Nzambi udi uditatshisha bua bualu buebe menemene

BITU bimpe bitambe patudi tulomba Nzambi diambuluisha patudi mu nsombelu mikole. Bualu se yeye muine ke ‘udi ne bukole bukumbane; dijingulula diende dia malu kadiena ne ku mfudilu kuadi.’ (Musambu 147:5) Yeye nkayende ke udi mukumbane bua kutuambuluisha bua kujikija ntatu yetu. Kabidi, Bible udi utulomba bua ‘kupumuna milombo ya mu mitshima yetu’ kumpala kuende. (Musambu 62:8) Kadi, bua tshinyi bantu ba bungi badi bela meji ne: Nzambi kêna wandamuna masambila abu? Bidi biumvuija ne: katu ubatabalela anyi uditatshisha bua bualu buabu anyi?

Pamutu pa kubipisha Nzambi ne lukasa luonso wamba mudiye ulengulula malu, anji vuluka tshikondo tshiuvua muana. Pavua baledi bebe kabayi bakupesha tshionso tshiuvua ubalomba, ukavuaku muambe muvuabu kabayi bakunange anyi? Ke mutu bana ba bungi bamba nanku. Kadi paudi mulue muntu mukole, udi mufike ku dimona ne: kudi mishindu ya bungi ya kuleja dinanga, kabidi kukumbajila muana kantu ne kantu konso kadiye ulomba ki nkumuleja dinanga dilelela to.

Bia muomumue, bikala Yehowa kayi wandamuna misangu yonso masambila etu mushindu utudi basue, kabiena biumvuija ne: mmutulengulule to. Mu kuamba kuimpe, Nzambi udi ututabalela tuetu bonso mu mishindu ya bungi.

“Ku bukole buende, tudi ne muoyo”

Tshia kumpala, “tudi ne muoyo, tunyungakana, kabidi bikale mutudi emu” anu bua bukole bua Nzambi. (Bienzedi 17:28, Mukanda wa Mvidi Mukulu [Katolike, MMM]) Padiye mutupeshe muoyo mmuleje mudiye ututabalela ne dinanga dionso!

Kabidi, Yehowa udi utupesha bintu bitudi nabi dijinga bua kushala ne muoyo. Tudi tubala ne: ‘Udi umeneshila bimuna mashinde, udi umeneshila bantu midioko bua kuyidiundishabu. Mbua bamanye mua kupatula biakudia mu buloba.’ (Musambu 104:14) Bushuwa, Mufuki wetu kêna anu utupesha bintu bitudi nabi dijinga dikole mu nsombelu patupu to. Udi kabidi utupesha ne kalolo konso ‘mvula ne bidimu bia kuvudija biakudia bifume mu diulu, uuja mitshima yetu tente ne bidia ne disanka.’​—Bienzedi 14:17.

Nansha nanku, bakuabu badi mua kudiebeja ne: ‘Bikala Nzambi mutunange bikole nanku, bua tshinyi udi wanyisha bua tuetu kukenga?’ Udiku ne diandamuna dia lukonko elu anyi?

Nzambi ke wa kudiula anyi?

Bantu ke batu badikebela nkayabu ntatu mivule. Tshilejilu, bantu mbamanye bimpe malu kampanda atu akebesha diakabi. Kadi badi benda anu kuenda masandi, banua maluvu makole ne diamba ne makanya, banaya manaya a tshikisu, bendesha bintu bu mudi moto ne lubilu lukole ne benza malu makuabu kabidi. Bikala nsombelu mibi ya nunku mikukebele ntatu, wa kudiula nnganyi? N’Nzambi anyi mmuntu udi muenze malu adi kaayi a meji aa? Dîyi difundisha ku nyuma wa Nzambi didi diamba ne: ‘Kanudidingi; Nzambi kêna usekibua; bualu bua tshintu tshionso tshidi muntu ukuna, ntshiotshi tshiapuolaye.’​—Galatia 6:7.

