Kuondo ka muoyo kalulame

DINGA dituku pavua Charles (muena mudimu wa mu iniversite kampanda wa mu ditunga dia Kenya) ufumina ku mudimu upingana kumbelu kuende wakajimija kamu kende ka telefone mu mashinyi. Mu ditunga dia Kenya tuamu tua telefone tutshitu tshintu tshia mushinga mukole.

Charles wakamba ne: “Tshivuaku mutekemene ne: nebakampingajile to.” Kadi matuku makese panyima, wakakema pakamuelabu nshinga kudi biro bia Bantemu ba Yehowa bia mu Kenya. Uvua anu bu uvua ulotakana pakamuambilabu bua kulua kuangata kamu kende! Bakamuambila ne: Ntemu wa Yehowa kampanda muena mudimu wa ku dîba ne ku dîba uvua mubuele mu mashinyi amue nende ke uvua muangule kamu aku. Bua kupetaye muena kamu aku, Ntemu au wakaya ne kamu aku ku biro bia Bantemu ba Yehowa. Bena budisuile badi benzaku mudimu bakamanya ne: Charles ke uvua muenaku pa kutangila nimero ivua ipatuka mu kamu pavuabu bakakangula.

Charles wakafundila biro bia Bantemu ne: “Ndi ne dianyisha bua munudi benze muenu muonso bua kumpeta. Ndi ngela bena mu tshisumbu tshienu bavua bangule kamu ne bapete muoyo wa kukampingajila tuasakidila wa manza tente. Ki mbipepele bua kupeta bantu bena bululame lelu to, kadi bidi bikolesha ku muoyo bua kumona se: kudi bamue bantu badi baleja ne: m’Bantemu balelela ba Yehowa Nzambi.”

Bantemu ba Yehowa mbamanyike miaba yonso bu bantu bena malu malulame. Badi bidikija mupostolo Paulo wakamba ne: ‘Tudi tuitabuja ne: tudi ne [tuondo tua muoyo] tuimpe, tudi basue kuenda bimpe mu malu onso.’ (Ebelu 13:18; 1 Kolinto 11:1) Mbamanye bimpe ne: tshikadilu tshilenga etshi tshidi tshitumbisha Yehowa Nzambi, anu muvua Yezu muambe ne: ‘Munya wenu uteme ku mêsu kua bantu, bamone midimu yenu mimpe, batumbishe Tatu wenu udi mu diulu.’​—Matayo 5:16.