Angata muoyo uudi nawu ne mushinga wawu

‘Mashi a Kristo nealengeje [tuondo tua muoyo] tuetu ku midimu mifue bua kukuatshila Nzambi udi ne muoyo mudimu.’​—EBELU 9:14.

1. Ng’amue malu kayi adi aleja ne: tudi tuangata muoyo ne mushinga mukole?

 BUOBU bakulombe bua kuleja mushinga uudi wangata nawu muoyo webe, newandamune munyi? Tutu tuangata muoyo ne mushinga mukole, nansha wetu anyi wa bantu bakuabu. Ke bualu kayi, tutu tuya kua munganga patudi tusama anyi tuya kuditetesha pa tshibidilu. Tudi basue kuikala ne muoyo ne kuikala ne makanda a mubidi. Nansha bantu ba bungi bakadi bakulakaje anyi bikale ne butekete kampanda kabatu basue kufua to, batu basue kuikala ne muoyo.

2, 3. (a) Nsumuinu 23:22 udi ulomba bualu kayi? (b) Mmu mushindu kayi mudi dilomba didi mu Nsumuinu 23:22 ditangila Nzambi?

² Mushinga uudi wangata nawu muoyo udi mua kulengeja anyi kunyanga malanda ebe ne bakuabu. Tshilejilu, Dîyi dia Nzambi didi diamba ne: ‘Umvua mêyi a tatu webe wakakulela; kupetudi mamu webe paluaye muntu mununu.’ (Nsumuinu 23:22) ‘Kumvua’ kakuena kumvuija anu kuteleja mêyi to; lusumuinu elu ludi lumvuija kuteleja ne kutumikila. (Ekesode 15:26; Dutelonome 7:12; 13:18; 15:5; Yoshua 22:2; Musambu 81:13) Bua tshinyi Dîyi dia Nzambi didi dilomba bua kumvuila tatu ne mamu? Kabiena anu bualu tatuebe ne mamuebe mbantu bakole kuudi anyi bualu mbamonemone malu to. Badi bamba muaba eu ne: bualu buobu ‘mbakakulela.’ Mu imue Bible, mvese eu udi wamba ne: “Teleja tatuebe wakakupesha muoyo.” Bushuwa, wewe muikale wangata muoyo webe ne mushinga, neudimone muena dibanza kudi muntu udi ufila muoyo eu.

³ Bulelela, biwikala muena Kristo mulelela, udi mumanye ne: Yehowa ke Mpokolo wa muoyo webe. Ku diambuluisha diende ‘udi ne muoyo’; udi mua ‘kuendakana,’ kuenza malu anu bu tshifukibua tshidi ne malu ku mutshima; ne udi mpindieu ‘wikala’ ne udi mua kuelangana meji bua matuku atshilualua, kusangisha ne bua muoyo wa tshiendelele. (Bienzedi 17:28; Musambu 36:9; Muambi 3:11) Mu diumvuangana ne Nsumuinu 23:22, mbimpe ‘kumvua’ tshidi Nzambi wamba ne kumutumikila, ne kuikala ne dijinga dia kuteleja ne kuenza malu bilondeshile mushindu udiye wangata muoyo, pamutu pa kujinga bua kuangata muoyo mushindu mukuabu.

Ikala unemeka muoyo

4. Ku ntuadijilu, mmunyi muakalua dinemeka dia muoyo bualu bua mushinga?

⁴ Yehowa wakaleja patoke katshia ku kale ne: kavua muanyishile bantu bua kunyanga muoyo bua bualu kayi buonso to. Kayine wakashipa muanabu Abele (muntu uvua kayi ne bualu), eyowa, wakajimija muoyo wa Abele bualu uvua ne tshiji ne lubabu lukole. Udi wela meji ne: Kayine uvua ne bukenji bua kuenza bualu bua nunku anyi? Bilondeshile Nzambi kavua nabu to. Wakamukonka ne: ‘Wewe wakuenza tshinyi? Muadi wa mashi a muakunyebe udi wela dîyi kundi difume pa buloba.’ (Genese 4:10) Ikala mumanye ne: mashi a Abele pa buloba avua aleja muoyo wende, uvua Kayine mujimije ku bukole ne avua ela lubila kudi Nzambi alomba disombuela.​—Ebelu 12:24.

