Nkonko ya babadi

Kunyima kua Mvula wa kabutu, Noa wakapatula nyunyu wa nkutshi mu buatu, nyunyu eu kupingana ne “katamba ka mutshi wa Olive.” Nkuepi kuvua nkutshi mupetele katamba ka mutshi aku?

Bible udi utuambila ne: ‘Mâyi akatamba kuvulangana pa buloba; ne mikuna mile yonso idi muinshi mua diulu yakabuikidibua.’ (Genese 7:19) Bu mukavua mâyi enda akepela, Noa wakatuma nyunyu wa nkutshi misangu isatu, ku lumingu musangu umue ku lumingu musangu umue. Musangu muibidi nkutshi wakapingana ne ‘katamba ka mutshi wa olive kabishi ku muinu, nunku Noa wakamanya ne: mâyi akavua makepe pa buloba.’​—Genese 8:8-11.

Bushuwa, bua mpindieu katuena bamanye bunene bua tshipapu tshia buloba tshivua mâyi a mvula mabuikile to, bualu bidi bimueneka ne: Mvula wa kabutu wakashintulula mushindu uvua buloba. Nansha nanku, bidi bisua kumueneka ne: mâyi avua mabuikile tshitupa tshinene tshia buloba, ke bualu kayi mitshi ya bungi yakafua. Kadi, bidi bimueneka kabidi ne: imue mitshi ivua mishale ne muoyo, nunku yakapeta mushindu wa kusampila kupatula ntonga mipiamipia pavua mâyi malue kukepela.

Mukanda mukuabu udi wamba bua mutshi wa olive ne: “Patubu baukosa, ntonga mipiamipia itu itoloka ku tshikuku tshiawu, nanku ntonga ayi itu ipatula tutamba tupiatupia tua mitshi tutue nansha ku tutanu. Mushindu eu ke utu kabidi mitshi ya olive ikadi pa kufua itoloka.” (The New Bible Dictionary) Mukanda mukuabu udi wamba kabidi ne: mutshi wa olive udi “anu bu utu kauyi ufua.” (The New Schaff-Herzog Encyclopedia of Religious Knowledge) Muntu nansha umue lelu ki mmumanye malu a bungi pa bidi bitangila disapalala dia mâyi, bu mudi malu a tshiepuepu ne a luya bidi mâyi aa mua kuikala nabi to. Ke bualu kayi katuena mua kumanya tshivua disapalala dia mâyi edi mua kuenzela mitshi ya olive anyi mitshi mikuabu nansha.

Kadi, mutshi wa olive wa muitu kawena mua kushala ne muoyo muaba wa mashika makole bu mutu mitshi idi pa mikuna mitumbuke to. Pa tshibidilu utu ukola miaba idi ne butumbuke bushadile ku bua metre 1 000, miaba itu luya nangananga lupite pa degre 10. Mukanda kampanda udi wamba ne: “Ke bualu kayi, pakamona Noa katamba kabishi ka mutshi, wakamanya ne: mâyi akavua enda akama too ne mu bibandabanda binene kabidi.” (The Flood Reconsidered) Pakapatula Noa nkutshi lumingu luakalonda, nkutshi kakapingana kabidi kudiye to, kulejabi ne: nyunyu eu wakasangana mitshi ya bungi ne miaba miume ivuaye mua kuikila.​—Genese 8:12.