“Ukumbaje bimpe mudimu webe”

“Ukumbaje mudimu webe wa dienzela [Nzambi] menemene.”​—2 TIMOTE 4:5, MML.

1, 2. Nansha mudi bena Kristo bonso bikale bamanyishi ba lumu luimpe, ntshinyi tshidibu balombe bakulu mu Mukanda wa Nzambi?

 UDIKU mumanyishi wa Bukalenge anyi? Bikalabi nanku, ela Yehowa Nzambi tuasakidila bua diakalenga ditambe bunene diudi nadi edi. Udi mukulu mu tshisumbu anyi? Edi ndiakalenga dikuabu dia kudi Yehowa. Kadi katuena ne bua kupua muoyo ne: ni ntulasa ni ndudimi lupepele kabiena mua kuvuija muntu nansha umue wa kutudi mukumbane bua kuenza mudimu wa kuyisha anyi wa butangidi mu tshisumbu to. Yehowa udi utuvuija bantu badi bakumbane bua kuenza mudimu wa kuyisha; bidi nanku bualu bamue balume ba munkatshi muetu badi bakumbaja malu malomba masunguluke a mu Mukanda wa Nzambi, bibapetesha diakalenga dia kuikala batangidi.​—2 Kolinto 3:5, 6; 1 Timote 3:1-7.

² Bena Kristo bonso badi badilambule kudi Nzambi badi benza mudimu wa kumanyisha lumu luimpe, kadi nangananga batangidi anyi bakulu ke badi ne bua kufila tshilejilu tshimpe mu mudimu wa kuyisha. Nzambi ne Kristo ne Bantemu ba Yehowa bakuabu mbamanye bimpe bakulu badi “benza mudimu bikole bua kuamba kua diyi ne kulongesha.” (1 Timote 5:17, MML; Efeso 5:23; Ebelu 6:10-12) Dîba dionso, ndongeshilu wa mukulu udi ne bua kukolesha bateleji bende mu nyuma, bualu mupostolo Paulo wakambila mutangidi nende Timote ne: “Dinga diba, bantu kabakuikala kabidi bateleja dilongesha dimpe, nebikale badikebela amu balongeshi bavule patupu ba pa diabo dijinga, bikale babafunya ku matshio; nebele bulelela nyima bua kuya kuteleja nsumuinu. Kadi wewe, dikuba ku bionso, ukoleshe muoyo mu dikenga, wenze mudimu wa dilongesha Mukenji Mulenga, ukumbaje bimpe mudimu webe.”​—2 Timote 4:3-5, MMM.

3. Ntshinyi tshidi tshikengela kuenza bua malongesha a dishima kaanyangi makanda a mu nyuma a bena mu tshisumbu?

³ Bua mukulu kujadika ne: malongesha a dishima kaena anyanga makanda a mu nyuma a bena mu tshisumbu, udi ne bua kutumikila mubelu wa Paulo eu: “Udilame mu malu onso, . . . ukumbaje mudimu webe wa dienzela [Nzambi] menemene.” (2 Timote 4:5, MML) Bushuwa, mukulu udi ne bua ‘kukumbaja mudimu wende menemene.’ Udi ne bua kuukumbaja wonso, kuukumbaja menemene anyi mu bujima buawu. Mukulu udi ukumbaja mudimu wende bimpe udi utabalela majitu ende onso, kayi ulengulula bualu nansha bumue anyi wenza mudimu anu tshitupa to. Muntu wa nunku udi ne lulamatu nansha mu malu makese.​—Luka 12:48; 16:10.

4. Ntshinyi tshidi mua kutuambuluisha bua kuenza mudimu wa Nzambi menemene?

⁴ Bua kukumbaja mudimu wetu menemene, kuukumbaja tshishiki, kabiena bikengela anu kuikala ne dîba dia bungi to, kadi tshidi ne bualu nkumanya mua kuenza mudimu bimpe ne dîba edi. Dimanya mua kutshintshikila malu didi mua kuambuluisha bena Kristo bonso bua kukumbaja amue malu mu mudimu wa kuyisha. Bua kuenza mêba a bungi mu mudimu wa budimi, mukulu udi ne bua kudilongolola bimpe bua kumona mua kunemeka programe wende ne kumanya mudimu udiye mua kupeshaku bakuabu bua bamuambuluishe ne mushindu udiye mua kubapeshawu. (Ebelu 13:17) Pa tshibidilu, mukulu utu udinemeka utu pende wenza mudimu eu, anu bu Nehemiya wakaditua pende yeye muine mu mudimu wa dibakulula dia bimanu bia Yelushalema. (Nehemiya 5:16) Nanku basadidi bonso ba Yehowa badi ne bua kuikala benza mudimu wa kuyisha Bukalenge pa tshibidilu.​—1 Kolinto 9:16-18.

