Bina bia mâyi bidi kabiyi bilama mâyi

MU BIKONDO bivuabu bafunda Bible, bantu bavua bumbula bina muinshi mua buloba nangananga bua kulaminamu mâyi. Mu bimue bikondo mu Buloba Bulaya, bina ebi ke bivua biambuluisha bua kulama mâyi mimpe.

Pavuaye ufunda dimanyisha kampanda dia Nzambi, muprofete Yelemiya wakakula bua bina bia mâyi bia mu tshimfuanyi, wamba ne: ‘Bualu bua bantu banyi bakuenza malu mabi abidi: bakundekela meme, mushimi wa mâyi a muoyo, bakudiumbuila [bina] bia mâyi, [bina] bimane kupuka mene, bidi kabiyi mua kulama mâyi.’​—Yelemiya 2:13.

Bena Isalele bakela Yehowa Nzambi wabu (mushimi wa mâyi a muoyo) nyima ne bakanyemena ku bipungidi kabiyi kutekela muoyo bivuabu badie ne biluilu bia masalayi a bisamba bia bende ne ku ntendelelu wa nzambi ya dishima. Bilondeshile mufuanu udi Yelemiya mufile, miaba eyi ivuabu batekemene bua kunyemenamu yakalua anu bina bivua bimina mâyi ne bivua kabiyi ne tshintu tshivua mua kukuba anyi kupandisha nansha tshimue to.​—Dutelonome 28:20.

Tshilejilu etshi tshia kale tshidiku tshitulongesha bualu kampanda anyi? Anu muvuabi mu matuku a Yelemiya, Yehowa Nzambi wa tshiendelele udi anu mushimi wa mâyi a muoyo. (Musambu 36:9; Buakabuluibua 4:11) Bantu badi mua kupeta muoyo wa kashidi anu buobu baye kudiye ku butuangaji bua Muanende Yezu Kristo. (Yone 4:14; 17:3) Kadi anu bu bantu ba mu tshikondo tshia Yelemiya, bisumbu bia bantu lelu mbisungule bua kubenga ne bua kunyanga mene dîyi dia Nzambi didi mu Bible. Kadi badi batekemena malu adi bena tshididi balaya bua kuenza, ngenyi ya patupu ya bantu ne malongesha ne nkidi bidi bipendesha Nzambi. (1 Kolinto 3:18-20; Kolosai 2:8) Tshia kusungula ntshimueneke patoke. Neweyemene nganyi? Neweyemene Yehowa ‘mushimi wa mâyi a muoyo’ anyi, neweyemene ‘[bina] bia mâyi bimane kupuka bidi kabiyi mua kulama mâyi’ anyi?

[Tshimfuanyi mu dibeji 32]

Ka-lupingu ka nzambi-mukaji Terracotta, kavuabu bapete mu lukita kampanda mu Isalele

[Mêyi a dianyisha]

Foto mukuata ne dianyisha dia British Museum