Didia dia Mukalenge badi badisekelela mushindu kayi?

BUA kumvuija malu a bungi pa bidi bitangila mua kusekelela Didia dia Mukalenge, mupostolo muena Kristo Paulo mmufunde ne: “Bualu budi Mfumu mundongeshe ke bobu bundi panyi munulongeshe ebu ne: Mfumu Yezu, butuku buvuabo bamufile mu bianza bia bantu, kuangataye diampa, [kusakidilaye Nzambi], kuditshibula, wamba ne: ‘Etshi mmubidi wanyi mufila bualu buenu; nuikale nuenza nanku bua kumvuluka.’ Bia muomumue kabidi ne kunyima kua didia, kuangataye dikopo wamba ne: ‘Dikopo edi ke Tshiovo tshipiatshipia tshia mashi anyi; misangu yonso inudi nudinua, nuikale nuenza nanku bua kumvuluka.’ Bualu misangu yonso inudi nudia diampa edi ne nunua dikopo edi, nudi numanyisha lufu lua Mfumu too ne papinganaye.”​—1 Kolinto 11:23-26, Mukanda wa Mvidi Mukulu [Katolike, MMM].

Bilondeshile mêyi a Paulo, Yezu wakabanjija Didia dia Mukalenge “butuku buvuabo bamufile” kudi Yudasa Isakaliote mu bianza bia balombodi ba tshitendelelu tshia bena Yuda bavua benzeje bena Lomo bua kupopela Kristo ku mutshi. Didia adi diakenzeka dilolo mu Dinayi dia matuku 31 a ngondo muisatu, mu 33 bikondo bietu ebi. Yezu wakafuila pa mutshi wa makenga mu Ditanu dia dituku 1 dia ngondo muinayi mu mapingaja. Bu muvua mbadilu wa matuku wa bena Yuda muikale wa diabu dituku dimue dituadija ku dilolo ne dishikila ku dilolo dia dituku dikuabu, nanku dituku diakenzabu Didia dia Mukalenge dia 14 Nisana mu 33 ke dituku dine diakalua lufu lua Yezu Kristo kabidi.

Bavua badia diampa ne mvinyo bavua ne bua ‘kuikala benza nanku’ bua kuvuluka Yezu. Bilondeshile Bible mukuabu, Yezu wakamba ne: “Enzayi nunku bu tshivulukilu tshianyi.” (1 Kolinto 11:24, Bible de Jérusalem) Batu babikila kabidi Didia dia Mukalenge ne: Tshivulukilu tshia lufu lua Kristo.

Bua tshinyi kuenza Tshivulukilu tshia lufu lua Yezu?

Bua kupeta diandamuna dia lukonko elu mbimpe kumanya tshidi lufu lua Yezu lumvuija. Yezu wakafua bu mubingishi munene wa mudi Yehowa muakanyine bukokeshi ku mutu kua bionso. Ke kutuishaye Satana mudiye muena dishima bua muakabandaye bantu ne: badi basadila Nzambi anu bua masanka abu. (Yobo 2:1-5; Nsumuinu 27:11) Kabidi Yezu anu bua lufu luende yeye uvua muntu mupuangane, ‘mmufile muoyo wende bua kupikula nawu bantu ba bungi.’ (Matayo 20:28) Pavua Adama muenzele Nzambi mpekatu, wakajimija muoyo mupuangane uvuaye nawu ne diakalenga dia kushala ne muoyo kashidi pavuaye utumikila Nzambi. Kadi ‘Nzambi wakatamba  kusua ba pa buloba, yeye wakabapa Muanende umuepele mulela bua muntu yonso wamuitabuja kafu biende, kadi ikale ne muoyo wa tshiendelele.’ (Yone 3:16) Bulelela, ‘difutu dia bubi ndufu, kadi dipa dia luse dia Nzambi mmuoyo wa tshiendelele mu Kristo Yezu Mukalenge wetu.’​—Lomo 6:23.

Nunku lufu lua Yezu Kristo ludi lumvuija dinanga dia mishindu ibidi mipite bunene: dinanga dia bungi didi Yehowa muleje bukua-bantu padiye mufile Muanende, ne dinanga dia kudilambula bua bakuabu didi Yezu muleje bukua-bantu pa kuditabila nkayende bua kubafuila. Tshivulukilu tshia lufu lua Yezu tshidi tshitumbisha mishindu ibidi ya dinanga eyi. Bu mudibu batuleje tuetu dinanga edi, katuenaku ne bua kuleja petu dianyisha bua bualu buadi anyi? Umue mushindu wa kuenza nanku ngua kuikalaku dîba dia kusekelela kua Didia dia Mukalenge.

