‘Dîyi diabu diakamuangalaka pa buloba bujima’

‘Nuvuije ba bisamba bionso bayidi, nubabatize mu dîna dia Tatu ne mu dia Muana ne mu dia nyuma muimpe.’​—MATAYO 28:19.

1, 2. (a) Mmudimu kayi uvua Yezu mupeshe bayidi bende? (b) Bua tshinyi bena Kristo ba kumpala bakafika ku dienza mudimu bikole?

 MATUKU makese kunyima kua dibanda dia Yezu mu diulu, wakapesha bayidi bende mudimu. Wakabambila ne: ‘Nuvuije ba bisamba bionso bayidi, nubabatize mu dîna dia Tatu ne mu dia Muana ne mu dia nyuma muimpe.’ (Matayo 28:19) Uvua mudimu mukole be!

² Anji kuelabi meji! Mu Pentekoste wa tshidimu tshia 33 bikondo bietu ebi, bayidi batue ku 120 bakapeta nyuma muimpe e kudituabu mu diambila bantu ne: Yezu ke Masiya uvuabu batekemene katshia ku kale; ne anu yeye ke uvua mua kubapetesha lupandu. (Bienzedi 2:1-36) Mmunyi muvua kasumbu kakese aka mua kuyisha bantu “ba bisamba bionso”? Bua mu lumvu lua bantu, kabivua mua kuenzeka to, kadi “Nzambi udi mumanye mua kuenza malu onso.” (Matayo 19:26) Nyuma wa Yehowa uvua wambuluisha bena Kristo ba kumpala ne bavua ne lukunukunu. (Zekâya 4:6; 2 Timote 4:2) Ke bualu kayi anu kunyima kua bidimu bikese tshianana, Paulo uvua mua kuamba ne: bakavua bayisha lumu luimpe ‘munkatshi mua bifukibua bionso muinshi mua diulu.’​—Kolosayi 1:23.

3. Tshiakabuikila ‘mponda’ anyi bena Kristo balelela ntshinyi?

³ Ntendelelu mulelela wakatungunuka ne kumuangalaka munkatshi mua matuku mavule mu bidimu lukama bia kumpala. Kadi Yezu uvua mulaye ne: tshikondo tshivua ne bua kulua tshivua Satana ne bua kukuna ‘lupele’ bua kufimpakaja bena Kristo balelela anyi ‘mponda’ munkatshi mua bidimu nkama ne nkama too ne ku dîba dia dinowa. Ke tshiakenzeka kunyima kua lufu lua bapostolo.​—Matayo 13:24-39.

Divula dia lukasa lelu

4, 5. Bena Kristo bela manyi bakaditua mu mudimu kayi kutuadijila mu tshidimu tshia 1919? Kadi bua tshinyi tshivua mudimu mukole?

⁴ Mu tshidimu tshia 1919 ke muvua bena Kristo ba bushuwa (mponda) ne bua kuditapulula ne ‘lupele.’ Bena Kristo bela manyi bavua bamanye ne: bivua bikengela kuenza anu mudimu munene uvua Yezu mufile. Bavua bashindike bimpe se: bavua mu ‘matuku a ku nshikidilu’; nenku bavua bavuluke mulayi wa Yezu eu wa ne: ‘Nebambile bantu bonso ba pa buloba lumu luimpe elu lua bukalenge buanyi, neluikale tshimanyishilu ku bisamba bionso; pashishe, nshikidilu nealue.’ (2 Timote 3:1; Matayo 24:14) Eyowa, bavua bamanye ne: kuvua mudimu wa bungi wa kuenza.

⁵ Kadi anu bu bayidi ba mu tshidimu tshia 33 bikondo bietu ebi, bena Kristo bela manyi bavua ne mudimu wa bungi wa kuenza. Bavua anu binunu bikese mu matunga makese tshianana. Mmushindu kayi uvuabu mpindieu mua kufika ku diyisha ‘bantu bonso ba pa buloba’? Tuvulukayi ne: bungi bua bantu buvua pamu’apa miliyo 300 mu tshikondo tshia Kaisa, kadi  buakavula kufika ku miliyare 2 kunyima kua mvita ya kumpala ya buloba bujima. Kabidi, mu bidimu bia 1900 bionso bantu bavua benda bavula ne lukasa luonso.

