Dîyi dia Yehowa didi ne muoyo

Malu manene a mu mukanda wa Genese: Tshitupa II

KUMBUKILA ku difukibua dia muntu wa kumpala Adama too ne ku lufu lua Yozefe muana wa Yakoba, mukanda wa Genese udi ubala bidimu 2 369 bia muyuki wa bukua-bantu. Nimero mushale wa tshibejibeji etshi uvua mukonkonone malu a mu nshapita wa 10 ne a mu mvese 9 ya ntuadijilu ya nshapita wa 11 Gen 1:1–11:9, idi yakula bua muyuki wa kumbukila ku difukibua dia bintu too ne ku tshikondo tshiakibakabu tshibumba tshia Babela. * Tshiena-bualu etshi tshidi tshiotshi tshiakula bua malu a mu mukanda wa Genese avua mashale, adi atangila mushindu uvua Nzambi muenzele Abalahama, Isaka, Yakoba ne Yozefe malu.

ABALAHAMA UDI ULUA MULUNDA WA NZAMBI

(Genese 11:10–23:20)

Bidimu bitue ku 350 kunyima kua Mvula wa kabutu, muntu kampanda wa mushinga mukole kudi Nzambi ne wa mu ndelanganyi ya Sheme muana wa Noa udi uledibua. Dîna diende ng’Abalama, pashishe diakalua kushintuluka kuluadi Abalahama. Ku dîyi didi Nzambi utuma, Abalama udi umbuka mu Kasada, mu tshimenga tshia Ula ne ulua kusombela mu ntenta mu buloba budi Yehowa ulaya bua kumupesha yeye ne tunkanunuina tuende. Bua ditabuja ne butumike buende, Abalahama udi ubikidibua ne: “mulunda wa Nzambi.”​—Yakobo 2:23.

Yehowa udi ubutula benji ba malu mabi ba mu Sodoma ne bimenga biena-mutumba, kadi udi upandisha Lota ne bana bende ba bakaji. Diledibua dia Isaka muana wa Abalahama didi dikumbaja mulayi uvua Nzambi mulaye. Kadi kunyima kua bidimu, ditabuja dia Abalahama didi ditetshibua padi Yehowa umuambila bua kumulambula muanende eu. Abalahama udi pabuipi ne kulambula muanende eu kadi muanjelu udi umukanda. Etshi ke tshidi tshileja ne: Abalahama udi muntu wa ditabuja ne mutuishibue ne: bisamba bionso bia pa buloba nebidibeneshe ku  butuangaji bua kankanunuina kende. Lufu lua mukajende munanga Sala ludi lubungamija Abalahama bikole menemene.

Mandamuna a nkonko ya mu Bible:

12:1-3​—Ndîba kayi diakatuadija tshipungidi tshia Abalahama ne tshiakanenga mutantshi bule kayi? Bidi bimueneka ne: tshipungidi tshia Yehowa ne Abalama tshia se: ‘Bisamba bionso bia pa buloba bibeneshibue ku butuangaji bua kankanunuina ka [Abalama]’ tshiakatuadija pavua Abalama musabuke musulu wa Pelata pavuaye uya mu Kanâna. Bivua mu dia matuku 14 a ngondo wa Nisan, tshidimu tshia 1943 kumpala kua bikondo bietu ebi anyi bidimu 430 kumpala kua Isalele kupikudibua ku bupika mu Ejipitu. (Ekesode 12:2, 6, 7, 40, 41) Tshipungidi tshia Abalahama tshidi ‘tshipungidi tshia tshiendelele.’ Tshidi tshitungunuka too ne padi dibenesha dia bisamba bionso bia pa buloba ne dibutuka dia baluishi bonso ba Nzambi bienzeka.​—Genese 17:7; 1 Kolinto 15:23-26.

