Malu a mu nsombelu

‘Nempingajile Yehowa tshinyi?’

MALONDA KUDI MARIA KERASINIS

Pamvua ne bidimu 18, ngakafuisha baledi banyi bundu, bena dîku dietu bakambenga, ne mvua tshintu tshia kuseka mu musoko wetu. Bakansengelela, kungezejabu ku bukole ne kunkanyinabu mene bua kunyanga lulamatu luanyi kudi Nzambi, kadi buobu e kupangila. Mvua mushindike ne: dishala mulamate bulelela bua mu Bible divua ne bua kuntuadila masanka a mu nyuma. Pandi ntangila bidimu bipite pa 50 bindi muenzele Yehowa mudimu, ndi mua kuamba panyi bu mufundi wa misambu ne: ‘Nempingajile Yehowa tshinyi bua malu ende mimpe onso akungenzeleye?’​—Musambu 116:12.

NGAKALEDIBUA mu tshidimu tshia 1930 mu musoko wa Aggelokastro, uvua mutantshi wa kilometre bu 20 ne dibungu dia Cenchrées, ku luseke lua ku Est kua tshitupa tshia buloba tshidi tshilopoka mu mbuu (isthme) tshia mu Corinthe, muvuabu benze tshisumbu tshia bena Kristo balelela mu bidimu lukama bia kumpala.​—Bienzedi 18:18; Lomo 16:1.

Dîku dietu divua ne nsombelu wa ditalala. Tatu uvua mfumu wa musoko ne bavua bamunemeka bikole. Mvua muana muisatu wa mu bana batanu. Baledi betu bakatukolesha bua tuikale balondi ba tshisumi ba Ekeleziya wa bena Orthodoxe wa bena Grèce. Mvua nya mu misa Dia lumingu dionso. Mvua nsambila bua kulomba luse kumpala kua tupingu, mvua ntemesha buji mu tuzubu tua masambila tua mu musoko wetu ne mvua ngenza bijila bionso. Misangu ya bungi mvua ngela meji bua kulua mansere. Kadi pashishe, meme ke wakalua muntu wa kumpala mu dîku wakafuisha baledi banyi bundu.

Bulelela bua mu Bible budi bunsankisha

Pamvua ne bidimu bitue ku 18, ngakumvua ne: Katina, muanabu ne umue wa ku babukonde banyi, uvua musombele mu musoko mukuabu utuvua  nawu mutumba, uvua ubala mikanda ya Bantemu ba Yehowa ne katshivua uya kabidi ku nzubu wa nzambi to. Bualu ebu buakantonda bikole, nunku meme kupangadija bua kumuambuluisha bua kupinganaye ku tshimvua ngela meji ne: ke njila muimpe. Pakaluaye kututangila, ngakalongolola bua tuetu kuya kuendakana nende, ne lungenyi lua kupitshila kua nsaserdose. Nsaserdose au wakabanga muyuki ne malu mabi mapite avuaye wamba Bantemu ba Yehowa, ubabikila ne: batontolodi bavua bapambuishe Katina. Diyuki adi diakatungunuka munkatshi mua matuku asatu malondangane, butuku butuku. Katina wakatonkola mashimi ende onso ne bijadiki bilongolola bimpe bia mu Bible. Ndekelu wa bionso, nsaserdose wakamuambila ne: bu muvuaye nsongakaji wa mpala mulenga ne wa meji, uvua mua kuanji kusanka mu bunsonga buende patshivuaye ne mushindu ne pashishe kulua kutangila malu a Nzambi pavuaye ne bua kukulumpa.

Tshivua muambile baledi banyi bualu nansha bumue bua muyuki au, kadi mu Dia lumingu diakalonda, ngakabenga kuya ku nzubu wa nzambi. Munda munya, nsaserdose wakalua diakamue ku makazen kutuvua tupanyina bintu. Ngakamushima ne: mvua ne bua kushala bua kuambuluisha Tatu mu makazen.

Nsaserdose wakankonka ne: “Ke bualu bulelela buuvua kuyi muluile, anyi nsongakaji au mmukukoke?”

Meme kumuambila patoke ne: “Bantu abu badi ne malongesha mimpe kutupita.”

Nsaserdose ukudimuka utangila kudi tatu, wakamuambila ne: “Mukalenge Economos, ipata mulela webe eu kumbelu anu mpindieu; mmutue nzubu webe mudilu.”

