Nkonko ya babadi

Disanka dinene didibu bambe mu nshapita wa 25 wa mukanda wa Lewitiki didi tshimfuanyi tshia tshinyi?

Mikenji ya Mose ivua yamba ne: mu “tshidimu tshia muanda mutekete, buloba nebuikishe tshidimu tshijima.” Bakambila bena Isalele bua tshidimu atshi ne: “Kuena mua kukuna biakudia mu budimu buebe, nansha kuipila budimi buebe bua mvinyo. Kunowi miepu ya biakudia bidi bidimenene, kupumbuludi tumuma tua mvinyo mu budimi buebe buudi kuyi muipile. Tshidimu atshio ke tshidi buloba mua kuikisha.” (Lewitiki 25:4, 5, MMM) Nunku, tshidimu tshionso tshia muanda-mutekete tshivua ne bua kuikala tshidimu tshia Nsabatu anyi dikisha bua buloba. Ne tshidimu tshionso tshia 50, kunyima kua tshidimu tshia Nsabatu wa muanda-mutekete wa tshidimu, tshivua ne bua kuikala Disanka dinene. Ntshinyi tshivua ne bua kuenzeka tshidimu atshi?

Yehowa wakambila Isalele mukana mua Mose ne: ‘Wewe neujidile tshidimu tshia makumi atanu, newele dîyi bua bantu bonso bapete budishikaminyi; etshi ntshidimu tshia Disanka dinene kunudi, neupingaje buloba buonso kudi bena buloba, ne muntu yonso neapingane kudi bana babu. Tshidimu tshia makumi atanu netshikale tshidimu tshia Disanka dinene kunudi; kanukunyi bintu, kanupuodi bintu bidi bidimenena anyi tumuma tudi tudimenena.’ (Lewitiki 25:10, 11) Disanka dinene divua dilonda tshidimu tshikuabu tshia Nsabatu wa buloba. Kadi bua bena Isalele, Disanka dinene edi divua dibapetesha budikadidi. Bavua ne bua kulekela bena Yuda bonso bavuabu bapane bua kuikala bapika. Buloba bua bumpianyi buvua muntu mua kuikala muenzejibue bua kusumbisha bavua ne bua kubupingajila dîku diende. Disanka dinene divua ne bua kuikala tshidimu tshia dipingaja bintu ne tshia budikadidi bua Isalele wa kale. Ebi bidi tshimfuanyi tshia tshinyi bua bena Kristo?

Buntomboji bua Adama buakabueja bantu mu bupika bua mpekatu. Mulambu wa Yezu Kristo ke udi Nzambi mufile bua kupikula bantu ku bupika  bua mpekatu. * (Matayo 20:28; Yone 3:16; 1 Yone 2:1, 2) Ndîba kayi didi bena Kristo bapikudibua ku bupika bua mukenji wa mpekatu? Mupostolo Paulo wakambila bena Kristo bela manyi ne: ‘Bualu bua mukenji wa nyuma wa muoyo wa mu Kristo Yezu wakampikula ku mukenji wa bubi ne wa lufu.’ (Lomo 8:2) Aba badi ne ditekemena dia kupeta muoyo mu diulu badi bapeta budikadidi ebu padibu bedibua manyi a nyuma muimpe. Nansha mudi mibidi yabu mikale ya mashi ne mâyi ne mipange bupuangane, Nzambi udi ubabingisha ne ubadila buledi bu bana bende ba mu nyuma. (Lomo 3:24; 8:16, 17) Bua bela manyi bonso pamue, Disanka dinene dia bena Kristo diakatuadija mu dituku dia Pentekoste wa mu tshidimu tshia 33.

Netuambe tshinyi bua “mikoko mikuabo” idi mitekemene muoyo wa kashidi pa buloba? (Yone 10:16) Bua mikoko mikuabu, Bukokeshi bua Kristo bua Bidimu tshinunu nebuikale tshikondo tshia dipingaja bintu mudi Nzambi musue ne tshia dipikudibua. Munkatshi mua Bukokeshi bua Bidimu tshinunu, Yezu neafile mabenesha a mulambu wende kudi bantu badi bamuitabuja ne neumbushe bipeta bia mpekatu. (Buakabuluibua 21:3, 4) Ku ndekelu kua Bukokeshi bua Kristo bua Bidimu tshinunu, bantu nebafike ku bupuangane ne nebikale bapikudibue tshishiki ku mpekatu ne ku lufu bivuabu bapiane. (Lomo 8:21) Pikala malu au makumbane, Disanka dinene dia bena Kristo nedijike.

[Mêyi adi kuinshi]

[Tshimfuanyi mu dibeji 26]

Disanka dinene dia Bukokeshi bua Bidimu tshinunu ntshikondo tshia dipingaja bintu mudi Nzambi musue ne tshia dipikudibua bua “mikoko mikuabo”