Badisangishile “pankatshinkatshi pa buloba”

Ukadiku mumvue miaku eyi: “Te Pito o Te Henua” anyi? Mu tshiena Rapa Nui (muakulu wa bena mu Tshidiila tshia Pâques wa katshia ku bankambua babu) miaku eyi idi yumvuija “Nkatshinkatshi wa Buloba.” Ntshinyi tshiakenza bua mpuilu kampanda kuluaye wa pa buende mu tshidiila etshi?

TSHIDITOLE, tshia dikema, ne tshia pa buatshi. Eyi mmiaku miangata bua kumvuija mudi Tshidiila tshia Pâques, anyi Rapa Nui bu mutu benamu kabidi batshibikila. Bulelela, mbuloba budi buditole pankayabu bualu budi mu Mbuu wa Pasifike wa ku Sud, mutantshi wa kilometre 3 790 ne tshimenga tshia Santiago tshia mu ditunga dia Chili. Tshisanga etshi tshiakalua provense wa Chili mu dia matuku 9 ngondo wa tshitema wa 1888.

Tshidiila etshi tshidi bu tshipapu tshia nseke isatu tshidi ne kilometre 166 mu bule ne mu butshiama ntshienza kudi mikuna isatu ivua miluke mudilu kale. Anu bu bidiila bikuabu bia bungi bia mu Pasifike, anu nsongo patupu ya mikuna minene idi muinshi mua mâyi ke idi mienze tshidiila etshi. Badi babikila tshidiila etshi tshijima bu tshivulukilu tshia bintu bifuka. Bulelela, ntshimanyike bikole bua mpingu yatshi ya dikema misonga ya mabue idibu babikila ne: moai. *

Pa kumbusha tshimuenekelu tshimpe tshia tshisanga etshi ne miaba ya bintu bidi bivuluija malu a kale, Tshidiila tshia Pâques tshidi ne biakudia bisheme bia mishindu ne mishindu. Mudi bia pa madimi bu mudi bikaka, avoka, binkuenda ne bibote bia mishindu tshitema tshijima. Bua mu mâyi badi bakuatamu mishipa ya mishindu ne mishindu ne minyinyi mikuabu ya mu mâyi.

Mu Tshidiila tshia Pâques kuulu nkusanguluke, mvula iloka milondangane ne mianzankongolo payi imueneka misangu ya bungi, bintu bitu biambuluisha benyi bua kueyela kapepe kimpe ne kubandila bimuenekelu bilengele ku mêsu. Mpindieu tshidiila etshi tshidi ne bantu batue ku 3 800. Badi basombelamu mpindieu mbantu bakalua kusombamu kumpala, basambakane ne  bena ku Mputu, bena mu Chili ne bisamba bikuabu. Bena ngendu ya dibandila bintu ba bungi ba ku Mputu ne mu Asia batu balua kubandila tshisanga etshi, bilua mushindu munene udi ditunga edi dipetela mfranga.

Badi bakunamu maminu a Bukalenge a kumpala

Mukanda wa Annuaire des Témoins de Jéhovah 1982 wakamanyisha ne: “Tuvua ne muambi wa lumu luimpe tshikondo kampanda anu umue tshianana mu Tshidiila tshia Pâques. Bavua bamuambuluishe mu nyuma kudi muanetu wa bakaji mukuabu uvua misionere ku biro bietu bia filiale bia [mu Chili] ku mikanda ivuabu bafundilangana. Nansha mukadi mumanyishi eu mupingane mu Chili, tudi ne bantu badi benza abonema balomba Tshibumba tshia Nsentedi mu tshidiila etshi. Tuakakema bikole mu ngondo muinayi wa tshidimu tshia 1980 pakatuelabu telefone umbukila mutantshi mule kudi muntu mukuabu uvua muanyishe bulelela uvua musue kumanya dîba dia kusekelela Tshivulukilu tshia lufu lua Yezu. Pashishe anu tshidimu atshi mulume kampanda ne mukajende ba mu tshimenga tshia Valparaiso bakaya kasombela mu tshidiila etshi e kubangisha dilonga Bible ne bantu bavua ne nyota ya bulelela. Mu ngondo muinayi wa tshidimu tshia 1981, bakenzela Tshivulukilu mu tshidiila etshi bua musangu wa kumpala ne bantu 13 bakabuelamu. Tudi ne disanka dia bungi bua mushindu udi ‘lumu luimpe’ lufike mu tshitupa tshia buloba etshi tshia kulekule!”