5. (a) Ntshintu kayi tshivua Nzambi mukandike mu matuku a Noa, ne nnganyi uvuaye mutshikandike? (b) Mmu ngumvuilu kayi muvua mukandu eu muikale bualu bua mushinga?

⁵ Kunyima kua Mvula wa kabutu, bantu bakatuadija nsombelu mupiamupia ku diambuluisha dia bantu muanda-mukulu patupu. Nzambi wakaleja mushinga uvuaye wangata nawu muoyo ne mashi mu mêyi avua atangila bantu bonso. Wakamba ne: bantu bavua mua kudia munyinyi  wa nyama, kadi wakela mukenji eu: ‘Bintu bionso bidi ne muoyo mbiakudia bienu; bu mungakanupa midioko, mbu mundi nnupa bintu bionso. Kadi kanudi muoyo wa munyinyi wonso, mmashi menemene.’ (Genese 9:3, 4) Bamue bena Yuda badi bumvuija ne: kabavua banyishile bantu bua kudia munyinyi anyi mashi a nyama utshidi ne muoyo to. Kadi biakalua kumueneka patoke ne: Nzambi uvua ukandika muaba eu didia mashi bua kuikala ne bukole bua mubidi. Kabidi, mukenji uvua Nzambi muele ku butuangaji bua Noa uvua bua kukumbaja tshipatshila Tshiende tshinene tshidi tshitangila mashi: etshi tshia kufikisha bantu ku dipeta muoyo wa tshiendelele.

6. Ku butuangaji bua Noa, mmunyi muvua Nzambi muleje mmuenenu Wende wa mushinga udi nawu muoyo?

⁶ Nzambi wakamba kabidi ne: ‘Nendombe bulami bua mashi enu, nembulombe kudi nyama yonso ne kudi muntu yonso; nendombe bulami bua muoyo wa muntu pankatshi pa muntu ne muntu. Muntu yonso udi umatshisha mashi a munga muntu panshi, nebamatshishe mashi ende panshi, bualu bua Nzambi wakafuka bantu mu tshifuanyikiji tshiende.’ (Genese 9:5, 6) Udi mua kumona bilondeshile mêyi adi atangila bantu bonso ba pa buloba aa ne: Nzambi udi umona mashi a muntu bu muoyo wende menemene. Mufuki udi upesha muntu muoyo, ne muntu nansha umue kêna ne bua kujimija muoyo eu udi muleja mu tshimfuanyi kudi mashi to. Muntu yeye mushipangane anu bu Kayine, Mufuki udi ne bukenji bua ‘kulomba bulami’ bua muoyo wende.

7. Bua tshinyi mêyi avua Nzambi muambile Noa pa bidi bitangila mashi adi ne bua kututangila?

⁷ Mu mêyi ende au, Nzambi wakambila bantu bua kubenga kuenza mudimu bibi ne mashi. Ukadiku mudikonke ne: mbua tshinyi anyi? Ne bua tshinyi Nzambi uvua ne mmuenenu wa nanku pa bidi bitangila mashi? Bulelela, diandamuna didi ditangila dimue dia ku malongesha manene a mu Bible. Dilongesha edi ndilongesha dia nshindamenu mu mukenji udi bena Kristo bamanyisha, nansha mudi bitendelelu bia bungi kabiyi biulonda. Ndilongesha kayi adi, ne mmunyi mudidi ditangila muoyo webe, mapangadika ebe ne bienzedi biebe?

Mmushindu kayi udi bantu mua kuenza mudimu bimpe ne mashi?

