Mukanda mutumina Noa

“WA KUNANGA Noa, ndi mubale malu ebe misangu ya bungi mu Bible ne mushindu uuvua muenze buatu bua wewe ne dîku diebe kupanduka ku Mvula wa kabutu.”

Aa ke mêyi a ntuadijilu a mukanda mufunda kudi Minnamaria (nsongakaji wa bidimu 15), bua diteta divuabu bele balongi ba bidimu 14 too ne 21. Diteta edi divua dilongolola kudi bena ku poste wa mu ditunga dia Finlande, kudi tshisumbu tshia balongeshi ba tshiena-Finlande ne tshisumbu tshia bafundi ba mikanda ba mu Finlande. Bavua balombe balongi aba bua kufundabu mukanda ne ngenyi miangatshila mu mukanda mukuabu. Bavua mua kuutumina mufundi wa mukanda au anyi muntu kampanda udibu batelamu. Ku mikanda yonso ivua balongi bafunde, balongeshi bakasungula mikanda mipite pa 1 400 ne buobu kuyituma kudi bavua bele diteta. Buobu kusungula mukanda wa kumpala uvua mutambe buimpe, mikanda dikumi ivua miulondele ne pashishe mikuabu mikanda dikumi ivua milondele. Minnamaria wakasanka bikole bualu bavua bateke mukanda wende munkatshi mua mikanda dikumi ivua pa muaba muisatu.

Bua tshinyi Minnamaria, muana mulongi, wakafundila Noa mukanda, pabi Noa uvua ne muoyo kukadi bidimu bitue ku 5 000? Udi umvuija ne: “Bible ke tshintu tshia kumpala tshingakavuluka. Ndi mulue kumanya bikole bantu badi Bible utela. Ndi mubale malu a bungi a bantu aba, ke bualu kayi ndi mbamona anu bu badi ne muoyo. Mvua musungule Noa bualu nsombelu wende uvua unsankisha bikole ne uvua mushilangane ne wanyi.”

Mukanda uvua Minnamaria mutumine Noa udi ujika ne mêyi aa: “Utshidi anu tshilejilu tshimpe tshia muntu uvua ne ditabuja ne uvua utumikila. Nsombelu webe udi ukankamija bonso badi babala Bible bua kuenzabu malu adi aleja ditabuja diabu.”

Mukanda wa nsongakaji mubadi wa Bible eu udi uleja ne: bulelela Bible udi ‘ne muoyo ne bukole’ kudi bantu bonso, ni mbana ni mbakole.​—Ebelu 4:12.