Mbabakine kakuyi bualu

‘Bakadi nanyi lukuna tshianana.’​—YONE 15:25.

1, 2. (a) Bua tshinyi bamue badi bakema padi bantu babipisha bena Kristo, kadi bua tshinyi ngakuilu wa mushindu eu kêna ne bua kutukemesha? (b) Ngumvuilu kayi wa miaku ‘kuikala ne lukuna’ utuakonkonona mu tshiena-bualu etshi? (Bala diumvuija kuinshi kua dibeji)

 BANTEMU BA YEHOWA batu badienzeja bua kutumikila mêyi a mu Dîyi dia Nzambi mu nsombelu wabu. Ke bualu kayi batu ne lumu luimpe mu matunga a bungi. Kadi minga misangu batu babashiminyina malu. Tshilejilu, muena mbulamatadi kampanda wa mu tshimenga tshia Saint-Pétersbourg, mu ditunga dia Russie, wakamba ne: “Bavua batuambile mudi Bantemu ba Yehowa bikale bena mu kasumbu kampanda ka mu musokoko badi benza malu muinshimuinshi, bashipa bana ne badishipa bobu bine.” Kadi kunyima kua yeye mumane kuenza mudimu pamue ne Bantemu ba Yehowa mu mpungilu kampanda wa bantu bafumine mu matunga a bungi, muena mbulamatadi eu wakalua kuamba ne: “Mpindieu ndi mmona bantu bimpe, bena musangelu . . . Mbantu badi basue ditalala ne bena bupole, ne mbanangangane bikole munkatshi muabu.” Wakamba kabidi ne: “Tshiena ngumvua menemene bua tshinyi bantu batu babashiminyina malu a buena aa to.”​—1 Petelo 3:16.

² Basadidi ba Nzambi kabena ne disanka nansha dikese bua kubabikilabu bibi nunku ne: benji ba malu mabi. Kadi kabena bakema padi bantu bababipisha. Yezu wakadianjila kudimuija bayidi bende ne: ‘Bikala ba pa buloba nenu lukuna, nudi bamanye ne: bakadi nanyi lukuna diambedi. Bakujikija dîyi diakadi difunda mu mikenji yabu ne: bakadi nanyi lukuna tshianana.’ * (Yone 15:18-20, 25; Musambu 35:19; 69:4) Kumpala ukavua muambile bayidi bende ne: ‘Bikalabu babikile muena nzubu ne: Belezebula, nebatambe kubikila ba mu nzubu muende muomumue.’ (Matayo 10:25) Bena Kristo badi bajingulula ne: padibu batantamena bipendu ebi badi bambula “mutshi” wa makenga uvuabu bitabe bua kuambula pakaluabu bayidi ba Kristo.​—Matayo 16:24.

3. Mmu mushindu kayi mudibu bakengeshe batendeledi balelela?

³ Dikengesha batendeledi balelela ndia kale, ndibange mu tshikondo tshia ‘Abele muntu muakane.’ (Matayo 23:34, 35) Dibakengesha edi ki ndimanyine anu pa bilejilu bikese bia pale pale nansha. Yezu wakamba ne: ‘bantu bonso nebakine’ bayidi bende bua dîna diende. (Matayo 10:22) Mupostolo Paulo wakalua kufunda ne: basadidi ba Nzambi bonso, ne yonso wa kutudi, badi ne bua kumanya ne: nebabakengeshe. (2 Timote 3:12) Bua tshinyi?

Mukebeshi wa lukuna lua kaluyi bualu

4. Mmunyi mudi Bible uleja mukebeshi wa lukuna luonso ludi kaluyi ne bishimikidi?

⁴ Dîyi dia Nzambi didi dituleja ne: katshia ku tshibangidilu, kudi mukebeshi wa lukuna udi kayi umueneka. Vuluka lufu lua tshikisu luakafua Abele muena ditabuja wa kumpala. Bible udi wamba ne: Kayina muanabu wakamushipa au “wakadi wa mubi” Satana Diabolo. (1 Yone 3:12) Kayina wakapeta meji a Satana Diabolo, yeye kuenza nende mudimu bua kukumbaja bipatshila biende bibi. Bible udi kabidi usokolola mudimu uvua Satana muenze bua kukebela Yobo ne Yezu Kristo makenga a tshikisu. (Yobo 1:12; 2:6, 7; Yone 8:37, 44; 13:27) Mukanda wa Buakabuluibua udi uleja patoke eu udi ukengeshisha bayidi ba Yezu, wamba ne: ‘Kutshinyi malu audi wamba kukenga nawu. Mona Diabolo udi wamba kuela bakuabu ba munkatshi muenu mu lukanu bua nuenu nutetshibue.’ (Buakabuluibua 2:10) Bushuwa, Satana ke mukebeshi wa lukuna luonso  ludibu bakine bantu ba Nzambi kakuyi bualu.