Kunyima, mu dia 30 a ngondo wa kumpala 1991, biro bietu bia mu Chili biakatuma Dario ne Winny Fernandez (baselangane) bu bampanda-njila ba pa buabu mu tshisanga etshi. Muanetu Fernandez (mulume) udi uvuluka wamba ne: “Tuakenza mêba atanu mu ndeke bua kufika mu tshitupa tshia buloba tshiditole tshia kule kutambe mudi bantu ne bikadilu biuwule tente ne malu a dikema.” Bobu kulongolola diakamue bisangilu ne mudimu wa buambi babambuluisha kudi muanetu wa balume kampanda wa mu tshidiila atshi ne muanetu wa bakaji mukuabu utshivua pende ufikilaku muomu ne bana bende babidi. Nansha muvuaku buluishi bua mêku a bantu bakuabu, lukunukunu lunekesha lua bena bitendelelu ne bikadilu bikuabu bia mu nshidimukilu ya bena Polynésie, bakamona muvua Yehowa ubenesha mudimu wabu. Muanetu Fernandez ne mukajende kabatshiena kabidi bampanda-njila ba pa buabu to, kadi mbashale anu mu tshidiila atshi mudibu bakolesha muana uvuabu balelele muine amu. Lelu’eu, mudi bamanyishi ba Bukalenge 32 badi benza mudimu ne disanka. Munkatshi muabu mudi bena Rapa Nui ne bakuabu badi balue kusombela mu tshidiila etshi anyi balue bua kuenzamu mudimu bua dijinga dikole didimu dia bambi ba lumu luimpe.

Badi balongolola mpuilu wa tshijengu

Bu mudi tshidiila tshikale kule menemene ne ditunga dia Chili, tshisumbu tshivuamu tshivua tshipeta misangu isatu ku tshidimu bande ya video ya mpuilu wa pa buende wa dituku dimue, mpuilu wa tshijengu ne mpungilu wa distrike. Kadi ku ndekelu kua tshidimu tshia 2000, bena Komite wa Filiale wa mu Chili bakatuadija kuela meji a kuenza mpuilu wa kumpala mu tshidiila tshia Pâques. Ndekelu wa bionso, bakapangadija bua kuenza mpuilu wa tshijengu mu ngondo wa dikumi ne umue wa 2001, kubikilabu bana betu bungi butshintshikila ba mu bitupa bishilashilangane bia mu Chili bua kulua kubuela mu mpuilu au. Anu bua programe ya ndeke ivuaku, mpuilu uvua ne bua kuenzeka mu Dia lumingu ne mu Dimue.

Bantu 33 bavuabu babikile bavua ne disanka dia bungi bua kuenza luendu batangile mu tshidiila bua kubuela mu mpuilu wa kumpala uvuabu ne bua kuenza mu tshitupa tshia buloba tshidi tshiditole menemene kule. Panyima pa mêba a bungi ne ndeke mulu basambuka Mbuu wa Pasifike, bakatukija  mioyo pakabakidilabu ne musangelu kudi bana betu ba mu tshidiila atshi bavua babindile ku tshipalu tshia ndeke. Bakakidila bana betu ne bintu bia kuvuala mu nshingu bu shene bienza ne bilongo, tshintu tshia pa buatshi tshitubu bapeshangana mu tshidiila etshi. Pashishe bakaya kubaleja miaba ya kulala ne panyima pa bamane kunyungulukaku kakese mu tshidiila, bonso bavua ne midimu mu mpuilu bakadisangisha ku Nzubu wa Bukalenge.

