Bua tshinyi Bantemu ba Yehowa badi anu balua kukutangila?

DISUMINYINA ditu nadi Bantemu ba Yehowa mu mudimu wabu wa diyisha bantu ku nzubu ne ku nzubu ndimanyike bimpe buloba bujima. Bamue bantu batu badikonka tshitu Bantemu batungunukila anu ne kuya kubatangila, nangananga bikalabu kabavua batambe kuanyisha mukenji uvua Bantemu babatuadile misangu ya kumpala. Mikanda ibidi mifumine mu ditunga dia Russie idi ituambuluisha bua kumvua bualu ebu.

Masha, nsongakaji wa bidimu 19 wa mu tshimenga tshia Khabarovsk udi wamba ne: “Bua kuamba bulelela, kumpala mvua ngepuka Bantemu ba Yehowa bikole.” Kadi kunyima kua yeye mumane kubala ndambu wa bibejibeji bipatula kudi Bantemu, wakashintulula meji ende. Mmufunde ne: “Bionso bimvua mubale mbinsankishe bikole ne mbindoongeshe malu a bungi, ne tshidi ne mushinga mutambe ntshia se: bidi bipesha muntu mmuenenu mukuabu pa bidi bitangila malu a panu. Ku kakese ku kakese, ngakabanga kumvua tshidibu bapeshile bantu muoyo.”

Svetlana, muntu mukaji wa mu tshimenga tshia Ussuriysk (tshidi mu mutantshi wa kilometre 80 lua ku Nord kua tshia Vladivostok) wakafunda ne: “Anu matuku adi panshi aa ke andi mubange kubala Tshibumba tshia Nsentedi ne Réveillez-vous! Bantu badi dijinga ne bibejibeji bia mushindu eu bikole matuku etu aa. Ntu munange biena-bualu bionso bitumu. Biena-bualu ebi bitu bisankisha be, bimanyisha bantu malu a bungi ne bibalongesha makuabu mavule! Tuasakidilayi! Tuasakidilayi wa manza tente bua munudi pa buloba apa ne bua munudi nuenza mudimu eu muimpe wa mushinga mukole.”

Bantemu ba Yehowa ba buloba bujima batu bangata lukonko lua Paulo ludi luelesha meji elu: ‘Mmunyi mumvua [bantu] bualu padiku kakuyi muntu bua kuyisha?’ (Lomo 10:14) Bua tshinyi kubenga kuitaba bua kuyikilaku ne Bantemu nansha bua minite mikese musangu waluabu kukutangila? Mukenji wa busambi udi usanganyibua mu Bible, Dîyi dia Nzambi udi mua kukusankisha pebe.