5. Mmunyi mutudi ne bua kuangata mudimu wa kuyisha?

⁵ Bulelela, tudi ne mudimu muimpe wa kumanyisha Bukalenge bukadibu bajadike mu diulu! Bushuwa, tudi ne disanka bua mudimu utudi nawu wa kuambila bantu bonso lumu luimpe kumpala kua nshikidilu kuluaye. (Matayo 24:14) Nansha mutudi bantu bapange bupuangane, mêyi a Paulo aa adi mua kutukankamija bikole: “Tshiuma etshi [mudimu wa kuyisha],  tudi batshiambule mu ngesu ya dibumba, bua bantu bamone bimpe ne: bukole ebu bupite [bua bantu] mbua kudi [Nzambi], kabuena bufuma kutudi to.” (2 Kolinto 4:7, MMM) Bulelela, tudi mua kuenza mudimu udi muanyishibue kudi Nzambi, kadi tudi mua kuwenza anu ku diambuluisha dia bukole ne meji bidiye ufila.​—1 Kolinto 1:26-31.

Tulejayi butumbi bua Nzambi

6. Ndishilangana kayi divua pankatshi pa Isalele wa ku mubidi ne Isalele wa mu nyuma?

⁶ Paulo udi wamba pa bidi bitangila bena Kristo bela manyi ne: Nzambi ‘wakatukumbaja kabidi bu bena mudimu ba dipungila dipiadipia.’ Mupostolo eu udi uleja dishilangana didi pankatshi pa tshipungidi tshipiatshipia tshivua Isalele wa mu nyuma mudie ne Nzambi ku butuangaji bua Yezu Kristo ne tshipungidi tshia kale tshia Mikenji tshivua Nzambi mudie ne Isalele wa ku mubidi ku butuangaji bua Mose. Paulo udi wamba kabidi ne: pavua Mose ufumina ku Mukuna wa Sinai upueka ne mabue avua ne Mikenji Dikumi, mpala wende uvua utua nsese, kakuyi mushindu wa bena Isalele kumutangila ne mêsu abu to. Kadi mu bule bua matuku, muanda kampanda wa mponono wakenzeka bualu ‘meji abu akakoleshibua’ ne tshilamba tshiakalua kubuikila mitshima yabu. Kadi padibu banyemena kudi Yehowa ne badilambula kudiye ne muoyo mujima, tshilamba etshi tshidi tshiumuka. Pashishe Paulo udi wamba kabidi bua mudimu uvuabu bapeshe aba bavua mu dipungila dipiadipia ne: ‘Buonso buetu, katuyi ne tshilulu tshikudika pa mpala, tudi tutangila bu mu lumuenu butumbi bua [Yehowa].’ (2 Kolinto 3:6-8, 14-18; Ekesode 34:29-35) “Mikoko mikuabo” ya Yezu ya lelu idi payi ne diakalenga dia kuleja butumbi bua Yehowa.​—Yone 10:16.

7. Mmunyi mudi bantu mua kuleja butumbi bua Nzambi?

⁷ Mmunyi mudi bantu bena mpekatu mua kuleja butumbi bua Nzambi, pabi muntu nansha umue kêna mua kumona mpala wende ne kushala ne muoyo? (Ekesode 33:20) Tudi ne bua kumanya ne: pa kumbusha butumbi budi nabu Yehowa, mmusue kabidi kubingisha bumfumu buende butambe bunene ku diambuluisha dia Bukalenge buende. Malu malelela adi atangila Bukalenge ngimue ya ku ‘mianda minene ya Nzambi’ yakabangabu kumanyisha kudi aba bavuabu bitshikijile nyuma muimpe dia Pentekoste wa mu tshidimu tshia 33 bikondo bietu ebi. (Bienzedi 2:11) Ku diambuluisha dia nyuma wa Nzambi, bavua mua kukumbaja mudimu uvuabu babapeshe ntuntuntu.​—Bienzedi 1:8.

