Mbakukolesheku kudi Dîyi dia Nzambi anyi?

NTSHINYI tshiutu wenza pautu upeta ntatu? Bua Yezu yeye, divuluka mvese kampanda muakanyine diakamuambuluisha bua kutantamena ntatu ya kudi Satana. (Matayo 4:1-11) Bia muomumue, pavua Mukalenge Davidi upeta ntatu, Dîyi dia Nzambi ke divua dimukolesha. Wakamba ne: “Mu divulangana dia matata munda muanyi, masamba ebe adi asankisha mutshima wanyi.”​—Musambu 94:19.

Mu mushindu wa muomumue, kuvuluka mvese kampanda ututu basue kudi mua kutusamba peshi kutupesha bukole patudi tupeta ntatu. Angata tshilejilu tshia Rex (udi mpindieu ne bidimu 89) udi muenze mudimu wa ku dîba ne ku dîba katshia mu 1931. Kadi udi wamba ne: “Misangu mivule mvua ndiumvua tshiyi mukumbanyine bujitu kampanda bua pa buabu mu buambi.” Ntshinyi tshivuaye wenza? Udi wamba ne: “Mvua mvuluka mvese untu musue wa Nsumuinu 3:5, udi wamba ne: ‘Eyemena Yehowa ne mutshima webe wonso, kueyemenyi dijingulula diebe dia mianda.’ Divuluka ne ditumikila mvese eu divua dingambuluisha bua kuenza midimu yanyi bimpe.”

Nansha bana batekete badi pabu mua kupeta diambuluisha mu dikala ne mvese utubu basue. Jack (muana wa bidimu bisambombo) udi wamba ne: Matayo 24:14 ke mvese wende utuye musue. Mvese eu utu umusaka bua kuya mu buambi ne baledi bende. Udi wamba ne: “Ntu musue kuya mu buambi mu Disambombo dionso ne papa ne mama ne yaya.”

Anu bu Yezu, utuku imue misangu upeta ntatu idi ilenga ditabuja diebe buludi anyi? Nanku Filipoi 4:13 udi mua kulua umue wa ku mvese iutu musue. Anu bu Mukalenge Davidi, udiku ne “Matata munda” muebe anyi? Nanku divuluka Filipoi 4:6, 7 didi mua kukuambuluisha bua kuatantamena. Utuku imue misangu unyingalala ne: mudimu uudi wenzela Nzambi udi patupu anyi? Nanku divuluka 1 Kolinto 15:58 nedikupeshe bukole.

Patudi tukuata mvese miakanyine, tudi tupesha Dîyi dia Nzambi mushindu wa kuikaladi ne bukole mu nsombelu wetu. (Ebelu 4:12) Mvese itudi basue ya mushindu’eu idi mua kutupesha bukole ne busambi.​—Lomo 15:4.