Tshidi diampa ne mvinyo biumvuija

Pakabanjija Yezu Didia dia Mukalenge, wakangata diampa ne dikopo dia mvinyo mukunze bu bimanyishilu anyi bilejilu. Yezu wakangata diampa, ‘pakasakidilaye Nzambi, wakaditshibula, wakamba ne: Edi [diampa] didi [diumvuija] mubidi wanyi wakanupebua bualu buenu.’ (1 Kolinto 11:24) Diampa adi bavua baditshibula bua kumona mua kudiabanya ne kudidia bualu divua diume dia ditshibulukangana, dienza anu ne bukula ne mâyi kamuyi luevene anyi buanga bua mampa. Mu Mukanda wa Nzambi, luevene ludi tshimfuanyi tshia mpekatu. (Matayo 16:11, 12; 1 Kolinto 5:6, 7) Yezu kavua ne mpekatu to. Ke pavua mubidi wende mupuangane wa buntu mulue mulambu mukumbane wa kupikula nawu bantu. (1 Yone 2:1, 2) Nanku mbiakanyine menemene bua diampa didi tshilejilu tshia mubidi wa buntu wa Kristo uvua kauyi mpekatu kuikaladi kadiyi diela luevene!

Yezu wakela kabidi Nzambi tuasakidila bua dikopo dia mvinyo mukunze kayi musambakaja ne kantu kakuabu e kuamba ne: “Dikopo edi didi tshipungidi tshipiatshipia, tshijadikibue ku mashi anyi.” (1 Kolinto 11:25, MML) Mvinyo mukunze uvua mu dikopo udi umvuija mashi a Yezu. Bu muvua mashi a balume ba ngombe ne a mbuji ajadika bujalame bua tshipungidi tshia Mikenji tshivua Nzambi mudie ne tshisamba tshia Isalele mu 1513 kumpala kua bikondo bietu ebi, mashi akapuekesha Yezu pakafuaye akavuija kabidi tshipungidi tshipiatshipia tshijalame.

Badi ne bua kudia bimanyishilu mbanganyi?

Bua kujadika badi bakumbanyine kudia bimanyishilu bia mu Tshivulukilu, tudi ne bua kumvua bimpe tshidi tshipungidi tshipiatshipia ne bantu badi batshidie. Bible udi wamba ne: ‘Yehowa udi wamba ne: Monayi, mu matuku alualua, nempunge tshipungidi tshipiatshipia ne bena Isalele ne bena Yuda. Nenteke mikenji yanyi munda muabu, nenyifunde mu mitshima yabu; meme nengikale Nzambi wabu, ne bobu nebikale bantu banyi. Nembabuikidile mibi yabu, ne tshiena mvuluka malu mabi abu kabidi.’​—Yelemiya 31:31-34.

Tshipungidi tshipiatshipia tshidi tshiambuluisha bua kudia malanda kampanda a pa buawu ne Yehowa Nzambi. Anu bua tshipungidi etshi, kasumbu kampanda ka bantu kadi kalua bantu bende, yeye ulua Nzambi wabu. Mikenji ya Yehowa mmifunda munda muabu, mu mioyo yabu, kabidi too ne ba pambelu pa tshisa tshia bena Yuda batengula mu mubidi badi pabu mua kubuela mu malanda a tshipungidi tshipiatshipia ne Nzambi. (Lomo 2:29) Luka uvua pende mufundi wa Bible udi ufunda bua dijinga dia Nzambi dia ‘kumueneka kudi bisamba bia bende bua kusungula munkatshi muabu bantu bua kuikalabu ne dîna diende.’ (Bienzedi 15:14) Bilondeshile 1 Petelo 2:10, ‘kale, kabavua tshisa, kadi mpindieu badi tshisamba tshia [Nzambi].’ (MMM) Mukanda wa Nzambi udi ubabikila bu ‘Isalele wa Nzambi,’ mmumue ne: Isalele wa mu nyuma. (Galatia 6:16; 2 Kolinto 1:21) Nanku tshipungidi tshipiatshipia ntshipungidi tshidi pankatshi pa Yehowa Nzambi ne Isalele wa mu nyuma.

 Butuku bua ndekelu buvua Yezu musombe ne bapostolo bende, Yezu nkayende wakenza kabidi nabu tshipungidi tshia mushindu mukuabu. Wakabambila ne: “Ndi ndia nenu tshipungidi, anu bu mudi Tatu wanyi mudie nanyi tshipungidi, bua bukalenge.” (Luka 22:29, NW) Etshi ntshipungidi tshia Bukalenge. Bungi bua bantu bapange bupuangane badibu bangate mu Bukalenge ebu mbantu 144 000. Padibu babishibua ku lufu baya mu diulu, nebikale bakalenge ne bakuidi bakokesha ne Kristo. (Buakabuluibua 5:9, 10; 14:1-4) Nunku, badi mu tshipungidi tshipiatshipia ne Yehowa Nzambi badi kabidi mu tshipungidi tshia Bukalenge ne Yezu Kristo. Anu bobu abu nkayabu ke badi bakanyine bua kudia bimanyishilu bia mu Didia dia Mukalenge.