Pa kumusha didikebela ntatu, bantu batu kabidi misangu ya bungi benzelangana bibi. Padi ditunga kampanda dijula mvita, katuena mua kudiula Nzambi ne: ng’udi mukebeshe makenga a mu mvita ayi to. Padi muntu mubi wenzela muinende mukuabu bibi, tudi mua kubipisha Nzambi bua mputa anyi lufu ludi mua kulua kumueneka anyi? Nansha kakese! Padi mukokeshi mubi ukengesha bantu bende, ubasubisha ne ubashipa, tudi ne bua kuela Nzambi tshilumbu pambidi anyi? Kuenza nanku nkupangila meji.​—Muambi 8:9.

Kadi netuambe tshinyi bua bantu miliyo ne miliyo badi mu bupele bupite anyi bafua ne nzala? Tudi mua kuela anu Nzambi tshilumbu pambidi anyi? Tòo. Buloba buetu ebu budi bupatula biakudia bia bungi bidi mua kudisha bantu bonso. (Musambu 10:2, 3; 145:16)  Diabanya dibi dia bintu bidi Nzambi utupesha bungibi ke didi difikisha bantu bapite bungi ku nzala ne bupele. Lutatu elu kaluena lujika kabidi bualu bantu mbasue anu kudisankisha buobu nkayabu.

Tshikebeshi tshinene tshia makenga

Kadi nnganyi utudi mua kudiula padi muntu usama anyi ufua bua bukulakaje? Bidi bikukemesha paudi umvua ne: katuena ne bua kudiula Nzambi nansha bua bualu ebu anyi? Nzambi kavua mufuke muntu bua kukulakaja ne kufua to.

Pavua Yehowa muteke Adama ne Eva (bantu ba kumpala) mu budimi bua Edene, wakabapesha ditekemena dia kuikala ne muoyo wa tshiendelele mu mparadizu pa buloba. Kadi uvua muleje patoke muvuaye musue bua buloba kuikalabu ne bantu bavua mua kuanyisha bintu bivuaye mubapeshe. Ke yeye kubelela mukenji wa kulonda bua kushalabu ne muoyo. Adama ne Eva bavua mua kushala basombe mu Mparadizu anu pavuabu batungunuka ne kutumikila Mufuki wabu wa dinanga.​—Genese 2:17; 3:2, 3, 17-23.

Diakabi, Adama ne Eva bakatombokela Nzambi. Eva wakasungula bua kuteleja Satana Diabolo. Wakashima Eva ne kujingaye bua kumuambila ne: Nzambi uvua mumusokoke tshintu kampanda tshimpe. Ke Eva kudituaye mu nsombelu wa budikadidi ne dijinga dia ‘kuikala bu Nzambi, mumanye malu mimpe ne malu mabi.’ Adama wakadisanga kudiye e kutombokelaye pende Nzambi.​—Genese 3:5, 6.

Pakenza Adama ne Eva bubi ebu, bakaleja ne: kabavua bakumbanyine muoyo wa kashidi nansha. Bakabanga kumona makenga adi afumina ku mpekatu. Makanda abu ne bukole buabu bua muoyo biakakepela, buobu kulua kufua. (Genese 5:5) Kadi ditomboka diabu divua ne bipeta bikuabu bitambe bubi. Tutshidi tukenga anu bua mpekatu wa Adama ne Eva au. Mupostolo Paulo wakafunda ne: ‘Bu muakalua bubi pa buloba bualu bua muntu umue, ne bu muakalua lufu bua bubi abu, nunku lufu luakafika kudi bantu bonso, bua bonso bakenza malu mabi.’ (Lomo 5:12) Bulelela, bua ditomboka dia Adama ne Eva, mpekatu ne lufu mbiambulukile bantu bonso anu bu disama dibi dia lufu.

