Liberia: Malu a Bukalenge adi aya kumpala nansha mudimu mvita

MVITA ya bena ditunga idi itua ipela mu Liberia kukadi bidimu bipite pa dikumi. Munkatshi mua 2003, bantomboji bakaluangana kubuelabu too ne mu Monrovia, tshimenga tshikulu. Bantemu ba Yehowa ba bungi bakashiya nzubu yabu misangu ne misangu. Bakabanyenga bintu njila ne njila.

Bia dibungama, pakenzeka mvita mu tshimenga tshikulu, binunu bia bantu bakafua. Munkatshi muabu muvua Bantemu babidi, muanetu wa balume ne muanetu wa bakaji. Mmushindu kayi uvua bana betu bakuabu bapite ne lutatu elu, ne ntshinyi tshiakenzabu bua kubambuluisha?

Badi bambuluisha aba badi mu dikenga

Munkatshi mua tshikondo tshionso tshia mvita atshi, biro bia filiale bia Bantemu ba Yehowa bia mu Liberia biakalongolola diambuluisha bua aba bavua mu dikenga. Bakafila biakudia, bintu bia mu nzubu ne manga. Mu tshikondo tshivua bantomboji bakuate tshitudilu tshia mazuwa, biakudia biakakepa. Biro bia filiale bikavua bidianjile kumona muvua malu ne bua kuenzeka ne bivua ne bintu bikumbane bua Bantemu binunu bibidi bavua baye kusombela mu Nzubu ya Bukalenge mu tshimenga tshijima. Bana betu bakalobelela biakudia, biobi kufika too ne ku tshikondo tshiakunzululabu tshitudilu tshia mazuwa tshiakabidi. Biro bia filiale wa Belgique ne wa Sierra Leone biakatuma manga ku ndeke, ne filiale wa ditunga dia Grande-Bretagne ne wa France yakatuma bilamba ku mazuwa.

Nansha muvua nsombelu mukole, bana betu bakashala ne lungenyi luimpe ne musangelu. Mêyi akamba muntu umue uvua munyeme kumbelu kuende misangu isatu mijima avua aleja meji avua nawu ba bungi ba kudibu. Wakamba ne: “Aa ke malu atutu tuyisha bantu; tudi mu matuku a ku nshikidilu.”

Badi bitaba lumu luimpe

Nansha mudiku bimvundu mu ditunga dijima, Bantemu badi batungunuka ne kupatula bipeta bimpe mu mudimu wa buambi. Mu ngondo wa kumpala wa 2003 kuvua bungi bua katshia ne katshia bua bamanyishi ba Bukalenge 3 879, ne mu ngondo muibidi bavua balombole malonga a Bible 15 227.

Bantu badi bitaba lumu luimpe ne lukasa luonso. Tshilejilu, mu musoko mukuabu munene (Bewahn) wa ku Sud kua ditunga edi, tshisumbu kampanda tshiakapangadija bua kuenzatshi Tshivulukilu tshia lufu lua Kristo, musoko eu uvua mutantshi wa luendu lua ku makasa lua mêba atanu ne muaba utubu badisangishila pa tshibidilu. Kumpala kua bana betu kuyabu mu musoko eu bua kubikila bantu mu Tshivulukilu, bakanji kupesha mfumu wa musoko kabeji ka dibikila. Pakapetaye kabeji aka, wakangata Bible wende, kuyaye kudi bena musoko, kubabadilaye mvese uvua mu kabeji ka dibikila aku, ubakankamija bua kubuela mu Tshivulukilu. Nunku, pakafika bambi ba lumu luimpe, bakamona ne: bakavua babenzele mudimu wabu! Mfumu wa musoko, pamue ne bana bende ne bakaji bende babidi, bakabuela mu Tshivulukilu. Bantu 27 bakabuela mu Tshivulukilu atshi. Katshia apu, mfumu wa musoko eu wakumbuka mu ekeleziya wa bena Metodiste, wakatuadija  kulonga Bible ne Bantemu, ne kufilaye muaba wa kuibakabu Nzubu wa Bukalenge.