Mmushindu kayi udi badi ne bukenji bua kudia bimanyishilu bia mu Tshivulukilu bamanya ne: badi ne malanda a mushindu wa pa buawu ne Nzambi, kabidi se: badi bapianyi pamue ne Kristo? Paulo mmumvuije ne: ‘Nyuma muimpe muine udi mumanyishanganyi ne nyuma yetu [anyi meji etu] ne: Tuetu tudi bana ba Nzambi. Ne bituikala bana, tudi bapianyi kabidi; bapianyi ba Nzambi, ne bapianyi tshiapamue ne Kristo: bituakenga nende, mbua tuetu tutumbishibue nende.’​—Lomo 8:16, 17.

Nzambi udi wela bapianyi ba Bukalenge pamue ne Kristo aba manyi ku diambuluisha dia nyuma wende muimpe, nansha bukole buende buenzeji. Nyuma udi ubashindikila ne: badi bapianyi ba Bukalenge menemene. Udi ukuna munda mua bena Kristo bela manyi ditekemena dia muoyo wa mu diulu. Badi badiumvua ne: bobu menemene ke badi Bible wambila bionso bidiye wamba bua muoyo wa mu diulu. Kabidi, mbanyishe bua kupangila biabu bionso bia pa buloba, nansha muoyo wa pa buloba ne malunda ne malela. Nansha bena Kristo bela manyi a nyuma bamone ne: muoyo wa pa buloba bukudimuna mparadizu newikale mupite bulengele, bobu kabena bautekemena to. (Luka 23:43) Lungenyi elu ki ndufumine ku malongesha a dishima a mu bitendelelu to, kadi nku bukole bua nyuma wa Nzambi udi ubapetesha ditekemena dia muoyo wa mu diulu didibu kabayi mua kushintulula, ke padibu badia bimanyishilu bia mu Tshivulukilu babidia ne kadila.

Kadi bikala muntu kayi mujadike menemene ne: udi mu tshipungidi tshipiatshipia ne tshipungidi tshia Bukalenge? Tuambe tshinyi bikala nyuma wa Nzambi kabidi kayi mumumanyishe ne: udi mupianyi pamue ne Kristo? Apu nebikale bualu bubi bua yeye kudia bimanyishilu bia mu Tshivulukilu. Bushuwa, Nzambi udi mua kunyingalala bikole bikala muntu mudileje yeye muine ku bukole mudiye mubikidibue bua kuikala mukalenge ne muakuidi mu diulu pabi kabayi bamumanyishe bualu bua mushindu eu to.​—Lomo 9:16; Buakabuluibua 22:5.

Lufu lua Yezu ndua kuvuluka misangu bungi munyi?

Badi ne bua kusekelela tshivulukilu tshia lufu lua Yezu lumingu luonso nansha mene pamuapa dituku dionso anyi? Bulelela, Kristo wakabanjija Didia dia Mukalenge dituku diakaluabu kumushipa kayi ne tshilumbu dia Pasaka wa bena Yuda (Kupita kua Yehowa). Pasaka au uvuabu badia anu musangu umue ku tshidimu (dia matuku 14 a ngondo wa Nisana) uvua tshivulukilu tshia dipatuka dia Isalele mu bupika bua mu Ejipitu. (Ekesode 12:6, 14; Lewitiki 23:5) Nunku tudi ne bua kusekelela tshivulukilu tshia lufu lua ‘Kristo, mulambu wetu wa kupita kua Yehowa,’ anu musangu umuepele ku tshidimu, ki nku lumingu anyi ku dituku dionso nansha. (1 Kolinto 5:7) Padi bena Kristo basekelela Didia dia Mukalenge, badi badienza mushindu wa muomumue ne wakadienza Yezu pavuaye mudibanjije.

Kadi ntshinyi tshidi Paulo usua kuamba padiye wamba ne: “Misangu yonso inudi nudia diampa edi ne nunua dikopo edi, nudi numanyisha lufu lua Mfumu too ne papinganaye”? (1 Kolinto 11:26, MMM) Mu mvese eu Paulo uvua muangate muaku udi umvuija “tshikondo tshionso tshinua-,” anyi “dîba dionso.” Nunku, uvua wamba  ne: dîba dionso divua bena Kristo bela manyi badia bimanyinu bia Tshivulukilu, bavua ne bua kumanyisha ditabuja divuabu nadi mu mulambu wa Yezu wa bupikudi.

