Tudi ne bua kulomba diambuluisha kudi banjelu anyi?

MBIMPE kulomba banjelu diambuluisha patudi mu lutatu anyi? Ke mudi bantu ba bungi bela meji. Tshibungu kampanda tshidi tshiamba bua bualu ebu ne: “Muntu udi utuma masambila kudi . . . banjelu . . . anu bua se: badi mua kutuakuila kudi Nzambi.” (New Catholic Encyclopedia) Tudi ne bua kulomba banjelu bua batuakuile anyi?

Dîyi dia Nzambi didi difila mêna anu a banjelu ba lulamatu ba Nzambi babidi patupu aa: Mikaele ne Gabaliele. (Danyele 8:16; 12:1; Luka 1:26; Yuda 9) Bu mudi mêna abu aa mu Bible, tudi tumona ne: muanjelu ne muanjelu yonso mmuntu wa mu nyuma wa pa buende udi ne diende dîna, kadi muanjelu ki mbukole kampanda budi kabuyi muntu to. Nansha nanku, banjelu bakuabu bakabenga kuamba mêna abu. Tshilejilu, pavua Yakoba mukonke muanjelu uvua mulue kumutangila dîna diende, wakabenga kumuambila dîna diende. (Genese 32:29; Balumbuluishi 13:17, 18) Mu Bible kamuena mêna a banjelu bonso to, bua kuepula bantu bua kabanekeshi mu dituma ntema kudibu.

Umue wa ku midimu ya banjelu ng’wa kufikisha mikenji ya Nzambi kudi bantu. Bushuwa, miaku ya tshiena-Ebelu ne tshiena-Gelika idibu bakudimune ne: “muanjelu” idi yumvuija ku muaku ku muaku “mutuadi wa mukenji.” Kadi banjelu ki mbatuangaji badi bangata masambila a bantu baya nawu ku nkuasa wa bukalenge wa Mutambe Bunene nansha. Nzambi mmulongolole bua bantu bikale batuma masambila abu kudiye mu dîna dia Muanende Yezu Kristo, wakamba ne: ‘Tshintu tshionso tshinualomba Tatu mu dîna dianyi yeye neanupetshi.’​—Yone 15:16; 1 Timote 2:5.

Yehowa Nzambi katu ne midimu mimupite bungi bua kubenga kututeleja patudi tutuma masambila kudiye mu mushindu muakanyine to. Bible udi utushindikila ne: ‘Yehowa udi pabuipi ne bonso badi bamubikila, kudi bonso badi bamubikila mu bushuwa.’​—Musambu 145:18.