Muntu uvuabu kabayi belele meji udi umuangalaja lumu lua mpuilu

Pavua bamue bana betu bavua balue bua mpuilu bayamu, bakakema pakumvuabu nsaserdose wa mu tshidiila atshi wakula ku tudiomba bua difika diabu. Uvua wakula bua bena ngendu bavua bafumine mu ditunga dia ku Amerike wa ku Sud bavua ne mua kuenda benda batangila bantu ku nzubu yabu bua kuyikila nabu bua nshikidilu utshilualua wa buloba. Nansha muvuaye usaka bena kuitabuja bende bua kubenga kuteleja benyi abu, dimanyisha diende diakambuluisha bua kumuangalaja lumu lua difika dia tshisumbu tshinene tshia Bantemu ba Yehowa mu tshidiila. Bena mu tshidiila bakashala ne mioyo kuulu kuulu. Matuku akalonda, bana betu benyi abu bakabayisha ne meji onso mukenji udi ukolesha wa lumu luimpe.

Mpuilu udi utuadija

Mu Dia lumingu mu dinda, bana betu ba mu tshidiila e kuindila bana betu benyi abu ku tshibuelelu tshia Nzubu wa Bukalenge bua kubajingila difika dilenga pavuabu bafika bua dituku dia kumpala dia mpuilu. “Iorana Koe! Iorana Koe!” Mmumue ne: “Difika dilenga!” Bana betu bakuabu ba bakaji ba mu tshidiila atshi bavua bavuale nkanzu ya tshiena kuabu ne balengeje nsuki yabu ne bilongo bilengele kumona mu mushindu utu bena Polynésie benza.

Kunyima kua mijiki ya ntuadijilu, bantu lukama bakasangisha mêyi abu bua kuimba musambu udi ne tshiena-bualu ne: “Tuikalayi bashindame, katuyi kutenkakaja!” e kuwimbabu mu mushindu uvuabi kabiyi bianji kuenzeka kabidi mu tshidiila atshi. Bana betu ba mu tshidiila amu bakapuekesha binsonji pavua mulombodi wa mpuilu mubajingile difika dilenga ne musangelu wonso mu muakulu wabu wa Rapa Nui. Mu dikisha dia mu midi, Bantemu basatu bakatambuishibua mu mâyi bua kuleja diditshipa diabu kudi Nzambi patoke. Pavua dituku dia kumpala dia mpuilu ditue ku ndekelu, muntu yonso uvuamu wakadiumvua muikale pabuipi menemene ne Yehowa ne bana betu bonso ba buloba bujima.​—1 Petelo 5:9.

Mudimu wa diyisha mu dinda

Bua malu kampanda avua mamueneke mu tshidiila amu, dituku diende dibidi, mpuilu wa tshijengu eu wakatuadija mu mapingaja. Nunku, bana betu benyi aba bakabenga kuladidila e kudituabu mu mudimu wa buambi mu dinda adi. Mmalu kayi akapetabu?

Mamu kampanda mukulakaje uvua ne bana bende muanda-mukulu wakambila Bantemu ne: kavua musue kuyikila nabu to, bualu yeye uvua muena Katolike. Pakamuambilabu ne: bualu buvuabu basue kuyikila nende mbua ntatu idi ikuata bantu bonso, bu mudi dinua dia diamba ne ntatu ya mu dîku, mamu wakitaba bua kubateleja.

Munga mamu mukulakaje pende wakabenga bua Bantemu babidi (mulume ne mukejende) kuyikilabu nende. Wakabambila bua kuya kayikila ne bantu ba mu Amerike wa ku Sud bavua ne tshikisu tshia bungi kudi bantu bakuabu. Bana betu aba bakamuambila ne: mukenji wa ‘lumu luimpe lua bukalenge’ badi bawambila muntu yonso, ne se: bavua balue mu tshisanga atshi bua kubuela mu mpuilu uvua mua kuambuluisha bantu bonso bua bafike ku dinanga Nzambi. (Matayo 24:14) Bakamuebeja ni uvua mua kuanyisha bua kuikala ne muoyo wa matuku a bungi mu mparadizu ne nsombelu mufuanangane ne uvua nende bantu mu  tshidiila atshi kadi kayi kabidi ne masama ne lufu. Pakamueleshishabu meji bua bungi bua bidimu bidi mikuna ivua kale iluka kapia milale, wakelangana meji a buipi bua muoyo e kukonka ne: “Bua tshinyi tudi ne muoyo anu bua matuku makese nunku?” Kadi wakakema pakamubadishabu Musambu 90:10.

