“Mupika wa lulamatu” udi upita diteta bukole!

‘Tshikondo tshia dilumbuluisha kubangadi ku ba mu nzubu wa Nzambi tshiakulua.’​—1 PETELO 4:17.

1. Ntshinyi tshiakasangana Yezu pakakontololaye “mupika”?

 MU Pentekoste wa tshidimu tshia 33 bikondo bietu ebi, Yezu wakateka “mupika” kampanda bua kupeshaye “bena mudimu” bende biakudia mu tshikondo tshiakanyine. Mu 1914, Yezu wakasomba mu nkuasa wa bumfumu, ne kunyima kua mutantshi mukese wakatuadija kukontolola “mupika.” Bu muakasanganaye ba bungi ba mu kasumbu ka “mupika” eu batungunuke ne kudileja ‘bena lulamatu ne badimuke,’ Yezu wakamuteka “ku mutu kua bintu biende bionso.” (Matayo 24:45-47, NW) Kadi, kuvua kabidi mupika mubi, uvua kayi wa lulamatu anyi wa budimu to.

‘Mupika au mubi’

2, 3. ‘Mupika au mubi’ uvua mufumine penyi, ne mmunyi muakafikaye ku dikala nanku?

² Yezu wakakula bua mupika mubi diakamue kunyima kua yeye mumane kuakula bua “mupika wa lulamatu ne wa budimu.” Wakamba ne: ‘Biamba mupika au mubi munda munda ne: Mfumu wanyi kêna ulua katataka; biabangaye kukuma bapika nende, biadiaye bidia, bianuaye maluvu popamue ne badi bakuatshike maluvu, mfumu wa mupika au nealue dituku didiye kayi mutekemene ne pa dîba didiye kayi mumanye, [neamukengeshe ne dinyoka ditambe bubi], neamuteke mu luseke lua bena lubombo; muadi [wende] newikalemu ne kusumakana menu.’ (Matayo 24:48-51) Miaku ‘mupika au mubi’ idi ikoka ntema yetu ku mêyi akavua Yezu muambe pa bidi bitangila mupika wa lulamatu ne wa budimu. Bushuwa, kumpala ‘mupika mubi’ mmupatukile munkatshi mua mupika wa lulamatu. * Mmu mushindu kayi?

³ Kumpala kua 1914, bena mu kasumbu ka mupika wa lulamatu ba bungi bavua ne ditekemena dikole dia kudisangisha ne Musedianganyi mu diulu tshidimu atshi, kadi malu avuabu batekemene bikole aa kaakakumbana mu tshidimu atshi to. Bua bualu ebu ne bua makuabu kabidi, ba bungi bakateketa mu mikole ne bakuabu pabu bakashala ne tshiji tshikole. Bamue ba kudibu bakabanga ‘kukuma’ aba bavua bana babu ne mêyi a mukana, basomba ne “badi bakuatshike maluvu,” bitendelelu bia mu Bukua-Buena-Kristo.​—Yeshaya 28:1-3; 32:6.

4. Ntshinyi tshivua Yezu muenze ne ‘mupika mubi’ ne aba bonso badi baleje lungenyi lua buena lua mupika mubi eu?

⁴ Bantu aba bavua bena Kristo kumpala bakalua kumanyika bu ‘mupika mubi,’ ne Yezu wakabanyoka ne dinyoka ‘dikole.’ Mmu mushindu kayi? Wakababenga, ne bakajimija ditekemena diabu dia kuya mu diulu. Kadi kabakabutudibua diakamue to. Bavua ne bua kuanji kutantamena tshikondo tshia muadi ne kusumakana kua menu “pambelu mu midima,” pambelu ba tshisumbu tshia bena Kristo. (Matayo 8:12, MMM) Kutuadijila anu mu matuku au, bela manyi bakuabu bakese mbaleje lungenyi lubi lua muomumue, badileja mudibu bikale ‘mupika mubi.’ Bamue ba ku “mikoko mikuabo” mbabidikije e kushala pabu kabayi ne lulamatu. (Yone 10:16) Bena lukuna bonso ba Kristo aba badi “pambelu mu midima” ya mu nyuma ya muomumue.

