Balombodi ba bitendelelu badi ne bua kuyisha malu a tshididi anyi?

MUEPISKOPO kampanda wa mu ditunga dia Canada wakambila bantu batu benza ngendu ya masambila ne: “Dibuela mu malu a tshididi didi mua kuambuluisha bapele . . . Nansha mudi malu a tshididi kaayi amueneka apetangana ne disua dia Nzambi, ‘tudi ne bua kudituamu bua kuakuila bapele.’”​—Catholic News.

Pa tshibidilu, kutu ngumu itu yamba bua mudi balombodi ba bitendelelu babingisha dibuela mu malu a tshididi; ne kabiena bia mpukapuka bua kumona balombodi ba bitendelelu bikale ne mianzu ya bena tshididi. Bamue mbakebe mua kushintulula malu a tshididi. Batu banyisha bakuabu ne babavuluka bua diditua diabu mu mianda bu mudi dipetangana dia bantu ba makoba mashilangane ne dishipa dia dikuatangana ku bupika.

Nansha nanku, bena mu bitendelelu ba bungi kabatu basue patu balombodi babu babuela mu malu a tshididi to. Mukanda kampanda wakamba pa bidi bitangila teoloji wa malu a tshididi ne: “Bena Mishonyi ke bavua minga misangu babenga bua balombodi babu kababuedi mu malu a tshididi.” (Christian Century) Bantu ba bungi badi banange malu a Nzambi batu bamona ne: ekeleziya ntshintu tshia tshijila tshidi katshiyi ne bua kubuela mu malu a tshididi to.

Muanda eu udi ujula imue nkonko mimpe idi ne mushinga kudi bonso badi basue kuikala ne nsombelu mulenga. Bayishi ba Buena-Kristo badi mua kulengeja malu a tshididi anyi? * Diyisha malu a tshididi ke mushindu udi Nzambi ukuata nawu mudimu bua kuenza mbulamatadi muimpe ne kujadika nsombelu mulenga pa buloba anyi? Buena-Kristo buvua butuadije ne tshipatshila tshinene tshia kuditua mu malu a tshididi anyi?

Mushindu uvua malu a tshididi mu dîna dia Kristo matuadije

Mu mukanda kampanda, muena malu a kale Henry Chadwick udi wamba ne: tshisumbu tshia bena Kristo tshia ntuadijilu tshivua tshimanyike bua “dibenga [diatshi] dia kudia bumfumu bua pa buloba.” Tshivua “tshibenga kubuela mu malu a tshididi, katshivua tshikebesha ndululu to, ne tshivua tshiena ditalala.” (The Early Church) Mukuabu mukanda udi wamba ne: “Kuvua dishindika divua ditangalake bikole munkatshi mua bena Kristo dia se: kabavua ne bua kuikala ne muanzu kampanda mu malu a tshididi to . . . Ku ndekelu kua bidimu bia nkama ibidi, Hippolyte wakamba ne: bilele biende lumu bia bena Kristo bivua bilomba bua muntu uvua nzuji kulekela mudimu wende eu bua kushishaye kubuela mu Ekeleziya.” (A History of Christianity) Kadi ku kakese ku kakese, bantu bavua bajinga kuikala bamfumu bakatuadija kulombola mu bisumbu bia bungi bia malu a ntendelelu, badipesha buobu nkayabu mêna a butumbi. (Bienzedi 20:29, 30) Bamue bavua basue kulua diakamue balombodi ba bitendelelu ne bena malu a tshididi. Dishintuluka dia tshimpitshimpi dia malu  diakenzeka mu mbulamatadi wa Lomo diakapetesha balombodi ba bitendelelu aba mushindu wa kupeta tshivuabu basue.

Mu tshidimu tshia 312 mu bikondo bietu ebi, Constantin, Amperere mumpangano muena Lomo wakatuadija kuanyisha Buena-Kristo. Bia dikema, bepiskopo bavua ne disanka dia kudia tshipungidi ne amperere mumpangano eu bua kupetela masanka kudiye. Henry Chadwick wakafunda ne: “Ekeleziya wakatamba kupeta dîyi dia kuamba mu mapangadika manene a tshididi.” Dibuela dia balombodi ba bitendelelu mu malu a tshididi diakabafikisha ku tshinyi?

Mushindu uvua malu a tshididi manyange bayishi

Lungenyi lua se: Nzambi udi mua kuenza mudimu ne balombodi ba bitendelelu bu bena tshididi luvua nangananga kudi Augustin, muena Katolike mumanyi wa malu a teoloji uvua ne buenzeji bukole wa mu bidimu bia nkama inayi. Uvua wela meji ne: ekeleziya uvua ne bua kulombola matunga ne kutuala ditalala mu bantu. Kadi muena malu a kale Herbert George Wells wakafunda ne: “Muyuki wa ku Mputu wa mu bidimu bia 400 too ne mu bidimu bia 1400 mmuyuki udi utangila nangananga dipanga kukumbana dia lungenyi lunene elu lua dienza dia mbulamatadi wa pa buloba bujima.” Bukua-buena-Kristo kabuakatuala ditalala nansha mene ku Mputu anyi pa buloba bujima to. Tshivuabu bela meji ne: tshivua Buena-Kristo tshiakajimija mushinga watshi ku mêsu kua bantu ba bungi. Tshilema tshivua penyi?