5. Bua tshinyi Satana mmukine batendeledi balelela?

⁵ Bua tshinyi Satana mmukine batendeledi balelela? Mu mayele kampanda adi aleja didiangata ne mushinga mupitshidile, Satana mmutontolole Yehowa Nzambi ‘Mukalenge wa kashidi.’ (1 Timote 1:17; 3:6) Udi uleja mudi Nzambi wela mikenji mipitshidile mu mushindu udiye ulombola bifukibua biende ne mudiku kakuyi muntu nansha umue udi wenzela Yehowa mudimu ne meji mimpe, ne mudi bantu bamusadila anu bua kupeta disanka. Satana udi uleja ne: bobu bamuanyishile bua kuteta bantu, udi mua kufikisha yonso wa kudibu ku dibenga disadila Nzambi. (Genese 3:1-6; Yobo 1:6-12; 2:1-7) Padi Satana ushiminyina Yehowa ne: udi mukengeshanganyi, muena dishima ne kayi ukumbaja malu ende, udi ukeba kuleja mudiye pende ne bukole bua kulombola diulu ne buloba. Nunku tshiji tshidiye mukuatshile basadidi ba Nzambi ntshilela kudi dijinga dikole didiye nadi bua bamutendelele.​—Matayo 4:8, 9.

6. (a) Mmunyi mudi tshilumbu tshia bumfumu butambe bunene bua Yehowa tshitangila yonso wa kutudi? (b) Mmunyi mudi dijingulula dia tshilumbu etshi dituambuluisha bua kushala ne lulamatu? (Bala kazubu kadi mu dibeji 16.)

⁶ Udiku umona mudi bualu ebu bukutangila anyi? Bu muudi musadidi wa Yehowa, pamu’apa ukadi mumone ne: nansha mudi kuenza disua dia Nzambi kulomba bua kudienzeja bikole, kudi kupeteshisha mabenesha mavule. Kadi ntshinyi tshiudi mua kuenza bikala nsombelu webe ukutatshisha bua kutungunuka ne kutumikila mikenji ne mêyi bia Yehowa? Ntshinyi tshiwenza biwikala umueneka kuyi upeta dibenesha nansha dimue mu mudimu uudi wenzela Yehowa? Udiku mua kuamba diakamue ne: kabiena ne mushinga bua kutungunuka ne kusadila Yehowa anyi? Peshi dinanga Yehowa ne dianyisha dikole bua ngikadilu yende ya dikema bidi mua kukusaka bua kutungunuka ne kuenda mu njila yende yonso? (Dutelonome 10:12, 13) Padi Yehowa mulekele Satana utukebela amue makenga, mmupeshe yonso wa kutudi mushindu wa tuetu kuleja luseke lutudi balamate mu tshilumbu etshi tshidi Satana mujule.​—Nsumuinu 27:11.

‘Panupendabu’

7. Ndimue diyele kayi didi Diabolo ukeba kutusesuisha nadi kudi Yehowa.

⁷ Mpindieu, tukonkononayi bimpe bimpe bumue bua ku mayele adi Satana wenza bua kujadika malu adiye ubanda nawu Yehowa ne basadidi bende: bipendu biule ne mafi. Yezu wakabikila Satana ne: ‘tatu wa mashimi.’ (Yone 8:44) Dîna dia Diabolo didi diumvuija “Mushiminyinyanganyi wa malu.” Dîna edi didi dileja ne: muntu eu mmushiminyinyi munene wa Nzambi malu, wa dîyi diende dimpe ne wa dîna diende dinsantu. Diabolo udi wenza mudimu ne dibubika dia malu, dibandangana ne malu a mafi ne mashimi a patoke bua kuluisha bumfumu butambe bunene bua Yehowa. Udi wenza mayele a muomumue aa bua kunyanga lumu lua basadidi ba lulamatu ba Nzambi. Mu diela Bantemu aba bipendu, udi mua kubakebela diteta dikole anyi didi mene dipite bukole bua bobu kuditantamena.