Dîba adi, Bantemu bakumvua diakamue dîyi dikole difuma ku nzubu mukuabu uvua ulonda. Nansha muvuabu kabayi bumvue bivuabu bamba, mamu au wakabambila ne: bena mutumba bavua babapenda, bamba kabidi patoke ne: kabavua basue bua Bantemu baye kubatangila to. Kadi mamu au ke uvuabu babikila bu nua, mmumue ne: yayende wa bana bonso ba mu dîku diabu. Bu mukavua tatuende mumane kufua, yeye ke uvua ne bua kusungula tshivua tshimpe bua dîku diabu. Wakakuila bana betu kumpala kua bana babu mu muakulu wabu ne kuangataye ne disanka mikanda yetu ivuabu bamupesha. Panyima pa matuku makese anu mu lumingu alu, bobu mu mashinyi bapita kumonaye Bantemu, ke kuambilaye muakunyende wa balume bua kuimanyika mashinyi. Nansha muvua muakunyende kayi muanyishe, mamu au wakela bana betu muoyo ne kubajingilaye bipeta bilenga mu mudimu wabu wa buambi.

Nansha muvua bamue bantu ba mu tshidiila atshi bamueneka ku ntuadijilu bu bavua kabayi basue mukenji uvua Bantemu benyi bayisha, benyi aba bakalua kumona bobu bine ne: bena Rapa Nui mbantu bimpe ba musangelu katshia anu ku tshifukilu tshiabu. Ba bungi ba kudibu bakateleja lumu luimpe ne disanka. Bua kuamba bulelela, Bantemu 6 pa 20 bavua batambule mu tshidiila atshi mbantu ba muomu. Umue wa kudibu wakalonga bulelela bua mu Bible musangu wa kumpala pavuabu balongesha mukajende Bible yeye musombe mu nzubu mukuabu ubatelejilamu. Yeye ne mukajende bakadi Bantemu batambule mpindieu, ne yeye udi musadidi wa mudimu mu tshisumbu.

Ndongamu wa malu a mu nyuma udi utungunuka

Dituku dibidi, mpuilu wakabanga mu mapingaja. Bantu bavua basankidila bulelela bakalua kabidi kudisangisha ne bana betu 32 ba mu tshidiila pamue ne bana betu benyi 33. Bantu batue ku lukama bakateleja ndongamu eu ne muyuki wa patoke uvua wamba ne: “Mushindu udi dinanga ne ditabuja bitshimune ba panu.” Bushuwa, aba bavua babuele mu mpuilu eu bakadimuena dinanga ditu munkatshi mua bantu ba Yehowa, nansha munkatshi mua bantu ba nshidimukilu ya miaba mishilangane.​—Yone 13:35.

Tshikondo tshia mpuilu wa tshijengu au, mutangidi wa tshijengu ne wa distrike bakenza tshisangilu tshia pa buatshi ne bampanda-njila. Bana betu benyi bavua bampanda-njila ba pa tshibidilu nansha ba pa buabu bakadisanga ne bampanda-njila basatu ba pa tshibidilu ba mu tshidiila atshi. Bonso buabu bakakoleshibua bikole.

