Badi batumbisha Nzambi badi bapeta mabenesha

‘Nebalue kukukuila ku mêsu kuebe, [Yehowa], nebatumbishe dîna diebe.’​—MUSAMBU 86:9.

1. Bua tshinyi tudi bakumbane bua kutumbisha Nzambi mu mishindu idi mipite ya bifukibua bidi kabiyi ne muoyo?

 YEHOWA mmuakanyine bua bifukibua biende bionso kumutumbishabi. Nansha mudi bifukibua biende bidi kabiyi ne muoyo bimutumbisha mu tshimuma, tuetu bantu tudi ne mushindu wa kuela meji, kujingulula malu, kuleja dianyisha ne kutendelela. Nunku tuetu ke badi mufundi wa Misambu wambila ne: ‘Nuenu bonso ba pa buloba, nuelele Nzambi mbila ya disanka. Nuimbe bienu musambu udi uleja butumbi bua dîna diende, numutumbishe ne ditumbisha dipite bunene.’​—Musambu 66:1, 2.

2. Mbanganyi badi batumikile dîyi dia kutumbisha dîna dia Nzambi, ne mbua tshinyi?

² Bantu ba bungi batu babenga kuitaba Nzambi anyi kumutumbisha. Kadi, mu matunga 235, Bantemu ba Yehowa bapite pa miliyo isambombo badi baleja ne: buobu badi bamona ‘[ngikadilu] idi kayiyi mua kumueneka’ ya Nzambi ku diambuluisha dia bintu bidiye muenze ne se: ‘mbumvue’ mudi bifukibua bimanyisha butumbi mu tshimuma. (Lomo 1:20; Musambu 19:2, 3) Mbafike kabidi ku dimanya Yehowa ne ku dimunanga pa kulonga Bible. Musambu wa 86:9, 10 uvua mudianjile kumanyisha ne: ‘Ba mu bisamba bionso bia bantu biwakufuka nebalue kukukuila ku mêsu kuebe, [Yehowa], nebatumbishe dîna diebe. Bualu bua wewe udi munene, ne udi wenza malu a kukema; anu wewe nkayebe udi Nzambi.’

3. Mmunyi mudi “musumba munene” ‘ukuatshila Nzambi mudimu munya ne butuku’?

³ Buakabuluibua 7:9, 15 udi kabidi wakula bua “musumba munene” wa batendeledi badi ‘bakuatshila [Nzambi] mudimu munya ne butuku mu ntempelo wende.’ (MMM) Abi kabiena biumvuija ne: Nzambi udi ulomba basadidi bende bua kumutumbisha kabayi balala tulu to, kadi batendeledi bende badi benza bulongolodi bua buloba bujima. Nunku padi butuku buila mu amue matunga, basadidi ba Nzambi ba lukuabu luseke lua dibulunge dietu mbaditue mu mudimu wa diyisha. Nanku tudi mua kuamba ne: dîba kadiena dibuelela aba badi batumbisha Yehowa. Mu katupa kîpi emu ‘bintu bionso bidi bipuyakana’ nebitumbishe Yehowa. (Musambu 150:6) Kadi bua mpindieu, ntshinyi tshidi yonso wa kutudi ne bua kuenza bua kutumbisha  Nzambi? Nntatu kayi itudi mua kupeta? Ne mmabenesha kayi adi mindile aba badi batumbisha Nzambi? Bua kupeta mandamuna, tukonkononayi muyuki wa mu Bible udi utangila tshisa tshia Gada tshia Isalele.

