Tuenzelangane malu mimpe mu bikondo bia makenga

MUPOSTOLO PAULO wakafila mubelu wamba ne: “Tuenzelayi bantu bonso bimpe, kadi nangananga bana betu mu [ditabuja].” (Galatia 6:10, MMM) Bantemu ba Yehowa pa buloba bujima badi badienzeja ne lukunukunu luonso bua kutumikila dîyi edi mu nsombelu wabu, benzela muntu yonso malu adi mimpe, baenzela nangananga Bantemu nabu. Ebu mbualu butudi tumona misangu ne misangu mu bikondo bia makenga. Anji mona muakenzekabi matuku mashale aa mu matunga asatu.

Mu ngondo wa dikumi ne muibidi 2002, tshipepele tshikole tshia mvunde tshia lubilu lua kilometre mipite pa 300 mu dîba dimue tshiakadikuma bibi mu Tshidiila tshia Guam. Nzubu ya bungi yakasunsuka, mikuabu mine kupuka yonso nkong. Bisumbu bia muomu kulongololabi diakamue tusumbu tua bena mudimu wa dilongolola dia nzubu bua kuambuluisha mêku a Bantemu avua mabuele mu dikenga dikole. Biro bidi bitangila mudimu wetu bidi mu Guam biakatuma bintu ne bena mudimu bua kulongolola nzubu ivua minyanguke, ne biro bia mu Hawaii pabi kufilabi diabi diambuluisha. Mu mbingu mikese, kasumbu ka bana betu bena mudimu wa mabaya ba mu Hawaii e kufika bua kutuishanganabu tshianza mu mudimu wa dibakulula au; ke bana betu ba mu tshidiila etshi pabu kulomba matuku a dikisha ku midimu yabu bua kuambuluishangana ne bana betu benyi aba. Lungenyi lua dieleshangana diboko ne disanka mu mudimu luakashala diyisha kudi bantu bonso ba mu Guam.

Ku mutumba kua tshimenga tshia Mandalay (mu ditunga dia Myanmar) kapia kakole kakakutuka pabuipi ne Nzubu wa Bukalenge wa Bantemu ba Yehowa. Nzubu wa dîku dia muanetu wa bakaji mukuabu ukavua mulekele diyisha ne bisangilu uvua anu tshitupa atshi. Lupepele luvua luya lutangile anu lua kuende aku, ke yeye kuasa lubilu mutangile ku Nzubu wa Bukalenge bua kubikila ba kulua kumuambuluisha. Dîba adi bana betu ba bungi bavuaku, bavua benza mudimu wa dilongolola Nzubu wa Bukalenge. Bakapapuka pakamonabu muanetu wa bakaji au, bualu kabavua bamanye ne: tshitupa atshi tshivua muanetu au to. Diakamue, bana betu e kuya kumuambuluisha, kumupatuishabu bintu, kuyabu kubiteka muaba muimpe. Kadi pakumvua bayende wa muanetu eu (uvua kayi Ntemu) bualu bua kapia aku kavua kakutuke, wakapingana kuende ne lukasa kadi kusanganaye bana betu bafue ne mudimu wa diambuluisha ba mu nzubu muende. Kushalaye ukema ne dianyisha dionso, mumvue kabidi mioyo ya munda mimutukije, bualu dîba dia mushindu au nditu bena bianza bile bakengeshangana, bibangana bintu. Muoyo mulenga wakaleja bana betu aba wakasaka muanetu wa bakaji ne muanende wa balume bua kudisanga kabidi pamue ne tshisumbu tshia bena Kristo; badi mpindieu babuela mu bisangilu bionso.

Munkatshi mua tshidimu tshia mudimu tshishale, bantu bavule mu Mozambique bavua babuele mu tshiyole tshia nzala bua minanga ivua  mienzeke ne bia pa madimi binyanguke. Biro bidi bitangila mudimu wa Bantemu ba Yehowa bia mu ditunga edi biakafila diakamue biakudia bua kuambuluisha bavua mu dikenga. Bavua babiabanyina bantu ku Nzubu ya Bukalenge, misangu mikuabu panyima pa bisangilu. Muanetu wa bakaji mukuabu udi ukolesha bana ne diboko dia nkaya wakamba ne: “Mvua mulue mu bisangilu mubungame, tshiyi mumanye tshimvua mua kudisha bana banyi patuvua tupingana kumbelu.” Diambuluisha dia dinanga dia kudi bana betu diakamusanguluja diakamue. Kuambaye ne: “Buanyi meme, bivua anu bu dibika dia bantu ku lufu!”

Bantemu batu kabidi ‘benza [malu adi] mimpe’ a mu nyuma a kumanyisha bakuabu mukenji wa busambi ne ditekemena udi mu Bible. Badi bitabuja tshiakitaba muena meji wa matuku a kale kale ne: ‘Kadi muntu udi uteleja [meji a kudi Nzambi] neasombe talalaa, neikale ne bupole, kayi utshina dikenga.’​—Nsumuinu 1:33, MMM.

[Bimfuanyi mu dibeji 31]

1, 2. Diabanya dia biakudia kudi badi mu dikenga mu Mozambique

3, 4. Tshipepele tshia mvunde tshiakupula nzubu ya bungi mu Guam

[Mêyi a dianyisha]

Muana, ku dia bakaji: Andrea Booher/​FEMA News Photo; muntu mukaji, kulu: AP Photo/​Pacific Daily News, Masako Watanabe