Bansonga, nudi nuenda nuibaka bua matuku atshilualua anyi?

‘Ndi mumanye meji andi nnuelela, adi meji a ditalala, kaena a diyoyo; adi bua kunupa ditekemena mu matuku atshidi kumpala.’​—YELEMIYA 29:11.

1, 2. Mmu mishindu kayi mishilashilangane itudi mua kuangata bidimu bia bunsonga?

 BANTU bakole ba bungi batu bamona bunsonga bu tshikondo tshitambe buimpe tshia matuku a muoyo. Batu bavuluka bukole ne tshisumi bivuabu nabi patshivuabu bansonga. Batu bajinga dîba divuabu ne majitu makese, divuabu ne manaya a bungi ne divua malu onso mimpe a matuku abu a muoyo mikale kumpala kuabu.

² Aba badi munkatshi muenu batshidi bansonga batu pamu’apa bamona bunsonga mushindu mukuabu. Nudi mua kuikala ne ntatu ya mushindu wa kupita ne dishintuluka dia mubidi ne meji enu mu tshikondo tshia bunsonga. Mu kalasa, nudi pamu’apa mua kukandamena bilele bibi bia balongi benu. Bidi mua kuikala binulomba bua kudienzeja bikole bua kukandamena dinua dia diamba, dikuatshika dia maluvu ne tshiendenda tshia masandi. Ba bungi ba munkatshi muenu batu badipeta kumpala kua tshilumbu tshia dibenga kubuelakana mu malu a panu peshi malu makuabu adi atangila ditabuja dienu. Bushuwa, bunsonga budi mua kuikala tshikondo tshikole. Nansha nanku, bunsonga budi tshikondo tshia malu mimpe. Lukonko ludi ne: Mmunyi muwikala mua kuenza mudimu ne malu mimpe aa?

Sanka mu bunsonga buebe

3. Mmubelu ne didimuija kayi bivua Solomo mupeshe bansonga?

³ Bantu bakole nebakuambile ne: bunsonga kabutu bunenga to, ne ki mbashime to. Mu bidimu bikese patupu, kuakuikala kabidi nsonga to. Nanku sanka mu busonga pautshidi nsonga apa! Eu ke mubelu wa Mukalenge Solomo, wakafunda ne: ‘Wewe nsongalume, usanke mu bunsongalume buebe, mutshima webe ukusankishe mu matuku a bunsongalume buebe; wende mu njila yonso idi mutshima webe musue ne idi mimpe ku mêsu kuebe.’ Kadi Solomo wakabela bansonga ne: ‘Umushe kanyinganyinga mu mutshima webe ne malu mabi a mubidi webe.’ Pashishe kuambaye ne: ‘Bikondo bia buana ne bunsongalume bidi patupu.’​—Muambi 11:9, 10.

4, 5. Bua tshinyi mbia meji bua bansonga kulongololabu matuku abu atshilualua? Umvuija.

⁴ Udi umvua tshivua Solomo musue kuamba muaba eu anyi? Bua wewe kumvua bimpe, angata tshilejilu tshia nsonga udibu bapesha tshintu kampanda tshinene, pamu’apa mmfranga ya bumpianyi. Neenze nayi tshinyi? Udi mua kutula mfranga yonso ayi mu bisankasanka, anu muvua muana mujimine wa mu lusumuinu lua Yezu muenze. (Luka 15:11-23) Kadi ntshinyi tshienzeka pajika mfranga? Kakuyi mpata, neanyingalale, udiamba muvuaye kayi ne meji! Ku lukuabu luseke, fuanyikijabi ne: udi wangata mfranga idibu bamupeshe eyi bua kulongolola nayi matuku ende atshilualua, pamu’apa udibutshila bimpe tshitupa tshinene tshia mfranga eyi. Mu bungi bua matuku, pikalaye ukadi usanka ne mfranga eyi ivuaye mudibutshile, udi wela meji ne: neanyingalale bua muvuaye kayi mutule mfranga yende yonso bua kusanka mu bunsonga buende anyi? Kabiena nanku to!