Lutatu lua kale

4. Ndutatu kayi luvua bena tshisa tshia Gada ne bua kupeta?

⁴ Kumpala kua bena Isalele ba mu tshisa tshia Gada kubuela mu Buloba Bulaya, bakalomba bua kusombela ku Est kua Musulu wa Yadene, muaba uvua muakanyine bua kudisha bimuna biabu. (Nomba 32:1-5) Disombelamu divua ne bua kubapetesha ntatu mikole. Bisa bivua ku Ouest kua musulu eu bivua ne bua kukubibua ku njiwu kudi Tshibanda tshia Yadene, tshivua tshipumbisha biluilu bia baluishi bua kubuelamu. (Yoshua 3:13-17) Kadi pa bidi bitangila maloba avua ku Est kua Yadene, mukanda kampanda mufunda kudi George Adam Smith udi wamba ne: “Maloba aa mmalandakane ne malabale, mu mpata munene wa bena Alaba, kaayi ne tshintu nansha tshimue tshidi tshipumbisha baluishi bua kubuelamu. Nunku adi misangu ya bungi kumpala kua njiwu ya kukuatshibua ku bukole kudi bendakanyi bena lukuka, ne bamue ba kudibu batu babuela mu mpata eu tshidimu tshionso mu dikeba maloba a kudishila bimuna.”​—The Historical Geography of the Holy Land.

5. Mmunyi muvua Yakoba mukankamije ndelanganyi ya Gada bua kuluangisha bavua babaluisha?

⁵ Mmunyi muvua bena tshisa tshia Gada mua kupita ne lutatu elu lua ku musangu ne ku musangu? Kale bidimu bia bungi bimane kupita, nkambua wabu Yakoba wakamba pa bulalu buende bua lufu ne: “[Gada], bivi ba mu njila nebamupawule, yeye kabidi neabapawule, abalondakaje.” (Genese 49:19, MMM) Muntu kayi mutangile bimpe udi mua kumona mêyi aa bu adi mabi. Kadi mu bulelela, avua ambila bena Gada bua kuluangisha bavua babela mvita. Yakoba wakabajadikila ne: bu buobu ne bua kuenza nanku, baluishi babu bavua ne bua kunyema mvita ne bundu tente mu mêsu, ne bena Gada benda babalondakaja.

Ntatu idi ikuata ntendelelu wetu lelu

6, 7. Mmunyi mudi nsombelu wa bena Kristo lelu mufuanangane ne wa tshisa tshia Gada?

⁶ Anu bu tshisa tshia Gada, lelu bena Kristo badi mu njiwu ya kupeta buluishi ne ntatu ya mu ndongoluelu wa malu wa Satana; kakuena bukubi nansha bumue bua mu tshishima budi butuepula ku malu aa to. (Yobo 1:10-12) Ba bungi ba kutudi batu batuilangana ne buluishi patubu baya mu kalasa, mu dikeba tshiakudia ne mu dikolesha bana. Kudi kabidi buluishi kabuyi kupepeja bua malu adi munda mua muntu. Bamue badi ne bua kuluangana ne “dieba mu mubidi” bu mudi disama dikole anyi bulema. (2 Kolinto 12:7-10) Bakuabu mbazengele ne lungenyi lua didimona ne mushinga mukese. “Matuku mabi” a bukulakaje adi mua kupangisha bena Kristo bakadi bakulakaje bua kusadila Yehowa ne bukole buvuabu nabu kumpala.​—Muambi 12:1.

⁷ Mupostolo Paulo udi kabidi utuvuluija ne: ‘Diluangana dietu dia bibula ndia kufuilangana ne  bisumbu bia nyuma mibi bidi mu miaba ya mu diulu.’ (Efeso 6:12) Tudi misangu yonso kumpala kua njiwu ya kupeta ‘nyuma wa pa buloba ebu’ anyi lungenyi lua buntomboji ne buenzavi ludi Satana ne ba-demon bende batuma kumpala. (1 Kolinto 2:12; Efeso 2:2, 3) Anu bu Lota uvua mutshinyi wa Nzambi, malu mabi adi bantu badi batunyunguluke benza ne bamba adi mua kutunyingalaja. (2 Petelo 2:7) Satana udi mua kutuluisha kabidi buludiludi. Udi wela bashadile bela manyi mvita, buobu badi ‘batumikila mikenji ya Nzambi, ne badi ne bumanyishi bua Yezu.’ (Buakabuluibua 12:17) “Mikoko mikuabo” ya Yezu idi payi ipeta buluishi bua kudi Satana padibu bakanga midimu yabu ne bayikengesha.​—Yone 10:16.