5. Ntshinyi tshivua “mupika wa lulamatu ne wa budimu” muenze, bishilangane ne ‘mupika mubi’?

⁵ Tshidibi, “mupika wa lulamatu ne wa budimu” eu wakabuela pende mu mateta a muomumue ne avua makuate ‘mupika au mubi.’ Kadi pamutu pa kufika munda, bena mu kasumbu kende buobu bakadiakaja. (2 Kolinto 13:11) Dinanga didibu banange Yehowa ne bana babu diakakoleshibua. Bua muanda eu, bavua ‘dikunji  ne tshishindamenu bia malu malelela’ mu ‘matuku a ku nshikidilu’ a ndululu aa.​—1 Timote 3:15; 2 Timote 3:1.

Bansongakaji batshimbakane ne badimuke

6. (a) Mmunyi muvua Yezu mufuanyikije budimu bua kasumbu kende ka mupika wa lulamatu? (b) Kumpala kua 1914, mmukenji kayi uvua bena Kristo bela manyi bamanyishe?

⁶ Kunyima kua Yezu mumane kuakula bua “mupika wa lulamatu,” wakafila mifuanu ibidi bua kuleja bua tshinyi bamue bena Kristo bela manyi bavua mua kudileja bena lulamatu ne badimuke pavua eku bakuabu kabayi nanku. * Bua kufuanyikija tshidi kuikala ne budimu tshiumvuija, wakamba ne: “Bukalenge bua diulu nebufuanangane ne bansongakaji dikumi bavua bangate miendu yabo, baye kuakidila musedianganyi. Kadi munkatshi muabo, batanu bavua batshimbakane, batanu bakuabo badimuke. Batshimbakane kuangata miendu yabo, nanshabo kuangata manyi; badimuke kuangata bobo manyi mu biasu, pamue ne miendu yabo.” (Matayo 25:1-4, MMM) Bansongakaji dikumi aba badi batuvuluija bena Kristo bela manyi ba kumpala kua 1914. Bakenza makumi kupeta ne: Yezu Kristo, musedianganyi ukavua pabuipi ne kufika. Ke bualu kayi, ‘bakaya’ kuakidila musedianganyi, bayisha ne dikima se: “tshikondo tshia bantu ba bisamba bia bende” tshivua ne bua kujika mu 1914.​—Luka 21:24.

7. Ndîba kayi divua bena Kristo bela manyi benze anu bu ‘baye kulala,’ ne mbua tshinyi?

⁷ Bavua bambilemu. Tshikondo tshia bantu ba bisamba bia bende tshiakajika mu 1914, ne Bukalenge bua Nzambi buvua ku bukokeshi bua Kristo Yezu buakatuadija kukokesha. Kadi abi biakenzeka mu diulu didi kadiyi dimueneka. Pa buloba, bantu bakabanga kukenga bua “mulau” uvuabu badianjile kumanyisha. (Buakabuluibua 12:10, 12) Tshikondo tshia kubela diteta tshiakafika. Bu muvua bena Kristo bela manyi kabayi bumvua malu bimpe menemene, bakela meji ne: “musedianganyi uvua ujingakana.” Bu muvua meji mabashikile eku bena panu babaluisha, ba bungi bakatekesha mu maboko, bakuabu kulekela mene ne mudimu wa diyisha dia patoke uvuabu balongolola pa tshibidilu. Anu bu bansongakaji ba mu mufuanu au, bakatuadija “kubunga ne tulu, kulalabo” anu muakenza bena Kristo ba ku dîna bavua bapange lulamatu kunyima kua lufu lua bapostolo ba Yezu.​—Matayo 25:5, MMM; Buakabuluibua 11:7, 8; 12:17.

8. Ntshinyi tshiakafikisha ku lubila lua ne: “Musedianganyi ukadi ulua!” ne bena Kristo bela manyi bavua ne bua kuenza tshinyi?

