Nkonko ya babadi

Mu disambila diende dia tshilejilu, Yezu uvuaku musue kumvuija ne: disua dia Nzambi divua dienzeka mu diulu nansha muvuabu kabayi banji kuipatamu banjelu babi anyi?

Anu mudibu bafunde mu Matayo 6:10, Yezu wakamba ne: ‘Benze pa buloba muudi musue bu mudibu benza mu diulu.’ Dilomba edi didi mua kumvuika mishindu ibidi. Wa kumpala: uvua ulomba bua disua dia Nzambi dienzeke pa buloba bu mukavuadi dienzeka mu diulu. Muibidi: uvua ulomba bua disua edi dienzeke tshishiki mu diulu ne pa buloba. * Diumvuija dia mêyi a Yezu adi kumpala a se: ‘Bukalenge buebe bulue,’ didi dileja ne: ngumvuilu muibidi eu udi upetangana bikole ne Bible. Ne didi dileja nsombelu uvuaku pavua Yezu pa buloba ne uvuaku munkatshi mua tshikondo tshile tshiakalonda. Bua tshinyi tudi tuamba nanku?

Mukanda wa Buakabuluibua udi wakula bua malu abidi mashilangane akenzeka pakajadikabu Bukalenge bua Nzambi mu diulu. Bua kumpala budi butangila diulu nkayadi, ne buibidi budi butangila buloba. Buakabuluibua 12:7-9, 12 udi wamba ne: ‘Mvita minene yakadi mu diulu: Mikaele ne banjelo bende bakaya kuluangana mvita ne dragon; ne dragon ne banjelo bende bakaluangana nabu; ne kabakabapita bukole, ne kabakasangana muaba wabu mu diulu. Dragon munene wakedibua panshi, nyoka au wa kale, yeye udi muidikibue ne: Diabolo ne Satana, mudingi wa ba pa buloba bonso; wakedibua panshi pa buloba, ne banjelo bende bakedibua nende panshi. Nunku, sankayi bienu, muulu ne nuenu badi bashikamamu. Mulawu wikale pa buloba, ne kudi mâyi manene, bualu bua Diabolo wakupueka kunudi, muikale ne tshiji tshikole, mumanye ne: udi ne musangu muipi.’

Dipata dia Satana ne ba-demon bende mu diulu panyima pa tshidimu tshia 1914 tshimane kutuadija diakambuluisha bua kumbushamu banjelo bonso batomboke, kufiladi disanka divule kudi banjelo ba Yehowa, bavua baleja tshibungi tshia bifukibua biende bia mu nyuma. (Yobo 1:6-12; 2:1-7; Buakabuluibua 12:10) Ke bualu kayi, dilomba didi mu disambila dia Yezu dia tshilejilu diakakumbana pa bivua bitangila diulu. Bonso bavua bashale mu diulu amu bavua balamate Yehowa ne bavua bakokela bumfumu buende tshishiki.

Tudi ne bua kuamba kushindika ne: nansha kumpala kua bualu abu, patshivua banjelo babi bikale ne budikadidi bua kubuela mu diulu, bakavua babipate mu dîku dia Nzambi ne babakandike amue malu masunguluke. Tshilejilu, Yuda 6 udi uleja ne: kuonso aku mu bidimu lukama bia kumpala mu bikondo bietu ebi, banjelo babi aba bakavua ‘balama mu nkanu ya tshiendelele mu mîdima [ya mu nyuma] too ne palua dituku dinene dia dilumbuluisha.’ Bia muomumue, 2 Petelo 2:4 udi wamba ne: ‘Nzambi [kavua] muengeleke banjelu pakenzabu bibi, kadi wakabela mu Ngena [dipuekeshibua milongo bikole] ne wakabafila mu nyongolo ya mîdima [ya mu nyuma], bua balamibuemu too ne ku dibalumbuluisha diabu.’ *

Bishilangane ne dipatshibua diabu patshivuabu mu diulu, banjelu babi aba batu ne bukokeshi bua  bungi pa buloba. Bushuwa, Dîyi dia Nzambi didi dibikila Satana ne: “mukokeshi wa buloba ebu,” ne didi dibikila ba-demon ne: “bamfumu ba mîdima ba buloba ebu.” (Yone 12:31; Efeso 6:11, 12; 1 Yone 5:19) Bu muvuaye ne bukokeshi, Diabolo wakalaya bua kupesha Yezu ‘makalenge onso a pa buloba ne butumbi buawu’ pavuaye wenza bualu bumue patupu bua kumukukuila. (Matayo 4:8, 9) Bulelela, padi Bukalenge bua Nzambi ‘bulua’ pa buloba, nebushintulule malu a bungi.

‘Dilua’ dia Bukalenge bua Nzambi nedivuije bintu bionso bipiabipia pa buloba apa. Bukalenge abu nebutshibule makokeshi onso a bantu ne buobu nebulue mbulamatadi umuepele wa pa buloba. Kabidi, bantu badi batshina Nzambi nebikale ‘buloba bupiabupia.’ (2 Petelo 3:13; Danyele 2:44) Bukalenge ebu nebujikije kabidi mpekatu mu bantu bena butumike ne ndekelu wa bionso nebuvuije buloba bujima mparadizu, nunku nebumbushe tshifundu tshionso tshia bukokeshi bua Satana.​—Lomo 8:20, 21; Buakabuluibua 19:17-21.

Ku ndekelu kua Bukokeshi bua Bidimu Tshinunu, pikala Bukalenge bua Masiya bumane kukumbaja malu avua Nzambi musue bua buenze, ‘Muana muine kabidi neatekibue muinshi mua Tatu wakateka bintu bionso muinshi muende, bua Nzambi kuikala ku mutu kua bionso ne mu bintu bionso.’ (1 Kolinto 15:28) Pashishe nekuikale diteta dia ndekelu, kunyima kuadi, Satana, ba-demon bende ne bantu bonso bantomboji bikalabu bapambuisha nebabutudibue kashidi mu ‘lufu luibidi.’ (Buakabuluibua 20:7-15) Panyima apu, bifukibua bionso bia lungenyi bidi mu diulu ne bidi pa buloba nebikokele ne disanka bumfumu bulenga bua Yehowa kashidi ne tshiendelele. Mu mishindu yonso, au ke mushindu mujima wakumbana mêyi a Yezu a mu disambila dia tshilejilu.​—1 Yone 4:8.

[Mêyi adi kuinshi]