“Tshimue tshia ku bintu binene bitubu benze”

PAVUABU bibake ntempelo wa Yehowa mu Yelushalema mu bukokeshi bua Mukalenge Solomo kukadi mpindieu bidimu bu 3 000, bakenza tshilaminu tshia mâyi tshilenga tshia tshiamu tshia mitaku ne bakatshitekela ku tshibuelelu tshia ntempelo tshia pambelu. Tshivua ne bujitu bua tone 30 ne tshivua tshibuela litre ya mâyi 40 000. Bavua babikila tshilaminu etshi tshinenanenayi tshia mâyi ne: dilongo dia tshiamu tshiengulula. (1 Bakelenge 7:23-26) Albert Zuidhof uvua kumpala mulombodi wa malu a dikebulula bintu wa mu ditunga dia Canada udi wamba mu mukanda kampanda ne: “Tshia bushuwa, tshivua tshimue tshia ku bintu binene bitubu benze mu tshisamba tshia bena Ebelu.”​—Biblical Archeologist.

Mushindu kayi uvuabu benze dilongo edi? Bible udi wamba ne: ‘Mukalenge wakafudila [malongo] a biamu ebi bionso mu maloba a dime a mu mpata wa Yadene.’ (1 Bakelenge 7:45, 46) Zuidhof udi wamba ne: “Mushindu uvuabu bafule dilongo edi udi mua kuikala mufuanangane ne utshidibu bafula ngonga minene ya tshiamu tshia bronze.” Udi umvuija ne: “Kumpalampala, bivua bilomba bua kuenza modele wa dilongo muenza ne dima; pashishe bavua badikudimika ne belapu budimbu buenze bu kamonya. . . . Pavuabu bajikija kuenza nunku, bantu bavua bafumba dilongo edi bavua bela dima dikuabu pa mutu pa tshia munda mua dilongo tshikavuabu benze ne badiumisha. Ku ndekelu, bavua bengulula budimbu abu bua bupatuke ne bapongolola tshiamu tshia bronze muengulula mu ditubu divua munda.”

Bunene ne bujitu bua dilongo adi bivua bilomba meji a bungi bua kudienza. Tshia munda ne tshia pambelu bivua ne bua kuikala bikole bua kuambulabi bujitu bua tone 30 ya tshiamu tshia mitaku tshiengulula, ne bavua ne bua kupongolola tshiamu tshiengulula atshi kabayi bimanyika bua kuepuka mitanta. Pamu’apa bivua bikengela mfulu ya kapia milamakaja bua kumona mua kuengulula tshiamu tshivuabu bela mu dima dikavuabu benze adi. Eu uvua mudimu wa dikema!

Mu disambila diakenza Mukalenge Solomo dituku dia dibanjija ntempelo, wakapa Yehowa Nzambi lumu bua midimu yonso ivua mienzeke bua ntempelo. Wakamba ne: ‘Wewe udi wamba bualu mukana muebe, utu wabumana ne tshianza tshiebe.’​—1 Bakelenge 8:24.