8. Mu Mikenji ya Mose, mmikalu kayi ivua Yehowa muele bua dienza dia mudimu ne mashi?

⁸ Yehowa wakafila mumvuija a bungi pa bidi bitangila muoyo ne mashi pakapeshaye Isalele Mikenji. Pakabapeshaye Mikenji eyi, wakenza bualu bukuabu mu dikumbaja dia malu avuaye mulongolole. Pamu’apa udi mua kuikala mumanye ne: Mikenji ivua ilomba bua kupeshabu Nzambi milambu bu mudi ntete, ne mafuta ne mvinyo. (Lewitiki 2:1-4; 23:13; Nomba 15:1-5) Kuvua kabidi milambu ya nyama. Nzambi wakamba bua milambu eyi ne: ‘Mashi adi mu muoyo wa tshintu; ngakanupa mashi pa tshioshelu bualu bua kunubuikidila nawu bubi buenu; mashi adi anubuikidila bubi bualu bua muoyo wawu. Bua bualu ebu ngakambila bena Isalele ne: Muntu wa munkatshi muenu kadi mashi.’ Yehowa wakamba kabidi ne: bikala muntu bu mudi tshilembi anyi eu udi mumune nyama mua kushipa nyama bua kudia, uvua ne bua kupongolola mashi ende panshi ne kuajibikila ne buloba. Bu mudi buloba buikale tshitekelu tshia makasa a Nzambi, pavua muntu upongolola mashi panshi, uvua uleja ne: uvua mumanye bua se: muoyo uvua upingana kudi Muufidi.​—Lewitiki 17:11-13; Yeshaya 66:1.

9. Mmudimu umu’epele kayi uvua nawu mashi uvuabu baleje mu Mikenji, ne tshipatshila tshiawu tshivua tshinyi?

⁹ Mukenji au kauvua mukiya patupu mu malu a ntendelelu uvua kauyi ne mushinga kutudi to. Udiku mumone bua tshinyi bena Isalele kabavua ne bua kudia mashi anyi? Nzambi wakamba ne: ‘Bua bualu ebu ngakambila bena Isalele ne: Muntu wa munkatshi muenu kadi mashi.’ Bivua nanku bua tshinyi? Diandamuna didi ne: ‘Ngakanupa mashi pa tshioshelu bualu bua kunubuikidila nawu bubi buenu.’ Udiku umona ne: ebi bidi bifila diumvuija pa bidi bitangila tshivua Nzambi muambidile Noa bua se: bantu kabavua ne bua kudia mashi anyi? Mufuki nkayende wakasungula bua kumona mashi bu adi ne mushinga mukole, kualamina bua mudimu wa pa buawu uvua mua kupandisha mioyo ya ba bungi. Mashi avua ne bua kukuata mudimu wa mushinga mukole wa dibuikidila dia mibi. Mu Mikenji ya Mose, mudimu umu’epele uvua Nzambi muanyishe bua kuenza ne mashi uvua wa kuela pa tshioshelu bua  kubuikidila mioyo ya bena Isalele, bavua bajinga bua Yehowa abafuile luse.

10. Bua tshinyi mashi a nyama kaavua mua kufikisha ku dibuikidila dia mpekatu yonso, kadi milambu ya mu Mikenji ivua ivuluija bantu tshinyi?

¹⁰ Muanda eu kawena ubengangana ne Buena-Kristo to. Mupostolo muena Kristo Paulo wakatela tshitupa tshia Mikenji etshi tshivua tshilongolola kudi Nzambi. Wakafunda ne: ‘Bintu bionso bidi bilengejibua ne mashi, bu mudi mikenji yamba, anu bikese bishala, ne bikalaku kakuyi kumatshisha kua mashi panshi, kakuena kubuikidila kua mibi nansha.’ (Ebelu 9:22) Paulo wakaleja patoke ne: milambu ivua milombibue kayivua ivuija bena Isalele bantu bapuangane anyi kabayi ne mibi to. Wakafunda ne: ‘Mu milambu yaya mudi tshivulukidi tshia mibi ku tshidimu ku tshidimu. Bua mashi a ngombe ne a mbuji kaena mua kumusha mibi.’ (Ebelu 10:1-4) Kadi milambu eyi ivua ne tshipatshila kampanda. Ivua ivuluija bena Isalele ne: bavua bantu bena mibi bavua dijinga ne tshintu tshikuabu bua kubabuikidilabu mibi yabu yonso. Kadi bu bikala mashi avua tshimfuanyi tshia mioyo ya nyama kaayi mua kubuikidila mibi yonso ya bantu, mashi kayi makuabu onso avua mua kuenza nanku anyi?