⁵ Ikala wangata bidimu biebe bia bunsonga bu dipa dia kudi Nzambi bualu biobi mene bidi dipa dia kudiye. Ntshinyi tshiwenza nabi? Udi mua kunyanga bukole buonso ebu ne tshisumi tshiebe mu bisankasanka, umuka ku edi disanka uya ku dikuabu, kuyi wela meji bua matuku atshilualua. Kadi wewe muenze nanku, mbiumvuike ne: buebe wewe ‘bunsonga ne bidimu bia bunsongalume’ nebikale bia ‘patupu’ menemene. Nenku mbitambe buimpe bua kulongolola matuku ebe atshilualua pautshidi nsonga, ki mmuomu anyi?

6. (a) Mmubelu kayi udi Solomo mufile bua kuambuluisha bansonga? (b) Ntshinyi tshidi Yehowa musue kuenzela bansonga, ne mmunyi mudi nsonga mua kupeta disanka mu bualu ebu?

 ⁶ Solomo wakamba dîyi didi mua kukuambuluisha bua kuenza malu mimpe mu bunsonga buebe. Wakamba ne: “Uvuluke Mufuki webe mu matuku a bunsongalume buebe.” (Muambi 12:1) Mubelu eu ke wakuambuluisha bua kupeta diakalengele: teleja Yehowa ne enza disua diende. Yehowa wakambila bena Isalele ba kale malu avuaye musue kubenzela ne: ‘Ndi mumanye meji andi nnuelela, adi meji a ditalala, kaena a diyoyo; adi bua kunupa ditekemena mu matuku atshidi kumpala.’ (Yelemiya 29:11) Yehowa mmusue kabidi bua kukupesha ‘ditekemena mu matuku atshidi kumpala.’ Wewe mumuvuluke mu bienzedi biebe, mu meji ebe ne mu mapangadika ebe, ditekemena adi dia mu matuku atshilualua nedikale dimpe.​—Buakabuluibua 7:16, 17; 21:3, 4.

‘Semenayi pabuipi ne Nzambi’

7, 8. Mmunyi mudi nsonga mua kusemena pabuipi ne Nzambi?

⁷ Yakobo wakatukankamija bua kuvuluka Yehowa pakatubelaye ne: ‘Semenayi pabuipi ne Nzambi ne yeye neasemene pabuipi nenu.’ (Yakobo 4:8) Yehowa udi Mufuki, Mukalenge wa diulu ne buloba, udi muakanyine bua bantu bonso bamutendelele ne bamusamune. (Buakabuluibua 4:11) Nansha nanku, tuetu basemene pabuipi nende, neasemene pabuipi netu. Dituangata ne mushinga nunku ne dinanga kabienaku bisanguluja mutshima webe anyi?​—Matayo 22:37.

⁸ Tudi tusemena pabuipi ne Yehowa mu mishindu ya bungi. Tshilejilu, mupostolo Paulo udi wamba ne: “Nanukilayi mu disambila, nuikale batabale panudi nusambila bua kuanyisha [Nzambi].” (Kolosai 4:2, MMM) Mu mêyi makuabu tudi tuamba ne: ikala ne tshibidilu tshia kusambila. Kuikadi usanka anu bua kuamba patupu amen kunyima kua tatuebe anyi muena Kristo nebe mukuabu wa mu tshisumbu mumane kukuimanyina mu disambila to. Ukadiku munzuluile Yehowa mutshima webe ne mumuambile malu adi mu meji ebe, malu adi akunyingalaja ne ntatu iudi upeta anyi? Ukadiku mumuambile malu atu akutatshisha bikole bua kuayukila ne muntu mukuabu anyi? Masambila menza ne muoyo mujima adi afila ditalala mu mutshima. (Filipoi 4:6, 7) Adi atuambuluisha bua kusemena pabuipi ne Yehowa ne bua kumvua ne: yeye udi usemena pabuipi netu.

9. Mmunyi mudi nsonga mua kuteleja Yehowa?

⁹ Tudi tumona mushindu mukuabu wa kusemena pabuipi ne Yehowa mu mêyi aa mafundisha ku nyuma wa Nzambi a se: ‘Umvua meji adibu bakupa, witabuje diyisha, bua wewe wikale ne meji mu matuku alualua.’ (Nsumuinu 19:20) Bulelela, wewe uteleja Yehowa ne umutumikila, udi wasa tshishimikidi bua matuku atshilualua. Mmunyi muudi mua kuleja ne: udi uteleja Yehowa? Kakuyi mpata, mpaudi ubuela mu bisangilu bia bena Kristo pa tshibidilu ne uteleja miyuki idibu benzamu. Kabidi, udi ‘unemeka tatu webe ne mamu webe’ paudi ubuela mu dilonga dia Bible dia mu dîku. (Efeso 6:1, 2; Ebelu 10:24, 25) Atshi ke tshidibu bakulomba. Kabidi, utuku ‘udisumbila tshikondo’ tshia kulongolola bisangilu, tshia kubala Bible pa tshibidilu ne tshia kukebulula malu mu mikanda mikuabu anyi? Utuku utumikila biudi ubala, bua wewe kumona mua kuenda bu ‘muena meji’ anyi? (Efeso 5:15-17; Musambu 1:1-3) Wewe muenze nanku, neusemene pabuipi ne Yehowa.