Bena mu dîku dietu badi bankudimukila

Bualu ebu buakenzeka ku ndekelu kua bidimu bia 1940 pavua ditunga dia Grèce mu mvita mikole ya munda mua ditunga. Bu muvua Tatu utshina bua se: bena mvita bavua mua kunkuata, wakalongolola bua meme kumbuka mu musoko wetu bua kuya kusombela kua yayanyi mu musoko uvua Katina musombele. Munkatshi mua ngondo ibidi ingakashala mu musoko amu, bakangambuluisha bua kumvua tshidi Bible wamba bua malu a bungi. Ngakabungama bua kumona ne: malongesha a bungi a Ekeleziya wa bena Orthodoxe kaavua a mu Bible to. Ngakajingulula ne: Nzambi katu witaba ntendelelu wa mpingu to, ne se: bilele bishilashilangane bia bitendelelu bu mudi ditendelela nkuruse, kabivua bifumine mu Buena-Kristo to, ne se: muntu udi ne bua kutendelela Nzambi “mu nyuma ne mu bulelela” bua kumusankisha. (Yone 4:23; Ekesode 20:4, 5) Bualu bua mushinga menemene mbua se: ngakalonga ne: Bible udi upesha bantu ditekemena dilenga dia muoyo wa kashidi pa buloba! Malongesha malelela aa a mu Bible avua munkatshi mua masanka a kumpala angakapeta kudi Yehowa.

Pinapu, yaya ne bayende bakamona ne: tshivua ngenza tshimanyinu tshia nkuruse dîba dia kudia ne tshivua nsambila kabidi kumpala kua tupingu to. Dimue dituku butuku bonso babidi bakankuma. Dituku diakalonda ngakapangadika bua kumbuka kumbelu kuabu ne ngakaya kua mamu muakunyi. Bukonde buanyi wakafundila tatu. Matuku makese pashishe tatu wakalua ne binsonji ukeba bua kunshintulula lungenyi. Bukonde buanyi wakatua binu panshi kumpala kuanyi, undomba luse; meme kumufuila nalu. Bua kujikija tshilumbu, bakandomba bua kupingana mu ekeleziya, kadi ngakabenga ne muoyo umue.

Bakatungunuka ne kungela mutoyi pangakapingana mu musoko wa ba Tatu. Tshivua ne mushindu wa kupetangana ne Katina, ne tshivua ne mukanda nansha umue wa kubala, nansha Bible. Ngakumvua disanka dia bungi pakangambuluisha muana wa tatu mukulu. Pakayaye ku Corinthe, wakapetangana ne Ntemu mukuabu ne kuntuadilaye mukanda wa: “Que Dieu soit reconnu pour vrai!” ne Bible (tshitupa tshia Mifundu ya bena Kristo ya tshiena-Greke), meme kubanga kubibala mu musokoko.

Nsombelu udi ushintuluka mumvua tshiyi muelele meji

Buluishi bukole buakatungunuka munkatshi mua bidimu bisatu. Tshivua mpetangana ne Ntemu nansha umue to, ne tshivua mene mua kupeta mikanda nansha. Kadi tshivua mumanye ne: malu manene avua ne bua kushintulula nsombelu wanyi akavua pa kuenzeka to.

Tatu wakangambila ne: mvua ne bua kuya kudi manseba ku Thessalonique. Kumpala kua meme kuya ku Thessalonique, ngakaya mu kazubu kampanda muvuabu batelela bilamba mu Corinthe bua kuntelelabu nkotshi. Ngakapapuka bikole pangakasangana ne: Katina uvua wenzamu mudimu! Tuvua ne disanka dia bungi dia kumonangana kunyima kua matuku a bungi nunku. Patuvua tupatuka nende babidi mu kazubu ka ditelela  bilamba aku, tuakasambakena ne nsongalume mukuabu muimpe ufuma ku mudimu mutangile kumbelu pa dikalu. Dîna diende divua Charalambos. Kunyima kua tuetu bamane kumanyangana nende, tuakapangadika bua kuselangana. Kabidi, bivua mu tshikondo atshi, mu dia 9 a ngondo wa kumpala tshidimu tshia 1952, ke mungakatambula bua kuleja didilambula dianyi kudi Yehowa.