6. Mmushindu kayi ukavua lumu luimpe luyishibue mu bidimu bia 1930?

⁶ Kadi basadidi ba Yehowa bela manyi anu bu bana babu ba mu bidimu lukama bia kumpala, badi baditua mu mudimu uvua mubindile bikale ne dieyemena dikole kudi Yehowa, ne kabidi nyuma wa Nzambi uvua nabu. Munkatshi mua bidimu bia 1930, bantu batue ku 56 000 mu matunga 115 bavua bayisha evanjeliyo. Bakavua benze mudimu muvule, kadi utshivuaku kabidi wa bungi.

7. (a) Mbualu kayi bukole buakapeta bena Kristo bela manyi? (b) Mmunyi mudi mudimu wa diyisha muye kumpala ne diambuluisha dia ‘mikoko mikuabu’ too ne lelu’eu?

⁷ Kadi dimanya bimpe diumvuija dia “musumba munene” udibu batela mu Buakabuluibua 7:9 diakakolesha malu ne diakaleja kabidi bena Kristo abu diambuluisha divua dilua. (Mukanda wa Mvidi Mukulu [Katolike, MMM]) Bavua ne bua kusangisha tshisumbu tshia ‘mikoko mikuabu’ bungi tshianana ivua ne ditekemena dia kuikala ne muoyo pa buloba. Bantu abu bavua “ba mu bisamba bionso, ba mu bisa bionso, matunga ne miakulu yonso.” (Yone 10:16) Bavua ne bua ‘kukuatshila [Yehowa] mudimu munya ne butuku.’ (Buakabuluibua 7:15) Abi bidi biumvuija ne: bavua ne bua kuditua pabu mu mudimu wa diyisha ne dilongesha. (Yeshaya 61:5) Bua bualu ebu, bena Kristo bela manyi bakasanka bikole pakamonabu bamanyishi ba lumu luimpe balua binunu ne binunu ne miliyo mivule pashishe. Tshilejilu, mu tshidimu tshia 2003, kuvua bantu 6 429 351 bavua bayishe ne ba bungi ba kudibu bavua bena mu musumba munene. * Bena Kristo bela manyi badi ne dianyisha padibu babambuluisha nunku; mikoko mikuabu idi isanka mudiyi itua bana babu aba mpanda.​—Matayo 25:34-40.

8. Nntshinyi tshiakenza Bantemu ba Yehowa pavuabu babakengesha mu mvita mibidi ya buloba bujima?

⁸ Pakamueneka tshiakabidi kasumbu ka mponda, Satana wakatuadija kukaluisha bikole. (Buakabuluibua 12:17) Kadi wakenza tshinyi pakamonaye musumba munene? Wakumvua tshiji tshibi be! Tudiku mua kuelakana bua kuamba ne: yeye ke uvua mukebeshe diluisha divuabu baluisha ntendelelu mulelela tshikondo tshia mvita mibidi ya buloba bujima anyi? Bakakengesha bena Kristo bikole mu matunga a nseke yonso ibidi avua mu mvita ayi. Bakakengesha bana betu ba bakaji ne ba balume bavule, bakashipa ne bakuabu. Nansha nanku, bakalonda mêyi a kangimba aa: “Ndi ntumbisha [Nzambi] bua bivuaye mulaye. Pandi mmutekemena, tshiena ntshina tshintu. Tshidi muntu mua kungenzela ntshinyi?” (Musambu 56:4, MMV; Matayo 10:28) Nyuma wa Yehowa wakakolesha bena Kristo bela manyi ne mikoko mikuabu, buobu kushala bimane tendee pamue. (2 Kolinto 4:7) Ke bualu kayi ‘dîyi dia Nzambi diakadiundadiunda.’ (Bienzedi 6:7) Pakabanga mvita mu tshidimu tshia 1939, bena Kristo ba lulamatu 72 475 bakafila luapolo lua mudimu wa buambi. Pabi mu tshidimu tshia 1945, tshidimu tshiakajika mvita, Bantemu ba tshisumi 156 299 bakafila luapolo lua mudimu wabu wa kumuangalaja kua lumu luimpe bavua anu bamue bantu bavua bayishe. Satana uvua mupangile bualu menemene!