10, 11. Mmasanka kayi mavule adi bansonga bapeta padibu bateleja Yehowa?

¹⁰ Mu mêyi a ntuadijilu a mukanda wa Nsumuinu, mufundi muenzeja kudi nyuma muimpe udi umvuija tshipatshila tshia mukanda eu wa mu Bible. Udi wamba ne: mukanda eu udiku ‘bua bantu bamanye lungenyi ne diyisha, bua bajingulule mêyi a meji. Bua bapete diyisha dia mua kuenza bienzedi bia meji, dia mu buakane, dia mu dikosa diakane dia nsambu, ne dia mu kulumbulula kuakane. Bua kupa muntu udi kayi mutantamane mu lungenyi budimu, bua kuleja nsongalume [dimanya] ne bukole bua kupangadija malu makane.’ (Nsumuinu 1:1-4) Ke bualu kayi, paudi ubala ne utumikila mêyi a mu Nsumuinu ne mêyi makuabu onso a mu Bible, udi upeta buakane ne kulumbulula kuakane, ne Yehowa neasanke bua wewe kusemena pabuipi nende. (Musambu 15:1-5) Wewe mupete kulumbulula kuakane, budimu, dimanya ne bukole bua kupangadija malu makane, mapangadika ebe neikale pawu mimpe.

¹¹ Kutekemena bua nsonga kuenza malu a meji mushindu’eu nkupangila meji anyi? Tòo, ki nkupangila meji to, bualu bansonga ba bungi bena Kristo batu benza malu ne meji nanku. Ke bualu  kayi bakuabu batu babanemeka ne ‘kabatu babalengulula bua bunsongalume buabu’ nansha. (1 Timote 4:12) Baledi babu badi basanka ne kasankila bua bualu buabu, ne Yehowa udi wamba ne: badi basankisha mutshima wende. (Nsumuinu 27:11) Nansha buobu bansonga, badi ne bua kuikala bajadike ne: mêyi aa mafundisha ku nyuma muimpe adi abakumbanyina: “Tangila muntu udi ne mutshima mutoke bimpe, mona muntu udi muakane; bualu bua [matuku atshilualua a muntu au neikale a] ditalala.”​—Musambu 37:37.

Sungula malu adi mimpe

12. Mbumue bua ku malu kayi a mushinga adi bansonga basungula, ne bua tshinyi disungula bualu ebu didi ne bipeta bidi bishala kashidi?

¹² Bunsonga ntshikondo tshia kusungula malu, bualu amue a kudiwu atu ne bipeta bidi bishala bua kashidi. Amue malu audi usungula mpindieu neikale ne bukole pa nsombelu webe munkatshi mua bidimu bia bungi bialua. Disungula malu a meji didi difikisha ku nsombelu wa disanka ne wa diakalengele. Disungula malu adi kaayi a meji didi mua kunyanga matuku a muoyo onso adi mashale. Tangila mudi muanda eu mulelela pa bidi bitangila malu abidi audi ne bua kusungula. Bua kumpala: Mbanganyi baudi usungula bua kusomba nabu? Bua tshinyi muanda eu udi ne mushinga? Bushuwa, lusumuinu lufundisha ku nyuma wa Nzambi ludi luamba ne: ‘Udi wenda ne bena meji udi ulua muena meji, kadi udi ubuelakana ne bapote neakenge bua bualu ebu.’ (Nsumuinu 13:20) Mbuena kuamba ne: ndekelu wa bionso netulue anu mudi aba batudi tusomba nabu: bena meji anyi bapote. Wewe udi musue kulua nganyi ku babidi aba?

13, 14. (a) Pa kumbusha dipetangana mpala ne mpala ne bantu, malunda adi atangila kabidi binganyi? (b) Ntshilema kayi tshidi bansonga ne bua kuepuka?

