Nkonko ya babadi

Bilondeshile Genese 38:15, 16 mmalu kayi avua mafikishe Yuda ku dilala ne mukaji uvuaye wela meji ne: ng’wa ndumba?

Nansha muvua Yuda mulale ne mukaji uvuaye wela meji ne: uvua wa ndumba, mu bulelela kavua mukaji wa ndumba to. Mona mushindu uvuabi bienzeke bilondeshile Genese nshapita wa 38.

Kumpala kua muanabute wa Yuda kulelaye bana ne mukajende Tamâ, bakamushipa bualu “wakadi muntu mubi ku mesu kua Yehowa.” (Genese 38:7) Mu tshikondo atshi muvua tshilele tshia kupiana mukaji wa mufue kudi bayende tshina. Bivua bienzeka nanku pavua mulume ufua kayi mulele bana, nunku muanabu wa balume uvua ne bua kupiana mukaji wa mu lufuila au bua kulelela muanabu bana. Kadi Onana muana muibidi wa Yuda wakabenga yeye kutumikila mukenji eu. Ke bua tshinyi wakafua bua dibenga kutumikila mukenji wa Nzambi eu. Nunku Yuda wakatuma Tamâ mukaji wa muanende au kua tatuende bua ashale muindile too ne pavua Shela muana muisatu wa Yuda ne bua kukola bua balue kuselangana nende pashishe. Kadi mu kupita kua bidimu, Yuda wakapanga mua kuselesha Shela Tamâ. Pakafuisha Yuda mukajende, Tamâ wakenza mayele a mua kumona mua kulela ne Yuda, muena Isalele uvua muikale tatuende muenu. Tamâ wakadishintulula mpala, e kuluaye bu mukaji wa ndumba ne kuya kusomba ku muelelu wa njila uvuaye mumanye bimpe ne: Yuda uvua ne bua kupitshilaku.

Bu muvuaye kayi mujadike ne: mukaji au uvua Tamâ, Yuda wakalala nende. Ne budimu buonso, mukaji eu wakasaka Yuda bua amueyeke bintu kampanda bu difutu, ne ku diambuluisha dia bintu ebi, mukaji eu wakalua kujadikila bantu ne: Yuda ke uvua mumuimitshishe difu. Pakamanyika bualu ebu, Yuda kakamutandisha to, kadi wakamba ne budipuekeshi buonso bua mukaji eu ne: ‘Yeye mmuntambe meme buakane, bualu bua meme tshiakamubakisha kudi muananyi mulume Shela.’ Bushuwa, “yeye kakamumanya kabidi tshiendelele.”​—Genese 38:26.

Bualu bubi buakenza Yuda buvua bualu wakabenga kufila Tamâ kudi Shela muanende bu muvuaye mulaye. Wakamanyangana kabidi ne mukaji uvuaye wela meji ne: uvua mukaji wa ndumba. Muanda eu uvua mubengangane ne tshipatshila tshia Nzambi tshia se: mulume asangile ne mukaji anu munda mua dibaka. (Genese 2:24) Mu bulelela, Yuda kakalala ne mukaji wa ndumba to. Kadi kayi nansha mumanye, wakapiana mukaji uvua muanende Shela ne bua kupiana ne kuluaye tatu wa muana uvua ne bukenji bua kupiana bintu bia mu dîku.

Bua Tamâ, dimanyangana diende ne Yuda kadivua dienda dia masandi to. Kabakangata bana bende ba mapasa bakaledibua abu bu ba panshi to. Pakapianabu Luta kudi Boaza muena Beteleheme, bakulu ba mu Beteleheme bakakula mu mushindu muimpe bua Pelese muana wa Tamâ, bambila Boaza ne: ‘Ba mu nzubu webe bikale bu ba mu nzubu wa Pelese, nguakalelela Tamâ Yuda, bua bana badi Yehowa ukulelesha ne nsongakaji eu.’ (Luta 4:12) Pelese udi pende munkatshi mua bankambua ba Yezu Kristo.​—Matayo 1:1-3; Luka 3:23-33.