Mufidi wa muoyo udi ukosa tshilumbu

11. Ntshinyi tshidi tshituleja ne: milambu ya mashi a nyama ivua ifunkuna tshintu kampanda?

¹¹ Mikenji ivua ifunkuna tshintu tshikuabu tshia mushinga mukole mu dikumbaja dia disua dia Nzambi. Paulo wakakonka ne: ‘Mikenji idi bua tshinyi?’ Wakandamuna ne: ‘Mikenji yakatentekejibua pa mutu bualu bua malu mabi a bantu, too ne pakalua kankanunuina ka Abalahama kakalayidilabu mulayi; wakalongolodibua kudi banjelu ku tshianza tshia mutuanganyi [Mose].’ (Galatia 3:19) Kabidi, Paulo wakafunda ne: ‘Mikenji ya Mose [idi] mindidimbi ya bintu bimpe bilualua, kayiyi mikale tshifuanyikiji mene tshia bintu ebi.’​—Ebelu 10:1.

12. Pa bidi bitangila mashi, mmunyi mutudi mua kujingulula malu adi Nzambi mulongolole bua kuenza?

¹² Anu mutukadi bamone, vuluka ne: mu matuku a Noa Nzambi wakela mukenji bua bantu kudia munyinyi wa nyama bua kukuatshisha muoyo, kadi kabavua ne bua kudia mashi to. Pashishe, Nzambi wakamba ne: “Mashi adi bu muoyo wa tshintu.” Bushuwa, wakasungula bua kumona mashi bu muoyo wa tshintu ne kuambaye ne: ‘Ngakanupa mashi pa tshioshelu bualu bua kunubuikidila nawu bubi buenu.’ Kadi kuvua ne bua kuikala disokolola dia dikema dia malu adi Nzambi mulongolole. Mikenji ya Mose ivua mundidimbi wa malu mimpe avua ne bua kulua. Mmalu kayi au?

13. Bua tshinyi lufu lua Yezu luvua ne mushinga?

¹³ Tshifuanyikiji atshi tshivua tshitangila lufu lua Yezu Kristo. Udi mumanye bimpe ne: bakakengesha Yezu, kumupopelabu ku mutshi. Wakafua bu muena tshibawu. Paulo wakafunda ne: ‘Patutshivua batekete, mu tshikondo tshiakane Kristo wakafuila bantu babi. Nzambi wakatamba kuleja luse luende kutudi mu muanda eu ne: patutshivua bantu babi, Kristo wakatufuila.’ (Lomo 5:6, 8) Pakatufuila Kristo, wakafila tshia-bupikudi bua kubuikila mibi yetu. Tshia-bupikudi etshi ke nshindamenu wa mukenji udi bena Kristo bamanyisha. (Matayo 20:28; Yone 3:16; 1 Kolinto 15:3; 1 Timote 2:6) Ndiumvuangana kayi didi pankatshi pa tshia-bupikudi ne mashi ne muoyo, ne mmunyi muditshi tshitangila muoyo webe?

14, 15. (a) Mmunyi mudi imue Bible imanyina anu pa lufu lua Yezu mu Efeso 1:7? (b) Ntshinyi tshidi bantu mua kulengulula mu Efeso 1:7?