¹³ Paudi wela meji bua malunda, pamu’apa utu umona anu disomba ne bantu. Mmuomu, kadi ki nkujike to. Paudi utangila ndongamu kampanda ku televizion, uteleja mijiki, ubala mukanda kampanda, uya kutangila filme peshi utangila amue malu ku Internet, udi usomba ne bantu. Bikala tshipatshila tshia bulunda abu tshikale tshia kuenza malu a tshikisu ne a tshiendenda tshia masandi peshi tshia kusaka bantu ku dinua dia diamba, dikuatshika dia maluvu anyi bualu kayi bukuabu budi bubengangana ne mêyi a mu Bible, udi usomba ne ‘mupote,’ udi wenza malu anu bu se: Yehowa katuku to.​—Musambu 14:1.

¹⁴ Pamu’apa udi wela meji ne: katshia wabanga kubuela mu bisangilu bia bena Kristo ne kuenza midimu ne tshisumi mu tshisumbu, udi ne bukole bua kukandamena ngenyi idi mua kukunyanga ya mu filme anyi ya mu mijiki idi ne tshikuma tshimpe kadi mikale ne mêyi adi umvuika mabi. Imue  misangu udi wela meji ne: kabiakukuenzela bualu bubi to wewe muele patupu dîsu mu bindidimbi bia bantu butaka ku Internet. Mupostolo Paulo udi ukuambila ne: udi udidinga. Udi wamba ne: “Malunda mabi adi anyanga malu makane a bantu.” (1 Kolinto 15:33) Diakabi, bansonga bena Kristo ba bungi bavua bamueneka ne luendu luimpe mbanyangishe malu makane abu kudi malunda mabi. Nenku wikale mupangadike bua kuepuka malunda a mushindu’eu. Wewe muenze nunku, neulonde mubelu wa Paulo wa se: ‘Kanudifuanyikiji ku malu a mu tshikondo etshi, kadi nuandamuke ku dikudimuna dia meji enu bu meji mapiamapia bua nuenu nujingulule mudi disua dia Nzambi didi dimpe, didi dimusankisha, ne didi diakane tshishiki.’​—Lomo 12:2.

15. Mbualu kayi buibidi budi bansonga ne bua kusungula, ne mmitoyi kayi itubu pamu’apa babela bua muanda eu?

¹⁵ Bualu buibidi buudi ne bua kusungula mbuobu ebu. Dîba nedilue diwikala ne bua kupangadika tshia kuenza pawajikija tulasa. Biwikala musombele mu ditunga mudibi bikole bua kupeta mudimu, udi mua kudimona muenzejibue bua kuitaba ne lukasa mudimu mulenga udi umueneka. Biwikala musombele mu ditunga didi ne bubanji bua bungi, kudi mua kuikala midimu ya bungi ya kusungula, imue ya kudiyi mikale itamba kuelangana mu diteta. Balongeshi benu peshi baledi bebe badi mua kuikala bakuelela meji mimpe padibu bakuambila bua kukeba mudimu udi upetesha mfranga anyi mene bubanji bua bungi. Kadi kulonga bua kupeta mudimu wa mushindu’au kudi mua kukepesha bikole dîba diudi mua kuenzela Yehowa mudimu.

16, 17. Umvuija mudi mvese mishilashilangane mua kuambuluisha nsonga bua kuikalaye ne nkatshinkatshi pa bidi bitangila mudimu.

¹⁶ Vuluka bua kukeba bua kumanya tshidi Bible wamba kumpala kua kuangata dipangadika kampanda. Bible udi utukankamija bua kuenza mudimu bua tuetu kupeta bintu bitudi nabi dijinga, uleja ne: tuetu nkayetu tudi ne bua kudiambuila bujitu buetu. (2 Tesalonike 3:10-12) Nansha nanku, kudi malu makuabu adi ne mushinga. Tudi tukukankamija bua kubala mvese idi ilonda eyi ne kuela meji pa mushindu udiyi mua kuambuluisha nsonga bua kuikala ne nkatshinkatshi mu bualu budi butangila disungula mudimu: Nsumuinu 30:8, 9; Muambi 7:11, 12; Matayo 6:33; 1 Kolinto 7:31; 1 Timote 6:9, 10. Kunyima kua wewe mumane kubala mvese eyi, udiku umona tshidi meji a Yehowa pa bualu ebu anyi?