⁸ Pashishe mu 1919 bualu kampanda kabuyi buelela meji buakenzeka. Tudi tubala ne: “Mundankulu, kuelabo lubila ne: ‘Musedianganyi ukadi ulua! Patukayi, nuye kumuakidila.’ Bansongakaji bonso kubika, kulongololabo miendu yabo.” (Matayo 25:6, 7, MMM) Anu pavua malu amueneka kaayi atoka, bakatuma dîyi bua kuenza mudimu! Mu 1918, Yezu, “mutumibue wa tshipungidi” wakalua ku ntempelo wa Yehowa wa mu nyuma bua kukontolola ne kukezula tshisumbu tshia Nzambi. (Malaki 3:1, NW) Mpindieu, bena Kristo bela manyi bavua ne bua kuya pambelu ne kusambakana nende mu lubanza lua pa buloba lua ntempelo au. Atshi tshivua tshikondo tshia bobu ‘kukenka.’​—Yeshaya 60:1, MMM; Filipoi 2:14, 15.

9, 10. Mu 1919, bua tshinyi bamue bena Kristo bavua “badimuke” ne bakuabu “batshimbakane”?

⁹ Kadi indila. Mu mufuanu au, bamue ba ku bansongakaji abu bavua ne lutatu kampanda. Yezu wakatungunuka wamba ne: “Batshimbakane kuambila badimuke ne: ‘Tupeshayiku tuanyi tunudi natu, bualu miendu yetu ikadi yamba kujima.’” (Matayo 25:8, MMM) Kuoku kakuyi mafuta, minda kayivua mua kutokesha to. Mafuta a muinda adi atuvuluija Dîyi dia Nzambi dia bulelela ne nyuma wende muimpe, bidi bipesha batendeledi balelela bukole bua kuikala batuadi ba  butoke. (Musambu 119:130; Danyele 5:14) Kumpala kua 1919, bena Kristo bela manyi ba budimu bavua bakebe ne tshisumi tshionso bua kujingulula dijinga dia Nzambi pa bidi bibatangila nansha muvuabu bapete butekete bua tshitupa tshîpi. Nunku, pakelabu lubila bua kukenka, bavua pabuipi bua kukenka.​—2 Timote 4:2; Ebelu 10:24, 25.

¹⁰ Kadi bamue bela manyi kabavua badilongolole bimpe bua kudipangisha amue masanka anyi kudienzejaku nansha muvuabu ne dijinga dikole dia kuikala ku luseke lua Musedianganyi to. Nunku pakafika tshikondo tshia kuditua mu mudimu wa kuyisha lumu luimpe, kabavua pabuipi to. (Matayo 24:14) Bakajinga mene kuimanyika mudimu wa binabu bena lukunukunu, balomba ne bamue ba kudibu mafuta abu. Mu mufuanu wa Yezu au, bansongakaji badimuke bakandamuna tshinyi? Bakamba ne: “Manyi aa kaena mua kutukumbana bonso to; ndayi kudi bapanyi, nudisumbile enu.” (Matayo 25:9, MMM) Bia muomumue, mu 1919 bena Kristo bela manyi ba lulamatu bakabenga kuenza tshintu kayi tshionso tshivua mua kutekesha bukole buabu bua kufila butoke. Bakapita diteta bukole.

11. Ntshinyi tshiakafikila bansongakaji batshimbakane?

¹¹ Yezu wakajikija bualu ebu ne: “[Bansongakaji batshimbakane] bamane kuya bua kusumba manyi, musedianganyi kufika; bansongakaji bavua badilongolole abo kubuela nende mu nzubu wa tshibilu tshia dibaka, kuinjilabo tshiibi. Ku shoo, bansongakaji bakuabo abo kufika pabo, kuelabo diyi ne: ‘Mukalenge, Mukalenge, tunzuluile!’ Awu kubandamuna ne: ‘Bulelela ndi nnuambila ne: tshiena munumanye to.’” (Matayo 25:10-12, MMM) Bushuwa, bamue kabavua badilongolole bimpe bua difika dia Musedianganyi to. Nunku bakabula mu diteta adi ne kupangilabu mushindu wa kubuela mu difesto dia dibaka dia mu diulu. Ndiakabi kayipu bunene nunku!