Charalambos ukavua mutambule kumpala. Yeye pende bena mu dîku diabu kabavua basue to. Charalambos uvua ne lukunukunu lua bungi. Uvua tshindondi tshia musadidi wa tshisumbu ne uvua ulombola malonga a Bible a bungi. Matuku makese panyima, batutuende bakitaba bulelela, ne lelu bana babu ba bungi ne mêku abu badi pabu bakuatshila Yehowa mudimu.

Tatu uvua munange Charalambos bikole, ke bualu kayi wakitaba bua ansele, kadi kabivua bipepele bua Mamu kuitabaye to. Nansha nanku, meme ne Charalambos tuakaselangana mu dia 29 a ngondo muisatu tshidimu tshia 1952. Anu tutuanyi wa kumpala ne muana wa tatu mukulu ke bakalua mu difesto dietu dia dibaka. Tshivuaku mumanye dîba adi ne: Charalambos uvua ne bua kulua dibenesha kadiyi kuelekeja, dipa dilelela dia kudi Yehowa nansha! Bu mumvua muena diende, ngakakokesha bua kuimanyikila nsombelu wanyi mujima pa mudimu wa Yehowa.

Tudi tukolesha bena Kristo netu mu nyuma

Mu tshidimu tshia 1953, meme ne Charalambos tuakapangadika bua kuya kusombela ku Athènes. Bu muvua Charalambos ne dijinga dia kuvudija mudimu wende wa buambi, wakalekela mudimu wa dîku diabu uvuaye wenza ne wakapeta mudimu wa mêba makese. Tuvua tuya nende mu buambi mu mapingaja ne tuvua tulombola malonga a Bible a bungi.

Tuvua ne bua kuikala ne mayele a bungi bualu bavua bakandike mudimu wetu kudi mbulamatadi. Tshilejilu, tuakapangadika bua kuteka tshibejibeji tshimue tshia Tshibumba tshia Nsentedi ku dididishi dia katanda katuvua tusumbishila bintu, munkatshi mua Athènes, muvua bayanyi wenzela mudimu wende wa mêba makese. Munene mukuabu wa bampulushi wakatuambila ne: bakavua bakandike tshibejibeji atshi. Kadi wakalomba bua tumupeshe tshibejibeji tshimue aye kuebeja bualu buatshi ku biro bia mbulamatadi bia malu a bupole. Pakamujadikilabu ne: tshibejibeji atshi katshivua tshikandika kudi mikenji, wakalua kutumanyisha bualu abu. Pakumvuabu bualu ebu kudi bana betu bakuabu bavua ne tutanda tua disumbishila bintu, bakatuadija pabu kuteka bibejibeji bia Tshibumba tshia Nsentedi ku madidishi a tutanda tuabu. Muntu mukuabu wakapetela Tshibumba tshia Nsentedi mu katanda ketu, kuluaye Ntemu, ne mpindieu udi mukulu mu tshisumbu.

Tuakapeta kabidi disanka dia kumona muakunyanyi wa balume wa mukala ulonga bulelela. Uvua mulue ku Athènes bua kulonga mu tshilongelu tshibandile tshia malu a mazuwa a mâyi a bangenda-mushinga, ne tuakaya nende mu mpungilu mukuabu. Tuvua tuenza mpungilu mu musokoko muitu. Wakananga malu akumvuaye, kadi matuku makese panyima wakabangisha kuenza ngendu. Luendu luende lukuabu luakamufikisha ku dibungu kampanda dia mu ditunga dia Argentine. Ku dibungu adi, misionere mukuabu wakabuela mu mazuwa a mâyi bua kuyisha, ne muakunyanyi wakamulomba bibejibeji bietu. Tuakumvua disanka ditudi katuyi mua kumvuija patuakapeta mukanda wende utuambila ne: “Ndi mupete bulelela. Ngenzelayi bua ngikale mpeta bibejibeji pa tshibidilu ku poste.” Lelu, yeye ne bena mu dîku diende badi benzela Yehowa mudimu ne lulamatu.

Mu tshidimu tshia 1958 bakalomba bayanyi bua kuenzaye mudimu wa mutangidi wa tshijengu. Bu muvuabu bakandike mudimu wetu ne nsombelu muikale mukole, batangidi bena ngendu bavua batamba kuenza mudimu kabayi ne bakaji babu. Mu ngondo wa dikumi tshidimu tshia 1959, tuakalomba bana betu bavua balombola mudimu ku filiale  bingikala mvua mua kuikala nya kumufila. Bakitaba. Tuvua ne bua kukumbula ne kukolesha bisumbu bia mu tshitupa tshia munkatshi ne tshia ku Nord kua Grèce.