8. Paulo uvua mudisuike bua kuenza tshinyi bua mudimu wa Nzambi?

⁸ Paulo uvua mudisuike bua kubenga kulekela tshintu nansha tshimue tshimupumbisha bua kukumbaja mudimu wende bimpe menemene. Wakafunda ne: ‘Bua bualu ebu tuetu tudi ne mudimu eu, bu mutuakapeta luse, katuena tupanga; kadi tuakapidia malu masokome a bundu, katuena tuendakana ne budimu, katuena tudinga bantu ne dîyi dia Nzambi, kadi tudi tudianyisha bua kudimuenesha dia bushuwa ku [kuondo ka muoyo] ka muntu yonso ku mêsu kua Nzambi.’ (2 Kolinto 4:1, 2) Ku diambuluisha dia tshidi Paulo ubikila ne: “mudimu eu,” bulelela mbumueneke ne butoke bua mu nyuma mbuye kule.

9, 10. Mmunyi mutudi mua kufika ku dileja butumbi bua Yehowa?

⁹ Pa bidi bitangila Mpokolo wa butoke, Paulo udi ufunda ne: ‘[Nzambi] uvua muambe ne: Butoke bukenke mu mîdima. Yeye ke udi ukenka mu mioyo yetu bua kutujinguluila [“dimanya dia butumbi dia Nzambi,” NW]  didi dikenka pa mpala wa Kristo.’ (2 Kolinto 4:6, MMM; Genese 1:2-5) Bu mutudi ne diakalenga dinene dia kuenzela Nzambi mudimu, tudilamayi bakezuke bua tuikale mua kuleja butoke bua Yehowa bu mmuenu.

¹⁰ Bantu badi mu mîdima ya mu nyuma kabena mua kumona butumbi bua Yehowa anyi mudi Yezu Kristo, Mose Munene ubukenkesha to. Kadi tuetu basadidi ba Yehowa tudi tupeta butoke bua butumbi budi bufumina mu Mukanda wa Nzambi ne tubukenkeshila bakuabu. Bua aba badi mu mîdima ya mu nyuma eyi kuepukabu kabutu, badi dijinga ne butoke budi bufumina kudi Nzambi. Nunku ne disanka dia bungi ne lukunukunu, tudi tutumikila mukenji wa Nzambi wa kutokesha butoke mu mîdima bua butumbi bua Yehowa.

Tokesha butoke buebe mu malonga a Bible

11. Ntshinyi tshiakamba Yezu pa bidi bitangila ditokesha butoke, ne mmushindu umue kayi utudi mua kuenza nunku mu mudimu wa kuyisha?

¹¹ Yezu wakambila bayidi bende ne: “Nuenu nudi butoke bua bena panu. Tshimenga tshiasa kulu kua mukuna kabena mua kutshisokoka. Kabidi kabena mua kutemesha muendu, kuuteka muinshi mua tshipanza; kadi batu bauteka pa tshitekelu tshiawu, bua kutokesha ku mesu a bonso badi mu nzubu. Ke mudi butoke buenu ne bua kutokesha ku mesu a bantu bonso bua bamone malu enu [mimpe] batumbishe Tatu wenu udi mu diulu.” (Matayo 5:14-16, MMM) Ngikadilu wetu muimpe udi mua kufikisha bakuabu ku dipesha Nzambi butumbi. (1 Petelo 2:12) Ne bitupa kabukabu bia mudimu wetu wa dimanyisha lumu luimpe bidi bitupetesha mishindu ya bungi ya kuikala tutokesha butoke buetu. Tshimue tshia ku bipatshila binene ntshia kutokesha butoke bua mu nyuma budi bufumina mu Dîyi dia Nzambi pa kulombola malonga a Bible mimpe. Eu ke mushindu mutambe buimpe wa tuetu kukumbaja mudimu wetu menemene. Mmibelu kayi idi mua kutuambuluisha bua kulombola malonga a Bible adi alenga mitshima ya bakebi ba bulelela?

12. Mmunyi mudi disambila dipetangana ne mudimu wa dilombola malonga a Bible?

¹² Kusambila Yehowa bua bualu ebu kudi kuleja ne: tudi ne dijinga dikole dia kulombola malonga a Bible. Kudi kabidi kuleja ne: tudi bamanye mushinga wa kuambuluisha bakuabu bua bapete dimanya dia Nzambi. (Yehezekele 33:7-9) Yehowa udi bushuwa mua kuandamuna masambila etu ne kubenesha madikolela atudi tuenza ne muoyo mujima mu mudimu wa kuyisha. (1 Yone 5:14, 15) Kadi katuena tusambila anu bua kupeta muntu kampanda wa tuetu kulonga nende Bible to. Kunyima kua tuetu bamane kushindamija dilonga, disambila ne dielangana meji pa bidi bitangila majinga masunguluke a mulongi wa Bible eu nebituambuluishe bua kulombola dilonga edi bimpe musangu wonso.​—Lomo 12:12.

