Mua kunenga panu ne kuikala ne disanka

BAMUE bantu batu bamba ne: “Muntu yonso mmusue kuikala amu ne muoyo; kadi kakuena muntu nansha umue utu musue kukulakaja to.” Bantu bakole ba bungi bakadi mu tshikondo tshia kulekela mudimu batu bakeba kuikala ne dîba divule ne majitu makese. Kadi batu batshina bua kushala kabayi ne tshia kuenza ne kabayi ne mushinga kabidi to. Batu kabidi batshina bua kusomba nkayabu, bua kupangila disanka ne bua kusama.

Kadi ntshinganyi tshidi muntu mua kuenza bua kuikala ne nsombelu wa disanka? Balunda bimpe ne bena dîku badi ne dinanga badi mua kuambuluisha bakulumpe ne bana bua kuikala ne disanka. Kadi, malu adi bakuabu benzela muntu mukulakaje bua kuikalaye ne disanka ki ng’adi ne mushinga menemene to. Tshidi ne mushinga menemene ntshidi muntu mukulakaje mua kuenzela bakuabu.

Pakalonga bamue bantu mabaka 423 a bantu bakulakaje muntatshi mule, bakamona ne: “kuambuluisha bantu bakuabu kudi mua kulepesha muoyo wetu.” Stephanie Brown, muntu uvua mulombole dilonga edi udi wamba ne: “Malu aa adi aleja ne: tshitudi tupetela mu malanda etu ne bakuabu ki ntshidi tshilengeja malanda aa to; tshitudi tuenzela bakuabu ke tshidi ne mushinga.” Tudi mua kuambuluisha bakuabu pa kubenzeja midimu ya ku nzubu, kubalamina bana, kuya kubasumbila bintu, kubambula mu mashinyi nansha pa dikalu peshi kuteleja muntu udi ne dijinga dia kuakula.

Yezu Kristo wakamba bidimu bitue ku 2 000 kumpala ne: “Disanka dia kupa ndipite dia kupeta.” (Bienzedi 20:35, MMV) Makuta a bungi, manga a kubenga kukulakaja, ne biakudia kabiena mua kuenza menemene bua se: muntu asombe matuku a bungi pa buloba ne ikale ne disanka to. Kadi, bidi bikengela kuenza mudimu ne kufila dîba diebe ne bukole buebe bua kuambuluisha bakuabu.

Kadi kuambuluisha bakuabu nkayaku kakuena mua kujikija bukulakaje ne masama ne lufu to. Anu Bukalenge bua Nzambi ke bualua kubiumusha. Bukalenge ebu nebujikije masama ne nansha “lufu kaluakuikalaku kabidi.” (Buakabuluibua 21:3, 4, MMV; Yeshaya 33:24) Bantu badi batumikila Nzambi nebikale ne muoyo wa tshiendelele ne disanka mu mparadizu pa buloba apa. (Luka 23:43) Bantemu ba Yehowa mbasue kuleja bantu nabu tshidi Bible wamba pa tshidibu mua kuenza bua kusomba matuku a bungi pa buloba ne kuikala ne disanka.