¹⁴ Bimue bitendelelu bitu biakula bua lufu lua Yezu ne benamu batu bamba mêyi bu mudi a se:  “Yezu wakamfuila.” Tangila tshidi imue Bible yamba mu Efeso 1:7: “[Nzambi] mmutupikule ku bubi, mmutujimijile mibi yetu yonsu, ku mulambu wa lufu lua Yezu Kristu.” (Mukanda wa Mvidi Mukulu [Mishonyi, MMV]) ‘Ku lufu lua Kristo, tudi bapikudibue ne mibi yetu idi mijimijibue.’ (Muanda Mulenga Lelu) Mu Bible eyi, mbimanyine anu pa lufu lua Yezu, kuena pebe mumone nanku anyi? Bamue badi mua kuamba ne: ‘Kadi lufu lua Yezu si ke ludi ne mushinga wa bungi. Nunku, ntshinyi tshikuabu tshidi tshishale mu mêyi a mu mvese eyi?’

¹⁵ Bushuwa, bu wewe muikale anu ne Bible eyi nkayayi, uvua mua kuikala mulengulule bualu kampanda bua mushinga mukole, ne ebi bivua mua kukepesha ngumvuilu webe wa mukenji udi Bible umanyisha. Miaku ya buena eyi idi ibuitshidija muanda wa se: mu mvese wa Efeso 1:7 mudi muaku wa tshiena-Gelika (haima) udi umvuija “mashi.” Ke bualu kayi Bible ya bungi, bu mudi Mukanda wa Nzambi idi yamba ne: ‘Tudi ne kupikudibua kuetu kudiye bua mashi ende, ne kubuikidibua kua malu mabi etu bu mudi bubanji bua ngasa wende.’

16. Miaku eyi: ‘mashi ende’ idi ne bua kutuvuluija tshinyi?

¹⁶ Miaku ‘mashi ende’ idi ne diumvuija dinene ne idi ne bua kutuvuluija malu a bungi. Lufu lua muntu nkayalu, nansha lua muntu mupuangane Yezu ki nduvua ne bualu to. Wakakumbaja tshivuabu badianjile kuleja mu mundidimbi mu Mikenji ya Mose, nangananga mu Dituku dia Dibuikidila. Mu dituku adi dia pa buadi, bavua balambula nyama mianyisha mu Mikenji. Pashishe muakuidi munene uvua uya ne ndambu wa mashi a nyama eyi mu muaba Mutambe Bunsantu wa tabernakle anyi ntempelo, uya kualeja kumpala kua Nzambi, bienze anu bu uvua kumpala Kuende menemene.​—Ekesode 25:22; Lewitiki 16:2-19.

17. Mmunyi muvua Yezu mukumbaje tshivua Dituku dia Dibuikidila didianjile kumanyisha bu mundidimbi?

¹⁷ Yezu wakakumbaja tshivua Dituku dia Dibuikidila dileja bu mundidimbi, anu muvua Paulo mumvuije. Tshia kumpala, wakaleja ne: muakuidi munene wa mu Isalele uvua ubuela musangu umue ku tshidimu ne mashi a kulambula ‘bualu buende ne bua matupakana a bantu.’ (Ebelu 9:6, 7) Mu diumvuangana ne bualu abu, kunyima kua bamane kumujula ku lufu bu muntu wa mu nyuma, Yezu wakaya mu diulu. Bu muvuaye muntu wa mu nyuma uvua kayi ne mubidi wa mashi ne mâyi, wakaya kumpala “kua Nzambi bua bualu buetu.” Ntshinyi tshiakalejaye Nzambi? Ki ntshintu kampanda tshia ku mubidi to, kadi tshintu tshia mushinga mukole. Paulo wakatungunuka ne kuamba ne: ‘Kristo, mumane kulua muakuidi munene, ki mbua mashi a mbuji ne a bana ba ngombe, kadi mbua mashi ende mene, wakabuela mu muaba mutambe tshijila musangu umue tshiendelele, mumane kuangatshila bantu dipikula dia tshiendelele. Bua bikala mashi a mbuji ne a balume ba ngombe mabajidile too ne ku dilengeja dia mubidi wa pa buloba, mashi a Kristo, wakadifila kudi Nzambi kayi ne ditoba, bua nyuma wa tshiendelele, neatambe misangu bungi munyi kulengeja muoyo-mukese webe ku midimu mifue bua kukuatshila Nzambi udi ne muoyo mudimu?’ Eyowa, Yezu wakaleja Nzambi mushinga wa mashi ende.​—Ebelu 9:11-14, 24, 28; 10:11-14; 1 Petelo 3:18.