¹⁷ Mudimu wa bianza kawena ne bua kulua ne mushinga kupita mudimu utudi tuenzela Yehowa to. Wewe mumanye mudimu kampanda muakanyine uudi mulonge mu tulasa tua bikadilu, mbimpe. Biwikala ujinga kulonga tulasa tukuabu kunyima kua tulasa tua bikadilu, abu mbualu buudi ne bua kuyukila ne baledi bebe. Kadi kupu muoyo “malu adi [ne mushinga mutambe],” mbuena kuamba ne: malu a mu nyuma. (Filipoi 1:9, 10) Kuenji tshilema tshivua Baluka mufundi wa Yelemiya muenze to. Wakajimija dianyisha divuaye nadi bua mudimu wende wa pa buawu ne kubangaye ‘kudikebela malu manene.’ (Yelemiya 45:5) Uvua muanji kupua muoyo bua se: kakuvua ‘bualu bunene’ nansha bumue pa buloba ebu buvua mua kumusemeja pabuipi ne Yehowa anyi kumuambuluisha bua kupanduka ku kabutu ka Yelushalema to. Badi mua kuamba bualu bua muomumue buetu tuetu lelu.

Angata malu a mu nyuma ne mushinga

18, 19. (a) Ntshinyi tshidi bena mutumba bebe ba bungi bafua natshi, ne ntshinyi tshiudi ne bua kumvua bua bualu buabu? (b) Bua tshinyi bantu ba bungi kabena bumvua nzala ya mu nyuma?

¹⁸ Ukadiku mumone baleja bana ba mu matunga adi ne nzala mu bikandakanda peshi ku TV anyi? Biwikala ukadi mubamone, kakuyi mpata uvua mubumvuile luse. Utuku umvua luse lua muomumue bua bantu badi mu tshitupa tshienu anyi? Bua tshinyi udi ne bua kubumvuila luse? Bualu ba bungi ba kudibu badi bafua pabu ne nzala. Badi bafua ne nzala ivuabu bamanyishe kudi Amosa ne: ‘Mukalenge Yehowa udi wamba ne: Monayi, mu matuku alualua, nentume tshiole pa buloba, tshidi katshiyi bu tshiole tshia biakudia, ne nyota idi kayiyi bu nyota ya mâyi, kadi tshiole tshia kumvua mêyi a Yehowa.’​—Amosa 8:11.

¹⁹ Ntshia bushuwa bua se: bavule ba munkatshi mua aba badi bafua ne nzala ya mu nyuma eyi ki ‘mbamanye ne: mbapele munda muabu’ to. (Matayo 5:3, MML)  Bavule kabatu bumvua nzala ya mu nyuma to. Bamue badi mene mua kumvua ne: batu badia bimpe mu nyuma. Kadi bikalabu badia bimpe, mbualu badi badia ‘meji [a patupu] a pa buloba ebu,’ adi mikale a lukuka lua bintu, a malu a dishima a bena meji, ne ngenyi idi itangila bikadilu ne malu makuabu a buena aa. Bamue batu bela meji ne: ‘meji’ a lelu adi avuija Bible mukanda udi kauyi kabidi ne mushinga. Kadi “bena panu, ne meji abo bobo, kabena mua kumanya [Nzambi].” Meji a panu kaakukuambuluisha bua kusemena pabuipi ne Nzambi to. Adi patupu “tshintu tshia butatakane ku mesu kua [Nzambi].”​—1 Kolinto 1:20, 21; 3:19, MMM.

20. Bua tshinyi ki mbia meji bua kukeba bua kuidikija bantu badi kabayi batendelela Yehowa?

²⁰ Pautu utangila bimfuanyi abi bia bana banyane ne nzala, utuku musue kuikala bu buobu anyi? Nansha kakese! Kadi, bamue bansonga ba mu mêku a bena Kristo mbaleje dijinga dia kuikala bu bantu badi bafua ne nzala ya mu nyuma badi babanyunguluke. Pamu’apa bansonga aba badi bela meji ne: bansonga bena panu kabena ne bualu budi bubatonde to, badi benza vi. Badi bapua muoyo bua se: bansonga abu badi kule ne Yehowa. (Efeso 4:17, 18) Badi kabidi bapua muoyo bipeta bibi bia nzala ya mu nyuma. Bimue bia ku bipeta bibi ebi mmafu a panshi ne tunyinganyinga ne ntatu ya ku mubidi bikebesha kudi tshiendenda tshia masandi, dinua dia makanya, dikuatshika dia maluvu ne dinua dia diamba. Nzala ya mu nyuma idi ifikisha ku lungenyi lua buntomboji, dipanga kuikala ne ditekemena ne bulombodi kampanda mu nsombelu.