8. Mmunyi muvua Satana mupende Yobo, ne mbipeta kayi biakapatuka?

⁸ Angata tshilejilu tshia malu akafikila Yobo, muena dîna didi diumvuija ne: “Muntu udibu bakine.” Pa kumbusha dibutula dia bimuna bia Yobo, dia bana bende ne dimutua disama, Satana wakenza bua Yobo amueneke bu muenji wa mpekatu uvua Yehowa unyoka. Nansha muvua bantu banemeka Yobo bikole, bakalua kumupetula too ne kudi balela bende ne balunda bende ba pa  muoyo. (Yobo 19:13-19; 29:1, 2, 7-11) Kabidi, Satana wakenza mudimu ne basambi babi bua ‘kutshibula Yobo ne mêyi,’ tshia kumpala ububika ne: Yobo uvua ne bua kuikala muenze mpekatu kampanda munene ne pashishe kumupishaye buludi ne: uvua muenji wa malu mabi. (Yobo 4:6-9; 19:2; 22:5-10) Abi bivua ne bua kuikala bitekeshe Yobo mu mikolo bikole!

9. Mmunyi muvua Satana muenze bua Yezu amueneke bu muenji wa malu mabi?

⁹ Bu mudi Muana wa Nzambi muikale mubingishi munene wa bumfumu butambe bunene bua Nzambi, wakalua muntu wa kumpala udi Satana mukine. Pakalua Yezu pa buloba, Satana wakakeba bua kumunyangila lumu luende lua mu nyuma mu dienza bua Yezu amueneke bu muena mpekatu, anu muakenzelaye Yobo. (Yeshaya 53:2-4; Yone 9:24) Bantu bakamubikila ne: munu wa maluvu ne muena mudi, kumuambabu kabidi ne: ‘udi ne demon munda.’ (Matayo 11:18, 19; Yone 7:20; 8:48; 10:20) Bakamushiminyina ne: uvua upenda Nzambi. (Matayo 9:2, 3; 26:63-66; Yone 10:33-36) Ebi biakanyingalaja Yezu, bualu uvua mumanye bimpe ne: bivua bipendesha Tatu wende tshianana. (Luka 22:41-44) Ndekelu wa bionso, bakapopela Yezu pa mutshi bu muena tshibawu muela mulawu. (Matayo 27:38-44) Bu muvua Yezu mushale ne lulamatu lupuangane, wakatantamena ‘ditontolola dia bantu babi.’​—Ebelu 12:2, 3.

10. Mmunyi mudi Satana mutue bashadile bela manyi mutu mu tshikondo tshietu etshi?

¹⁰ Mu tshikondo tshietu etshi, Satana mmutue kabidi bashadile ba ku bayidi bela manyi ba Kristo mutu. Badi bamubikila ne: ‘mubandi wa bana betu ba mu Kristo, udi ubabanda kumpala kua Nzambi wetu munya ne butuku.’ (Buakabuluibua 12:9, 10) Katshia dîba diakamuipatabu mu diulu ne kumuelabu pa buloba, Satana mmudienzeje bikole menemene bua kuvuija bana babu ne Kristo bu bantu ba kukina bikole. (1 Kolinto 4:13) Mu amue matunga, mbabashiminyine bamba mudibu tshisumbu tshia Nzambi tshia njiwu, anu muvuabu bamba bena Kristo ba mu bidimu lukama bia kumpala. (Bienzedi 24:5, 14; 28:22) Anu mutudi bamone ku ntuadijilu, mbabendeshile lumu lubi. Kadi, ‘ku butumbi ne mu dipetula, ku lumu lubi ne ku lumu luimpe,’ bana babu ne Kristo bela manyi, bakuatshisha kudi benzejanganyi nabu ba mudimu “mikoko mikuabo,” mbadienzeje ne budipuekeshi buonso bua ‘kutumikila mikenji ya Nzambi ne kumanyisha bua Yezu.’​—2 Kolinto 6:8; Yone 10:16; Buakabuluibua 12:17.

11, 12. (a) Ntshinyi tshidi mua kuikala tshiledi tshia bimue bipendu bidibu bapenda bena Kristo? (b) Mmu mishindu kayi mudi muena Kristo mua kukenga kakuyi bualu bua ditabuja diende?

