Tuenzele bakuabu bimpe anyi katubenzedi?

MALU anudi kanuyi basue bua banuenzele, kanuenzedi bakuabu nansha.” Mêyi mimpe a tshikadilu tshilenga aa ng’a Confucius, mulongeshi muena nkindi muende lumu wa mu ditunga dia Chine. Lelu’eu bidimu bitue ku 2 500 bimane kupita, ba bungi batshidi anu balame dilongesha dia ne: yonso udi udikanda patupu bua kuenzela bakuabu bubi kayi buonso, ukadi anu muntu muakane.

Bua kuamba bulelela, mêyi a Confucius a tshikadilu tshilenga aa adi ne mushinga wa bungi. Kadi Bible pende udi uleja luseke lukuabu lua bualu ebu mu nsombelu wa bantu ne mushindu udibu benzelangana malu. Pa kumusha tshitudi mua kubikila bu mpekatu wa mibi mienzela bantu netu, Bible udi wakula bua mpekatu wa dibenga kuenzelangana bualu budi buimpe. Muyidi muena Kristo Yakobo wakafunda ne: ‘Muntu udi mumanye mua kuenza bualu buimpe ne udi kayi ubuenza, bualu ebu budi bubi [anyi mpekatu] kudiye.’ (Yakobo 4:17) Pamutu pa kulongesha bena Kristo anu bua kubenga kuenzela bakuabu bibi patupu, Yezu Kristo wakafila mubelu eu: “Bionso binudi basue bua bakuabo banuenzele, nuenu penu nubenzelebio.”​—Matayo 7:12, MMM.

Nzambi ukavua mulongolole anu katshia ku tshifukilu bua muntu yonso kuikalaye wenzela muinende malu mutuye musue bua bamuenzele pende. Wakashiya tshilejilu tshitambe buimpe pa kuleja mudiye ujingila bakuabu disanka mu mushindu wakafukaye bantu, mudibu bafunde ne: ‘Nzambi wakafuka muntu ne [tshimfuanyi] tshiende, ne wakamufuka ne [tshimfuanyi] tshia Nzambi; wakabafuka mulume ne mukaji.’ (Genese 1:27) Abi bidi biumvuija ne: bua dinanga, Nzambi wakafuka bantu ne kuondo ka muoyo kavua mua kubalombola (pavuabu bakalongesha bimpe) bua kuenzela bakuabu malu adibu buobu pabu basue bua babenzele.

Ba bungi lelu’eu badi bakenga kabayi ne ditekemena dia wa kubasungila mu bianza bia bantu bena lukinu babule meji. Mbimueneke patoke ne: tshidi ne bualu ki nkuepuka anu dienzela bakuabu bibi patupu, kadi nkubenzela kabidi tshidi tshimpe tshidi mua kubambuluisha. Bua bualu ebu, Bantemu ba Yehowa mbadifile ku budisuile bua kuambuluisha bantu nabu bua kumanya ditekemena dilenga dia dikema didi munda mua Dîyi dia Nzambi. Padibu bendela bena mutumba nabu ne lumu luimpe ludi mu Bible, badi benza nanku ne muoyo wa dinanga, benzela bakuabu mudibu basue bua babenzele buobu pabu.