Tshijadiki tshitambe bunene tshia mudi Nzambi ututabalela

Mbisua kuleja ne: bua bantu bavua Nzambi mufuke kuabu kuvua kujike anyi? Tòo. Apa ke patudi tumona tshijadiki tshitambe bunene tshia mudi Nzambi uditatshisha bua bualu buetu. Nansha muvuabi bisame  Nzambi bikole, wakafila mushindu wa kupikula bantu ku mpekatu ne ku lufu. Tshintu tshia dibapikula natshi mmuoyo mupuangane uvua Yezu mufile ne mutshima umue bua bualu buetu. (Lomo 3:24) Ke bualu kayi mupostolo Yone wakafunda ne: ‘Bualu bua Nzambi wakatamba kusua ba pa buloba, yeye wakabapa Muanende umuepele mulela bua muntu yonso wamuitabuja kafu biende, kadi ikale ne muoyo wa tshiendelele.’ (Yone 3:16) Anu bua tshienzedi etshi tshia dinanga dikole, tudi kabidi tumona mua kupetulula ditekemena dia kuikala ne muoyo kashidi. Paulo wakafundila bena Lomo ne: ‘Bualu bubi bumue buakavuija dipila kudi bantu bonso, nunku kabidi bualu buakane bumue buakavuija dibingishibua dia muoyo kudi bantu bonso.’​—Lomo 5:18.

Tushale bashindike ne: mu tshikondo tshidi Nzambi mulongolole, kakuakuikala kabidi makenga anyi lufu pa buloba buetu ebu to. Pamutu pa malu aa, nsombelu udibu baleje mu mukanda wa Buakabuluibua ke wikala pa buloba bujima, bualu mbafundamu ne: ‘Tangilayi, nzubu wa tshilulu wa Nzambi udi munkatshi mua bantu, ne yeye neikale nabu, ne bobu nebikale bantu bende; ne Nzambi muine neikale nabu, neikale Nzambi wabu. Yeye neakupule tshinsonji tshionso ku mêsu kuabu; ne lufu kaluena luikalaku kabidi; madilu kaena ikalaku kabidi, nansha muadi, nansha kanyinganyinga kabidi; malu a kumudilu akumuka.’ (Buakabuluibua 21:3, 4) Pamuapa udi mua kuamba ne: ‘Tshiakuikala kabidi ne muoyo penzeka malu onso aa to!’ Kadi bidi bimueneka ne: newikale imue misangu ne muoyo. Nansha wewe mufue, Nzambi udi mua kukubisha ku lufu. (Yone 5:28, 29) Ke tshidi Nzambi mutulongoluele, ne ke tshienzeka. Kuamba ne: Nzambi katu ututabalela ndishima dikole be!

‘Semena pabuipi ne Nzambi’

Bidi bitukankamija patudi tumvua ne: Nzambi ukadi mulongolole mushindu wa kujikija makenga a bantu bua kashidi. Kadi netuambe tshinyi bua mpindieu? Tshia kuenza ntshinyi tuetu bafuishe muntu utudi banange anyi bikale ne muana utusama? Bulelela, dîba dia Nzambi dia kumbusha masama ne lufu ki ndianji kukumbana to. Bible udi utuleja ne: tudi ne bua kuanji kuindila katantshi bua ntatu eyi kuluayi kujika. Kadi Nzambi ki mmutulekele tshianana to. Muyidi Yakobo wakamba ne: ‘Semenayi pabuipi ne Nzambi ne yeye neasemene pabuipi nenu.’ (Yakobo 4:8) Bushuwa, Mufuki wetu udi utulomba bua kudia nende malanda mimpe, ne aba badi nende malanda mashême batu bamona dikuatshisha diende misangu yonso, nansha mu nsombelu mikole.

Kadi mmunyi mutudi mua kusemena pabuipi nende? Mukalenge Davidi wakela lukonko lua muomumue kukadi bidimu bitue ku 3 000 pakambaye ne: ‘Yehowa, washikama mu mukuna webe wa tshijila nnganyi?’ (Musambu 15:1) Davidi nkayende wakandamuna wamba ne: ‘Nyeye udi wenda mu buakane, udi wenza malu makane, udi wamba mêyi malelela mu mutshima wende. Nyeye udi kayi wela mukoso ne ludimi luende, udi kayi wenzela mulunda wende bibi.’ (Musambu 15:2, 3) Mu diamba dimpe, Yehowa udi wanyisha aba bonso badi balonda njila uvua Adama ne Eva babenge kulonda. Udi usemena pabuipi ne aba badi benza disua diende.​—Dutelonome 6:24, 25; 1 Yone 5:3.