15:13​—Ndîba kayi diakakumbana dikengeshibua dia ndelanganyi ya Abalama mukantshi mua bidimu 400? Tshikondo etshi tshia dikenga tshiakatuadija mu tshidimu tshia 1913 kumpala kua bikondo bietu ebi, pavua Isaka muana wa Abalahama ukavua mumane kujila mabele ne muikale ne bidimu bu 5 nanku, ne muanende Yishemaele uvua ne bidimu bu 19 tshikondo atshi uvua “useka” Isaka. (Genese 21:8-14; Galatia 4:29) Dikenga edi diakajika mu tshidimu tshia 1513 kumpala kua bikondo bietu ebi, pavua bena Isalele bapatuke mu bupika mu Ejipitu.

16:2​—Bivua bimpe bua Salai kufila muena mudimu wende mukaji Hagâ kudi Abalama bua ashale mukajende anyi? Tshivua Salai muenze tshivua tshipetangana ne tshilele tshia mu tshikondo atshi tshia ne: mukaji uvua nkumba uvua ne bua kupesha bayende mukaji mukuabu bua amulelele bana. Tshilele tshia kusela bakaji ba bungi tshiakatuadija bua musangu wa kumpala mu ndelanganyi ya Kana (Kayina). Pashishe, kuluatshi tshilele kudi bamue batendeledi ba Yehowa. (Genese 4:17-19; 16:1-3; 29:21-28) Nansha nanku, Yehowa kakalekela mukenji wende wa ku tshibangidilu wa disela mukaji anu umuepele to. (Genese 2:21, 22) Noa ne bana bende bakavuluijabu mukenji eu wa ‘kulelangana ne kuuja buloba,’ bavua bonso ne mukaji anu umue. (Genese 7:7; 9:1; 2 Petelo 2:5) Ne Yezu wakajadikulula kabidi mukenji wa disela mukaji anu umuepele.​—Matayo 19:4-8; 1 Timote 3:2, 12.

19:8​—Kabivuaku bibi bua Lota kufila bana bende ba bakaji kudi bena Sodoma anyi? Bilondeshile mikenji ya mu Asia ya mu tshikondo atshi, muena nzubu uvua ne dibanza dia kukuba benyi bavua balua ku nzubu kuende, kubepula ku njiwu nansha biobi bikengela kufua bua bualu buabu. Lota uvua mudilongolole bua kuenza nanku. Ne dikima dionso wakapatuka pambelu bua kumonangana ne musumba wa bantu, kukangaye tshiibi tshia nzubu, yeye nkayende kutuilanganaye nabu mpala ne mpala. Tshikondo atshi tshivuaye musue kufila bana bende ba bakaji, Lota uvua pamu’apa mujingulule ne: benyi bende abu bavua batumibue ba Nzambi ne uvua pamu’apa wela meji ne: Nzambi udi mua kukuba bana bende ba bakaji bu muvuaye mukube Sala mukaji wa tatuende mukuabu mu Ejipitu. (Genese 12:17-20) Bushuwa, pakakola malu, Lota ne bana bende ba bakaji bakapanduka.

19:30-38​—Yehowa wakalengulula dikuatshika dia maluvu dia Lota ne dilela diende dia bana ne bana bende babidi ba bakaji anyi? Yehowa katu wanyisha diangatangana dia bena muntu anyi dikuatshika dia maluvu to. (Lewitiki 18:6, 7, 29; 1 Kolinto 6:9, 10) Tshibi, Lota uvua ne kanyinganyinga kakole bua “malu mabi” a bena mu Sodoma. (2 Petelo 2:6-8, MMM) Ke tshivua tshisake bana ba bakaji ba Lota bua kumunuishabu maluvu bua amukuate, bualu bavua bamanye ne: Lota kavua mua kuanyisha bua kumanyangana nabu yeye kayi mukuatshike to. Kadi bu muvuabu benyi mu musoko, bana bende ba bakaji bakamona ne: au uvua mushindu umuepele wa kushiya mukono wa dîku dia Lota. Muyuki eu udi mu Bible bua kuleja malanda adi pankatshi pa bena Moaba ne bena Amona (mu ndelanganyi ya Bene-ami) kudi bena Isalele, ndelanganyi ya Abalahama.

