Nkonko ya babadi
Nkonko ya babadi
Ntshinyi tshivua Yezu musue kuamba pakambilaye bayidi bende ne: ‘Ngakadi mmona Satana mukuluke mu diulu mupone bu muele wa mvula’?
Yezu uvua ufuma ku disungula bayidi 70 ne ‘wakabatuma kumpala kuende ku babidi ku babidi mu misoko yonso ne mu miaba yonso yakadiye wamba kuya.’ Pakapingana bayidi aba 70, bavua basanka bua muvuabu bakumbaje mudimu wabu bimpe. Bakamba ne: ‘Mukalenge, bademon mene badi batumikila dîyi dietu mu dîna diebe.’ Ke Yezu kuamba ne: ‘Ngakadi mmona Satana mukuluke mu diulu mupone bu muele wa mvula.’—Luka 10:1, 17, 18.
Patudi tubala musangu wa kumpala mvese eu bidi mua kumueneka ne: Yezu uvua wakula bua muanda kampanda ukavua muenzeke. Pabi, bidimu 60 panyima pa Yezu mumane kuamba mêyi aa, mupostolo Yone wakamba mêyi a muomumue e kufundaye ne: ‘Dragon munene wakedibua panshi, nyoka au wa kale, yeye udi muidikibue ne: Diabolo ne Satana, mudingi wa ba pa buloba bonso; wakedibua panshi pa buloba, ne banjelo bende bakedibua nende panshi.’—Buakabuluibua 12:9.
Pavua Yone mufunde mêyi au, Satana utshivua mu diulu. Mmunyi mutudi bamanye bualu ebu? Bualu Buakabuluibua mmukanda wa milayi, kadi ki mmukanda udi ulonda malu a bantu to. (Buakabuluibua 1:1) Nunku, pavua Yone mufunde mukanda wa Buakabuluibua, Satana kavua muanji kupueka pa buloba to. Kadi malu adi aleja ne: wakapueka panshi matuku makese panyima pa disomba dia Yezu mu nkuasa wa Bukalenge bua Nzambi mu tshidimu tshia 1914. *—Buakabuluibua 12:1-10.
Kadi bua tshinyi Yezu uvua wakula bua dipata dia Satana mu diulu anu bu muanda ukavua muenzeke? Bamue bamanyi ba mianda ya mu Bible badi baleja ne: Yezu uvua utandisha bayidi bende bualu bavua baditambisha bibi. Badi bela meji ne: uvua wamba ne: ‘Nudi batshimune bademon, kadi kanuikadi ne lutambishi to. Satana wakalua muena lutambishi, ne ke tshiakamufikisha ku dikuluka.’
Katuena mua kujadika bualu ebu to. Kadi, bidi bimueneka ne: Yezu uvua usanka pamue ne bayidi bende ne wakula bua dipata dia Satana divua ne bua kuenzeka mu matuku atshivua kumpala. Yezu uvua mumanye bimpe lukinu lua bademon kupita bayidi bende bonso. Elayi meji bua disanka dia Yezu pakumvuaye ne: bademon badi ne bukole bua bungi bavua batumikile dîyi dia bayidi bende, bantu bapange bupuangane! Ditumikila edi divua ka-diosha ka matuku atshilualua pavua Yezu (Mikaele mfumu wa banjelu) mua kuluangana ne Satana ne kumuipata mu diulu.
Pavua Yezu muambe ne: uvua mumone Satana ‘mukuluke,’ uvua ujadika muvua Satana ne bua kukuluka bushuwa. Bualu ebu mbufuanangane ne milayi mikuabu ya mu Bible idi yakula bua malu adi kaayi manji kuenzeka bu mamane kuenzeka. Tshilejilu, tangila mudibu bakula bua bimue bitupa bia mulayi udi utangila Masiya udi mu Yeshaya 52:13–53:12 bienze bu bimane kuenzeka. Bia muomumue Yezu uvua ujadika ne: dipatshibua dia Satana mu diulu divua ne bua kuenzeka bilondeshile tshidi Tatuende mulongolole. Yezu uvua kabidi mujadike ne: mu tshikondo tshidi Nzambi mulongolole, bavua ne bua kuela Satana ne bademon bende mu dijimba ne pashishe kulua kubabutula bua kashidi.—Lomo 16:20; Ebelu 2:14; Buakabuluibua 20:1-3, 7-10.
[Mêyi adi kuinshi]
^ tshik. 5 Bala nshapita wa 10 wa mukanda wa Dimanya didi difikisha ku muoyo wa kashidi, ne nshapita wa 27 wa mukanda wa Buakabuluibua—Nkomenu wabu munene ukadi pabuipi!, mipatula kudi Bantemu ba Yehowa.