Tshibilu tshidi tshikutangila

PAVUA Yezu Kristo pa buloba, wakabanjija tshibilu kampanda tshidi tshitumbisha Nzambi. Tshiotshi atshi ke tshibilu tshimuepele patupu tshia malu a Nzambi tshivuaye mushile bayidi bende bua kuikalabu benza. Tshivua tshia Didia dia Mukalenge.

Tufuanyikije ne: wewe udi pa bule kabayi bakumone, kadi umona malu onso mudiwu enzeka. Udi umona Yezu ubuela pamue ne bapostolo bende mu nzubu wa kulu mu Yelushalema bua kusekelela Pasaka wa bena Yuda. Bajikiji didia dia Pasaka uvuabu badia pa tshibidilu wa kana ka mukoko kosha, bisekiseki bia bululu, diampa kadiyi diela luevene, ne mvinyo mukunze. Badi bipata Yudasa Isakaliote uvua mupostolo mubule lulamatu, uya diakamue nunku uya kutungila Mfumuende tshitungu. (Matayo 26:17-25; Yone 13:21, 26-30) Yezu udi ushala nkayende ne bapostolo bende 11 ba lulamatu. Matayo ngumue wa kudibu.

Bilondeshile mudi Matayo uvua mudimuene muanda eu ulonda, Yezu wakabanjija Didia dia Mukalenge mushindu eu: ‘Yezu wakangata diampa [kadiyi diela luevene], ne mumane kusakidila [Nzambi], wakaditshibula kudipesha balongi bende; wakabambila ne: “Angatayi, nudie etshi [tshidi tshiumvuija] mubidi wanyi.” Pashishe wakangata dikopo dia mvinyo, ne mumane kusakidila [Nzambi], wakabapeshadi wamba ne: “Nuayi buonso buenu, bualu bua etshi tshidi [tshiumvuija] mashi anyi, mashi adi ajadika tshipungidi tshia [Nzambi] ne adi mamatshile ba bungi, bua kubajimijila mibi.”’​—Matayo 26:26-28, Muanda Mulenga Lelu.

Bua tshinyi Yezu uvua mubanjije Didia dia Mukalenge? Bua tshinyi pakadibanjijaye uvua mudibanjije ne diampa kadiyi diela luevene ne mvinyo mukunze? Balongi ba Yezu bonso bavua ne bua kudia bimanyishilu ebi anyi? Mmisangu bungi kayi ivuabu ne bua kuikala badia didia edi? Didiku menemene ne mushinga kampanda ku mêsu kuebe anyi?