¹¹ Bushuwa, bipendu bionso bidibu bapenda musadidi yonso wa Nzambi kabiena “bua buakane” to. (Matayo 5:10) Imue ntatu idi mua kufumina ku bilema bietu tuetu nkayetu. Kakuena tshitudi tupeta nansha tshimue ‘bituadikankamika patuenza bualu bubi ne badi batukuma.’ Kadi bikala muena Kristo ‘udikankamika mu kanyinganyinga bualu bua [kuondo ka muoyo] kende kudi Nzambi pakengaye kayi ne bualu, muanda eu udi wa kusakidila’ ku mêsu kua Yehowa. (1 Petelo 2:19, 20) Mmu nsombelu kayi mudibi mua kuenzeka nunku?

¹² Mbakengeshe bamue bualu bakabenga bua kubuelakana mu bilele bia madilu bidi kabiyi bipetangana ne Mukanda wa Nzambi. (Dutelonome 14:1) Bansonga Bantemu mbalue bantu badibu bapenda anu kupenda bualu badi batumikila mikenji ya Yehowa idi ilomba bua kuikala ne bikadilu bimpe. (1 Petelo 4:4) Batu babande bamue baledi bena Kristo mudibu “balenguludi ba malu” anyi “bantu babi” bualu bakakeba kuondapisha bana babu ne manga adi kaayi menza ne mashi. (Bienzedi 15:29) Mbakine bena Kristo kudi balela ne bena mutumba babu anu bualu mbalue basadidi ba Yehowa. (Matayo 10:34-37) Bana betu bonso aba badi balonda tshilejilu tshishiya kudi baprofete ne kudi Yezu mu dikengeshibua kakuyi bualu.​—Matayo 5:11, 12; Yakobo 5:10; 1 Petelo 2:21.

Tutantamenayi bipendu bidibu batupenda

13. Ntshinyi tshidi mua kutuambuluisha bua kulama nkatshinkatshi wetu wa mu nyuma padibu batuela bipendu bikole?

¹³ Padibu batuela bipendu bikole bua ditabuja dietu, tudi mua kuteketa mu mikolo bu muakenza muprofete Yelemiya, ne tudi mua kumvua anu bu se: katuena mua kutungunuka ne kusadila Nzambi. (Yelemiya 20:7-9) Ntshinyi tshidi mua kutuambuluisha bua kulama nkatshinkatshi  wetu wa mu nyuma? Keba bua kumona malu mudi Yehowa uamona. Yehowa udi umona aba badi bashala ne lulamatu mu mateta bu batshimunyi, kadi ki mbu bantu badibu bapite dikanda to. (Lomo 8:37) Keba bua kuvuluka bantu bavua babingishe bumfumu butambe bunene bua Yehowa nansha muvuaku malu onso avua Diabolo muenze bua kubanyangila lumu, balume ne bakaji bu mudi Abele, Yobo ne bakuabu bena lulamatu ba kale, ne basadidi ba Nzambi ba mu tshikondo tshietu etshi. (Ebelu 11:35-37; 12:1) Elangana meji bua nsombelu wabu wa lulamatu. Bena mu tshisumbu etshi tshinene tshia bena lulamatu badi batubikila bua kudisangisha nabu bua kutshimuna ku diambuluisha dia ditabuja.​—1 Yone 5:4.

14. Mmunyi mudi disambila dienza ne muoyo mujima mua kutuambuluisha bua kuikala bena lulamatu?

¹⁴ Padi ‘matata avulangana munda muetu,’ tudi mua kusambila Yehowa ne muoyo mujima, ne yeye neatusambe ne neatukoleshe. (Musambu 50:15; 94:19) Neatupeshe meji atudi nawu dijinga bua kutantamena mateta. Neatuambuluishe kabidi bua tuetu kushala bavuluke tshilumbu tshinene tshia bumfumu butambe bunene bua Yehowa, tshilumbu tshidi tshijudije lukuna ludibu bakine basadidi bende. (Yakobo 1:5) Yehowa udi kabidi mua kutupesha “ditalala dia Nzambi didi ditamba dijingulula dionso dia bantu.” (Filipoi 4:6, 7) Ditalala edi didi Nzambi ufila didi dituambuluisha bua kushala ne lutulu ne bimane tendee kumpala kua makenga makole, katuyi tuelakana anyi tutshina nansha. Ku diambuluisha dia nyuma wende, Yehowa udi mua kutukuatshisha mu malu onso adiye ulekela atufikila.​—1 Kolinto 10:13.

