Malu malonda kudi bamanyishi ba Bukalenge

Badi bayishila bantu pa miaba yabu ya mudimu

MMU bualu kayi muvua mupostolo Matayo, Petelo, Andele, Yakobo ne Yone bafuanangane? Buonso buabu bavua miaba yabu ya mudimu pakababikila Yezu. Petelo, Andele, Yakobo ne Yone bavua ku mudimu wabu wa diloba pakabambila Yezu ne: “Ndondayi.” Matayo uvua ku biro biende bia dilambuisha dia bitadi pakamubikila Yezu bua kuluaye muyidi wende.​—Matayo 4:18-21; 9:9, MMM.

Kuyishila bantu pa miaba yabu ya mudimu kudi mua kupatula bipeta bimpe. Pavua Bantemu ba Yehowa ba mu Japon bajingulule bualu ebu, bakenza muabu muonso matuku adi mashale aa bua kuditua mu mudimu wa buambi wa mushindu eu. Mbipeta kayi bivuabu bapatule? Mu ngondo mikese patupu, bakapinganyina bantu misangu binunu ne binunu, kutuadijabu malonga a Bible matue ku 250. Mona malu adi alonda aa. Muambi wa lumu luimpe mukuabu wa ku dîba ne ku dîba wa mu tshimenga tshia Tokyo wakapetangana ne mutangidi wa restoran kampanda ukavua muyukile ne Ntemu wa Yehowa mukuabu patshivuaye mulongi bidimu bitue ku 30 bimane kupita. Nansha muvua mutangidi wa restoran eu kayi mumvue malu a bungi avuabu bamuyishe patshivuaye mulongi apu, wakapeta dijinga dia kumanya malu a mu Bible. Kadi musangu eu uvuabu balue kumujululula dijinga diende adi, wakanyisha diakamue ne disanka dionso bua kulonga Bible ku diambuluisha dia mukanda wa Dimanya didi difikisha ku muoyo wa kashidi. * Wakadienzela kabidi programe wende wa pa nkayende wa dibala dia Bible dilolo dionso kumpala kua kulala.

Mpanda-njila kampanda wa pa buende wakabuela mu biro bikuabu bia mudimu, kulombaye bua kuyukila ne mulombodi wa midimu ku telefone. Nansha muvua mulombodi au kayiku, nsongakaji uvua muandamune ku telefone wende wakebeja ne: “Udi musue kuyukila nanyi anyi?” Pakajikijabu kuyukidilangana kakese ku telefone, nsongakaji au wakapatuka e kumuambilaye ne: uvua munange kubala Bible bikole. Mpanda-njila wa pa buende au kudilongolola e kumutuadila Bible, buobu kutuadijabu dilonga dia Bible mu lupangu lua mitshi ne bilongo (parke) luvua pabuipi apu mu dinda dionso kumpala kua mudimu kubangawu.

Mu biro bikuabu, mulume kampanda wakamona muena mudimu nabu mukuabu mukaji wanyisha bua kuangata bibejibeji bia Tshibumba tshia Nsentedi ne Réveillez-vous! kadi ushala ubimansha diakamue pakumbuka Ntemu uvua mumupeshabi. Pakapingana mulume au kumbelu, wakalondela mukajende uvua Ntemu wa Yehowa bualu ebu, yeye kumuambila ne: uvua mua kuikala mutelejaku nansha kakese bu buobu bamupeshe yeye bibejibeji abi. Muanende wa bakaji uvua mumumvue wakula bua tshilumbu atshi wakatshilondela pende Ntemu wa Yehowa utu uyisha mu teritware wa midimu ya bungenda-mushinga au. Ntemu eu wakaya kutangila mulume au ne lukasa luonso ku mudimu wende ne kutuadijaye kulonga nende Bible. Mulume au wakatuadija diakamue kubuela mu bisangilu bia mu Dia lumingu misangu yonso.

Kuyishila bantu pa miaba yabu ya mudimu nkupatule mabenesha makuabu. Bamanyishi bavule ba lumu luimpe ba mu Japon mbalue bapiluke mu dimanya mua kupinganyina kabidi bantu miaba idibu bapanyishila bintu, mu biapu ne mu biro. Kabidi, kuyisha kua mushindu eu nkuambuluishe bua kupetangana ne bavule bakavua balekele mudimu wa diyisha ne kutuadija kulonga nabu Bible. Bipeta bivua bikemesha. Tshisumbu tshimue tshia munkatshinkatshi mua tshimenga tshia Tokyo tshivua tshifile luapolo matuku mashale aa lua bantu 108 bavuabu balonge nabu Bible, bungi bupite buvuatshi tshifile tshidimu tshishale misangu ibidi.

[Mêyi adi kuinshi]