Ngendu ayi kayivua mipepele to. Kuvua anu njila mikese ivua ne kabudimbua. Bu mutuvua katuyi ne etu mashinyi, pa tshibidilu tuvua tubuela mu mashinyi avua ambula bantu anyi avua ambula majitu, tubuelamu ne nzolo ne bintu bikuabu bia kupanyisha. Tuvua tuvuala bikumba bua kumona mua kuenda mu njila ya bitotshi. Bu muvua mu musoko wonso muikale basalayi, tuvua ne bua kubuela mu misoko butuku bua kuepuka dituela nkonko.

Bana betu bavua banyisha makumbula bikole. Nansha muvua ba bungi ba kudibu benza mudimu mukole ku madimi abu, bavua benza bukole buabu buonso bua kubuela mu bisangilu bivua bienzeka ku ma dilolo menemene mu nzubu mishilashilangane. Bana betu bavua kabidi bakididianganyi ne bavua batupesha bintu bimpe bivuabu nabi, nansha muvuabu anu ne tubintu tukese. Tuvua tulala imue misangu ne dîku dijima kaba kamue mu tshibambalu tshimue tshia nzubu. Ditabuja dia bana betu, ditantamana, ne lukunukunu luabu bivua kabidi disanka dikuabu dituakapeta.

Tudi tuvudija mudimu wetu

Mu ngondo muibidi wa tshidimu tshia 1961, patuvua baye kuendakana ku Betele ku Athènes, bakatuebeja bua kumanya ni tuvua mua kuitaba bua kuenza mudimu ku Betele. Tuakandamuna ne mêyi a Yeshaya a ne: ‘Ke meme eu, untume meme!’ (Yeshaya 6:8) Ngondo ibidi pashishe, tuakapeta mukanda batuambilamu bua kufika ku Betele pa lukasa. Nunku mu dia 27 a ngondo muitanu tshidimu tshia 1961, tuakabangisha kuenza mudimu ku Betele.

Tuvua banange bikole mudimu wetu mupiamupia eu, ne diakamue tuakibidilangana ne nsombelu wa ku Betele. Bayanyi uvua wenza mudimu mu tshibambalu tshia Mudimu ne tshia malu a abonema, ne pashishe wakenza mudimu bua matuku makese mu Komite wa Filiale. Mvua ne midimu ya bungi ya kuenza ku Betele. Dîba adi dîku dia Betele ditshivua anu ne bantu 18, kadi munkatshi mua bidimu bifike ku bitanu, bantu batue ku 40 bavua ku Betele bualu bavua benzelaku kalasa ka bakulu. Mu dinda, mvua nsukula malongo, ngambuluisha muanetu wa balume uvua ku tshikuku, ngadija malalu 12 ne ndongolola mêsa bua biakudia bia mu midi. Mu mapingaja, mvua nkoma bilamba, nsukula nkumba ne nkolopa mu nzubu ya diladila. Musangu umue ku lumingu mvua ngenza mudimu mu tshisukuidi tshia bilamba. Kuvua mudimu wa bungi, kadi mvua ne disanka dia kuambuluisha.

Tuvua tuenza mudimu wa buambi wa bungi be ku Betele. Misangu ya bungi tuvua tulombola malonga a Bible mafike ku muanda-mutekete. Ku ndekelu kua lumingu, mvua nya kufila Charalambos mu bisumbu bishilangane muvuaye uya kuenza miyuki. Tuvua anu babidi dîba dionso.

Tuakalonga Bible ne mulume mukuabu ne mukajende bavua balamate bikole Ekeleziya Orthodoxe wa bena Grèce ne bavua balunda ba nsaserdose uvua ulombola tshisumbu tshia bantu bavua balondakaja batontolodi ba ekeleziya. Mu nzubu muabu muvua nzubu mukuabu uvua muule tente ne tupingu, bavua buoshamu musenga wa manananshi dîba dionso ne bimbamu misambu ya nzambi dituku dijima. Munkatshi mua matuku ndambu, tuvua tuya kulonga nabu Bible mu Dinayi dionso, ne mulunda wabu nsaserdose au uvua ulua kubatangila mu Ditanu dionso. Dimue dituku, bakatulomba bua kuenza muetu muonso bua kuya kuabu bualu bavua batulamine bualu bua dikema. Tshintu tshia kumpala tshiakatulejabu tshivua nzubu au. Bavua bumushe tupingu tuonso tuvuamu ne bavua bamulongolole. Mulume eu ne mukajende bakadiunda mu nyuma ne kutambulabu. Tuvua ne disanka dia kumona bantu batue ku 50 batuvua balonge nabu Bible balambula mioyo yabu kudi Yehowa ne batambula.

