Nkonko ya babadi

Ntshinyi tshivua tshienzeke mu bualu budibu balonde mu Ekesode 4:24-26 (NW), ne mmuoyo wa nganyi uvua mu njiwu?

Mose uvua mu njila mutangile mu Ejipitu ne mukajende Sipola ne bana bende ba balume Gêshoma ne Eliezê pavua bualu budi bulonda ebu buenzeke: “Pakadibu mu njila batangile ku nzubu wa tshilala benyi, Yehowa wakasambakana nende ne uvua ukeba mua kumushipa. Sipola wakangata dibue ditue, kutengulaye muanende wa balume, kulabaye dikoba divuaye mukose ku makasa ende ne kuambaye ne: ‘Bualu udi bayanyi wa mashi.’ Ke kumulekelaye. Sipola kuambaye ne: ‘Bayanyi wa mashi’ bualu bua ditengula.” (Ekesode 4:20, 24-26, NW) Nansha mudi mvese eyi kayiyi yumvuika bimpe menemene ne diumvuija diayi kadiyi dijadika bimpe, Bible udi ufila ndambu wa butoke pa mvese eyi.

Muyuki kawena uleja patoke muena muoyo uvua mu njiwu to. Kadi katuena mua kuamba ne: muoyo wa Mose ke uvua mu njiwu to, bualu utshivua ufumina ku dipeta mudimu wa kudi Nzambi bua kupatula bena Isalele mu Ejipitu. (Ekesode 3:10) Kabiena bimueneka ne: muanjelu wa Nzambi uvua mua kukeba kushipa Mose yeye muikale uya kukumbaja mudimu uvua Nzambi mumupeshe to. Nanku muoyo wa umue wa ku bana bende ke uvua ne bua kuikala mu njiwu. Mukenji uvuabu bapeshe Abalahama pa bidi bitangila ditengula uvua wamba ne: ‘Muntu mulume udi kayi mutengula nebamumushe munkatshi mua bana babu, bualu bua yeye wakashipa tshipungidi tshianyi.’ (Genese 17:14) Mose uvua pamu’apa mulengulule bua kutengula muanende, ke bualu kayi muanjelu wa Yehowa uvua ukeba kushipa muana.

Mmakasa a nganyi avua dikoba dilenge pavua Sipola mutengule muanende bua kujikija tshilumbu atshi? Avua makasa a muanjelu wa Yehowa uvua ne bukokeshi bua kushipa muana uvua kayi mutengula. Nunku, Sipola uvua mua kuikala muenze ku bukole bua dikoba dilenge makasa a muanjelu bu tshijadiki tshia muvuaye mukumbaje tshipungidi.

Mêyi a Sipola a ne: “Udi bayanyi wa mashi” mmêyi adi akemesha. Adi aleja tshinyi pa bidi bimutangila? Bu muvuaye mukumbaje bualu buvua tshipungidi tshia ditengula tshilomba, Sipola wakaleja ne: uvua muitabe ne: uvua pende mu malanda a tshipungidi ne Yehowa. Tshipungidi tshia mikenji tshivua Yehowa mudie ne bena Isalele tshivua tshileja ne: mu malanda avuabu nawu mu tshipungidi atshi bavua mua kuangata Yehowa bu mulume ne muntu mukuabu bu mukaji. (Yelemiya 31:32) Nunku pakabikilaye Yehowa ku butuangaji bua muanjelu uvua muleji-mpala wende ne: “bayanyi wa mashi,” bidi bimueneka se: Sipola wakasua kuleja ne: yeye pende uvua ne bua kutumikila mêyi a mu tshipungidi atshi. Bivua anu bu uvua muitabe bua kuikala mukaji mu tshipungidi tshia ditengula, ne Yehowa muikale bu mulume anyi bayende. Mu mishindu yonso, bu muvuaye kayi muelakane bua kutumikila bualu buvua Nzambi mulombe abu, muoyo wa muanende kautshivua kabidi mu njiwu nansha.