Mufuanu wa ntalanta

12. (a) Yezu wakenza mudimu ne tshinyi bua kuleja tshidi lulamatu lumvuija? (b) Muntu ‘wakaya ku luendu lule’ au nnganyi?

¹² Kunyima kua Yezu mumane kufuanyikija tshidi budimu, mpindieu udi ufila mufuanu mukuabu bua kumvuija tshidi lulamatu. Wakamba ne: “Muntu kampanda uvua uya ku luendu lule, kubikilaye bena mudimu bende, kubashila bintu biende. Kubapeshaye bintu bia kuenduluka nabio, ewu mpalata itanu, mukuabo ibidi, munga umue, bilondeshile lungenyi luvua nalu muntu ne muntu, pashishe kuyaye.” (Matayo 25:14, 15, MMM) Muntu wa mu mufuanu eu n’Yezu nkayende, ‘wakaya ku luendu lule’ pakabandaye mu diulu mu tshidimu tshia 33 bikondo bietu ebi. Kadi kumpala kua kubandaye mu diulu, wakashila bayidi bende ba lulamatu “bintu biende.” Bidi bisua kumvuija tshinyi?

13. Mmunyi muvua Yezu mulongolole budimi bunene bua mudimu ne wakamba mêyi kayi a dianyishila “bena mudimu bende” bua kuendulukabu ne bintu biende?

¹³ Mu mudimu wende wa pa buloba, Yezu wakabanga kulongolola budimi bunene bua mudimu pa kuyisha lumu luimpe lua Bukalenge mu ditunga dijima dia Isalele. (Matayo 9:35-38) Kumpala kua ‘kuyaye ku luendu lule,’ wakafila budimi abu kudi bayidi bende ba lulamatu, wamba ne: ‘Yayi bienu, nuvuije ba bisamba bionso bayidi, nubabatize mu dîna dia Tatu ne mu dia Muana ne mu dia nyuma muimpe; [nubalongeshe] mua kuenza malu onso angakanuambila; ne  monayi, ndi nenu matuku onso too ne ku nshikidilu kua tshikondo etshi.’ (Matayo 28:18-20) Mêyi a Yezu aa adi aleja ne: wakanyishila “bena mudimu bende” bua kuendulukabu ne bintu abi too ne papinganaye, “bilondeshile lungenyi luvua nalu muntu ne muntu.”

14. Bua tshinyi bonso kabavua ne bua kuenduluka mushindu wa muomumue?

¹⁴ Mêyi aa adi aleja ne: bena Kristo bonso ba mu bidimu lukama bia kumpala kabavua mu nsombelu ya mishindu ya muomumue to. Tshilejilu, Paulo ne Timote bavua ne mushindu wa kuenza kuenzelamu mudimu wa kuyisha ne kulongesha. Nsombelu wa bakuabu uvua mua kuikala pamuapa ubapangisha bua kuenza mudimu wa bungi. Tshilejilu, bamue bena Kristo bavua bapika, ne bakuabu bena tusamasama, bakulakaje, anyi pamuapa bavua ne majitu a mu dîku. Bushuwa, ki mbayidi bonso bavua ne mushindu wa kuenza imue midimu ya pa buayi ya mu tshisumbu to. Bakaji bela manyi ne bamue balume bela manyi kabavua balongesha mu tshisumbu to. (1 Kolinto 14:34; 1 Timote 3:1; Yakobo 3:1) Kadi nansha bikale mu nsombelu kayi, bena Kristo bela manyi bonso, balume ne bakaji bavua babapeshe mudimu wa kuenduluka. Bavua ne bua kuenza mudimu wa bena Kristo bilondeshile nsombelu wabu. Ke tshidi binabu ba lelu benza kabidi.

Tshikondo tshia diteta tshidi tshituadija!

15, 16. (a) Ndîba kayi divua tshikondo tshikumbane bua kubadika bintu? (b) Mmishindu kayi mipiamipia ya ‘kuenduluka’ ivuabu bapeshe bena lulamatu?