15. Ntshinyi tshidi mua kutuambuluisha bua kuepuka difika munda patudi tukenga?

¹⁵ Ntshinyi tshidi mua kutuambuluisha bua kubenga kukuatshila aba badi batukine kakuyi bualu tshiji? Tuvuluke ne: Satana ne bademon bende ke baluishi betu banene. (Efeso 6:12) Nansha mudi bamue bantu batukengesha ku bukole, ba bungi ba kudi badi baluisha basadidi ba Nzambi badi babaluisha mu dipanga anyi badi babasaka kudi bantu bakuabu. (Danyele 6:4-16; 1 Timote 1:12, 13) Yehowa udi musue bua ‘bantu bonso’ bapete mushindu wa ‘kusungidibua ne kufika ku dimanya dia malu malelela.’ (1 Timote 2:4) Bushuwa, bamue bantu bavua batuluisha kumpala badi mpindieu bana betu bena Kristo bualu mbadimuene mudi ngikadilu wetu kayi ne kadiwu. (1 Petelo 2:12) Tudi kabidi mua kupeta dilongesha mu tshilejilu tshia Yosefe muana wa Yakoba. Nansha muakakengeshabu Yosefe bikole kudi bana babu, kakashala mubalamine munda to. Bua tshinyi? Bualu wakajingulula ne: tshianza tshia Yehowa ke tshivua tshilombola mianda ayi bua kukumbaja disua Diende. (Genese 45:4-8) Bia muomumue, Yehowa udi mua kuenzeja bua dikenga dionso didi ditukuata katuyi ne bualu bubi butudi benze ditumbishishe dîna diende.​—1 Petelo 4:16.

16, 17. Bua tshinyi katuena ne bua kutamba kusamisha mutu bua malu adi baluishi betu benza bua kuimanyika mudimu wa kuyisha?

¹⁶ Katuena ne bua kutamba kusamisha mutu bikala mu tshikondo kampanda baluishi betu bamueneka bakokeshe bua kupumbishisha luendu lua mudimu wa diamba lumu luimpe. Yehowa udi mpindieu unyukula bisamba ku diambuluisha dia diyisha didi dienda dienzeka mu buloba bujima, ne bintu bilengele bidi bienda bibuela mu ntendelelu wende. (Hagai 2:7) Yezu Kristo Mulami Muimpe wakamba ne: ‘Mikoko yanyi idi yumvua dîyi dianyi, ndi muyimanye, idi indonda. Ndi nyipa muoyo wa tshiendelele; kakuena mukuabu udi uyinyenga mu tshianza tshianyi.’ (Yone 10:27-29) Banjelu ba tshijila badi benza pabu mudimu wa dinowa dinene dia mu nyuma. (Matayo 13:39, 41; Buakabuluibua 14:6, 7) Ke bualu kayi kakuena bualu nansha bumue budi baluishi betu bamba anyi benza budi mua kupangisha disua dia Nzambi bua kukumbanadi to.​—Yeshaya 54:17; Bienzedi 5:38, 39.

 ¹⁷ Misangu ya bungi, malu atu baluishi betu bajinga kutuenzela atu abapinganyina bobu. Muaba kampanda mu Afrike, bavua batangajile Bantemu ba Yehowa mashimi mabi a bungi, ne dishima dia se: bavua batendelela Diabolo. Bua bualu ebu, pavua Bantemu baya kuyisha, Grace uvua unyema uya kusokoma kunyima kua nzubu wende too ne pavuabu bumbuka. Dimue dituku mpasata wa mu tshitanda tshiabu wakaleja umue mukanda wetu ne kuambilaye bonso bavua mu tshitanda bua kabikadi baubala to, bualu uvua mua kubasaka bua kupatuka mu tshitendelelu tshiabu. Muanda eu wakakoka ntema ya Grace. Musangu mukuabu pakalua Bantemu, kakasokoma to, wakayukila nabu, ne bobu kumupesha wende mukanda wa buena au. Dilonga dia Bible diakatuadija, ne mu 1996 wakatambula. Mpindieu Grace mmudifile mu dikeba dia bantu bakuabu badibu mua kuikala bashime pa bidi bitangila Bantemu ba Yehowa.

Tukoleshayi ditabuja dietu mpindieu

18. Bua tshinyi tudi ne bua kukolesha ditabuja dietu kumpala kua mateta makole kuluawu, ne mmunyi mutudi mua kudikolesha?