Tulekele diluangana anyi tuluangishe badi batubunda?

8. Ntshinyi tshitudi ne bua kuenza padi Satana utubunda, ne mbua tshinyi?

⁸ Ntshinyi tshitudi ne bua kuenza padi Satana utubunda? Anu muvua bena mu tshisa tshia kale tshia Gada, tudi ne bua kuikala bakole mu nyuma ne kuluangisha badi batuela mvita mu diumvuangana ne mibelu ya Nzambi. Diakabi, bamue mbatuadije kutshioka bua ntatu ya mu nsombelu, balengulula majitu abu a mu nyuma. (Matayo 13:20-22) Bua kumvuija tshivua tshienzeje bua dibuela mu bisangilu bia tshisumbu tshiabu dikepele, Ntemu kampanda wakamba ne: “Bana betu bakadi batshioka bulelela. Badi ne tunyinganyinga tua bungi menemene.” Bushuwa, lelu bantu badi ne malu a bungi adi mua kubatshiokesha. Nunku bidi mua kulua bipepele bua kumona ntendelelu wa Nzambi bu lukuabu lutatu anyi dilomba didi dinema bujitu. Kadi eu ki mmuenenu muakanyine peshi muimpe anyi?

9. Mmunyi mudi kuambula tshikokedi tshia Kristo kufikisha ku dikisha?

⁹ Tangila tshivua Yezu muambile misumba ya bantu ba mu tshikondo tshiende bavua pabu batshiokesha kudi ntatu ya mu nsombelu: ‘Luayi kundi, bonso badi ne mudimu mukole, badi ne bujitu bunene, meme nennupe dikisha.’ Yezu uvua usua kuamba ne: muntu uvua mua kupeta dikisha adi pa kukepesha mudimu wende udiye wenzela Nzambi anyi? Tòo, Yezu wakamba kabidi ne: ‘Angatayi mutshi wanyi wa tshikokedi pa nshingu yenu, nuyile malu kundi; bualu bua meme ndi ne kalolo ne kanemu mu mutshima wanyi; nunku nenusangane dikisha mu mitshima yenu.’ Tshikokedi mmutshi anyi mulonda udi wambuluisha muntu anyi nyama bua kuambula tshintu tshia bujitu. Kadi bua tshinyi bantu badi ne bua kuitaba bua kuambula tshikokedi tshia nunku? Katuena badianjile kuikala ne “bujitu bunene” anyi? Bushuwa, kadi tshiambilu etshi tshia mu tshiena-Gelika badi kabidi mua kutshikudimuna ne: “Ikalayi muinshi mua tshikokedi tshianyi pamue nanyi.” Anji ela meji: Yezu udi udifila bua kutuambuluisha bua tuambule bujitu buetu! Katuena ne bua kubuambula ne bukole buetu nkayetu to.​—Matayo 9:36; 11:28, 29; 2 Kolinto 4:7.

10. Ntshinyi tshitudi tupeta patudi tuenza madikolela bua kutumbisha Nzambi?

¹⁰ Patudi tuambula tshikokedi tshidi Kristo utupesha bu bayidi bende, tudi tuluangana ne Satana. Yakobo 4:7 udi ulaya ne: “Nukandamene Diabolo ne yeye neanunyeme.” Ebi kabiena bileja ne: mbipepele bua kukandamena Satana to. Kusadila Nzambi kudi kulomba madikolela a bungi. (Luka 13:24) Kadi Bible udi utulaya mu Musambu wa 126:5 ne: ‘Badi bamiamina maminu ne binsonji ku mêsu nebapuole biakudia ne mbila ya disanka.’ Bulelela, katuena tutendelela Nzambi udi kayi ne dianyisha to. Udi “mufutshi wa badi bamukeba,” ne udi ubenesha bantu badi bamutumbisha.​—Ebelu 11:6.