¹⁵ Mufuanu udi utungunuka ne: “Kunyima kua matuku, mfumu wa bena mudimu aba kufika, kutuadijaye kubadika nabo bintu.” (Matayo 25:16, MMM) Mu 1914, tshikondo tshile kunyima kua tshidimu tshia 33 bikondo bietu ebi, dikalaku dia Kristo mu bukokeshi bua Bukalenge buende diakatuadija. Bidimu bisatu ne tshitupa pashishe, mu 1918, wakalua mu ntempelo wa Nzambi wa mu nyuma ne kukumbajaye mêyi a Petelo aa: ‘Bualu bua tshikondo tshia dilumbuluisha kubangadi ku ba mu nzubu wa Nzambi tshiakulua.’ (1 Petelo 4:17; Malaki 3:1) Tshivua tshikondo tshia kubadika bintu.

¹⁶ Ntshinyi tshivua bapika, bana babu ne Yezu benze ne “ntalanta” ya Mfumu? Kubangila  mu 33 bikondo bietu ebi too ne bidimu bia kumpala kua tshidimu tshia 1914, bamue bakenza mudimu mukole wa ‘dienduluka’ eu bua Kristo. (Matayo 25:16) Nansha mu mvita ya kumpala ya buloba bujima, bavua baleje dijinga dikole dia kusadila Mfumu. Mpindieu, bivua biakanyine bua kupesha bena lulamatu mishindu mipiamipia ya ‘kuenduluka.’ Dîba dia nshikidilu wa tshikondo etshi divua difike. Bavua ne bua kuyisha lumu luimpe pa buloba bujima. ‘Bintu bia pa buloba bia kunowa’ bivua ne bua kunowibua. (Buakabuluibua 14:6, 7, 14-16) Bidi bikengela kumanya muaba udi bena mu kasumbu ka blé ba ndekelu ne kusangisha “musumba munene” wa mikoko mikuabu.​—Buakabuluibua 7:9; Matayo 13:24-30.

17. Mmunyi muvua bena Kristo bela manyi ba lulamatu ‘babuele, basanke pamue ne mukalenge wabu’?

¹⁷ Tshikondo tshia dinowa ntshikondo tshia disanka. (Musambu 126:6) Nunku bidi biakanyine bua se: pavua mu 1919 Yezu mupeshe bana babu bela manyi ba lulamatu bujitu bunene pa kuamba ne: ‘Udi mundamate mu bintu bikese, nenkuteke mu bivule. Buela usanke pamue ne mukalenge webe!’ (Matayo 25:21, 23) Kabidi, katuena mua kukokesha bua kufuanyikija bunene bua disanka dia Mukalenge mupiamupia eu wa Bukalenge bua Nzambi to. (Musambu 45:1, 2, 6, 7) Mupika wa lulamatu udi upeta pende disanka edi pa kuleja mpala wa Mukalenge ne kuvudija bintu biende pa buloba. (2 Kolinto 5:20) Disanka dia mupika eu didi dimueneka mu mêyi a tshiprofete adi mu Yeshaya 61:10 aa: ‘Nentambe kusanka mu Yehowa, mutshima wanyi neutambe kusanka mu Nzambi wanyi; bualu bua yeye wakunduatshisha bivualu bia lupandu.’

18. Bua tshinyi bamue bakabula mu diteta, ne mbipeta kayi biakapatuka?

¹⁸ Diakabi, bakuabu diteta edi diakabapita bukole. Tudi tubala ne: “Muena mpalata umue usemena pende, kuambaye ne: ‘Mukalenge, ndi mumanye ne: udi muntu wa malu makole: udi unowa paudi kuyi mukune, kabidi ukunguija paudi kuyi mumiamine. Mvua nkutshina, ke meme kuya kusokoka mpalata webe mu buloba. Nyeye ewu, angata tshintu tshiebe.’” (Matayo 25:24, 25, MMM) Bia muomumue, bamue bena Kristo bela manyi kabavua ‘benduluke’ to. Kumpala kua 1914, kabakamanyisha bakuabu bualu bua ditekemena diabu ne disanka dionso to, ne kabakajinga mene kutuadija kumanyisha ditekemena edi mu 1919 to. Ntshinyi tshiakenza Yezu bua kapeja kabu aku? Wakabanyenga midimu yonso ya pa buayi ivuabu nayi. Wakabela ‘pambelu mu midima, muaba udi kudila kua muadi ne kusumakaja kua mênu.’​—Matayo 25:28, 30, MMM.