18. Bua tshinyi biambilu bia mu Bible bidi bitangila mashi bidi ne mushinga kudi bena Kristo ba lelu?

¹⁸ Bulelela bua kudi Nzambi ebu budi butuambuluisha bua kumvua bitupa bionso bia tshidi Bible wamba pa bidi bitangila mashi: tshidi Nzambi umuenena mashi mudiye uamona amu,  tshidi ne bua kuikala mushindu utudi tuamona, ne tshitudi ne bua kunemekela malu adi Nzambi ukandika pa mushindu wa kuenza mudimu ne mashi. Wewe mubale mikanda ya mu Mifundu ya tshiena-Gelika ya bena Kristo, neumone bakula miaba ya bungi bua “mashi a Kristo.” (Bala kazubu.) Miaku eyi idi ileja patoke ne: muena Kristo yonso udi ne bua kuikala ne ditabuja ‘mu mashi a Yezu.’ (Lomo 3:25) Tudi mua kupeta dibuikidila dia mibi yetu ne kuikala mu ditalala ne Nzambi anu ‘ku mashi a Yezu.’ (Kolosai 1:20) Ke tshivua tshienzekele aba bavua Yezu mudie nabu tshipungidi tshia pa buatshi tshia kukokesha nende mu diulu. (Luka 22:20, 28-30; 1 Kolinto 11:25; Ebelu 13:20) Bidi kabidi nanku bua ‘musumba munene’ lelu, wikala ne bua kupanduka ku “dikenga dinene” ne kupeta muoyo wa tshiendelele mu mparadizu. Badi anu bu ‘badi batokesha mayeka abu mu mashi a Muana wa mukoko.’​—Buakabuluibua 7:9, 14.

19, 20. (a) Bua tshinyi Nzambi mmusungule bua kuteka mikalu mu dienza dia mudimu ne mashi, ne mmunyi mutudi ne bua kudiumvua pa bidi bitangila bualu ebu? (b) Ntshinyi tshitudi ne bua kukeba bua kumanya?

¹⁹ Bulelela, mashi adi ne mushinga wa pa buawu ku mêsu kua Nzambi. Adi ne bua kuikala ne mushinga eu kabidi ku mêsu kuetu. Mufuki eu udi uditatshisha bua muoyo udi ne bukenji bua kuela mikalu pa tshidi bantu ne bua kuenza ne mashi. Mu diditatshisha diende dikole bua muoyo wetu, wakadisuika bua kuenza mudimu ne mashi mu mushindu umue mutambe bunene, mushindu umu’epele udi ufikisha ku muoyo wa tshiendelele. Bivua bitangila mashi a mushinga mukole a Yezu. Tudi ne dianyisha dia bungi bua muvua Yehowa Nzambi muenze malu bua diakalenga dietu pa kukuata mudimu ne mashi a Yezu mu mushindu eu udi usungila mioyo ya bantu! Nunku tudi ne bua kuikala ne dianyisha kudi Yezu bua muvuaye muele  mashi ende panshi bu mulambu bua bualu buetu! Bulelela, tudi mua kumvua disanka divua mupostolo Yone muleje mu mêyi aa: ‘Kudi yeye udi utunanga, ne wakatuvuwa ku mibi yetu mu mashi ende mene; ne wakatuvuija bukalenge ne bakuidi kudi Nzambi wende udi kabidi Tatu; kudi yeye mene kuikale butumbi ne bukokeshi too ne tshiendelele. Amen.’​—Buakabuluibua 1:5, 6.