Tutumbishayi Nzambi pa kuyisha Bukalenge

11. Mmunyi mudi mudimu wa budimi wambuluisha bua kutuila Satana nkanana?

¹¹ Yezu wakatuma dîyi ne: ‘Yayi bienu, nuvuije ba bisamba bionso bayidi.’ Mudimu wa diyisha mmushindu munene wa kulambula Nzambi ‘mulambu wa kumutumbisha nawu.’ (Matayo 28:19; Ebelu 13:15) ‘Dibueja makasa etu mu bisabata bia kudilongolola bua lumu luimpe lua ditalala’ ntshitupa tshikuabu tshinene tshia bietu ‘bintu bionso bia mvita’ bitudi tutuila nabi Satana nkanana. (Efeso 6:11-15) Ditumbisha Nzambi mu mudimu wa budimi mmushindu mulenga wa kukolesha ditabuja dietu. (2 Kolinto 4:13) Bidi bituambuluisha bua kuepuka ngenyi mibi. (Filipoi 4:8) Dienza mudimu wa budimi didi dituambuluisha bua kukoleshangana ne bena Kristo netu.

12, 13. Mmunyi mudi dienza mudimu wa budimi pa tshibidilu mua kuambuluisha bena mu mêku? Fila tshilejilu.

¹² Mudimu wa diyisha udi kabidi mua kuikala  mudimu muimpe wa bena mu dîku. Mu bulelela, bana batu dijinga ne dijikija lutetuku dimpe. Kadi, dîba dipitshisha ne bena mu dîku mu mudimu wa budimi kadiena ne bua kuikala ditonda to. Baledi badi mua kudivuija dia disanka pa kuibidija bana babu bua bapatule bipeta bimpe mu mudimu wa kuyisha. Bana si batu basue malu atubu benza bimpe, ki mmuomu anyi? Padi baledi baleja nkatshinkatshi, kabayi bajinga bua bana babu benze bipitshile pa mikalu yabu, badi mua kubambuluisha bua kuikala ne disanka mu mudimu wa diyisha.​—Genese 33:13, 14.

¹³ Kabidi, bena dîku badi batumbisha Nzambi pamue badi bakolesha malanda abu. Tuangate tshilejilu tshia muanetu wa bakaji uvuabu balekele ne bana batanu kudi bayende uvua kayi muena Kristo. Wakatuilangana nunku ne lutatu lua kupeta mudimu wa bianza ne kudisha bana bende. Ebi biakamupetesha dibungama dikole ne kulengululaye majinga a mu nyuma a bana bende anyi? Udi wamba ne: “Ngakalonga Bible ne mikanda ya malu a mu Bible ne tshisumi, ntumikila bimvua mbala. Mvua nya ne bana mu bisangilu ne mu mudimu wa ku nzubu ne ku nzubu pa tshibidilu. Mbipeta kayi biakapatuka bua madikolela anyi? Bana banyi bonso batanu mbatambule.” Diditua bikole mu mudimu wa diyisha didi kabidi mua kukuambuluisha mu madikolela audi wenza bua kukolesha bana bebe mu ‘dibela ne didimuija bia Mukalenge.’​—Efeso 6:4.

14. (a) Mmunyi mudi bansonga mua kutumbisha Nzambi mu kalasa? (b) Ntshinyi tshidi mua kuambuluisha bansonga bua ‘kabafu bundu bua lumu luimpe’?