9. Ntulasa kayi tupiatupia tuvuabu bunzulule mu tshikondo tshia Mvita Mibidi ya buloba bujima?

⁹ Bidi bimueneka patoke ne: nansha muvua malu manyanguke bikole bua mvita mibidi ya buloba bujima, basadidi ba Yehowa bavua bamanya anu ne: bivua bikengela kuyisha. Mene mu tshidimu tshia 1943 pakavua mvita itua ipela, bakunzulula tulasa tubidi tupiatupia. Kamue  kavua kenzekela mu bisumbu bionso bua kuambuluisha Ntemu yonso bua kumanya mua kuyisha ne kuvuija bantu bayidi: badi bakabikila lelu ne: Kalasa ka Mudimu wa Nzambi. Kakuabu kadibu babikila ne: Tshilongelu tshia Bible tshia Watchtower tshia Gilada, kavua kambuluisha ba-misionere bua kumona mua kuya kuyisha mu matunga a ku ba bende. Pakajika mvita, bena Kristo balelela bavua anuku bua kuyisha.

10. Mmunyi muvua tshisumi tshia basadidi ba Yehowa tshimueneke mu tshidimu tshia 2003?

¹⁰ Mudimu kayipu mulenga uvuabu benze! Kalasa ka Mudimu wa Nzambi nkambuluishe bakulumpe ne bana, baledi ne bana babu, ne nansha balema bua kukumbaja mudimu munene uvua Yezu mufile. (Musambu 148:12, 13; Yoele 2:28, 29) Tshilejilu, mu tshidimu tshia 2003, muayene wa bantu 825 185 bavua baleje muvuabu ne lukunukunu pa kuenza mudimu wa bumpanda-njila (bua tshitupa tshîpi anyi bua matuku a bungi). Bantemu ba Yehowa bavua bapitshishe mêba 1 234 796 477 mu diambila bantu mukenji mulenga wa Bukalenge. Kakuyi mpata, Yehowa udi usanka bua tshisumi tshidi natshi bantu bende!

Ku ba-bende

11, 12. Fila bilejilu bidi bijadika mudi ba-misionere benze mudimu muimpe.

¹¹ Balongi ba Gilada (munkatshi mua bidimu bivule) ne balongi ba Kalasa ka Dilongesha Mudimu (matuku adi panshi aa) mbenze malu a kukema. Tshilejilu, pakafika ba-misionere ba kumpala mu ditunga dia Brésil mu tshidimu tshia 1945, kuvua anu bamanyishi 400. Ba-misionere abu ne bakuabu bakalua pashishe ne bana betu ba tshisumi ba mu Brésil bakenza mudimu mukole, Yehowa e kubenesha mudimu wabu bikole. Kabiena bisankisha muntu yonso padiye umona ne: bantu 607 362 bavua bafile luapolo lua mudimu mu tshidimu tshia 2003 anyi?

¹² Tuangatayi tshilejilu tshia ditunga dia Japon. Kumpala kua mvita mibidi ya buloba bujima, kuvua bamanyishi ba Bukalenge batue ku lukama patupu mu Japon. Mu tshikondo tshia mvita, bakashipa bamue bungi buabu e kukepela, kuenzabi bua ne: ku ndekelu kua mvita kushale anu Bantemu bakese bavua ne muoyo mu nyuma ne ku mubidi. (Nsumuinu 14:32) Bantemu bakese ba lulamatu, ba disanka ne bakididianganyi aba bakasanka bikole pakalua ba-misionere 13 bavua balonge mu Gilada mu tshidimu tshia 1949. Bidimu 50 pashishe (mu tshidimu tshia 2003), bamanyishi 217 508 bavua bafile luapolo mu Japon! Kakuyi mpata, Yehowa mmubeneshe bikole bantu bende mu ditunga edi. Malu a mushindu eu mmenzeke kabidi mu matunga makuabu a bungi. Aba badi bayisha ku ba-bende, mbenze ne: mudimu wa kuyisha uya kumpala, kuenza bua ne: mu tshidimu tshia 2003, lumu luimpe luyishibue mu matunga manene ne makese 235. Eyowa, musumba munene udi ufumina mu “matunga onso.”

‘Ba bisamba bionso, ba bisa bionso, ne miakulu yonso’

13, 14. Mmu mushindu kayi muvua Yehowa muleje mushinga wa kuyisha lumu luimpe mu “miakulu yonso”?

¹³ Tshishima tshia kumpala tshiakenza bayidi pakapetabu nyuma muimpe mu tshidimu tshia 33 bikondo bietu ebi tshivua tshia kuakula miakulu ne misumba ya bantu. Bantu bonso bakabateleja, bavua mua kuikala bamanye tshiena-Greke (muakulu uvuabu bakula mu matunga a bungi). Bu muvuabu kabidi “banemeki ba [Nzambi],” bavua mua kuikala bumvua tshiena-Ebelu tshivuabu bakula ku ntempelo. Kadi bakumvua dijinga dia kuteleja bikole pakumvuabu lumu luimpe mu miakulu yabu ya ku dibele.​—Bienzedi 2:5, 7-12, MMM.