Disomba ne bana betu bela manyi divua disanka dia pa buadi dimvua mupete. Dilua kutumona dia  bana betu ba mu Kasumbu Kaludiki, bu mudi muanetu Knorr, Franz ne Henschel divua ditukolesha bikole. Kunyima kua bidimu bipite pa 40, ntshidi mmona ne: kuenza mudimu ku Betele ndumu ne diakalenga dinene.

Disama ne lufu lua bayanyi

Mu 1982 bayanyi wakabanga kuleja bimanyinu bia disama dia Alzheimer. Patuakafika mu 1990 mubidi wende wakateketa bikole ne disama, ne ndekelu wa bionso biakalomba bua kuikala kumulama dîba dionso. Munkatshi mua bidimu muanda-mukulu bia ndekelu bia muoyo wende, katuvua mua kumbuka ku Betele to. Bana betu bananga ba bungi ba ku Betele ne batangidi bavua balombola mudimu bakalongolola bua kutuambuluisha. Kadi nansha muvuabu batuambuluisha ne dinanga, mvua ne bua kuenza mêba a bungi munya ne butuku bua kumulama. Nsombelu uvua mukole menemene misangu mikuabu, ne mvua ngenza matuku a bungi tshiyi ndala butuku.

Mu ngondo wa muanda-mutekete wa tshidimu tshia 1998, bayanyi munanga wakafua. Nansha mundi mujinga bikole, ndi mukole ku muoyo pandi mvuluka ne: Yehowa mmumulame, ne ndi mumanye ne: Yehowa neamuvuluke ne bantu bakuabu ba bungi pabishaye bafue.​—Yone 5:28, 29.

Ndi ne dianyisha bua masanka a kudi Yehowa

Nansha mundi mufuishe bayanyi, tshiena nkayanyi to. Ntshidi anu ne diakalenga dia kuenza mudimu ku Betele, ne mbannange ne bandame bimpe kudi dîku dijima dia Betele. Dîku dianyi dinene didi dikonga bana betu ba mu nyuma balume ne bakaji ba mu ditunga dijima dia Grèce. Nansha munkadi ne bidimu bipite pa 70 mpindieu, tshitshidi ne bukole bua kuenza mudimu matuku onso kubangila ku dinda too ne dilolo ku tshikuku ne mu nzubu wa tshidilu.

Mu 1999, bualu bumvua mmona bu tshilota buakakumbana pangakaya kuendakana ku biro bidi bilombola mudimu wa Bantemu ba Yehowa pa buloba bujima mu New York. Tshiena mua kumvuija mungakumvua to. Buvua bualu buvua bunkoleshe be ne bundi tshiyi mua kupua muoyo.

Pandi ntangila panyima, ndi ngitaba ne muoyo mujima ne: tshivua mua kuikala muenze mudimu ne muoyo wanyi mu mushindu mutambe buimpe. Mudimu mutambe bulenga udi muntu mua kuenza ngua kuenzela Yehowa mudimu ku dîba ne ku dîba. Ndi ngamba ne dishindika dionso ne: tshitu muanji kupangila tshintu nansha tshimue. Yehowa wakatulama bimpe meme ne bayanyi mu nyuma ne ku mubidi. Bua malu andi mudimuene nkayanyi, ndi njingulula tshivua mufundi wa Misambu mukonkele ne: ‘Nempingajile Yehowa tshinyi bua malu ende mimpe onso akungenzeleye?’​—Musambu 116:12.

[Tshimfuanyi mu dibeji 26]

Meme ne Charalambos tuvua anu bu mukaba ne tshilamba

[Tshimfuanyi mu dibeji 27]

Bayanyi mu biro biende ku Betele

[Tshimfuanyi mu dibeji 28]

Ndi mmona ne: kuenza mudimu ku Betele ndiakalenga dinene