Disua dia Nzambi didi dienda dienzeka anyi?

“Malu enzeke pa buloba bu muudi musue ne bu mudiwu enzeka mu diulu.”​—Matayo 6:10, Muanda Mulenga Lelu.

JULIO ne Christina bakakenga ne kanyinganyinga pakamonabu bana babu balela banayi boshika ne bafua. Kanyemesha mukuabu uvua mukuatshike maluvu uvua mudikume ne ende mashinyi mu abu avuabu bimanyike ku luseke, owu kukuata kapia. Marcos, muanabu muitanu wakapanda yeye, kadi ndimi ya kapia ivua mimunyange mudidi ne tshimfuanyi tshiende bua kashidi. Uvua ne mvula tshitema. Tatuende wakashala ne kanyinganyinga kakole ku muoyo. Kadi wakadikolesha ne kukolesha kabidi bena mu dîku diende ku muoyo wamba ne: “Tshidi tshienzeke etshi ndisua dia Nzambi, ke tshitudi ne bua kumanya, nansha kumueneke malu mimpe anyi mabi, nansha bualu kayi bukuabu buonso.”

Kumpala kua malu makuate buôwa a mushindu’eu, bantu ba bungi batu anu bamba mushindu eu. Batu bela meji ne: ‘Nzambi yeye muikale wa bukole buonso ne uditatshisha bua bualu buetu, bualu budi butuenzekele budi ne bua kuikala bua diakalenga dietu mu mushindu kampanda, nansha buobu mua kutukolela bua kubumvua.’ Udi pebe witaba lungenyi elu anyi?

Lungenyi lua se: tshionso tshidi tshienzeka, ni ntshimpe ni ntshibi, tshidi tshileja tshidi disua dia Nzambi ndushindamene nangananga pa mêyi a Yezu atudi batele kulu eku akambaye mu disambila ditubu babikila ne: ndia Tatu wetu. Disua dia Nzambi didi dienzeka mu diulu, ki mmuomu anyi? Patudi tusambila ne: ‘Malu enzeke pa buloba bu muudi musue,’ katuena muaba au tuitaba mudi malu adi enzeka pa buloba apa mikale disua dia Nzambi anyi?

Bantu ba bungi kabena bitaba lungenyi elu to. Buabu buobu, lungenyi elu ludi luleja Nzambi bu udi kayi utshuka bantu bende badiye mufuke. Ke padibu badiebeja ne: ‘Mmunyi mudi Nzambi wa dinanga mua kujingila bantu badi kabayi ne bualu makenga makuate buôwa nunku? Bikalaye ujinga bua tupete dilongesha kampanda, adi ndilongesha dia mushindu kayi adi?’ Pamu’apa malu aa ngautu udiebeja pebe.

Pa bualu ebu, muyidi Yakobo muanabu ne Yezu wakafunda ne: ‘Muntu kambi biende pamuteyabu ne: ndi muteyibue kudi Nzambi; bualu bua Nzambi kêna mumanye mua kuteyibua ne malu mabi, ne yeye muine kêna uteya muntu.’ (Yakobo 1:13) Nzambi ki ngudi ukebesha malu mabi nansha. Ke bualu kayi kakuena udi mua kuamba ne: malu onso adi enzeka pa buloba lelu ndisua dia Nzambi to. Bible udi wakula kabidi bua disua dia bantu, disua dia bisamba, kabidi nansha bua disua dia Diabolo. (Yone 1:13; 2 Timote 2:26; 1 Petelo 4:3) Kuena witabaku ne: malu avua mafikile dîku dia Julio ne Christina mmalu avua kaayi mua kuikala disua dia Tatu wetu wa mu diulu muena dinanga anyi?

Kadi ntshinyi tshivua Yezu musue kuamba menemene pakalongeshaye bayidi bende bua kusambila ne: ‘Malu enzeke bu muudi musue’? Tshivua anu dilomba Nzambi patupu bua kujikijaye mianda kampanda anyi, peshi Yezu uvua utulongesha bua kusambila bua tshintu tshikuabu tshimpe tshia mushinga mukole ne tshilenga: dishintuluka didi bantu bonso mua kutekemena? Tukonkononayi kabidi tshidi Bible utuambila.

[Mêyi a dianyisha bua bimfuanyi mu dibeji 3]

Mashinyi: Dominique Faget-STF/​AFP/​Getty Images; muana: FAO photo/​B. Imevbore