Bena Kristo bela manyi bavua ne bua kuenza Tshivulukilu tshia lufu lua Kristo ‘too ne pavuaye upingana.’ Tshibilu etshi tshivua ne bua kushala tshienzeka too ne dîba divua Yezu ufika bua kuangata balongi bende kuya nabu mu diulu pa kubabisha ku lufu ne muoyo wa mu nyuma tshikondo tshia “dilua” diende. (1 Tesalonike 4:14-17) Bualu ebu budi bumvuangana ne mêyi avua Kristo muambile bapostolo bende 11 ba lulamatu ne: ‘Bingaya ne binganulongoluela muaba, nempingane kabidi, nennuangate kundi meme muine, bua kundi ngikala, nuenu nenuikalaku kabidi.’​—Yone 14:3.

Tshivulukilu tshidi ne mushinga kayi kuudi?

Mbimpe kudia bimanyishilu bia mu Tshivulukilu bua mulambu wa Yezu kushishawu kubuikila mibi yetu ne tuetu kupeta muoyo wa kashidi pa buloba anyi? Tòo. Kakuena tshidi tshileja mu Bible ne: bantu bavua batshina Nzambi, bu mudi Noa, Abalahama, Sala, Isaka, Lebeka, Yosefe, Mose, ne Davidi pabikabu ku lufu pa buloba apa nebadiaku bimanyishilu ebi to. Pabi, bobu ne bakuabu bonso badi bajinga kupeta muoyo wa kashidi pa buloba nebikale ne bua kuleja ditabuja diabu dia Nzambi ne Kristo ne dia mulambu wa kutupikula nawu udi Yehowa mutulongoluele. (Yone 3:36; 14:1) Bua kupeta muoyo wa kashidi, wewe pebe udi ne bua kuleja ditabuja dia mushindu eu. Dibuela diebe dia mu tshibilu tshia ku tshidimu tshia musekelelu wa lufu lua Kristo nedikuvuluije mulambu munene au ne nedikale ne bua kuvudija dianyisha diudi nadi bua mulambu eu.

Mupostolo Yone wakaleja mushinga wa mulambu wa Yezu pakambaye ne: ‘Ndi nnufundila malu â [nuenu bela manyi nanyi] bua nuenu kanuenji bubi. Bienza muntu mukuabu bubi, tudi ne Muakuidi kudi Tatu, Yezu Kristo udi muakane; ne yeye udi bu mulambu wa kubuikila nawu mibi yetu; ki ngua mibi yetu nkayayi, kadi wa mibi ya bonso ba pa buloba kabidi.’ (1 Yone 2:1, 2) Bela manyi badi mua kuamba ne: mulambu wa Yezu udi ubuikila mpekatu yabu uyijimija. Kadi mmulambu udi ubuikila kabidi mpekatu ya ba pa buloba bujima, upetesha bena butumike bonso mushindu wa kupeta muoyo wa kashidi!

Newikalaku dia matuku 4 a ngondo muinayi wa 2004 bua kuvuluka lufu lua Yezu anyi? Bantemu ba Yehowa nebenze tshibilu etshi buloba bujima miaba itubu badisangishila. Wewe mubuelamu, neuteleje muyuki wa malongesha a mu Bible wa mushinga mukole wikala mua kukuambuluisha. Nebakuvuluije malu mapite bungi adi Yehowa Nzambi ne Yezu Kristo batuenzele. Kudisangisha ne bantu badi bangata Nzambi ne Kristo ne mulambu wa bupikudi wa Yezu ne mushinga mukole nekukupeteshe kabidi mabenesha a bungi mu nyuma. Tshibilu atshi tshidi mua kukolesha dijinga diebe dia kulua muntu udi Nzambi uleja bulenga buende buuvua kuyi mukumbanyine, bikufikisha too ne ku muoyo wa kashidi. Kulekedi tshintu nansha tshimue tshikupumbisha. Ndaku ubuele mu tshibilu etshi tshidi tshipesha Tatu wetu wa mu diulu Yehowa Nzambi butumbi ne tshimusankisha, netshikusankishe bikole.

[Tshimfuanyi mu dibeji 5]

Lufu lua Yezu ludi lumvuija dinanga dia mishindu ibidi mipite bunene

[Tshimfuanyi mu dibeji 6]

Diampa kadiyi diela luevene ne mvinyo mbimanyishilu bikumbane bia mubidi wa Yezu kauyi mpekatu ne mashi ende akaya panshi