21. Mmunyi mutudi mua kudikuba bua kubenga kulonda bikadilu bibi bia bantu badi kabayi batendelela Yehowa?

²¹ Nenku, paudi mu kalasa munkatshi mua bantu badi kabayi batendelela Yehowa pamue nebe, kulekedi bikadilu biabu bikupita makanda to. (2 Kolinto 4:18) Bamue nebambe meyi a kupepeja nawu malu a mu nyuma. Kabidi, bena ku tudiomba ne bafundi ba bikandakanda nebatangalaje malu a mashimi muinshimuinshi, basua kuleja ne: kuenda masandi, kukuatshika maluvu anyi kuakula malu a busenji ki nkubi to. Luisha bikadilu bia mushindu’eu. Tungunuka ne kusomba ne bantu badi ‘balamate ditabuja ne [kuondo ka muoyo] kimpe.’ Ikala misangu yonso ne “bivule bia kuenza mu mudimu wa Mukalenge.” (1 Timote 1:19; 1 Kolinto 15:58, NW) Wikale ne bia bungi bia kuenza ku Nzubu wa Bukalenge ne mu mudimu wa budimi. Mu bidimu biutshidi ulonga, ikala wenza bumpanda-njila buambuluishi ku musangu ne ku musangu. Kolesha mmuenenu webe wa malu a mu nyuma mushindu’eu, ne kuakujimija nkatshinkatshi webe to.​—2 Timote 4:5.

22, 23. (a) Bua tshinyi nsonga muena Kristo neikale misangu mivule usungula malu adi bakuabu kabayi bumvua? (b) Mmalu kayi adibu bakankamija bansonga bua kuenza?

²² Mmuenenu wa malu wa mu nyuma neakufikishe pamu’apa ku diangata mapangadika  ikala bantu bakuabu kabayi mua kumvua to. Tshilejilu, nsongalume mukuabu muena Kristo uvua muimbi wa mijiki wa kalanda musenga ne uvua mujikije tulasa tubandile ne lumu lua bungi. Pakajikijaye tulasa tuende, wakabanga kuenza mudimu uvua tatuende wenza wa disukula mmuenu ya madidishi bua kumonaye mua kuangata mudimu uvuaye mutambe kusua bikole wa muambi wa lumu luimpe wa ku dîba ne ku dîba anyi mpanda-njila. Balongeshi bende kabakumvua bua tshinyi uvua muangate dipangadika edi to, kadi biwikala wewe musemene pabuipi ne Yehowa, tudi bajadike ne: udi umvua bua tshinyi wakangata dipangadika edi.

²³ Paudi utangila mushindu wa wewe kuenza mudimu ne biuma bia mushinga bia bunsonga buebe, ‘udibutshile bidi bitekibue bimpe bua matuku atshilualua, bua wewe ulamate muoyo udi muoyo wa bushuwa mene.’ (1 Timote 6:19) Ikala mupangadike bua ‘kuvuluka Mufuki webe’ mu bunsonga buebe, ne mu matuku ebe onso a muoyo. Au ke mushindu umuepele wa kuasa tshishimikidi tshimpe bua matuku atshilualua, matuku atshilualua ikala kaayi mua kujika.

Nkomenu webe udi tshinyi?

• Mmibelu kayi mifundisha ku nyuma muimpe idi yambuluisha bansonga bua kulongolola matuku abu atshilualua?

• Ng’imue mishindu kayi idi nsonga mua ‘kusemena pabuipi ne Nzambi’?

• Ng’amue mapangadika kayi adi nsonga wangata ikala ne bukole pa matuku ende atshilualua?

[Nkonko ya dilonga]

[Bimfuanyi mu dibeji 15]

Neulekele bipatshila biebe biangata bukole buebe buonso ne tshisumi tshionso bia mu bunsonga anyi?

[Tshimfuanyi mu mabeji 16, 17]

Bansonga bena Kristo ba meji badi balama mmuenenu muimpe wa malu wa mu nyuma