Mmunyi mutudi mua kuenza disua dia Nzambi? Tudi ne bua kulonga malu ‘mimpe ne adi Nzambi Musungidi wetu witabuja,’ ne pashishe kuenza bitudi balonge. (1 Timote 2:3) Bidi biumvuija kupeta dimanya dilelela dia Bible. (Yone 17:3; 2 Timote 3:16, 17) Kadi kubala Bible pa mutu pa mutu ki nkukumbane to. Tudi ne bua kuidikija bena Yuda ba mu Beloya ba mu bidimu lukama bia kumpala bakumvua diyisha dia Paulo. Tudi tubala bua bualu buabu ne: ‘Bakitabuja dîyi ne mitshima mimana kulongolola; bakadi badikebela mu Mukanda wa Nzambi ku dituku ku dituku ne: malu aa adi malelela anyi?’​—Bienzedi 17:11.

Bia muomumue lelu, dilonga Bible ne lubatshi luonso didi dikolesha ditabuja dietu kudi Nzambi ne dituambuluisha bua kudia nende malanda mashême. (Ebelu 11:6) Didi kabidi dituambuluisha bua kumvua bimpe mushindu udi Yehowa wenzela bantu malu, kabiyi anu bua masanka a matuku makese, kadi nangananga bua masanka a kashidi bua bonso badi balongolole mitshima yabu bua kuapeta.

Mona mudi bamue bena Kristo badi ne malanda mimpe ne Nzambi bamba. Danielle (nsongakaji wa bidimu 16) udi wamba ne: “Ndi munange Yehowa bikole menemene, ne ndi ne malu a bungi a kumuelela tuasakidila.  Mmumpeshe baledi bimpe ba dinanga badi bamunange yeye ne bandongeshe mu diumvuangana ne Dîyi diende.” Muena Kristo mukuabu wa mu ditunga dia Uruguay mmufunde ne: “Mutshima wanyi mmuule tente ne dianyisha, ne ndi ngumvua anu mua kuela Yehowa tuasakidila bua dindeja bulenga buende budi kabuyi bungakanyine ne bua bulunda buende.” Nzambi udi wanyisha nansha bana batekete menemene. Gabriela (muana wa bakaji wa bidimu muanda-mutekete) udi wamba ne: “Ndi munange Nzambi kupita bintu bionso bidi pa buloba bujima! Ndi ne Bible wanyi meme nkayanyi. Ntu musue kulonga malu a Nzambi ne a Muanende.”

Lelu’eu, miliyo ne miliyo ya bantu pa buloba bujima mbitabe ne muoyo mujima mêyi a mufundi wa Misambu wakamba ne: ‘Bidi bimpe bua meme kusemena pabuipi ne Nzambi.’ (Musambu 73:28) Mbambuluishe bantu aba bua kutantamena ntatu idibu bapeta mpindieu, ne badi ne ditekemena dishindame dia kusomba kashidi mu Mparadizu pa buloba. (1 Timote 4:8) Kuenaku mua kudifundila pebe tshipatshila tshia ‘kusemena pabuipi ne Nzambi’ anyi? Bulelela, Bible udi utushindikila ne: ‘Yeye kêna netu kule kudi muntu ne muntu.’ (Bienzedi 17:27) Eyowa, Nzambi udi uditatshisha bua bualu buebe menemene!

[Bimfuanyi mu dibeji 5]

Tudi tumona mudi Yehowa uditatshisha bua bualu buetu mu mishindu ya bungi

[Tshimfuanyi mu dibeji 7]

Nansha bana batekete badi mua kusemena pabuipi ne Nzambi

[Bimfuanyi mu dibeji 7]

Yehowa udi utuambuluisha bua kutantamena ntatu lelu’eu. Mu tshikondo tshidiye mulongolole, neumbushe masama ne lufu