Bena mu dîku dia ba Yezu bavua banganyi?

MU MIABA ya bungi pa buloba tutu tumona mu ngondo wa dikumi ne muibidi benzeja manaya a Yezu muana mutekete bamukuba kudi mamuende Mariya ne tatuende mudishi Yosefe. Manaya aa atu mene mua kukoka ne bantu badi kabayi bena Kristo. Bu mudiwu mimanyine pa Yezu, Bible udi utuambila tshinyi bua dîku diabu patshivuaye pa buloba?

Yezu uvua mukolele mu dîku dia dikema. Uvua muledibue kudi mukaji utshivua kamama: diende Mariya, nunku ke kuluaye wa mu dîku dietu bia bantu edi. Bilondeshile Bible, bavua basambuluje muoyo wende kumbukila mu diulu ne kuwela mu difu dia Mariya ku bukole bua nyuma muimpe. (Luka 1:30-35) Kumpala kua kabayi banji kumanyisha tshishima tshia dimitshibua dia Yezu, Mariya ukavua mubangila wa Yosefe eu wakalua tatu mudishi wa Yezu.

Kunyima kua diledibua dia Yezu, Yosefe ne Mariya bakalela bakunyi bakuabu ba Yezu, balume ne bakaji. Bidi nanku patudi tutangila lukonko luvua bena mu Nazaleta bele bua bualu bua Yezu ne: ‘Yeye kêna muana wa muena mabaya anyi? Kabena babikila mamuende ne: Mariya anyi? Bana babu ba balume Yakobo ne Yosefe ne Simona ne Yuda; ne bana babu ba bakaji, kabena munkatshi muetu, buonso buabu anyi?’ (Matayo 1:25; 13:55, 56; Mâko 6:3) Nunku tudi mua kuamba ne: dîku dia ba Yezu divua dienza ne baledi bende, bakunyi bende ba balume banayi ne ba bakaji babidi anyi bapite ba babidi.

Kadi lelu’eu, bamue bantu kabatu bitaba ne: bakunyi ba Yezu bavua bana ba Yosefe ne Mariya to. Bua tshinyi? Tshibungu tshikuabu tshidi tshiamba ne: “Katshia anu ku ntuadijilu, Ekeleziya wakalongesha ne: Mariya wakashala anu kamama. Nunku, bilondeshile dilongesha edi, kakuena mua kuikala dielakana dia se: Mariya kavua mulele bana bakuabu to.” (New Catholic Encyclopedia) Tshibungu tshimue tshimue etshi tshidi tshiamba ne: miaku “muanabu wa balume” ne “muanabu wa bakaji” idi mua kuleja “muntu anyi bantu kampanda badi mu buobumue mu ntendelelu anyi malanda makuabu” peshi balela kampanda, pamu’apa bana ba bana babu ne Mariya anyi Yosefe.

Ke mudibi menemene anyi? Nansha bamue bena teoloji ba bena Katolike badi babenga dilongesha dia Ekeleziya edi, bamba ne: Yezu uvua ne bakunyi bende ba balume ne ba bakaji ba ku mubidi, bavuabu bapatuke nabu mu difu dimue. John Paul Meier, mulombodi wa kale wa tshisumbu kampanda (Catholic Bible Association of America) wakafunda ne: “Pa kumusha dienza mudimu mu mipinganyi mu Dipungila Dipiadipia ne muaku [wa mu tshiena-Greke] adelphos [udi umvuija muanabu ne muntu], bua kuleja malanda adi pankatshi pa bantu, muaku eu udi umvuija malanda adi pankatshi pa bana badi baledibue kudi baledi bamue anyi kudi muledi umue, ne kakuena diumvuija dikuabu to.” * Bushuwa, Mukanda wa Nzambi udi wamba ne: Yezu uvua ne bakunyi bende ba balume ne ba bakaji, bana balela kudi Yosefe ne Mariya.

Evanjeliyo idi itela balela bakuabu ba Yezu, kadi bua mpindieu tuanji tuakula bua bena mu dîku dia ba Yezu ne tumone tshitudi mua kulongela kudibu.

[Mêyi adi kuinshi]