¹⁴ Lelu’eu kabidi badi bayisha mu miakulu ya  bungi. Bavua balaye ne: musumba munene kawakufumina anu mu matunga to, kadi kabidi mu ‘bisamba, bisa ne miakulu.’ Mu diumvuanga ne muanda eu, Yehowa wakafila mulayi eu ku butuangaji bua Zekâya: “Diba adio, bantu dikumi ba mu bisamba bidi biakula miakulu mishilangane, nebakuate muena Yuda umue ku luzembe lua tshilamba, bamuambila ne: ‘Tudi basue kuya nebe, bualu tudi bumvue ne: [Nzambi] udi nenu.’” (Zekâya 8:23, MMM) Nansha mudi Bantemu kabayi ne tshipedi tshia kuakula mu miakulu, mbamanye buimpe bua kulongesha bantu mu miakulu yabu.

15, 16. Ba-misionere ne bakuabu bantu bavua benze tshinyi bua kuyisha mu miakulu ya miaba ivuabu basombele?

¹⁵ Eyowa, lelu’eu kudi miakulu idi mimanyike bikole pa buloba bu mudi: Anglais, Mfualansa ne tshiena-Espagne. Kadi badi bumuke kuabu baye ku ba-bende bua kuyisha badi balonga miakulu ya muaba udibu bua kupetesha bantu “bavua badilongolole bimpe bua muoyo wa kashidi” lumu luimpe. (Bienzedi 13:48, NW) Bidi mua kuikala bikole. Tshilejilu, pavua bana betu ba mu tshidiila tshia Tuvalu (ku Sud kua Mbuu wa Pasifike) bakeba mikanda ya mu muakulu wabu, muanetu misionere kampanda wakajinga kubambuluisha. Bua muvuaku kakuyi nkonga-miaku mu muakulu wa Tuvalu, wakabanga kusangisha miaku muaba umue. Kunyima kua matuku bakapatula mukanda wa Udi mua kuikala ne muoyo wa kashidi pa buloba bukudimuna mparadizu. * Pakafika ba-misionere mu Curaçao, mikanda idi yakula malu a Bible ne nkonga-miaku kabivuaku mu muakulu wa Papiamento nansha. Kuvua dikokangana pa mushindu wa kufunda muakulu eu. Nansha nanku, kunyima kua bidimu bibidi pa difika dia ba-misionere, trakte ya kumpala ya malu a Nzambi yakapatuka. Lelu’eu, Papiamento ng’umue wa ku miakulu 133 idi ipatula Tshibumba tshia Nsentedi musangu umue ne Anglais.

¹⁶ Ba-misionere ba kumpala bakafika mu ditunga dia Namibie kabakapeta Bantemu bavua mua kubambuluisha bua kukudimuna mikanda to. Tshikuabu tshintu: Nama, muakulu umue wa ku miakulu ya mu ditunga edi kawena ne imue miaku bua kumvuija miaku bu mudi: “bupuangane.” Misionere kampanda udi wamba ne: “Bua kukudimuna, mvua ngenza mudimu ne balongeshi ba mu tulasa bavua balonga Bible. Bu muvuabu ne dimanya dikese dia bulelela, mvua nsomba nabu bua kujadika bikala tshiambilu tshionso tshijalame.” Nansha nanku, bakakudimuna trakte wa Nsombelu wa ditalala mu bulongolodi bupiabupia mu miakulu inayi ya mu Namibie. Lelu’eu, badi bapatula pa tshibidilu Tshibumba tshia Nsentedi mu muakulu wa Kwanyama ne wa Ndonga.

17, 18. Mbualu kayi bukole budibu baluangana nabu mu Mexique ne mu matunga makuabu?

¹⁷ Tshiena-Espagne ke muakulu munene wa mu Mexique. Kadi kumpala kua bantu bavua  bafumina mu Espagne kufika, kuvua miakulu ya bungi, ne imue batshidi bayakula too ne lelu. Ke bualu kayi badi bapatula mikanda ya Bantemu mu miakulu muanda-mutekete ne kabidi mu muakulu wa tumama wa bena Mexique. Mudimu wetu wa Bukalenge wa mu muakulu wa Maya ke mukanda wa kumpala wa mu miakulu ya bena Inde ba mu Amerike. Ke bualu kayi munkatshi mua bamanyishi ba Bukalenge ba mu Mexique 572 530, mudi binunu bia ba-Maya, ba-Aztèque ne bakuabu.

