“Ke tshintu tshitambe buimpe tshiudi mua kuenza atshi”

ALEXIS mmuana wa balume wa bidimu bitanu. Baledi bende badi balonga Bible ne babuela mu bisangilu bia Bantemu ba Yehowa, ne mbasombele mu tshimenga tshia Morelia, mu ditunga dia Mexique. Pavuabu babuele yeye ne dîku diabu mu mpuilu wa tshijengu, wakamona dinaya dimue dia tshilejilu divua dileja mushindu wa kuyisha ku nzubu ne ku nzubu. Wakatangila diakamue tatuende ne kumukonka ne: “Tatu, Tatu, bua tshinyi wewe kutu pebe uya kuyisha bantu?” Tatuende kumuandamuna ne: “Ntshidi ndonga bua mmone panyi mua kuyisha.” Alexis kumuambilaye pashishe ne disanka ne: “Tatu, ke tshintu tshitambe buimpe tshiudi mua kuenza atshi.”

Muana wa balume eu uvua mumone mudibi bia mushinga bua muntu kuenzaye malu mu diumvuangana ne dimanya dia Yehowa didiye nadi. Bu mudi bana babidi eu wa balume eu wa bakaji ba mamuende mukuabu kumbelu kuabu, wakanji kulomba Yehowa, pashishe kubalondelaye malu avuaye ulonga ne baledi bende mu mukanda wa Miyuki ya mu Mukanda wa Nzambi. Nansha muvua Alexis kayi muanji kumanya mua kubala, uvua mumanye bimpe malu avua mu mukanda eu ku diambuluisha dia bimfuanyi bidi biumvuija malu aa. Wakafika too ne ku diamba ne: mmusue bua kuya katangila bantu ku mbanza yabu bua kubambila malu adiye mumanye pa bidi bitangila malu adi Yehowa mulongolole.

Bushuwa, bantu bakole ne bana, bonso badi mua kulonda tshidi “wa Tshijila” Yehowa musue bua benze bua kupetabu diakalenga ditambe bunene dia kuenza mudimu wa kuyisha malu ende kudi bukua-bisamba. (Yeshaya 43:3; Matayo 21:16) Bushuwa, etshi ke tshintu tshitambe buimpe ku bionso bidi muntu mua kuenza.