“Bua kumanyisha dîna dia Yehowa”

PA BULOBA bujima, bantu badi banyisha tshibejibeji tshia Tshibumba tshia Nsentedi ne tshia Réveillez-vous! bua malu a mu nyuma ne makuabu malu adibi bilongesha. Mubadi mukuabu wa mu ditunga dia France wakela meji bua bualu ebu ne kufundaye mukanda udi ulonda eu:

“Ndi nsongakaji udi kayi mulonge bikole udi mufumine mu Afrike. Matuku mashale aa ndi mutuadije kubala bibejibeji bienu. Bu mudi biena-bualu bidimu binkoka ntema, ndi ngenda njingulula mushinga wa dibala. Ku diambuluisha dia bibejibeji bienu ndi mulengeje ngakuilu wanyi ne ndi mua kufunda mukanda kauyi ne bilema bia bungi to.

“Ndi nkema bua munudi nupatula biena-bualu bidi biakula bualu buonso budi butangila bantu, buloba ne Mufuki. Biena-bualu ebi mbipepele be, ke bualu kayi bidi bisaka muntu bua kuluaye mubadi wa dilambu. Kakuena muntu mukuabu udi ne bukole bua kulongesha bantu ba mishindu yonso musangu umue to.

“Ndi nkema kabidi pandi mmona ne: bionso ebi kabiena bienzeka bua kupeta mfranga to, kadi anu bua kumanyisha dîna dia Yehowa. Ndi mumanye ne: Yehowa udi unuanyisha, ndi nnuela tuasakidila. Suayi nutungunuke ne kupeta bukole bua kudi Mufuki bua nuenu kumona mua kulongesha.”

Bantemu ba Yehowa badi mpindieu benza mudimu wabu wa kulongesha bantu Bible mu matunga 235. Tshibumba tshia Nsentedi tshidi tshipatuka mu miakulu 148 ne Réveillez-vous! mu miakulu 87. Kabatu bapatula bibejibeji ebi bua kutumbisha muntu nansha umue to. Mibelu ya mu Bible ne malu malelela adimu bidi ne tshipatshila tshia kutumbisha Mufuki, eu udi wamba ne: ‘Meme ndi Yehowa udi ukuyisha bua wewe wikale ne diakalengele.’ (Yeshaya 48:17) Wewe ubala Bible pa tshibidilu ne bibejibeji ebi nebikuambuluishe.