Nkonko ya babadi
Nkonko ya babadi
Bu muvua bena Lewi kabayi ne bumpianyi mu Isalele wa kale, mmunyi muvua Hanamele muena Lewi mua kupangisha muanabu Yelemiya uvua pende muena Lewi budimi mudi Yelemiya 32:7 uleja?
Yehowa wakambila Alona bualu buvua butangila bena Lewi ne: ‘Wewe kuena ne bumpianyi mu buloba buabu, wewe kuena ne tshitupa munkatshi mua [bena Isalele].’ (Nomba 18:20) Nansha nanku, bavua bapeshe bena Lewi misoko 48 mu Buloba Bulaya buonso bujima mikale ne mpata ya kudishila bimuna. Musoko wa tshilelelu wa ba Yelemiya uvua wa Anatota, umue wa ku misoko ivuabu bapeshe “bana ba Alona bakuidi.”—Yoshua 21:13-19; Nomba 35:1-8; 1 Kulondolola 6:54, 60.
Mbaleje mu Lewitiki 25:32-34 muvua Yehowa mufile mikenji misunguluke ya tshivua ne bua kuenzeka bua ‘[bukokeshi bua] kupikula’ bintu bivua bena Lewi ne bua kuikala nabi. Bidi bimueneka ne: dîku ne dîku dia muena Lewi yonso divua mua kuikala ne bukenji bua bumpianyi pa bintu kampanda bisunguluke, pa mushindu wa kukuata nabi mudimu ne wa kubipana. Bukenji bua bumpianyi abu buvua anu mua kutangila kabidi nansha dipana ne dipikula dia bintu bia muntu uvua muena Lewi. * Mu malu a bungi, bena Lewi bavua bapeta bintu, benza nabi kabidi malu anu muvua bena Isalele bakuabu bonso benza.
Pamu’apa bukenji bua kuangata bintu bia muena Lewi bia mushindu eu bavua babupetela anu ku bintu bia bumpianyi bua dîku diabu. Kadi bua ‘[bukenji bua] dipikula’ dia bintu bavua babuanyishile anu bena Lewi munkatshi muabu nkayabu. Kabidi bidi bimueneka se: dipana ne disumba dia maloba divua anu bua mpangu ivua pambelu mu misoko ivuabu, bualu bu muvua ‘madimi [a didishila bimuna avua] ku matshika a misoko yabu’ mikale ‘bumpianyi buabu tshiendelele,’ kabavua ne bua kuapana to.—Lewitiki 25:32, 34.
Nunku mbimueneke patoke ne: budimi buvua Yelemiya musumbe kudi Hanamele buvua bua mushindu eu buvua muntu mukuabu mua kulua muenabu anu pavuaye ubupikula. Buvua mua kuikala bua munda mua musoko. Yehowa nkayende uvua mujadike ne: “budimi” buine abu buvua bua Hanamele, ne Yelemiya uvua ne ‘bukenji bua kubupikula.’ (Yelemiya 32:6, 7) Yehowa wakangata bualu bua dipikula dia budimi ebu bu tshifuanyikijilu bua kushindika bualu buvuaye mulaye bua se: bena Isalele bavua mua kuangatulula bumpianyi buabu bua maloba abu panyima pa dipingana diabu bafumina mu bupika mu Babulona.—Yelemiya 32:13-15.
Kakuena tshintu nansha tshimue tshidi tshileja ne: Hanamele uvua mupete budimi bua mu Anatota ebu mu njila mubi to. Kakuena kabidi tshidi tshileja ne: uvua mushipe mukenji wa Yehowa pavuaye muambile Yelemiya bua kusumba budimi bua mu Anatota, anyi Yelemiya muenze tshidibamba mudipe bukenji bua dipikula bua kusumba budimi abu to.—Yelemiya 32:8-15.
[Mêyi adi kuinshi]
^ tshik. 4 Mu bidimu lukama bia kumpala bia bikondo bietu ebi, Bânaba muena Lewi wakapana budimi buende yeye kufila makuta akapetaye bua kuambuluisha nawu balongi ba Kristo ba mu Yeruzalema bavua mu dikenga. Budimi abu buvua pamu’apa mu Palestine anyi mu Kupulio. Anyi pamu’apa tshivua anu katupa ka buloba bua dijikila bantu kavua Bânaba mupete lua pabuipi ne Yelushalema.—Bienzedi 4:34-37.