¹⁴ Bansonga wetu, binuikala basombele mu ditunga mudi mikenji mianyishe bua kuyisha miaba yonso, nudiku nutumbisha Nzambi pa kuyisha mu kalasa anyi, peshi ditshina bantu didi dinupingaja tshianyima? (Nsumuinu 29:25) Ntemu kampanda wa bidimu 13 wa mu ditunga dia Porto Rico udi ufunda ne: “Tshitu muanji kumvua buôwa bua kuyisha mu kalasa to, bualu ndi mmumanye ne: etshi mbulelela. Mu kalasa ntu anu ngela munu kuulu ne ngambila bakuabu malu andi mulonge mu Bible. Patutu katuyi tulonga, ntu nya mu tshilaminu tshia mikanda tshia mu tshilongelu tshietu ne mbala mukanda wa Les jeunes s’interrogent *.” Yehowa mmubeneshe madikolela ende anyi? Udi wamba ne: “Minga misangu balongi betu batu bangela nkonko anyi mene balomba pabu mukanda eu.” Biwikala upingana tshianyima mu muanda eu, pamu’apa bidi bikengela bua udijinguluile nkayebe ‘mudi disua dia Nzambi didi dimpe, didi dimusankisha ne didi diakane tshishiki’ pa kudilongela ne tshisumi. (Lomo 12:2) Paudi utuishibua ne: tshiudi mulonge mbulelela, ‘kuakufua bundu bua lumu luimpe’ nansha kakese.​—Lomo 1:16.

‘Tshiibi tshiunzulula’ bua mudimu

15, 16. ‘Ntshiibi tshinene kayi tshia kuenza mudimu’ tshidi bamue bena Kristo babuelele, ne mmabenesha kayi adibu bapete?

¹⁵ Mupostolo Paulo wakafunda ne: bavua ‘bamunzuluile tshiibi tshinene tshia kuenza mudimu.’ (1 Kolinto 16:9) Nsombelu webe udiku ukunzuluila tshiibi bua kuditua mu mudimu wa bungi anyi? Tshilejilu, kuditua mu mudimu wa bumpanda-njila bua pa tshibidilu anyi buambuluishi kudi kulomba dienza mudimu wa diyisha mêba 70 anyi 50 ku ngondo. Pa tshibidilu, bena Kristo batu banyisha bena Kristo nabu bampanda-njila bua mudimu wabu wa lulamatu. Nansha nanku, dienza diabu dia mêba a bungi mu mudimu wa kuyisha kadiena dibasaka bua kudimona bikale ne mushinga bapite bana babu ba balume anyi ba bakaji to. Kadi badi ne lungenyi lua buena luvua Yezu muleje lua kuamba ne: ‘Tudi bapika ba tshianana, tuakuenza anu malu atuakadi nawu bua kuenza.’​—Luka 17:10.

¹⁶ Mudimu wa bumpanda-njila udi ulomba  didibela, didilongolola dia muntu pa nkayende ne dijinga dia kudipangisha amue masanka. Kadi kudi mabenesha. Tamika, nsongakaji udi mpanda-njila udi wamba ne: “Kumanya mua kuludikila bantu njila mululame mu Dîyi dia Nzambi dia bushuwa ndibenesha dinene. Paudi wenza bumpanda-njila udi wenza mudimu bikole ne Bible. Mpindieu pantu nya ku nzubu ne ku nzubu, ntu mvuluka mvese miakanyine muntu ne muntu yonso undi nyikila nende.” (2 Timote 2:15) Mpanda-njila mukuabu, diende Mica udi wamba ne: “Kumona mushindu udi bulelela bulenga nsombelu wa bantu ndibenesha dikuabu dia dikema.” Nsonga mukuabu diende Matthew udi wakula bia muomumue bua disanka dia “kumona muntu ubuela mu bulelela. Kakuena disanka dia mushindu mukuabu didi mua kupita edi to.”

