Nzambi udiku utangila bualu buetu anyi?

UDIKU udimona munkatshi mua diluangana ne kanyinganyinga kakole bua ntatu idi mu dîku diebe, bua masama, ntatu idi itangila mudimu peshi bua majitu makuabu manene anyi? Bantu ba bungi badi ne tunyinganyinga bua malu aa. Ne nnganyi lelu udi kayi utata bua kansungansunga, malu mabi adi bakuabu benze ne bua tshinyangu? Bushuwa, bidi anu mudi Bible wamba ne: ‘Bifukibua bionso bidi bitua mikemu popamue ne bidi bidinyenga popamue too ne katataka.’ (Lomo 8:22) Kabiena bikemesha padi bantu ba bungi bakonka ne: ‘Nzambi udiku utangila bualu buetu anyi? Nealueku kutuambuluisha anyi?’

Solomo Mukalenge wa meji wakasambila Nzambi ne: “Wewe nkayebe udi mumanye mitshima ya bantu.” Solomo uvua mujadike ne: Nzambi mmutumanye ne udi kabidi uditatshisha bua muntu ne muntu wa kutudi. Wakalomba Nzambi bua ‘umvue mu muaba wende mu diulu’ ne andamune masambila a muntu yonso udi utshina Nzambi udi umuambila bua ‘disama diende ne ntatu yende.’​—2 Kulondolola 6:29, 30.

Lelu, Yehowa Nzambi utshidi amu uditatshisha bua bualu buetu ne udi utuambila bua tuetu kumulomba diambuluisha mu disambila. (Musambu 50:15) Udi utulaya ne: neandamune masambila menza ne muoyo mujima adi umvuangana ne disua diende. (Musambu 55:16, 22; Luka 11:5-13; 2 Kolinto 4:7) Bulelela, Yehowa udi uteleja ‘biamutendelela ne biamutendekena muntu yonso, nansha [bantu bende] bonso.’ Nunku, tuetu beyemene Nzambi, bamulombe diambuluisha mu disambila ne basemene nende pabuipi, neatukube ne neatulombole bimpe. (Nsumuinu 3:5, 6) Yakobo, umue wa ku bafundi ba Bible udi utuambila ne: ‘Semenayi pabuipi ne Nzambi ne yeye neasemene pabuipi nenu.’​—Yakobo 4:8.