¹⁸ Mu matuku adi panshi aa, bantu ba bungi mbanyeme matunga abu balue bena tshimuangi mu matunga makuabu, peshi mbayamu bua kukeba makuta. Ke bua tshinyi bua musangu wa kumpala mu matunga a bungi kudi miakulu mivule. Bantemu ba Yehowa mbasue kupepeja bualu ebu. Tshilejilu, kudi bisumbu ne tusumbu tua miakulu 22 mu Italie pa kumusha bia tshiena-Italie. Bua kuambuluisha bana betu bua kuyisha, bavua benze tulasa matuku adi panshi aa bua kulongesha miakulu 146 kusangisha ne muakulu wa tumama wa bena Italie. Mu matunga makuabu a bungi, Bantemu ba Yehowa badi baditatshisha bua kuenzela bantu badi bafumine mu matunga makuabu bia muomumue. Eyowa, ne diambuluisha dia Yehowa, musumba munene udi upatukila mu miakulu ya bungi be!

“Pa buloba bujima”

19, 20. Mmêyi kayi a Paulo adi akumbana bimpe menemene lelu’eu? Umvuija.

¹⁹ Mupostolo Paulo wakafunda mu bidimu lukama bia kumpala ne: “Kabavua bumvue dilongesha edi anyi? Eyowa, Diyi diabo divua diumvuike pa buloba bujima, miaku yabo miumvuike ne ku ntengu ya buloba.” (Lomo 10:18, MMM) Pikala bualu bua nunku buenzeke mu bidimu lukama bia kumpala, lelu’eu budi bukumbana bikole! Bantu miliyo (bumue bua musangu wa kumpala) badi bamba ne: “Nentumbishe [Yehowa] diba dionso, mmusamune amu kumusamuna mukana muanyi.”​—Musambu 34:1, MMM.

²⁰ Tshintu tshikuabu, mudimu kawena utua panshi to. Bamanyishi ba Bukalenge badi benda bavula. Mêba adibu bapitshisha mu buambi adi enda avula. Makumbula mapiamapia miliyo mivule ne malonga a Bible nkama ya binunu bidi bienzeka. Kutshidi bantu badi bitaba bulelela. Tshidimu tshishale, bantu 16 097 622 bavua babuele mu Tshivulukilu tshia lufu lua Yezu. Bushuwa, kutshidi bia bungi bia kuenza. Tuikalayi tuidikija muoyo-mutoke wa bana betu badi batantamene dibakengesha dikole. Tuidikijayi lukunukunu lua bana betu badi batuadije kuenzela Yehowa mudimu katshia ku tshidimu tshia 1919. Tuetu bonso tuenzayi tshidi mufundi wa Misambu wamba etshi: “Bintu bionso bidi bipuyakana bitumbishe Yehowa! Tumbishayi Yehowa!”​—Musambu 150:6.

[Mêyi adi kuinshi]

Udiku mua kumvuija anyi?

• Mmudimu kayi wakabanga bana betu kuenza mu tshidimu tshia 1919, bua tshinyi katshivua bualu bupepele?

• Bakasangisha banganyi bua kuenzabu pabu mudimu wa buambi?

• Mmalu kayi avua ba-misionere ne bakuabu benze ku ba-bende?

• Tshijadiki kayi tshiudi mua kufila bua kuleja mudi Yehowa uteka tshianza tshiende pa mudimu wa basadidi bende ba lelu?

[Nkonko ya dilonga]

 [Tablo mu mabeji 18-21]

LUAPOLO LUA BULOBA BUJIMA LUA BANTEMU BA YEHOWA BUA TSHIDIMU TSHIA MUDIMU 2003

 (Bua kumona malu bimpe, tangila mu mukanda)

[Bimfuanyi mu mabeji 14, 15]

Ndululu ya mvita mibidi ya buloba bujima kayivua mifikishe bena Kristo bua kupua muoyo ne: bivua bikengela kuyisha lumu luimpe

[Mêyi a dianyisha]

Ditayika dia bombe: U.S. Navy photo; mikuabu: U.S. Coast Guard photo

[Bimfuanyi mu mabeji 16, 17]

Musumba munene uvua ne bua kufumina mu bisamba ne miakulu yonso