Malongesha adi atutangila:

13:8, 9. Ntshilejilu kayipu tshimpe tshidi Abalahama mutushile patudi tujikija bilumbu! Katuena ne bua kunyanga malanda a ditalala bua makuta, bua malu atudi tuetu basue anyi bua kuditambisha kuetu to.

15:5, 6. Pakavua Abalahama wenda ukulakaja ne kayi muanji kulela muana nansha umue,  wakakuatshila Nzambi bualu ebu. Ne Yehowa wakamujadikila ne: uvua ne bua kulela muana. Ntshinyi tshiakenzeka? Abalahama ‘wakitabuja Yehowa.’ Tuetu bambile Yehowa malu etu onso adi mu mitshima yetu, tuetu bitabe malu adiye utujadikila mu Bible ne tumutumikila, ditabuja dietu nedikoleshibue.

15:16. Bua tshinyi Yehowa wakanji kuindila bua kubutula bena Amole (anyi bena Kanâna) too ne ku bipungu biabu binayi bijima? Bualu udi Nzambi wa lutulu. Wakindila too ne pakamonaye ne: kabavua mua kushintuluka nansha bia munyi. Anu bu Yehowa, tuikalayiku petu ne lutulu.

18:23-33. Yehowa kakubutula bantu babi ne bimpe diatshimue to. Neakube bantu bakane.

19:16. Bu muvua Lota ‘ujanguluka,’ banjelu bakamukuata ku tshianza kumukoka yeye ne dîku diende, kubapatulabu pambelu pa tshimenga tshia Sodoma. Bidi bimpe tuetu kuenza malu ne mitalu yonso patudi bindile nshikidilu wa bulongolodi ebu bubi.

19:26. Mbutshimbakane kayipu bua kupeta ditanaji anyi kupinganyina bintu bia mu bulongolodi ebu bitukavua bele nyima!

YAKOBA WAKALELA BANA BA BALUME 12

(Genese 24:1–36:43)

Abalahama udi ulongolola bua Isaka kuselaye Lebeka, mukaji uvua muitabuje Yehowa. Udi ulela bana ba mapasa Esau ne Yakoba. Esau udi upetula buana-bute buende ne ubusumbisha Yakoba, eu udi tatuende ulua kubenesha ku ndekelu kua bionso. Yakoba udi unyema uya kusombela ku Padana-alama, kudiye usela Lea ne Lakele ne ulama mikoko ya tatuabu munkatshi mua bidimu bitue ku 20 kumpala kua kumbukaye ne dîku diende. Lea, Lakele ne bapika babu bakaji babidi badi balelela Yakoba bana ba balume 12 ne bakuabu ba bakaji. Yakoba udi uluangana ne muanjelu ne muanjelu udi umubenesha, pashishe dîna diende didi dishintuluka dilua Isalele.

Mandamuna a nkonko ya mu Bible:

28:12, 13​—“Tshibandilu” tshivua Yakoba mulote tshidi ne diumvuija kayi? “Tshibandilu” etshi tshivua pamu’apa tshifuanangane ne tshia mabue tshivua tshileja ne: kudi diumvuangana pankatshi pa buloba ne diulu. Dibanda dipueka dia banjelu ba Nzambi pa tshibandilu etshi divua dileja ne: banjelu badi bakuata mudimu wa mushinga mu mushindu kampanda pankatshi pa Yehowa ne bantu badiye muanyishe.​—Yone 1:51.

