Tshitubu bayila mu nzambi

“DITUNGA dia Corée wa ku Sud didi mpindieu ne bena mishonyi bapite ba mu ditunga dia États-Unis misangu mitue ku inayi.” Mêyi aa avua mu tshikandakanda tshia Newsweek avua ne bua kuikala makemeshe babadi ba bungi, bualu bantu bavule batu bela meji ne: Corée nditunga dia bena Confucius ne bena Bouddha. Lelu, muntu yeye muye mu Corée neasangane bitanda bia bantu badi badiamba bena Kristo bia bungi, bimanyikila pa tshibidilu ku nkuruse mikenkesha ne midilu mikunze. Mu ma Dia lumingu, pa tshibidilu tutu tumona bantu babidi babidi anyi basatu basatu baya mu nzambi ne Bible ku bianza. Bilondeshile nkonko kampanda ivuabu bele bantu mu 1998, bena mu Corée batue ku 30 pa 100 batu baya mu ekeleziya wa bena Katolike anyi wa bena Mishonyi, bungi bupite bua aba badi badiamba bena Bouddha.

Lelu wa ndaya eu, katutshitu tumona bantu bungi nunku baya pa tshibidilu mu bitanda bia nzambi miaba mikuabu. Pabi kabiena bienzeka anu mu Corée nkayamu to, kadi bidi kabidi bienzeka ne mu matunga makuabu a mu Asia, mu Afrike ne mu Amerike wa ku Sud. Bua tshinyi bantu bapite bungi nunku badi bamba mudibu bitabuja Nzambi padi lelu dilengulula malu a bitendelelu dimueneka dienda ditangalaka pa buloba? Bua tshinyi badi baya mu nzambi?

Mandamuna a nkonko ivuabu bele bamue bantu basungula akaleja ne: tshia-bibidi tshia bena mu Corée batu baya mu nzambi batu bayamu bua kukeba ditalala dia mu mutshima; bantu batue ku tshia-bisatu mbatekemene muoyo wa tshiendelele panyima pa lufu luabu; ne muntu umue pa dikumi yeye udi ukeba makanda a mubidi, bubanji ne diakalengele.

Bantu ba bungi ba mu ditunga dia Chine batu batshimukila mu bitanda bia nzambi ne ditekemena dia kupetamu tshintu kampanda tshia kupingaja pa muaba wa mu nyuma uvua mushale mutupu pavua ngenyi ya ba-kapitaliste yenda ipingana ku kakese ku kakese pa muaba wa ya ba-koministe. Ku tshidimu tshionso, badi bapatula ne babanya Bible miliyo ne miliyo mu Chine, ne bantu badi bamueneka bamubala anu muvuabu babala kakanda kakunze ka Mao.

Bamue bena Katolike ba mu ditunga dia Brésil, nangananga bansonga, kabena basanka bua dilaya dia kupeta disanka mu matuku atshilualua, mbasue bua dilaya adi dikumbane anu mpindieu. Tshikandakanda tshia  Tudo tshidi tshiamba ne: “Bikala mu bidimu bia 1970 dilongesha dia dipikula ke divua dilenge mitshima ne ngenyi ya bantu, lelu ndilongesha dia dikasa dimpe.” Bakalomba bantu bavuabu bele nkonko mu ditunga dia Grande-Bretagne bavua baya mu bitanda bia nzambi bua kutelabu bualu bumue buvuabu banangile tshitendelelu tshiabu. Ba bungi bakatela buwetu pa muaba wa kumpala.

Bionso ebi bidi bileja ne: patshidi bantu ba bungi batungunuka ne kuitabuja Nzambi, bavule badi baditatshisha nangananga bua bintu bidibu mua kupeta mpindieu kupita bua bidibu mua kupeta mu matuku atshilualua, anyi mene bua Nzambi nkayende. Buebe wewe mbualu buimpe kayi butudi ne bua kuitabujila Nzambi? Ntshinyi tshidi Bible utuambila bua bualu ebu? Neupete diandamuna mu tshiena-bualu tshidi tshilonda.