Bumpianyi bua mushinga mukole mutambe

MUPOSTOLO Yone wakafunda pakavuaye mikolo ku tshina ne: ‘Bualu bua ngakasanka bikole pakalua bana betu bammanyisha bua bushuwa buebe ne bu muudi wenda mu bushuwa.’​—3 Yone 4.

Mupostolo wa lulamatu eu uvua wakula bua bana bende ba mu nyuma. Kadi baledi ba bungi badi mua kuambulula mêyi a mupostolo aa bua bana babu. Mbenze mudimu mukole wa kukolesha bana babu ‘bimpe ne dibela ne didimuija bia Mukalenge,’ ne mpindieu badi basanka padibu bamona bana babu bakadi bakole ‘benda mu bushuwa’ anyi bulelela. (Efeso 6:4, Muanda Mulenga Lelu) Bushuwa, kulongesha bana bebe njila wa ku muoyo wa tshiendelele nkubapesha bumpianyi bua mushinga mukole mutambe. Bidi nanku bualu dilamata Nzambi, didi dikongoloja kuikala ne nsombelu udi Yehowa musue bua bena Kristo bikale nende, didi ‘ne mulayi wa muoyo wa mpindieu ne wa muoyo ukadi pa kulua.’​—1 Timote 4:8.

Tatu wetu mupuangane Yehowa udi wanyisha bikole baledi badi bamutshina badi benza muabu muonso bua kulongesha bana babu malu a mu nyuma. Padi bana babu bitaba dilongesha edi, badi bapeta disanka dia bungi padibu batungunuka pamue ne baledi babu mu ntendelelu mulelela. Padi bana ba mushindu’eu bakola, badi bakuata malu a bungi malenga a mu nsombelu eu. Bamue batu bavuluka ne disanka dionso musangu wa kumpala uvuabu benze mudimu mu Kalasa ka Mudimu wa Nzambi. * Anyi pamu’apa badi bavuluka tshikondo tshivuabu babale mvese wa mu Bible bua musangu wa kumpala pavuabu bayisha ku nzubu ne ku nzubu ne umue wa ku baledi babu. Mmunyi mudi bana aba mua kupua muoyo muvuabu bateleja baledi babu bababadila mukanda wa Miyuki ya mu Mukanda wa Nzambi anyi Telejayi Mulongeshi munene? * Gabriel udi uvuluka malu avuaye munange bikole, udi wamba ne: “Pamvua ne bidimu binayi tshianana, mamu uvua ungimbila misambu matuku onso pavuaye ulamba. Ntshidi mvuluka ne disanka dia bungi musambu kampanda wa Bukalenge. Pangakakola, musambu eu wakangambuluisha bua kumona mushinga wa kuenzela Yehowa mudimu.” Pamu’apa udi pebe muvuluke musambu muimpe udi Gabriel wamba eu. Mmusambu wa 157 mu mukanda wa misambu wa Tutumbishayi Yehowa ne misambu, ne udi ne tshiena-bualu tshidi tshiamba ne: “Tendelela Yehowa pautshidi nsonga.”

Musambu eu udi utuadija nunku: “Bana se bakasamuna Yezu, /Ne mbila kumusekelelabu.” Bushuwa, kuvua bana bavua ne diakalenga dia kusomba pamue ne Yezu, ne bakamusankisha pamu’apa bua bikadilu biabu bilenga. Yezu wakambila  bayidi bende bua kulonda tshilejilu tshia mushindu utu bana badiakaje bua kulonga malu makuabu. (Matayo 18:3, 4) Nunku bana badi ne muaba mukumbanyine mu ntendelelu wa Yehowa. Ke bualu kayi musambu udi utungunuka wamba ne: “Bana batu batumbisha Nzambi.”