13. Ntshinyi tshidi mua kutuambuluisha bua kulombola malonga a Bible mimpe?

¹³ Bua kulombola malonga a Bible makane, tudi ne bua kudilongolola bimpe musangu wonso. Tuetu bamone kabiyi bikumbana, bidi mua kuikala bimpe bua kutangila mutu Mutangidi wa Dilonga dia Mukanda ulongesha tshitupa tshionso tshia dilongesha dia ku lumingu ne ku lumingu. Musangu mukuabu, tudi mua kuya kufila bamanyishi ba Bukalenge badi bapatule bipeta bimpe mu dilombola malonga a Bible. Bushuwa, tudi ne bua kukonkonona nangananga mmuenenu uvua nende Yezu ne ndogeshilu yende.

14. Mmunyi mutudi mua kulenga mutshima wa mulongi wa Bible?

¹⁴ Yezu uvua ne disanka pavuaye wenza disua dia Tatuende wa mu diulu ne pavuaye wambila bakuabu malu a Nzambi. (Musambu 40:8) Uvua mupole malu ne ulenga mitshima ya bavua bamuteleja. (Matayo 11:28-30) Nunku tudienzejayi petu bua tuikale tulenga mitshima ya balongi betu ba Bible. Bua tuetu kufika ku dienza nunku, tudi ne bua kulongolola dilonga dionso bikale ne malu kampanda a pa buawu adi atangila mulongi eu mu lungenyi luetu. Tshilejilu, bikalaye wa muaba utubu kabayi bitaba Bible, tudi ne bua kuenza muetu muonso bua kumutuisha se: malu adi mu Bible mmalelela. Pa kuenza nunku, netuikale ne mushindu wa kubala mvese ya bungi ne kuyumvuija.

Ambuluisha balongi bua kumvua bilejilu

15, 16. (a) Mmunyi mutudi mua kuambuluisha mulongi udi kayi umvua tshilejilu kampanda tshia mu Bible? (b) Ntshinyi tshitudi mua kuenza padi mu umue wa ku mikanda yetu muikale tshilejilu tshidi tshikolele mulongi wa Bible bua kumvua?

¹⁵ Mulongi wa Bible udi mua kuikala kayi  muibidile ne tshilejilu kampanda tshidi mu Mukanda wa Nzambi. Tshilejilu, udi mua kuikala kayi mumvue tshivua Yezu musue kuamba pakakulaye bua diteka muendu pa tshitekelu tshiawu. (Mâko 4:21, 22) Yezu uvua usua kuakula bua muendu wa kale uvua ne mukaba utema ne mafuta. Bavua bateka muendu au pa tshitekelu kampanda tshisunguluke, ne uvua utokesha mu tshibambalu kansanga tshia nzubu au. Makebulula menza pa tshiena-bualu tshia “Lampe” (muendu) ne tshia “Porte-lampe” (tshitekelu tshia muendu) mu mukanda bu mudi wa Étude perspicace des Écritures adi mua kuambuluisha bua kumvua tshilejilu tshia Yezu etshi bimpe. * Kadi katuakumvuaku bimpe bu tuetu mua kudilongolola ne pashishe kutuadila mulongi wa Bible diumvuija dimpe diumvuika biakane ne diamusankisha anyi?

¹⁶ Mu mukanda kampanda unudi nulonga nawu Bible mudi mua kuikala tshilejilu tshidi tshikolele mulongi kampanda bua kumvua. Keba mua kutshiumvuija anyi wangate tshilejilu tshikuabu tshidi tshipetangana ne bualu budi mu tshialu abu. Pamu’apa mu mukanda badi mua kuikala baleja ne: kuikala ne muena dibaka muimpe ne kuenza malu mu buobumue bidi ne mushinga mu dibaka. Tshilejilu, badi mua kuikala bakule bua muntu kampanda udi wela tutungu ku tshiamu tshia trapèze, utshilekela udiela mulu mu lupepele ne bikengela bua muedi wa tutungu mukuabu kulua kumukuata. Kadi udi mua kuangata tshilejilu tshikuabu tshidi tshipetangana ne etshi ne tshidi mua kuleja mushinga wa kuikala ne muena dibaka muimpe ne kuenza malu mu buobumue, bu mudi tshia mushindu udi bena mudimu benza mudimu mu diumvuangana pa kukupilangana turton tudibu bapatula mu buatu mu bianza.

