Udi muvuluke anyi?

Dibala dia nimero ya ndekelu ya Tshibumba tshia Nsentedi divua dikusankishe anyi? Nanku anji tangilabi ni udi mua kuandamuna nkonko idi ilonda eyi:

• Ntshinyi tshidi tshileja ne: Yezu uvua ne bana babu ba balume ne ba bakaji?

Bible udi uleja bualu ebu mu Matayo 13:55, 56 ne Mâko 6:3. Muaku wa tshiena-Greke (adelphos) utudi tusangana mu mvese eyi batu benza nawu mudimu bua kuleja “malanda kampanda a ku mubidi anyi a mu mikenji, kabidi udi umvuija anu bua muanabu ne muntu anyi bua muana wa tatuende anyi wa mamuende.” (The Catholic Biblical Quarterly, Tshiongo 1992)​—15/12, dibeji 3.

• Mmunyi mudi mvita mishintuluke patoke lelu’eu, ne misangu ya bungi itu mikebesha kudi malu kayi?

Mu bidimu bidi panshi ebi, mvita idi mibueje bantu mu biyole nya bena ditunga nkayabu; mvita pankatshi pa tshisumbu kampanda tshia bantu ne tshikuabu bionso bienza ne bena mu ditunga dimue. Nkuna ya bisamba, dishilangana dia ntendelelu, kansungansunga ne makokangana a bena tshididi ke bidi bikebesha mvita eyi. Tshijudiji tshikuabu tshia mvita ndukuka lua bumfumu ne lua makuta.​—1/1, dibeji 3-4.

• Ntshinyi tshidi tshituleja ne: Yezu kavua ujinga bua bena Kristo kuikalabu bambulula mêyi a mu disambila dia Tatu wetu ku muoyo?

Yezu wakalongesha tshilejilu tshia disambila etshi mu Muyuki wende wa pa Mukuna. Ngondo mitue ku 18 pashishe, wakambulula anu ngenyi minene ya mu disambila diende dia ntuadijilu adi. (Matayo 6:9-13; Luka 11:1-4) Bu muvuaye kayi muambulule disambila adi muaku ku muaku, bidi bileja se: kavua mulongeshe disambila dia kuenza dikuata ku muoyo anu mudidi amu nansha.​—1/2, dibeji 8.

• Kunyima kua Mvula wa kabutu, nyunyi wa nkutshi uvua mupete katamba kabishi ka mutshi wa olive kavuaye mupingane naku mu buatu penyi?

Katuena bamanye bungi bua tshiepuepue tshivua mu mâyi a Mvula au anyi bungi bua luya anyi mashika bivuamu to. Kadi mitshi ya olive itu mimanyike bua mutuyi isasa kabidi nansha panyima pa buobu bayikose. Nunku, imue ivua mua kuikala mipanduke ku mâyi a mvula ne pashishe milue kupatula kabidi ntonga.​—15/2, dibeji 31.

• Mu mvita ya bena mu Nigeria nkayabu, ne dikuata dia Biafra, mmunyi muvua Bantemu ba Yehowa bapete biakudia bia mu nyuma?

Kuvua muena mudimu mukuabu wa mbulamatadi uvuabu batume ku Mputu, mukuabu pende uvua wenza mudimu muaba uvua ndeka ikidila mu Biafra. Bubidi buabu bavua Bantemu. Bakitaba bua kuteka mioyo yabu mu njiwu pa kufikisha biakudia bia mu nyuma mu Biafra, kuambuluishabu bana babu ba bungi nunku too ne muakajika mvita mu 1970.​—1/3 dibeji 27.

• Ntshinyi tshiakenzabu ne Tshipungidi tshia ditalala tshia Westphalie, ne mmunyi muvua muanda eu utangila bitendelelu?

Dishintuluka diakafikisha Ampire Munsantu wa bena Lomo ku dipanduluka mu bitendelelu bisatu: bena Katolike, bena Luther ne bena Calvin. Bakenza Buobumue bua bena Mishonyi ne Tshipungu tshia bena Katolike mu bidimu bia ndekelu bia 1600. Pashishe mvita yakajuka mu Bohême ne kufikisha ku difuilakana dia mamfumu mu matunga a bungi. Bena Katolike ne bena Mishonyi bavua baluangana bua kuikala ku mutu kua bakuabu mu malu a tshididi ne a bungenda. Ku ndekelu, kuenzabu miyuki ya mu provense wa Westphalie, mu Allemagne. Panyima pa bidimu bu bitanu, bakatua biala pa Tshipungidi tshia Ditalala tshia Westphalie mu 1648, Mvita ya Bidimu Makumi Asatu kujikayi ne matunga madikadile a ku Mputu adiku lelu kutuadijawu.​—15/3, dibeji 20-23.

• Nomba wa 666 udi tshimanyinu tshia “nyama wa luonji” anyi dîna diende udi umvuija tshinyi?

Tshimanyinu tshiende etshi ntshileja mu Buakabuluibua 13:16-18. Nyama wa luonji udi tshifuanyikijilu tshia makalenge a bantu, ne dikala dia nyama eu ne “nomba wa muntu” didi dileja ne: mbulamatadi ya bantu idi ne bulema bua buntu bua dipanga bupuangane. Disangisha dia 6 ku 60 ne ku 600 didi dileja dipanga kukumbana dinene ku mêsu kua Nzambi. Aba bonso badi ne tshimanyinu etshi badi baleja mudibu banemeka makalenge a tshididi bu nzambi, anyi baatekemena bua kupeta lupandu.​—1/4, dibeji 4-7.