Busambi bua badi bakenga

PAVUABU bakengesha bena lulamatu ba kale, bavua basambila ne muoyo mujima bua Nzambi abalombole. Kadi bavua kabidi benza kuoku bualu kampanda bua kupepeja dikenga diabu, bu mudi kukeba mayele a mua kunyema bavua babakengesha. Tshilejilu, Davidi wakeyemena Yehowa e kuenzaye yeye muine muende muonso bua kutantamena buluishi. Netuambe tshinyi buetu tuetu lelu’eu?

Pautu ne dikenga, se utu anu pamu’apa ukebaku mushindu kampanda wa mua kujikija lutatu luebe. Tshilejilu, wewe kuyi ne mudimu, kuakuenzaku bukole bua kupeta mudimu kampanda mukumbanyine udi mua kunuambuluisha ne dîku diebe anyi? (1 Timote 5:8) Peshi wewe usama, kutuku ukeba munganga udi mua kukuondopa bimpe anyi? Mbia bushuwa bualu Yezu uvua ne bukole bua kudi Nzambi bua kuondopa masama onso, uvua muambe pende ne: ‘Babedi badi bakengela munganga.’ (Matayo 9:12, MMM) Kadi lutatu luebe pamu’apa kaluena anu mua kujika to; udi mua kutungunuka ne kulutantamena mu mushindu kampanda anyi kansanga.

Bua tshinyi kubenga kuambila Yehowa Nzambi lutatu luebe mu disambila? Tshilejilu, patudi tuenda tukeba mudimu, dieyemena Nzambi mu masambila nedituambuluishe bua kubenga kuitaba mudimu udi ubengangana ne mêyi a mu Bible. Netuepuke kabidi ‘kusesuishibua mu njila wa ditabuja’ kudi lukuka anyi dinanga dia mfranga. (1 Timote 6:10) Bulelela, patudi tuangata mapangadika manene adi atangila malu a mudimu, a mu dîku, anyi a masama, tudi mua kulonda mubelu wa Davidi eu: ‘Teka bujitu buebe pambidi pa Yehowa, ne yeye neakukoleshe; kêna witabuja tshiendelele bua bantu bakane banyungishibue.’​—Musambu 55:22.

Kusambila ne muoyo mujima nekutuambuluishe kabidi bua kushala bashindame mu meji etu bua lutatu luetu elu kalutupitshi mutu. Mupostolo Paulo eu uvua muena Kristo wa bushuwa, wakafunda ne: ‘Lekelayi kuditatshisha ku bualu bumue; kadi mu malu onso ku ditendelela ne ku disengelela numanyishe Nzambi bua milombu yenu ne disakidila.’ Disambila dienza ne muoyo mujima didi mua kutukuatshisha mu mushindu kayi? ‘Ditalala dia Nzambi didi ditamba dijingulula dionso dia bantu, nedilame mitshima yenu ne meji enu mu Kristo Yezu.’ (Filipoi 4:6, 7) Ditalala dia Nzambi ‘nditambe dijingulula dionso dia bantu.’ Nunku, didi mua kutujalamija patudi tutata ne bujitu bua malu  adi atunyingalaja. ‘Nedilame mitshima yetu ne meji etu,’ dituambuluisha nunku bua kuepuka dienza dia malu lubilu lubilu katuyi bele meji bimpe, bualu didi mua kutuvudijila kabidi tunyinganyinga.

Disambila didi mene mua kushintuluisha too ne mushindu udi malu enda aya. Tshikondo tshivua mupostolo Paulo mu buloko ku Lomo, wakasengelela bena Kristo nende ne budipuekeshi buonso bua kusambila bua bualu buende. Bua tshinyi Paulo uvua mubalombe bualu ebu? Wakabafundila ne: ‘Ndi nusengelela bua nuenu kutamba kuenza bualu ebu, bua meme mpingajibue kunudi lubilu.’ (Ebelu 13:19) Mu ngakuilu mukuabu, Paulo uvua mumanye ne: pavua Yehowa umvua masambila a bena Kristo nende menza ne disuminyina dionso, dishintuluka divua mua kumueneka pa tshilumbu tshia dîba divuabu mua kumupatula mu buloko.​—Filemona 22.

Disambila didiku mua kushintulula malu pa bidi bitangila dikenga dietu anyi? Eyowa, didi mua kuashintulula. Kadi tudi ne bua kumanya ne: Yehowa Nzambi udi mua kubenga kuandamuna masambila etu mu mushindu utuvua tuetu tutekemena. Paulo wakasambila misangu ne misangu bua ‘dieba [divua] mu mubidi’ wende divua dikale pamu’apa disama kampanda. Kadi pamutu pa kumbushila Paulo dikenga adi Nzambi wakamuambila ne: ‘Ngasa wanyi udi ukukumbana, bua bukole buanyi budi bukumbajibua tshishiki mu butekete.’​—2 Kolinto 12:7-9.

Nunku, ntatu yetu kayena mua kujika anu musangu umue to. Kadi neyitupeteshe mushindu wa kuleja patoke mutudi tueyemena Tatu wetu wa mu diulu. (Yakobo 1:2-4) Nansha Yehowa Nzambi kayi mutujikijile dikenga dietu, tshidibi udi mua ‘kutuenzela njila wa kupandukila, bua [tuetu] tumanye mua kutantamena diteta’ edi. (1 Kolinto 10:13) Ebu mbualu bua mushinga wa bungi bua mudibu babikila Yehowa ne: ‘Nzambi wa busambi buonso, utu watusamba mu makenga etu onso.’ (2 Kolinto 1:3, 4) Nzambi udi mua kutupesha bionso bitudi nabi dijinga bua kutantamena ntatu ne tudi kabidi ne ditekemena dia muoyo wa tshiendelele.

Bible Dîyi dia Nzambi didi dilaya ne: Yehowa ‘neakupule tshinsonji tshionso ku mêsu kuabu; ne lufu kaluena luikalaku kabidi; madilu kaena ikalaku kabidi, nansha muadi, nansha kanyinganyinga kabidi.’ (Buakabuluibua 21:3, 4) Mbikukolele bua kuitaba ne: bantu nebasombe pa buloba buikala kabuyi ne makenga kabidi anyi? Bidi mua kukukolela bua kuitaba bualu ebu nangananga wewe muibidilangane ne nsombelu wa makenga mavule. Nansha nanku, Nzambi mmulaye bua kupikula bantu ku buôwa ne makenga ne dijinga diende edi nedikumbane kakuyi mpata.​—Yeshaya 55:10, 11.

[Bimfuanyi mu dibeji 9]

Bafumina mu makenga batangile ku disulakana