17. Ntshinyi tshitudi mua kulongela kudi Yezu pa bidi bitangila bilejilu?

¹⁷ Bua kupeta tshilejilu tshikuabu tshidi tshifuanangane, bidi mua kulomba bua kudianjila kudilongolola. Patudi tuenza nunku, tudi tuleja mulongi wa Bible au ne: tudi tumutabalela. Yezu uvua ufila bilejilu bipepele bua kutokesha biena-bualu bikole. Mu Muyuki wende wa pa Mukuna mudi bilejilu bia buena ebi, ne Bible udi uleja ne: dilongesha diende divua disankisha bateleji bende. (Matayo 5:1–7:29) Yezu uvua umvuija malu ne lutulu luonso bualu uvua uditatshisha bikole bua bantu.​—Matayo 16:5-12.

18. Ntshinyi tshidi tshikengela kuenza ne mvese idibu batele patupu mu mikanda yetu?

¹⁸ Diditatshisha dietu bua bakuabu neditusake bua ‘kuelangana meji bua Mikanda ya tshijila.’ (Bienzedi 17:2, 3, Mukanda wa Mvidi Mukulu [Mishonyi, MMV]) Ebi bidi bilomba dilonga ne muoyo mujima, kusambila ne kuenza mudimu bimpe ne mikanda itudi tupeta ku diambuluisha dia ‘mulami wa lulamatu.’ (Luka 12:42-44) Tshilejilu, mu mukanda wa Dimanya didi difikisha ku muoyo wa kashidi mbele mêyi a mu mvese ya bungi mu bikoso. * Bua dipangila muaba munene mu mukanda eu, mikuabu mvese mbayele patupu. Mu dilonga dia Bible, bidi bia mushinga bua kubala ne kumvuija imue ya ku mvese idibu bele patupu eyi. Nunku dilongesha dietu nedishindamene mu Dîyi dia Nzambi, ne nedikale ne bukole bua bungi. (Ebelu 4:12) Ikala ubuela mu Bible munkatshi mua dilonga dionso, muikale ne tshibidilu tshia kuenza mudimu ne mvese idi mu bikoso. Ambuluisha mulongi bua kumvua tshidi Bible wamba pa bidi bitangila tshiena-bualu kampanda anyi ngikadilu kansanga. Dienzeje bua kumuleja ne: yeye utumikila Nzambi bushuwa neapete mabenesha.​—Yeshaya 48:17, 18.

 Ela nkonko idi yelesha meji

19, 20. (a) Bua tshinyi bidi bimpe kuela nkonko idi ilomba mmuenenu wa muntu patudi tulombola dilonga dia Bible? (b) Tshidi tshikengela kuenza ntshinyi padi tshiena-bualu kampanda tshilomba dikonkonona malu makuabu?

¹⁹ Mushindu muimpe uvua Yezu ukuata mudimu ne nkonko uvua wambuluisha bantu bua kuela meji. (Matayo 17:24-27) Tuetu tuela nkonko idi ilomba mmuenenu wa mulongi wa Bible ne kayiyi imufuisha bundu, mandamuna ende adi mua kuleja tshidiye wela meji pa bidi bitangila tshiena-bualu kampanda peshi kansanga. Pamu’apa tudi mua kumona ne: utshidi amu mulamate ngenyi idi kayiyi ya mu Mukanda wa Nzambi. Tshilejilu, mulongi eu udi mua kuikala witaba Busatu Bunsantu. Nshapita 3 wa mukanda wa Dimanya udi uleja ne: muaku “Busatu Bunsantu” kautu mu Bible to. Mu mukanda eu mbatele mêyi a mu imue mvese ne bele mikuabu patupu idi ileja ne: Yehowa mmushilangane ne Yezu, ne nyuma muimpe mbukole buenzeji bua Nzambi, kadi ki mmuntu to. Dibala ne diumvuija mvese ya mu Bible eyi didi mua kuambuluisha bua kujikija tshilumbu etshi. Kadi bidi bikengela kuenza tshinyi padibi bilomba kubala mikuabu mvese? Pamu’apa dinga dituku kunyima kua dilonga dia pa tshibidilu, nudi mua kuyukidilangana pa tshiena-bualu etshi mushindu udibu batshiumvuije mu mukanda mukuabu wa Bantemu ba Yehowa, bu mudi mu broshire wa Tudi ne bua kuitabuja Busatu Bunsanto anyi? Pashishe, tudi mua kutungunuka ne dilonga mu mukanda wa Dimanya.

