Bantu badiku dijinga ne mibelu mimpe anyi?

LELU bantu ba bungi badi bitaba ne: badi ne bukokeshi bua kusunguluja tshimpe ne tshibi ne badi ne bukenji bua kuenza tshionso tshidibu basue. Bakuabu badi bamba ne: bualu buonso budi anu buimpe padibu busankisha. Dibaka ne dîku bivuabu bangata katshia kuonso aku bu nshindamenu wa bukua-bantu bidi bienda binyanguka bikole bia menemene.​—Genese 3:5.

Angata tshilejilu tshia Verónica, * udi musombele mu ditunga dia Mexique. Udi wamba ne: “Kushale anu matuku makese bua tuetu kuenza mufikilu wa 15 wa dibaka dietu, bayanyi kungambila ne: uvua ne mukaji mukuabu. Yeye kundeja ne: bu mutshivua mukaji eu nsonga ne kabidi muikale umuenzela malu avua amusankisha bikole, kavua mua kumulekela to. Biakambungamija bikole pangakela meji ne: bayanyi umvua ngangata bu mulunda wanyi wa pa muoyo kavua ne bua kuikala kabidi ku luseke luanyi. Mvua ne tshibidilu tshia kuela meji ne: lufu lua bananga betu ke bualu buvua bukebesha kanyinganyinga katambe bunene. Kadi buanyi meme, dienda masandi diakankebela mene tunyinganyinga tupite apu, bualu tshivua anu mujimije patupu muntu umvua munange bikole, kadi wakatungunuka ne kuenza malu avua ansama ku muoyo bikole.”

Pashishe kudi tshilejilu tshia muntu mulume mukuabu wa bidimu 22 ukadi mushipe dibaka ne mukajende ne muikale ne muana umue wa balume, kadi kayi musue kuambula majitu ende a butatu to. Udi ukeba bua mamuende ikale umudisha yeye ne muanende wa balume eu. Padi mamuende kayi witaba bionso bidiye wamba, udi ufika munda ne utuadija kumupenda, bienze anu bu mutu muana mukole bibi. Mamuende utu upangila tshia kuenza patu muana eu ubanga kumupenda nunku.

Kudi bilejilu bia bungi bia mushindu’eu. Diabulukangana ne dishipa mabaka ku mbulamatadi bidi bienda bivula miaba yonso. Bana ba bungi batu bamona umue wa ku baledi babu umbuka  ku nzubu ne uya kutuadija dibaka dikuabu. Bamue bana kabatu banemeka kabidi bantu bakuabu anyi baledi babu bine to, ne batu baditua mu dienza malu avua muntu kayi mua kuela meji ne: bavua mua kuenza kumpala. Dienda masandi, dinua dia diamba, diluisha bansonga ne dishipa dia balongeshi anyi baledi kudi bana mbilue kutangalaka bikole mu matunga a bungi. Kabidi ukadi mua kuikala mumone ne: lelu ntatu kayitu anu mu dikolesha dia bana ne mu mabaka nansha.

Patudi tumona malu aa, tudi mua kudiebeja tshidi tshienzekele bantu lelu. Bikala bantu bamanye bushuwa mua kusunguluja tshimpe ne tshibi, bua tshinyi ntatu mipite bungi nunku idi anu itungunuka kayiyi ijika? Bantu badiku dijinga ne mibelu mimpe anyi? Kudiku mpokolo muimpe wa kueyemena wa mibelu mimpe ya nunku anyi? Nansha mudi bantu ba bungi bamba mudibu bitabuja Nzambi ne Dîyi diende didiye mufundishe, bualu ebu kabuena bumueneka bulombola mapangadika abu to. Kadi mmasanka kayi atudi mua kupeta patudi tukeba ne pashishe tupeta mibelu kudi Nzambi? Tumonayi bualu ebu mu tshiena-bualu tshidi tshilonda.

[Mêyi adi kuinshi]