Dishintulula mmuenenu

Bienzedi bia bana betu mbiambuluishe kabidi bamue baluishi bua kushintululabu mmuenenu wabu pa bidi bitangila bulelela. Tuangate tshilejilu tshia muntu mukuabu, dîna diende ng’Opoku. Mpanda-njila wa pa buende kampanda wakapetangana nende mu mudimu wa buambi ne kumupeshaye Tshibumba tshia Nsentedi. Tshiena-bualu kampanda tshia mu tshibejibeji etshi tshiakasankisha Opoku kadi kavua ne makuta to. Pakamumvuija mpanda-njila au ne: katshivua tshia kusumbisha, mpanda-njila wakamushila tshibejibeji ne kudilongololaye bua kumupinganyina. Pakapingana mpanda-njila, Opoku wakamuebeja ne: “Udi mummanye anyi? Bana benu ba bungi ba mu tshimenga etshi tshia Harper mbamanye. Mvua ngipata bana ba Bantemu mu kalasa!” Wakamuleja kabidi ne: uvua mulombodi wa tulasa tua bikadilu tuvua mu tshimenga ne kabidi uvua mukengeshe bana ba Bantemu ba Yehowa bualu kabavua banemekela dibendele dia ditunga nansha.

Kadi bilejilu bisatu bia dinanga divua bena Kristo Bantemu ba Yehowa baleje biakasaka Opoku bua kushintulula mmuenenu wende. Tshia kumpala, wakamona Bantemu baditatshisha bua muanabu wa mu Kristo uvua usama bikole. Bakamutuma too ne mu ditunga diena mutumba bua kumuondapabu. Opoku uvua wela meji ne: muanetu uvua usama eu uvua “muntu munene” mu Bantemu kadi kuluaye kumanya ne: uvua anu Ntemu bu Bantemu bonso. Tshibidi, mu 1990, Opoku wakalua muena tshimuangi mu ditunga dia Côte d’Ivoire. Dimue dituku pavua nyota ya mâyi mimusume, wakaya bua kusumba mâyi kudi muana wa balume mukuabu. Opoku uvua anu ne dibeji dia makuta a bungi ne muana au kavua ne makuta a kumupingajila to, ke yeye kupesha Opoku mâyi a tshianana. Kunyima kua muana eu mumane kupesha Opoku mâyi, wakamuebeja ne: “Udi wela meji ne: nekuikale tshikondo tshikala bantu bu wewe ne meme tupeshangana bintu kakuyi dilomba makuta anyi?” Opuku wakamona ne: muana au uvua Ntemu wa Yehowa ne muana kumujadikila ne: bivua nanku. Kalolo ne bulenga bia muanetu au biakalenga mutshima wende bikole. Ndekelu wa bionso, muoyo mulenga wa mpanda-njila uvua mumupeshe tshibejibeji kakuyi difila dia makuta biakatuisha Opoku ne: uvua ne mmuenenu mubi pa Bantemu ne bivua bikengela yeye kushintulula mmuenenu wende eu. Wakadiunda mu nyuma ne udi mpindieu muambi wa lumu luimpe udi kayi muanji kutambula.

Nansha mudi bana betu ba mu Liberia batungunuka ne kupeta ntatu mikole, badi beyemena Nzambi ne bamanyisha ne lulamatu lumu luimpe lua nsombelu mulenga mu bukokeshi bua Bukalenge bua Nzambi. Yehowa kakupua mudimu wabu mukole ne dinanga didibu baleja bua dîna diende muoyo nansha.​—Ebelu 6:10.

[Tuarte mu dibeji 30]

(Bua kumona malu bimpe, tangila mu mukanda)

MONROVIA

[Bimfuanyi mu dibeji 31]

Mu bikondo bia ntatu, bantu ba Yehowa batu bapesha bantu badi bakenga diambuluisha dia mu nyuma ne dia ku mubidi