²⁰ Fuanyikijabi ne: mulongi udi ufila diandamuna diuvua kuyi muelele meji anyi didi kadiyi dikusankisha ku lukonko ludi lulomba mmuenenu wende. Pikalabi bitangila dinua dia makanya anyi dilongesha dikuabu didi dilenga mulongi buludiludi, tudi mua kumulomba bua kutungunuka ne dilonga ne kulua kukonkonona bualu ebu kunyima. Dimanya dia se: mulongi mmutungunuke ne kunua makanya didi ditusaka bua kukeba malu adi mu munga mukanda adi mua kumuambuluisha bua kulekela malu awu bua kukola mu nyuma. Tudienzejayi bua kulenga mutshima wa mulongi ne tusambile bua Yehowa amuambuluishe bua kukola mu nyuma.

21. Ntshinyi tshidi mua kuenzeka tuetu benze bua ndongeshilu yetu ipetangane ne majinga masunguluke a mulongi wa Bible?

²¹ Tuetu tudilongolola bimpe ne Yehowa utuambuluisha, netuenze kakuyi mpata bua mishindu itudi tulongesha ipetangane ne majinga masunguluke a mulongi wa Bible. Mu bule bua matuku, tudi mua kufika ku dimuambuluisha bua kunanga Nzambi bikole. Tudi kabidi mua kumufikisha ku dikala ne kanemu ne dianyisha bua bulongolodi bua Yehowa. Ne bidi bisankisha bikole padi balongi ba Bible bafika ku dimona ne: ‘Nzambi udi munkatshi muetu bulelela.’ (1 Kolinto 14:24, 25) Nunku tulombolayi malonga a Bible bimpe ne tuenze muetu muonso bua kuambuluisha bakuabu bua balue bayidi ba Yezu.

Tshiuma tshia kunanga bikole

22, 23. Ntshinyi tshidi tshikengela kuenza bua tuetu kukumbaja mudimu wetu menemene?

²² Bua kukumbaja mudimu wetu menemene, tudi ne bua kueyemena bukole budi Nzambi ufila. Paulo uvua wakula bua mudimu wa Nzambi pakafundilaye bena Kristo nende bela manyi ne: “Tshiuma etshi, tudi batshiambule mu ngesu ya dibumba, bua bantu bamone bimpe ne: bukole ebu bupite [bua bantu] mbua kudi [Nzambi], kabuena bufuma kutudi to.”​—2 Kolinto 4:7, MMM.

²³ Nansha tuetu bikale bela manyi peshi “mikoko mikuabo,” tudi anu bu ngesu mitekete ya dibumba. (Yone 10:16) Kadi Yehowa udi mua kutupesha bukole butudi nabu dijinga bua kukumbaja midimu yetu nansha batuluisha munyi. (Yone 13:16; Filipoi 4:13) Nunku tueyemenayi Yehowa ne muoyo mujima, tunangayi tshiuma anyi mudimu wetu wa mushinga mukole eu bikole, ne tuukumbajayi menemene.

[Mêyi adi kuinshi]

Newandamune munyi?

• Ntshinyi tshidi bakulu mua kuenza bua kukumbaja mudimu wabu menemene?

• Mmunyi mutudi mua kulengeja ndombuelu wetu wa malonga a Bible?

• Ntshinyi tshiwenza bikala mulongi wa Bible kampanda kayi umvua tshilejilu kansanga anyi muikale ujinga kumanya malu makuabu adi atangila tshiena-bualu kankenge?

[Nkonko ya dilonga]

[Tshimfuanyi mu dibeji 16]

Bakulu bena Kristo badi balongesha mu tshisumbu ne bambuluisha bua kulongesha bena Kristo nabu mudimu wa kuyisha

[Tshimfuanyi mu dibeji 18]

Kulombola malonga a Bible mimpe ngumue mushindu wa kutokesha butoke buetu