17. Mmunyi muvua muena Kristo mukuabu mutshimune mmuenenu mubi pa bidi bitangila bumpanda-njila?

¹⁷ Udiku mua kubuela ku tshiibi tshia mudimu wa bumpanda-njila anyi? Pamu’apa udi mua kuikala musue kuwenza kadi udimona kuyi mukumbane to. Kenyatte, muanetu utshidi nsongakaji, udi wamba ne: “Mvua ne mmuenenu mubi pa bidi bitangila bumpanda-njila. Tshivua ndimona mukumbane bua kubuenza to. Tshivua mumanye mua kulongolola mishindu ya kutuadija diyikila ne bantu anyi kubelesha meji ku diambuluisha dia Bible to.” Kadi bakulu bakamupesha muanetu wa bakaji uvua mpanda-njila mupie bua kuenzabu nende mudimu. Kenyatte udi wamba ne: “Bivua bikuatshisha milowo pamvua ngenza nende mudimu. Ebi biakampesha nzala ya kuenza mudimu wa bumpanda-njila.” Pamu’apa buobu bakukankamije ne bakulongeshe pebe mudimu, neupete nzala ya kuenza bumpanda-njila.

18. Mmabenesha kayi adi aba badi babuela mu mudimu wa bu-misionere mua kupeta?

¹⁸ Bumpanda-njila budi mua kukunzuluila tshiibi ku mikuabu midimu ya Nzambi. Tshilejilu, bamue bena dibaka badi mua kukumbana bua kulonga mudimu wa bu-misionere bua babatume bua kuyisha mu matunga makuabu. Bamisionere batu ne bua kuibidila ne ditunga dipiadipia, pamu’apa ne muakulu mupiamupia, bilele bipiabipia ne biakudia bipiabipia. Kadi mabenesha adibu bapeta adi avuija ntatu eyi tshianana. Mildred, misionere mumonemone mianda wa mu Mexique wakamba ne: “Tshitu muanji kunyingalala bua dipangadika dianyi dia kulua misionere to. Etshi ke tshivua dijinga dianyi katshia ku buana.” Mmasanka kayi adiye  mupete? Udi wamba ne: “Mu ditunga dietu, bivua bikole bua kupeta muntu wa kulonga nende Bible. Kadi munemu, nkadi mupete umue musangu balongi batue ku banayi batuadija tshiapamue mudimu wa kuyisha!”

19, 20. Mmunyi mudi mudimu wa ku Betele, wa mu bukua-matunga ne Kalasa ka Dilongesha Mudimu bipeteshe ba bungi mabenesha?

¹⁹ Aba badi benza mudimu wa ku Betele anyi ku biro bia Bantemu ba Yehowa badi pabu bapeta mabenesha mavule. Sven, muanetu utshidi nsongalume udi wenza mudimu mu Allemagne, udi wamba bua mudimu wende wa ku Betele ne: “Ndi mmona ne: ndi ngenda ngenza bualu budi ne mushinga wa bungi. Mvua mua kuikala muenze mudimu ne mamanya anyi mu buloba ebu. Kadi bivua mua kuikala anu bu dilamisha makuta ku banke ukadi pa kutua panshi.” Bushuwa, kuenza mudimu bu mudisuile kakuyi difutu kudi kulomba didipangisha amue masanka. Kadi Sven udi wamba ne: “Paudi upingana ku nzubu, udi mumanye ne: tshintu tshionso tshiuvua muenze dituku adi uvua mutshienzele Yehowa. Ne abi bidi bikupesha disanka dia bungi.”

²⁰ Bamue bana betu badi benza mudimu wa mu bukua-matunga, mudimu wa dibaka nzubu ya biro bia Bantemu mu matunga makuabu. Mulume mukuabu ne mukajende bavua benze mudimu mu matunga muanda-mukulu bakafunda ne: “Bana betu ba munemu mbantu bimpe. Mitshima neyitusame bikole bua kushiyangana nabu, eu mmusangu wa muanda-mukulu wikala mitshima yetu misame. Bushuwa, tudi bamone malu mimpe be!” Pashishe kudi Kalasa ka Dilongesha Mudimu. Mu kalasa aka, bana betu ba balume batshidi bajike badi bakumbaja malu malomba badi balonga malu a mu nyuma. Umue wabu uvua mujikije mu kalasa aka wakafunda ne: “Tshiena mumanye mushindu wa kunuela tuasakidila bua kalasa aka ka mpatshi. Mbulongolodi kayi bukuabu budi mua kudienzeja nunku bua kulongesha bantu mudimu?”