Diteta didi ditungunuka

19. Mmu mushindu kayi mudi diteta ditungunuka, ne ntshinyi tshidi bena Kristo bela manyi bonso badisuike bua kuenza?

¹⁹ Bulelela, ba bungi ba ku bantu bavua balue bapika bela manyi ba Kristo mu tshikondo tshia ku nshikidilu kabavua kabidi basadila Yehowa pakabanga Yezu dikontolola diende mu 1918 to. Bavua bapangile mushindu wa kubelabu diteta anyi? Tòo. Diteta diakatuadija anu mu 1918 ne mu 1919, pavua kasumbu ka mupika wa lulamatu ne wa budimu kapite diteta bukole. Bena Kristo bela manyi mbatungunuka ne kubakontolola too ne padi tshimanyishilu tshidibu babatua tshilua tshia kashidi. (Buakabuluibua 7:1-3) Bu mudi bena Kristo bela manyi bamanye bualu ebu, badi badisuike bua kutungunuka ne ‘kuenduluka’ ne lulamatu luonso. Mbadisuike bua kuikala badimuke, balame mafuta a bungi bua butoke buikalaku bukumbane. Mbamanye bimpe ne: padi yonso wa kudibu ufika ku ndekelu kua muoyo wende mu lulamatu luonso, Yezu neamuakidile muaba wa kusombela, mu diulu.​—Matayo 24:13; Yone 14:2-4; 1 Kolinto 15:50, 51.

20. (a) Mikoko mikuabu mmidisuike bua kuenza tshinyi lelu’eu? (b) Ntshinyi tshidi bena Kristo bela manyi bamanye?

²⁰ Musumba munene wa mikoko mikuabu mmuidikije bana babu bela manyi. Bena mu musumba eu mbajadike ne: dimanya dia majinga a Nzambi didi dibambika bujitu bunene. (Yehezekele 3:17-21) Ke bualu kayi, ku diambuluisha dia Dîyi dia Yehowa ne nyuma muimpe, bobu pabu mbatungunuke ne kulama mafuta a bungi ku diambuluisha dia dilonga ne didisangisha ne bena Kristo nabu. Ne badi batokesha ne butoke buabu, benza mudimu wabu wa kuyisha ne kulongesha, tuambe ne: ‘benduluka’ pamue ne bana babu bela manyi. Kadi bena Kristo bela manyi mbamanye bimpe ne: buobu ke bavua babapeshe ntalanta. Buobu ke bikala Mukalenge ne bua kuebeja bua mushindu udibu balama bintu biende bidi pa buloba. Nansha mudibu bakese pa buloba, kabena mua kulekela musumba munene bujitu buabu to. Bua bualu ebu, bena mu kasumbu ka “mupika wa lulamatu ne wa budimu” badi batungunuka ne kuikala bantunga-mulongo mu mudimu wa dienduluka wa Mukalenge, bikale ne dianyisha divule bua dikuatshisha dia bena lulamatu ba mu musumba munene. Bena mu musumba munene mbamanye bimpe bujitu budi nabu bana babu bela manyi ne kabidi mbamanye mudibi diakalenga kudibu dia kuenza mudimu ku butangidi buabu.

