Ditabuja dia mubedi didi mua kumuondapa anyi?

PATUTU tusama, tutu tukeba bua kupeta dikisha ne kabidi tukeba bua kutuondapabu. Pamuapa udi mua kuikala mumanye mudibu baleja mu Bible mushindu uvua Yezu Kristo muondape masama a mishindu yonso misangu ne misangu, upetesha bantu bavua basama dikisha. Kadi mmunyi muvua Yezu ufika ku diondopa bantu abu? Bible udi wamba ne: nku “bukole bua [Nzambi].” (Luka 9:42, 43, MMM; Bienzedi 19:11, 12) Nunku, nyuma muimpe wa Nzambi ke uvua wondapangana, kadi ki nditabuja dia muntu patupu to. (Bienzedi 28:7-9) Ke bualu kayi Yezu kavua ulomba babedi bua kulejabu ditabuja kudiye bua kushishabu kuondapibua to.

Kadi udi mua kudikonka ne: ‘Diondapangana dia mu bishima mmuanda wa kale mumane kupita anyi peshi bantu nebuondapibue kabidi mushindu uvua Yezu wondapangana kale au? Nditekemena kayi didibu ne bua kuikala nadi kudi bantu badi ne disama dikole anyi didi kadiyi ne buanga?’

Bible udi umvuija ne: mu bulongolodi bupiabupia bua Nzambi bua buakane, bukole bua Nzambi nebuondape kabidi bantu mu tshishima anu muvua Yezu muondapangane pavuaye pa buloba. Bantemu ba Yehowa ba muaba uudi nebikale ne disanka dia kukuleja tshikondo ne mushindu wakumbaja Nzambi bualu budi muondapi wa babedi wa muaba unudi nansha umue kayi mua kuenza: bua kujikija masama onso ne lufu kabidi. Bushuwa, Nzambi ‘neamine lufu tshiendelele.’​—Yeshaya 25:8.