Malu malonda kudi bamanyishi ba Bukalenge

‘Lua utukuatshishe’

MU NGONDO wa muanda-mutekete wa tshidimu tshia 2000, bakalomba Bantemu ba mu ditunga dia Autriche, dia Allemagne ne dia Suisse badi bakula tshiena-Allemagne bua kuya mu ditunga dia Bolivie. Bua tshinyi? Bualu mu tshijengu tshia kilometre mitue ku 300 pamue ne tshimenga tshia Santa Cruz (mu Bolivie) mudi bena nzambi badibu babikila ne: ba-Mennonite badi bakula tshiena-Allemagne bavua basue kumanya Bible bikole.

Bantemu batue ku 140 bakitaba bua kuya mu Bolivie. Bamue bakaya bua mbingu mikese, bakuabu bua tshidimu tshimue anyi kupita apu. Mu dilua mu Bolivie, bakaleja lungenyi lua muomumue ne lua ba-misionere ba mu bidimu lukama bia kumpala bakitaba dîyi edi, ne: ‘Lua mu Makedonia, utukuatshishe.’​—Bienzedi 16:9, 10.

Kuenza mudimu mu teritware eu kudi bishi? Mukulu kampanda wa mu tshisumbu tshia mu Bolivie udi wamba ne: “Bua kuya ku umue wa ku miaba 43 idi ba-Mennonite, tudi mua kuenza mêba muanda-mukulu mu njila mibi mu mashinyi a 4x4. Bua kufika miaba mile, bitu bitulomba misangu ya bungi matuku anayi ne tutu tulala mu ntenta matuku makuabu. Kadi mbia mushinga bua kuitaba ntatu yonso eyi, bualu bantu aba kabatu banji kumvua lumu luimpe kumpala.”

Kumpala, ba-Mennonite ba bungi kabavua batuakidila bimpe to. Kadi dibapinganyina misangu ya bungi ndibambuluishe bua kuitaba ne disanka malu adi Bantemu babatuadila. Tshilejilu, tshidime kampanda wakamba ne: uvua ubala tshibejibeji tshia Réveillez–vous! kukadi tshidimu tshijima. Wakamba kabidi ne: “Ndi mumanye ne: bantu ba bungi muaba eu kabena bitaba binudi nuamba to, kadi meme ndi ngela meji ne: mbulelela.” Mu muaba mukuabu, tatu kampanda wakamba ne: “Bamue bena mutumba banyi badi bamba ne: nudi baprofete ba dishima, bakuabu badi bamba ne: nudi ne bulelela. Ndi musue kudimanyina nkayanyi tshinudi.”

Kudi mpindieu tshisumbu tshia muakulu wa tshiena-Allemagne mu Bolivie. Tshisumbu etshi tshidi ne bambi ba lumu luimpe 35, pamue ne bambi ba lumu luimpe 14 ba ku dîba ne ku dîba. Too ne lelu, ba-Mennonite 14 bakadi balue bambi ba lumu luimpe lua Bukalenge, ne 9 badi babuela mu bisangilu pa tshibidilu. Tatu mukuabu mukulumpe udi mutambule matuku aa wakamba ne: “Tudi tumona patoke bulombodi bua Yehowa. Mmutume bana betu ba balume ne ba bakaji bakole mu nyuma badi bakula tshiena-Allemagne bua kutuambuluisha. Tudi ne dianyisha dia bungi be!” Muanende wa bakaji (udi ne mvula 17) udi pende mutambule wakamba kabidi ne: “Lukunukunu lua bana betu ba balume ne ba bakaji batshidi bansonga ndukuate bantu bakuabu. Ba bungi ba kudibu mbampanda-njila, badi benza mudimu ne dîba diabu ne makuta abu bua kuambuluisha bakuabu. Bidi binsaka panyi bua kuenza anu bu buobu.”

Bulelela, aba bakenza bukole bua ‘kuya’ kuambuluisha, badi bapeta masanka a bungi.