¹⁸ Bu mudi Satana mua kutuluisha dîba kayi dionso ne lukuna ludi kaluyi ne nshindamenu, bidi bia mushinga bua tuetu kukolesha ditabuja dietu mpindieu. Mmunyi mutudi mua kudikolesha? Luapolo kampanda lufumine mu ditunga kansanga muvuabu bakengeshe basadidi ba Yehowa luvua luamba ne: “Kudi bualu bumue budi bulue kumueneka patoke: Aba badi ne bibidilu bimpe bia mu nyuma ne badi banyisha bulelela bua mu Bible kabena ne lutatu bua kushala bakole padi mateta abafikila. Kadi aba badi ‘mu tshikondo tshiakane’ bapumbisha bisangilu, kabayi benza mudimu wa budimi pa tshibidilu ne bapidia ditabuja diabu bua tualu tukese batu pa tshibidilu balenduka padibu mu diteta ‘dia kapia.’” (2 Timote 4:2) Wewe mumone malu audi  ne bua kulengeja, dienzeje bua kualengeja kuyi ujingakana to.​—Musambu 119:60.

19. Lulamatu lua basadidi ba Nzambi padibu babakina kakuyi bualu ludi tshijadiki tshia tshinyi?

¹⁹ Lulamatu lua batendeledi balelela mu makenga adi afumina ku tshiji tshia Satana ntshijadiki tshia patoke tshia se: bumfumu bua Yehowa ke budi buakane ne bukumbane. Lulamatu luabu ludi lusankisha mutshima wa Nzambi. Nansha mudi bantu mua kutuela bipendu, eu udi ne bunême ku mutu kua buloba ne diulu ‘kêna umvua bundu bua bualu buabu bua kumubikilabu Nzambi wabu.’ Bulelela, mbiakanyine bua kuamba bua bena lulamatu bonso aba ne: ‘Ba pa buloba kabavua babakanyine.’​—Ebelu 11:16, 38.

[Mêyi adi kuinshi]

Udi mua kumvuija anyi?

• Nnganyi udi mukebeshi wa lukuna kaluyi ne nshindamenu ludibu bakine batendeledi balelela?

• Mmunyi muvua Satana muenze mudimu ne bipendu bua kunyanga lulamatu lua Yobo ne lua Yezu?

• Mmunyi mudi Yehowa utukolesha bua kushala bashindame patudi kumpala kua lukuna ludi lufumina kudi Satana?

[Nkonko ya dilonga]

[Kazubu/​Tshimfuanyi mu dibeji 16]

Bakajingulula tshilumbu tshilelela

Ntemu wa Yehowa kampanda wa mu ditunga dia Ukraine muvuabu bakandike mudimu wa kuyisha Bukalenge bidimu bipite pa 50 wakamba ne: “Nsombelu uvua nende Bantemu ba Yehowa ki ngua kukonkonona anu mu mushindu udi bantu batuenzela malu to. . . . Bena mbulamatadi ba bungi bavua benza anu mudimu wabu. Pakashintuluka mbulamatadi, bena mbulamatadi aba bakalamata ku lunga luseke, kadi tuetu tuakashala anu mutuvua amu. Tuakajingulula ne: tshiledi tshilelela tshia ntatu yetu bakavua batshileje patoke mu Bible.

“Katuvua tudimona anu bu bantu bavuabu bakengesha kudi bena tshinyangu kakuyi bualu to. Tshiakatuambuluisha bua kutantamana tshivua ngumvuilu muimpe wa tshilumbu tshivua tshijuke mu budimi bua Edene: tshilumbu tshia bukenji bua Nzambi bua kukokesha. . . . Tuakashala balamate ku luseke lua tshilumbu tshivua tshitangila ki ng’anu malu etu a muntu ne muntu, kadi kabidi malu adi atangila Mukalenge mutambe bunene wa diulu ne buloba. Tuvua ne lumvu lutambe buimpe lua malu manene avua mu tshilumbu atshi. Ebi biakatuvuija bakole ne biakatupesha mushindu wa kulama lulamatu luetu mu ntatu mitambe bukole menemene.”

[Tshimfuanyi]

Victor Popovych, bakamukuata mu 1970

[Tshimfuanyi mu dibeji 13]

Nnganyi uvua mukebeshe bipendu bivuabu bapende Yezu?

[Bimfuanyi mu dibeji 15]

Yobo, Mariya ne basadidi ba Nzambi ba mu tshikondo tshietu etshi bu mudi Stanley Jones mbabingishe bumfumu butambe bunene bua Yehowa