“Tudi basue bua tuandamune ne: ‘Eyowa’”

MATUKU adi panshi aa biro bia Bantemu ba Yehowa bia mu ditunga dia Nigeria bivua bipete mukanda uvua wamba mu tshikoso mêyi adi alonda aa ne:

“Muanetu wa balume Anderson wakafua pavuaye ne bidimu 14. Kumpala kua lufu luende, uvua mumune nzolo yende ibidi. Uvua musue kuyipana ne pashishe kutumina biro bia Bantemu makuta aa bu dipa bua mudimu wa diyisha udi wenzeka pa buloba bujima. Kadi wakafua kumpala kua nzolo eyi kupanyishibuayi.

“Pa kumona dijinga diende edi, tuetu baledi bende tuakakolesha nzolo ayi ne kuyipana. Tudi tunutumina makuta aa bu dipa dia Anderson. Bualu bilondeshile dilaya dia Yehowa, tudi batuishibue se: mu katupa kîpi emu menemene netumonangane ne Anderson tshiakabidi. Tudi basue bua tuandamune ne: ‘Eyowa’ pikalaye mua kutukonka ni tuvua bakumbaje tshivua muoyo wende musue. Bushuwa, tudi bindile tshikondo tshituikala mua kumona ki ng’anu Anderson nkayende, kadi ne ‘tshisumbu tshinene tshia bamanyi’ bikala ne bua kubishibua.”​—Ebelu 12:1; Yone 5:28, 29.

Anu bu mudibi bileja patoke mu mukanda udi kulu eku, kuitaba dibika dia bafue nditekemena didi dikolesha bena Kristo balelela. Ndisanka kayipu dikala nadi mêku miliyo mivule, anu muikala nadi dîku dia Anderson, pikalawu mua kuakidila bananga babu bavua muluishi lufu muangate!​—1 Kolinto 15:24-26.

Dîyi dia Nzambi didi dileja ditekemena dia dibika dia bafue bu bumue bua ku malu malenga a bungi ikala Nzambi mua kuenzela bantu mu katupa kîpi emu mu Bukalenge buende. (2 Petelo 3:13) Bible udi wakula bua malu ikala Nzambi mua kuenzela bantu dîba adi wamba ne: ‘Yeye neakupule tshinsonji tshionso ku mêsu kuabu; ne lufu kaluena luikalaku kabidi; madilu kaena ikalaku kabidi, nansha muadi, nansha kanyinganyinga kabidi; malu a kumudilu akumuka.’​—Buakabuluibua 21:4.