Bana ba bungi mbapeshe Nzambi ne dîku diabu lumu ku nzubu yabu, mu kalasa ne miaba mikuabu ku diambuluisha dia ngikadilu wabu mulenga. Badi ne disanka dinene dia kuikala ne “Baledi batshinyi ba Yehowa.” (Dutelonome 6:7) Baledi bena Nzambi badi batumikila mêyi a Yehowa, Tatu wa dinanga udi ulongesha bifukibua biende bua kuenda mu njila udibi ne bua kuendela. Baledi aba batu bapeta mabenesha a bungi be! Padibu pabu balongesha bana mu dîku, badi bapeta disanka dia kuikala ne bana badi ‘babatumikila ne babasankisha’! (Yeshaya 48:17, 18) Angelica, udi mpindieu wenza mudimu ku biro bia Bantemu ba Yehowa bia mu ditunga dia Mexique udi wamba ne: “Baledi banyi bavua benza muabu muonso bua kuikala ne nsombelu uvua umvuangana ne mêyi a mu Bible. Bualu ebu buakampetesha nsombelu muimpe mutambe ku buana buanyi. Mvua ne disanka dia bungi.”

Bena Kristo ba nunku badi bamona ne: mbia mushinga bua wewe kulama bumpianyi buebe bua mu nyuma. Pamu’apa udi mua kuikala nsonga mu dîku didi ditumikila mikenji ya Buena-Kristo. Bikalabi nanku, musambu eu udi ukubela ne: “Nsonga muena Kristo udikube.” Nekulue tshikondo tshiwikala ne bua kudiangatshila mapangadika wewe nkayebe. Ke bualu kayi “mu bunsonga Nzambi weyemene./Kukebi bua kuenda lumu panu.”

Wewe muenze tshilema tshia kukeba lumu mu nsombelu webe kumpala, dilongesha dionso diudi upeta didi mua kupueka ne mâyi ne udi mua kunyanga nsombelu webe wa matuku atshilualua. Dijinga dia kuenda lumu didi mua kukufikisha ku dibenga kuikala mutabale. Bamue bansonga mbafike ku didia bulunda ne bantu badi bamueneka bikale bimpe, anyi ba malu malenga kadi kabayi banange mikenji ya Buena-Kristo. Ke tshivua tshimueneke mu tshilejilu tshia Tara, nsongakaji udibu bakule bualu buende mu filme wa Les jeunes s’interrogent... Comment me faire de vrais amis? Anu bu Tara, nsonga muena Kristo yonso udi udia bulunda ne bantu badi kabayi banyisha ntendelelu mulelela neamone nansha ku shoo tshidi musambu wamba ne: “Malunda mabi adi ne njiwu.” Bidi bilomba didienzeja munkatshi mua bidimu bia bungi bua kupeta bikadilu bilenga, kadi bidi mua kunyanguka anu pa lukasa.

Bulelela, kuikala ne nsombelu udi uleja ditshina dia Nzambi ki nkupepele to. Kadi, anu bu mudi musambu utungunuka ne kuamba ne: “Binuavuluka Nzambi ku buana,/Kumusadila  ne bulelela,” nenuase tshishimikidi tshikole bua diakalenga dilelela. Kabidi “nenusanke mu dikola dienu.” Neulue kumona ne: bikala Yehowa ukutabalela ne dinanga dionso, tshintu nansha tshimue katshiena mua kukupumbisha bua kuenza malu mimpe ku mêsu kuende to. Ke mushindu uudi mua kulua muntu mukole mupie mu nyuma nunku, muntu mukole udi utshina Nzambi. Pashishe, ‘Nzambi neasanke bua bualu buebe’ biwikala wenza muebe muonso bua kuitaba dilongesha dia Buena-Kristo. Elu ke lumu lutambe bunene ludi muntu mua kupeta, ki mmuomu anyi?​—Nsumuinu 27:11.

Nunku, nuenu bansonga, ikalayi nuvuluka misangu yonso ne: dilongesha didi Yehowa ne baledi benu bena Kristo banupesha didi ne mushinga mukole. Dinanga dinene didibu banunange dinusake bua kuenza malu adi mimpe ku mêsu kua Yehowa. Anu bu Yezu Kristo ne nsonga muena lulamatu Timote, nenusankishe Tatu wenu wa mu diulu ne baledi benu. Binualua penu baledi, nenuanyishe pamu’apa mêyi a Angelica (utukadi batele) aa: “Meme mulele muana, nengenze muanyi muonso bua kubueja dinanga dia Yehowa mu mutshima wende kutuadijila anu ku buana ne kuenza bua dinanga adi dikale ne mushinga mukole mu nsombelu wende.” Kakuyi mpata, njila muakane udi ufikisha ku muoyo wa tshiendelele ke bumpianyi mene bua mushinga mukole mutambe!

[Mêyi adi kuinshi]