Ba bungi bavua bamba muvuabu bayisha Buena-Kristo bakakokibua mu malu a tshididi bikale ne meji mimpe, kadi bakadimona bakadi baditue mu malu mabi. Martin Luther uvua muyishi ne mukudimunyi wa Bible mmuende lumu bua didienzeja diende dia kushintulula malu a mu Ekeleziya Katolike. Kadi, dibenga diende ne muoyo umue dia malongesha a ekeleziya diakabendeshila lumu, yeye ne bantu bavua banange malu a tshididi bua kujulabu buntomboji. Luther wakajimija kanêmu kavua naku bantu ba bungi kudiye pakatuadijaye pende kuakula bua bilumbu bia malu a tshididi. Kumpala, wakanyisha bapele bavua batombokela babanji bena tshikisu. Pashishe, pakajula bantomboji tshikisu, wakakankamija babanji bua kushipa bantomboji, buobu kubashipa binunu ne binunu. Kabiena bikemesha bua muvua bapele bamuangate bu muena tshitungu. Luther wakasaka kabidi babanji bua kutombokela amperere wa bena Katolike. Nunku, bena Mishonyi (muakalua bayidi ba Luther kumanyika) bakenza tshisumbu tshia tshididi ku ntuadijilu kua buntomboji buabu. Ntshinyi tshivua bumfumu buenzele Luther? Buakamunyanga. Tshilejilu, nansha muvuaye kumpala ubenga ditabijija bavua bela ekeleziya mpata malu ku bukole, wakalua kusaka balunda bende bena tshididi bua kuoshabu aba bonso bavua babenga batismo wa bana.

Jean Calvin uvua mfumu wa tshitendelelu uvua muende lumu bikole mu tshimenga tshia Génève, kadi yeye pende wakalua kupeta muaba munene mu malu a tshididi. Pakaleja Michel Servet ne: Busatu-Bunsantu kabuena ne nshindamenu mu Bible, bua dîyi divuaye nadi mu malu a tshididi, Calvin wakuoshisha Servet ku mutshi. Ndisesuka dikuate buôwa kayipu ku malongesha a Yezu!

Pamu’apa bantu aba bavua bapue muoyo tshidi Bible wamba mu 1 Yone 5:19 ne: “Buloba bujima budi mu bukokeshi bua mubi.” (Muanda Mulenga Lelu [MML]) Bavuaku ne dijinga dilelela dia kulengeja malu a tshididi a mu tshikondo tshiabu anyi, peshi dikeba dia bumfumu ne dia kuikala ne balunda bavua ne mianzu minene ke bivua bibakoka? Nansha bia munyi, bavua mua kuvuluka mêyi a Yakobo muyidi wa Yezu mafundisha ku nyuma wa Nzambi a se: ‘Kanuena bamanye ne: bulunda bua malu a pa buloba budi ne Nzambi lukuna anyi? Nunku muntu yonso wasua kuikala mulunda wa malu a pa buloba, udi udivuija muena  lukuna kudi Nzambi.’ (Yakobo 4:4) Yakobo uvua mumanye bimpe ne: Yezu uvua muambe bua bayidi bende ne: ‘Kabena ba pa buloba, bu mundi meme tshiyi wa pa buloba.’​—Yone 17:14.

Nansha nanku, bantu ba bungi mbamanye ne: bena Kristo kabena ne bua kudibueja mu malu mabi a pa buloba, kadi kabena banyisha dibenga kubuela mu malu a tshididi anyi ‘kubenga kuikala ba pa buloba’ bushuwa. Badi bamba mudi dibenga kubuela mu malu a tshididi edi dipangisha bena Kristo bua kuikala baleja bakuabu dinanga. Badi bitabuja bua se: balombodi ba bitendelelu badi ne bua kuambuluisha bua kuluisha dikosa mbuejilu ne kansungansunga. Kadi dibenga kubuela mu malu a tshididi divua Yezu mulongeshe ndibengangane bulelela ne diditatshisha ne muoyo mujima bua bakuabu anyi? Muena Kristo udi mua kuepuka bua kubuelakana mu bilumbu bia malu a tshididi eku wambuluisha bakuabu mu mushindu muimpe anyi? Tshiena-bualu tshidi tshilonda tshidi tshiandamuna nkonko eyi.

[Mêyi adi kuinshi]

[Tshimfuanyi mu dibeji 4]

Balombodi ba bitendelelu bakadia bipungidi ne bamfumu bu mudi Amperere Constantin bua kupetabu bumfumu bua tshididi

[Mêyi a dianyisha]

Musée du Louvre, Paris

[Bimfuanyi mu dibeji 5]

Bua tshinyi balombodi ba bitendelelu bavua bamanyike bimpe bakakokibua mu malu a tshididi?

Augustin

Luther

Calvin

[Mêyi a dianyisha]

Augustin: ICCD Photo; Calvin: Foto wa kudi Holbein, muangatshila mu mukanda wa The History of Protestantism (Vol. II)