Butshia mu dibidi, bana betu bakuabu ba mu tshidiila atshi batu benza mudimu wa kunyunguluka ne bantu bua kubaleja tshidiila bakanyunguluka  ne bana betu benyi. Bakaya kumona tshina tshia mabue tshia muaba uvuabu basongela mpingu ya moai, kubandilabu mikuna ivua iluka mudilu ivua kumpala miaba ivuabu benzela manaya a kale a ditembangana, kabidi kumonabu lusenga lulengele lubalakana lua ku muelelu wa mâyi lua Anakena lua muaba uvua ba mu tshidiila etshi ba kumpala batudile ne mazuwa a mâyi. *

Musangu wa ndekelu wa kumonangana ne bana betu ba mu tshidiila etshi uvua mu Dilonga dia mukanda dia mu tshisumbu. Panyima pa tshisangilu atshi, Bantemu ba mu tshidiila etshi bakalambila benyi babu biakudia bia dikema bitubu balambilanganamu. Pashishe, bavuale mvuadilu wa buena kuabu, bakanji kubatuilaku dikasa dimpe dia maja a kabukulu. Benyi pamue ne bana betu bena tshidiila tshia Rapa Nui bakamona ne: bivua ne mushinga menemene bua muvuabu benze madikolela abu onso bua mpuilu au kuenzekaye.

Bana betu bonso benyi bavua balue bakadiumvua pabuipi menemene ne bana babu bavua kule pa nkayabu bavuabu basombe nabu mu disanka lumingu lujima. Bakavua bumvua bibatonda bua kumbuka mu tshidiila atshi. Batshidi anu batungunuka ne kuanyisha balunda babu bapiabapia bavuabu bapete ne mushindu uvuabu bakoleshibue mu nyuma. Ku tshipalu tshia ndeke, bana betu ba mu Tshidiila tshia Pâques bakavuadika benyi masanga mu nshingu avuabu benze ne bizubu bia binyamankole bia mu mâyi.

Benyi bakalaya pakavuabu bumbuka ne: “Iorana! Iau he hoki mai e Rapa Nui ee,” mbuena kuamba ne: “Ushale bimpe! Nempingane kabidi muebe munemu Rapa Nui.” Bushuwa, badi ne dijinga dikole dia kupingana bua kumona balunda babu bapiabapia ne bena dîku diabu dia mu nyuma ba mu Tshidiila tshia Pâques, tshidiila tshia pa buatshi, tshiditole, tshia dikema tshidi ne bantu bena malu malenga!

[Mêyi adi kuinshi]

[Kazubu mu dibeji 24]

Diyisha mu Tshidiila tshia Pâques

Bidimu bu bibidi kumpala kua mpuilu eu kuenzekaye, mutangidi wa tshijengu kampanda ne mukajende bavua bapitshile mu tshidiila etshi e kupetabu malu malenga a bungi. Tshilejilu, bakakema bikole pavua muanetu wa bakaji uvua mubafile muaba uvuabu ne bua kulala mubavuluije ne: bavua balonge nende Bible ku Sud kua ditunga dia Chili patshivuaye nsongakaji wa bidimu bitue ku 16. Pashishe lutete luakakunabu alu kukola kukuama mamuma mu Rapa Nui.

Bakapeta kabidi bualu budi busekesha ebu: Muntu mukuabu uvua upana bintu bia divuluka nabi muaba au wakangata Bible wa Les Saintes Écritures​—Traduction du monde nouveau ne mukanda wa Dimanya didi difikisha ku muoyo wa kashidi wa kulonga nawu Bible, yonso mipatula kudi Bantemu ba Yehowa. Pakapinganabu bua kumonangana kabidi ne muntu eu, wakabambila ne: kavua mumanye mua kubala Bible au to. Bavua bamushile Bible wa mu Mfualansa pamutu pa wa mu tshiena Espagne! Bakajikija tshilumbu atshi ne lukasa luonso, ne bua diambuluisha dia Bantemu ba mu tshidiila tshiabu ne dia Bible wa mu muakulu wabu, wakafika ku dijingulula ne: Bible kavua mukole bua kumumvua to.

[Karte mu dibeji 22]

(Bua kumona malu bimpe, tangila mu mukanda)

TSHIDIILA TSHIA PÂQUES

CHILI

[Bimfuanyi mu dibeji 23]

Babidi ba ku bantu bavua batambule mu mpuilu wa tshijengu

[Bimfuanyi mu dibeji 25]

Pa mpulumuku pa mukuna wa Rano Raraku uvua uluka mudilu; tshimfuanyi tshikese: Bimuma bia muitu bibikila ne: guayaba bitubu bapuola mu tshidiila etshi