30:14, 15​—Bua tshinyi Lakele wakabenga kulala ne bayende bua mandragore makese patupu? Mu bikondo bia kale, bavua benza mudimu ne bimuma bia mandragore bu buanga bua tulu ne bua kutalaja anyi kupolesha nabu bisama. Bavua bamba kabidi ne: bimuma ebi bivua bijula bikole dijinga dia kusangila ne mulume anyi ne mukaji, biambuluisha kabidi muntu bua kulela anyi kuimita. (Musambu wa Solomo 7:13) Nansha mudi Bible kayi uleja tshivua tshisake Lakele ku dienza nunku, kadi pamu’apa uvua wela meji ne: mandragore avua mua kumuambuluisha bua kuimitaye difu ne kuela tshisala ku bunkumba buende. Kadi pakapita bidimu ndambu, Yehowa ‘wakamupesha buledi.’​—Genese 30:22-24, MMM.

Malongesha adi atutangila:

25:23. Yehowa udi ne bukokeshi bua kumona bitupa bionso bia muana udi kayi muanji kuledibua udi mua kudianjila kumanya malu kumpala kua dîba bua kusungula udiye musue bua kukumbaja malongolola ende. Kadi, katu udianjila kufundila bantu tshikalabu to.​—Hoshea 12:3; Lomo 9:10-12.

25:32, 33; 32:24-29. Diditatshisha dia Yakoba bua kupeta buana-bute ne diluangana diende ne muanjelu butuku bujima bua kupeta mabenesha bidi bileja ne: Yakoba uvua wanyisha bikole bintu bia tshijila. Yehowa mmutupeshe bintu bia tshijila bipite bungi, bu mudi malanda etu nende, bulongolodi buende, tshia-bupikudi, Bible ne ditekemena dietu dia Bukalenge. Tuikalayi bu Yakoba pa kuanyisha bintu bionso ebi.

34:1, 30, MMM. ‘Dikebela Yakoba diakabi’ diakatuadija bualu Dina uvua mudie bulunda ne bantu bavua kabayi banange Yehowa to. Tudi ne bua kusungula balunda betu ne meji.

YEHOWA UDI UBENESHA YOZEFE MU EJIPITU

(Genese 37:1–50:26)

Mukawu wa bana ba Yakoba udi ubasaka bua kupana muanabu Yozefe ku bupika. Mu Ejipitu, badi bela Yozefe mu buloko bualu udi ushala mulamate ne dikima dionso ku mêyi manene a Nzambi a mu nsombelu. Kadi kunyima kua matuku, badi bamupatula mu buloko bua umvuije bilota bia Pâlo, bivua bimanyisha bidimu muanda-mutekete  bia biakudia bia bungi bilonda kudi bidimu bikuabu muanda-mutekete bia tshiyole tshikole tshia nzala. Pashishe badi bateka Yozefe mutangidi wa malu a biakudia mu Ejipitu. Bua bukole bua nzala, bana babu badi balua kukeba biakudia mu Ejipitu. Dîku diabu dionso divua disombele tshiakabidi pamue mu tshitupa tshia buloba tshia bufuke bua bungi tshia Goshene. Pavua Yakoba ukavua mikolo ku tshina, ubenesha bana bende ne ufila mulayi udi ufila ditekemena dia mabenesha a bungi enzeka mu matuku adi kumpala menemene. Badi baya ne tshitalu tshia Yakoba mu Kanâna bua kutshijika. Padi Yozefe ufua ne bidimu 110, badi bumisha tshitalu tshiende, ne ndekelu wa bionso balua kuya natshi dimue dituku mu Buloba Bulaya.​—Ekesode 13:19.

Mandamuna a nkonko ya mu Bible:

43:32​—Bua tshinyi kudia biakudia pamue ne bena-Ebelu kuvua bualu bua bundu kudi bena Ejipitu? Bivua nanku kudi bena Ejipitu pamu’apa bua meji mabi avuabu babelela bua ntendelelu wabu anyi bua lutambishi luvuabu nalu bua tshisamba tshiabu. Bena Ejipitu bavua kabidi bapepeja balami ba mikoko. (Genese 46:34) Bua tshinyi? Balami ba mikoko bavua pamu’apa mu milongo ya kuinshi mu Ejipitu. Anyi bua dipangila dia maloba a kudimina, bena Ejipitu bavua bapetula bantu bavua bakeba mpata ya kudishila bimuna.