21. Mmubelu kayi udi utangila bena Kristo bonso kutuadijila mu 1919 too ne mu matuku etu aa?

²¹ Nunku, nansha mudi mifuanu ibidi eyi ituleja mianda ivua mienzeke mu tshidimu tshia 1919 ne pabuipi ne tshidimu etshi, idi itangila bena Kristo bonso ba lulamatu ba mu matuku a ku nshikidilu aa. Mu mushindu eu, nansha mudi mubelu uvua Yezu mufile ku ndekelu kua mufuanu wa bansongakaji dikumi utangila kumpala bena Kristo bela manyi ba kumpala kua 1919, tshidibi udi utangila muena Kristo yonso mu matuku a ku nshikidilu aa. Nunku tuetu bonso tutumikile mêyi a Yezu aa: “Ikalayi batabale, bualu kanuena bamanye dituku ne diba.”​—Matayo 25:13, MMM.

[Mêyi adi kuinshi]

Udi mua kumvuija anyi?

• Ndîba kayi divua Yezu mukontolole bayidi bende, ne ntshinyi tshiakasanganaye?

• Bua tshinyi bamue bena Kristo bela manyi bavua bapete lungenyi lua ‘mupika mubi’?

• Mmunyi mutudi mua kuleja ne: tudi badimuke mu nyuma?

• Mmu mushindu kayi mutudi mua kutungunuka ne kuidikija bana babu ne Yezu bela manyi ba lulamatu pa kutungunuka ne ‘kuenduluka’?

[Nkonko ya dilonga]

[Kazubu mu dibeji 16]

YEZU UDI ULUA DÎBA KAYI?

Mu Matayo nshapita wa 24 ne wa 25, badi bamba ne: Yezu udi “ulua” mu ngumvuilu mishilangane. Kabiena bikengela bua yeye kumbuka muaba udiye musombele bua kushishaye ‘kulua’ to. Kadi udi “ulua” mu ngumvuilu wa se: udi utangija ntema yende kudi bantu anyi kudi bayidi bende, misangu ya bungi bua diambuluisha. Nunku mu 1914 ‘wakalua’ bua kutuadija dikalaku diende bu Mukalenge ukadibu bamane kusombesha mu nkuasa wa bumfumu. (Matayo 16:28; 17:1; Bienzedi 1:11) Mu 1918 ‘wakalua’ bu mutuadi wa mukenji wa tshipungidi, kutuadijaye diakamue kulumbuluisha aba badi badiamba mudibu benzela Yehowa mudimu. (Malaki 3:1-3; 1 Petelo 4:17) Ku Armagedone, ‘nealue’ bua kubutula baluishi ba Yehowa.​—Buakabuluibua 19:11-16.

Dilua (anyi difika) didibu bakule bualu buadi mu Matayo 24:29-44 ne 25:31-46 nedienzeke mu tshikondo tshia “dikenga dinene.” (Buakabuluibua 7:14) Ku lukuabu luseke, dilua didibu bambe misangu ya bungi mu Matayo 24:45 too ne 25:30 didi diodi ditangila tshikondo tshia kutuadijila mu 1918 tshidi Yezu ulumbuluisha aba badi badiamba mudibu bayidi bende. Nanku kabiena bia meji bua kuamba tshilejilu ne: difuta mupika wa lulamatu, dilumbuluisha dia bansongakaji batshimbakane ne dia mupika muena bufuba uvua musokoke ntalanta ya Mfumu nebienzeke ‘palua’ Yezu ku dikenga dinene nansha. Abi bidi mua kumvuija anu bu se: nebasangane bela manyi ba bungi kabayi ne lulamatu mu tshikondo atshi ne bua bualu ebu nebikengele kupingaja bakuabu pa muaba wabu. Pabi Buakabuluibua 7:3 udi uleja se: tshikondo atshi bela manyi bapika ba Kristo nebikale bakadi bamane kubatua “tshimanyinu” bua kashidi.

[Tshimfuanyi mu dibeji 14]

‘Mupika mubi’ kakapeta mabenesha mu 1919 to

[Tshimfuanyi mu dibeji 15]

Bansongakaji badimuke bavua pabuipi pakafika musedianganyi

[Tshimfuanyi mu dibeji 17]

Bapika ba lulamatu bavua baditue mu ‘dienduluka’

Mupika mutshimbakane kavua muenze yeye nanku to

 [Bimfuanyi mu dibeji 18]

Bela manyi ne “musumba munene” mbatungunuke ne kutokesha ne butoke buabu