Bishima bia Yezu mmalu malelela anyi mmianu?

‘BAKALUA ne bantu ba bungi bakadi bakuatshike ne bademon kudi [Yezu Kristo]; wakumusha nyuma mibi ne dîyi diende, wakakolesha bena mabedi bonso.’ (Matayo 8:16) ‘[Yezu] wakabika, wakabulukila lupepele, wakambila dijiba dia mâyi ne: Puwa, talala talalaa. Lupepele luakalekela, muaba au wakatalala talalaa.’ (Mâko 4:39) Mmunyi muudi umona bishima ebi? Udiku witaba ne: bidi biakula bua malu malelela menzeke anyi udi wela meji ne: mmiyuki ya malu mafuikakaja anyi mmianu ya patupu?

Bantu ba bungi lelu badi bela mpata mikole baleja ne: bishima bia Yezu kabivua bienzeke to. Bu mutudi mu tshikondo tshia biamu bia bena meji bu mudi teleskope ne mikroskope, tshikondo tshidi bantu benda benza ngendu mu tshibuashibuashi bua kulonga ne bua kushintulula ngikadilu ya bantu mipiana katshia ku tshilelelu, bantu badi bamueneka belakana bua kuitaba malu adibu balonda bua bishima ne malu a kukema menza kudi Nzambi.

Bamue badi bela meji ne: miyuki idi yakula bua bishima mmifuikakaja patupu. Bilondeshile mufundi mukuabu wa mukanda udi wamba mudiwu ukonkonona malu a Yezu “mulelela,” miyuki ya bishima bia Kristo idi patupu “mishindu ya kuendeshila” Buena-Kristo lumu bua kutangalakabu.

Bakuabu badi bamona bishima bia Yezu bu mashimi a patoke. Imue misangu badi babanda Yezu muine mudiye muena dishima. Bilondeshile Justin Martyr wa mu lukama lua bidimu luibidi mu bikondo bietu ebi, banyangi ba lumu lua Yezu “bakafika too ne ku dimubikila ne: muena majimbu ne mudingi  wa bantu.” Bakuabu bantu badi bamba ne: Yezu “kakenza bishima biende bu muprofete muena Yuda to, wakabienza bu muena majimbu, muntu uvuabu balongeshe mu ntempelo ya bisamba bia bende.”

Diumvuija dia tshidi bu tshidi katshiyi mua kuenzeka

Udi mua kuela meji ne: kudi bualu kampanda bunene budi busaka bantu bua kuela mpata eyi ne kubenga kuitaba bishima. Badi bamona bikole anyi mene bu bualu budi kabuyi mua kuenzeka bua kuitaba lungenyi lua se: kuvua mua kuikala makole kampanda mapite a bantu avua enzeja bishima ebi. Nsongalume mukuabu uvua wamba mudibi kabiyi bimanyike bikala Nzambi udiku anyi kayiku wakamba ne: “Bishima kabitu bianji kuenzeka nansha kakese.” Pashishe wakatela mêyi a David Hume muena nkindi wa mu ditunga dia Écosse wa mu lukama lua bidimu lua 18 wakafunda ne: “Tshishima tshidi tshishipa mikenji ya ku tshifukilu.”

Kadi bantu ba bungi badi ne bua kuikala badimuke bua kuamba ne: muanda kampanda wa tshishima kawena mua kuenzeka to. Mukanda kampanda udi ubikila tshishima ne: “muanda udibu kabayi mua kumvuija ku diambuluisha dia mikenji mimanyike ya ku tshifukilu.” (The World Book Encyclopedia) Bilondeshile diumvuija edi, bidimu lukama bishale bantu bavua mua kuangata diya mulu mu kapepa, dimanyishilangana ngumu ya kule kakuyi nshinga ne diendakana dia biamu bia satelite bu “bishima.” Bushuwa, ki mbimpe bua kuamba ne: bishima kabitu mua kuenzeka to, bionso ebi anu bualu katuena mua kubiumvuija ne dimanya ditudi nadi mpindieu to.

Tuetu bakonkonone bimue bijadiki bia mu Bible bidi bitangila bishima bia Yezu Kristo, ntshinyi tshituapeta? Bishima bia Yezu mmalu malelela anyi mmianu?