantu badi babatondesha nsombelu. Kadi Nzuji Jean Crepeau wa ku Kabadi Kakulu ka mu ditunga dia Canada uvua yeye umona malu mushindu mukuabu. Bantemu ba Yehowa ba mu ditunga adi bavua batontolole mukenji uvuabu bele mu tshimenga tshia Blainville (mu provense wa Québec), uvua ubalomba bua bikale ne mukanda wa dianyisha dia kuyisha ku nzubu ne ku nzubu. Mu dipangadika dia kabadi, Nzuji Crepeau wakamba ne: “Diya dia Bantemu ba Yehowa ku nzubu ya bantu mmudimu udi bena Kristo benzela bantu ne . . . mikanda idi Bantemu bafila kudi bantu badi banyisha mmikanda ya mushinga  wa bungi, idi yakula bua bitendelelu, bua Bible, bua dinua dia diamba, bua dikuatshika dia mala, dilongesha bansonga, bilumbu bia mu mabaka ne dishipa dia mabaka.” Dipangadika edi diakatungunuka diamba ne: “Kabadi kadi anu mua kuamba ne: kufuanyikija Bantemu ba Yehowa ne basumbishi ba mikanda ku nzubu ne ku nzubu ntshipendu, mbualu budi bupuekesha milongo, budi bubungamija ne budi bubanyangila lumu patupu.”

Bantemu ba Yehowa badi balengeja nsombelu wa bantu ba muaba udibu padibu babambuluisha bua kujikija ntatu idibu bapeta mu nsombelu wa matuku onso ne padibu babapesha ditekemena dia matuku atshilualua. Bible udi ubambuluisha bua kuenza mudimu eu. ‘Dîyi dionso dia mu Mukanda wa Nzambi didi difume munda mua Nzambi bu mupuya wende, ne didi ne mudimu muimpe wa kuyisha bantu, ne wa kubabela, ne wa kubadimuija, ne wa kubalongesha mu buakane bua Nzambi; bua muntu wa Nzambi ikale mukumbajibue, mulongolola tshishiki bua midimu yonso mimpe.’​—2 Timote 3:16, 17.

Udi musue kumanya mushindu udi Bantemu ba Yehowa “badilongolola bua mudimu muimpe wonso” anyi? Tudi tukulomba bua kuitaba diambuluisha didibu basue kukupesha bua wewe kumanya malu a bungi a mu Bible ne bua wewe kupeta masanka adi afumina ku mudimu eu wa mushinga mukole udibu bakuatshisha nawu bantu muaba uudi musombele ne pa buloba bujima.

[Bimfuanyi mu mabeji 30, 31]

Bantemu ba Yehowa badi bakeba bua kutuishangana maboko mu mudimu ne bakokeshi

[Tshimfuanyi mu dibeji 31]

Bantemu mbamanyike bua mutubu bambuluisha bena mutumba nabu