21. Ndutatu kayi ludi bena Kristo bonso batuilangana nalu mu mudimu udibu benzela Nzambi?

²¹ Bushuwa, biibi bia bungi bia mudimu mbiunzulula. Mu bulelela, ba bungi ba kutudi kabena ne mushindu wa kuenza mudimu ku Betele anyi mu ditunga dikuabu to. Nansha Yezu uvua mumanye bimpe ne: bena Kristo bavua ne bua kukuama “mamuma” bungi bushilashilangane bilondeshile nsombelu wa muntu ne muntu. (Matayo 13:23) Nunku lutatu lutudi nalu tuetu bena Kristo ndua kukuata mudimu bimpe ne nsombelu wetu, mbuena kuamba ne: kuenza mudimu wa Yehowa bikole bilondeshile nsombelu wetu. Patudi tuenza nunku, tudi tupesha Yehowa butumbi, ne tudi mua kuikala bajadike ne: udi usanka bikole. Tangila tshilejilu tshia Ethel, muanetu wa bakaji ukadi mukulakaje udi musombele mu nzubu kampanda wa bakulakaje. Udi uyisha badiye musombe nabu mu nzubu eu pa tshibidilu ne ku telefone kabidi. Nansha mudiye kayi ne mushindu wa kuenza malu onso, mmudifile ne anyima wende mujima mu mudimu wende.​—Matayo 22:37.

22. (a) Mmu mishindu kayi mikuabu itudi mua kutumbisha Nzambi? (b) Ntshikondo kayi tshia dikema tshidi tshituindile?

²² Kadi vuluka ne: diyisha didi anu mushindu umue utudi tuambika Yehowa butumbi. Patudi ne ngikadilu ne tshimuenekelu bia tshitembu ku mudimu wetu wa bianza, mu kalasa ne kumbelu, tudi tusankisha mutshima wa Yehowa. (Nsumuinu 27:11) Nsumuinu 28:20 udi ulaya ne: ‘Muntu udi mua kueyemenyibua neavudijibue ne masanka a bungi.’ Nunku tudi ne bua ‘kukuna maminu a bungi’ mu mudimu utudi tukuatshila Nzambi, bamanye ne: netupuole mabenesha bungi tshianana. (2 Kolinto 9:6) Tuetu benze nanku, nebikale diakalenga kutudi bua kuikala ne muoyo mu tshikondo tshilenga atshi tshikala ‘bintu bionso bidi bipuyakana’ ne bua kupesha Nzambi butumbi budiye muakanyine menemene!​—Musambu 150:6.

[Mêyi adi kuinshi]

Udi muvuluke anyi?

• Mmunyi mudi bantu ba Nzambi bamuenzela mudimu “munya ne butuku”?

• Ndutatu kayi luvua tshisa tshia Gada tshipete, ne bualu ebu budi bulongesha bena Kristo tshinyi lelu?

• Mmunyi mudi mudimu wetu wa budimi utukuba ku mvita idi Satana utuela?

• ‘Ntshiibi tshiunzulula’ kayi tshidi bamue babuelele, ne mmabenesha kayi adibu bapete?

[Nkonko ya dilonga]

[Tshimfuanyi mu dibeji 15]

Anu muvua bena Gada baluangisha bisumbu bia baluishi, bena Kristo badi ne bua kuluangisha Satana padiye ubabunda

[Tshimfuanyi mu dibeji 17]

Tudi tukoleshangana ne bana betu mu mudimu wa budimi

[Bimfuanyi mu dibeji 18]

Mudimu wa bumpanda-njila udi mua kunzulula tshiibi ku midimu mikuabu ya pa buayi bu mudi:

1. Mudimu wa mu bukua-matunga

2. Mudimu wa ku Betele

3. Mudimu wa bu-misionere