²⁰ Nzambi wetu udi ne meji ne Mufidi wa muoyo uvua ne mudimu wa disungila muoyo mu lungenyi luende katshia ku kale menemene. Nunku tudi ne bua kudikonka ne: ‘Muanda eu udi ne bua kuikala ne bukole kayi pa mapangadika etu ne bienzedi bietu’? Tshiena-bualu tshidi tshilonda netshiandamune lukonko elu.

Newandamune munyi?

• Ntshinyi tshitudi mua kulonga pa bidi bitangila mmuenenu wa Nzambi bua mashi mu muyuki wa Abele ne wa Noa?

• Mu Mikenji ya Mose, mmikalu kayi ivua Nzambi muele pa bidi bitangila dienza mudimu ne mashi, ne mbua tshinyi?

• Mmunyi muvua Yezu mukumbaje tshivua tshileja mu mundidimbi kudi Dituku dia Dibuikidila?

• Mmunyi mudi mashi a Yezu mua kusungila muoyo wetu?

[Nkonko ya dilonga]

[Kazubu mu dibeji 18]

MMASHI A NGANYI ADI ASUNGILA MIOYO YA BANTU?

‘Nuditangile bimpe, ne tshisumbu tshionso tshiakanutekelabu batangidi kudi nyuma muimpe, nudishe ekeleziya wa Mukalenge wakasumbaye ku mashi ende.’​—Bienzedi 20:28.

‘Ke bualu budi butambe nunku ne: patutshidi tubingishibua mpindieu ku mashi ende netusungidibue ku tshiji tshia Nzambi kudiye.’​—Lomo 5:9.

‘Kanuvua ne ditekemena, kanuyi ne Nzambi mu buloba ebu. Kadi katataka mu Kristo Yezu nuenu bakadi kule diambedi nuakavuijibua pabuipi mu mashi a Kristo.’​—Efeso 2:12, 13.

‘[Nzambi] wakasanka bua tshiuwidi tshionso tshia Bunzambi tshikale munda muende; ne bua kulengejijaye bintu bionso kudiye bua bualu buende, yeye mumane kuvuija ditalala ku mashi a ku mutshi wende.’​—Kolosai 1:19, 20.

‘Bana betu, tudi ne dikima dia kubuela mu muaba wa tshijila bua mashi a Yezu.’​—Ebelu 10:19.

‘Tuakapikudibua ki nku bintu bidi bijimina, mu malu a muoyo wenu akanushilabu kudi batatuenu; kadi nuakapikudibua ku mashi a mushinga mukole, bu a muana wa mukoko kayi ne tshilema ne kayi ne ditoba, ku mashi a Kristo mene.’​—1 Petelo 1:18, 19.

‘Bituenda mu munya, bu mudiye mu munya, tudi tuikalangana ne buobumue, ne mashi a Yezu, Muanende, adi atulengeja ku mibi yonso.’​—1 Yone 1:7.

‘Wewe udi ne buakane bua kuangata mukanda ne bua kulamuna bimanyishilu biawu. Bualu bua wewe wakashipibua ne wakasumbila Nzambi ba mu tshisamba tshionso, ne ba mu muakulu wonso, ne ba munkatshi mua bantu bonso, ne ba munkatshi mua ditunga dionso, ku mashi ebe.’​—Buakabuluibua 5:9.

‘Mubandi wa bana betu ba mu Kristo udi wedibua panshi. Ne buobu bakamupita bukole bualu bua mashi a Muana wa Mukoko, ne bualu bua dîyi dia bumanyishi buabu.’​—Buakabuluibua 12:10, 11.

[Tshimfuanyi mu dibeji 16]

Mu Mikenji ya Mose, Nzambi wakaleja patoke ne: mashi avua ne bua kuenza mudimu mu difuila bantu luse bua mibi

[Tshimfuanyi mu dibeji 17]

Ku mashi a Yezu, mioyo ya bungi ivua ne bua kusungidibua