Masambila ebe adi mua kushintulula malu anyi?

NNGANYI wetu utu kayi muanji kupeta lutatu lunene lumupite dikanda? Bible udi uleja muvua mupostolo Paulo mumanye se: masambila adi mua kuambuluisha bua kujikija ntatu ya mushindu’eu.

Pakelabu Paulo mu lukanu ku Lomo kakuyi bualu, wakalomba bena Kristo nende bua basambile bua bualu buende, kuambaye kabidi ne: ‘Ndi nnusengelela bua nuenu kutamba kuenza bualu ebu, bua meme mpingajibue kunudi lubilu.’ (Ebelu 13:18, 19) Musangu mukuabu, Paulo wakaleja muvuaye mushindike se: Nzambi uvua ne bua kuandamuna masambila menza bua kumulekelabu ne lukasa. (Filemona 22) Bakalekela Paulo ne lukasa ne wakabangulula mudimu wende wa bu-misionere.

Kadi masambila adiku mua kuambuluisha bushuwa bua kujikija ntatu yebe anyi? Pamu’apa bidi mua kuenzeka. Nansha nanku, vuluka ne: disambila ki ntshilele patupu tshia mu ditendelela to. Ndiyukilangana dilelela ne Tatu wetu wa dinanga ne wa bukole udi mu diulu. Tudi ne bua kudiumvua bapepele bua kumuambila malu masunguluke mu masambila etu, kadi pashishe kuindila ne lutulu luonso bua kumona mushindu udi Yehowa wandamuna.

Nzambi kêna pamu’apa mua kuandamuna diakamue disambila dionso to, peshi kêna pamu’apa mua kuandamuna anu mu mushindu anyi mu tshikondo tshitudi tuetu batekemene nansha. Tshilejilu, Paulo wakasambila njila ne njila bua “dieba [divua] mu mubidi” wende. Nansha bikala lutatu lua Paulo luvua lua mushindu kayi, Nzambi kakalujikija to, kadi wakakolesha Paulo ne mêyi aa: “Bulengele buanyi mbukuakanyine, bualu bukole buanyi budi bumueneka padi butekete.”​—2 Kolinto 12:7-9, MMM.

Tuetu petu tudi mua kuikala bashindike ne: nansha Nzambi kayi mutumbushile dikenga kampanda disunguluke, udi mua ‘kutuenzela njila wa kupandukila, bua tuetu tumanye mua kuditantamena.’ (1 Kolinto 10:13) Mu katupa kîpi emu, Nzambi neajikije makenga onso a bantu. Mu dindila tshikondo atshi, dinyemena kudi ‘[Eu] udi umvua milombu’ didi mua kuambuluisha bua kujikija lutatu.​—Musambu 65:2.