44:5​—Mbia bulelela se: Yozefe uvua utempa mbuku ne lupanza anyi? Lupanza lua tshiamu tshia argent ne mêyi akamba mulami wende bua bualu bualu avua mêyi a budimu anyi a mayele. Bu muvua Yozefe muikale mutendeledi wa lulamatu wa Yehowa, kavua utempa mbuku ne lupanza alu to, anu muvua Benyamina kayi mua kuluibe nansha.

49:10​—‘Dikombo dia bukalenge’ ne “tshibangu tshia bukokeshi” bidi biumvuija tshinyi? Dikombo dia bukalenge mmutshi utu nawu mukalenge ku tshianza bu tshimanyinu tshia bukokeshi buende. Tshibangu tshia bukokeshi mmulangala mule udi uleja bukenji budiye nabu bua kutuma dîyi. Pavua Yakoba muakule bua bintu ebi, uvua usua kuleja ne: bukokeshi ne bukole nebitungunuke ne kuikala kudi tshisamba tshia Yuda too ne pavua Shilo ne bua kulua. Kankanunuina ka Yuda aka ki mmuntu mukuabu to, n’Yezu Kristo, udi Yehowa mupeshe bukalenge mu diulu. Kristo udi ne bukokeshi ne bukenji bua kutuma dîyi.​—Musambu 2:8, 9; Yeshaya 55:4; Danyele 7:13, 14.

Malongesha adi atutangila:

38:26. Yuda wakenza bibi pa kulala ne Tamâ, mukaji wa muanende wa mu lufuila. Kadi pakamanyaye ne: uvua mumuimitshishe difu, Yuda wakitaba tshilema tshiende ne budipuekeshi buonso. Tuetu petu tudi ne bua kuitaba ne lukasa luonso bilema bietu.

39:9. Diandamuna dia Yozefe kudi mukaji wa Potifâ didi dileja ne: ngelelu wende wa meji uvua upetangana ne wa Nzambi pa malu a bikadilu, ne kuondo kende ka muoyo kavua kalombola kudi mêyi a Nzambi. Katuenaku petu mua kuenza muetu muonso bua mêyi a Nzambi ikale alombola kuondo ketu ka muoyo anyi?

41:14-16, 39, 40. Yehowa udi mua kushintulula amue malu bua diakalenga dia bantu badi bamutshina. Padi ntatu itukuata, mbimpe bua tuetu kueyemena Yehowa ne kushala ne lulamatu kudiye.

Bavua ne ditabuja dikole

Bushuwa, Abalahama, Isaka, Yakoba ne Yozefe bavua batshina Nzambi ne bavua bantu ba ditabuja. Muyuki wa malu a mu nsombelu wabu udi usanganyibua mu mukanda wa Genese mmukoleshe ditabuja dietu bikole ne mmutulongeshe malongesha a bungi a mushinga mukole.

Muyuki eu udi mua kukuambuluisha bikole wewe muikale ubala Bible ku lumingu luonso mu tshitupa tshidibu baleje mu programe wa Kalasa ka Mudimu wa Nzambi. Dibala malu atudi tufuma ku dimona aa nediambuluishe bua muyuki eu kuikalawu bu bualu budi buenda buenzeka.

[Mêyi adi kuinshi]

[Tshimfuanyi mu dibeji 26]

Abalahama uvua muntu wa ditabuja

[Tshimfuanyi mu dibeji 26]

Yehowa udi ubenesha Yozefe

[Tshimfuanyi mu dibeji 26]

Muntu muakane Lota ne bana bende ba bakaji bakapandishibua

[Tshimfuanyi mu dibeji 29]

Yakoba uvua wanyisha bintu bia tshijila. Kadi wewe?