Nansha bobu batshioke, ki mbazengele nansha

‘Yehowa udi Mufuki wa nseke yonso ya pa buloba too ne ku mfudilu kuabu. Yeye udi ukolesha badi [batshioka], udi ukumbaja bukole bua muntu udi kayi ne ngulu.’​—YESHAYA 40:28, 29.

1, 2. (a) Ndubila kayi luimpe ludibu bele bonso badi basue kuikala mu ntendelelu mukezuke? (b) Ntshinyi tshidi mua kutamba kunyanga makanda etu a mu nyuma?

 BU MUTUDI bayidi ba Yezu, tudi bamanye bimpe lubila luende lulenga elu: ‘Luayi kundi, bonso badi ne mudimu mukole, badi ne bujitu bunene, meme nennupe dikisha. Bualu bua mutshi wanyi wa tshikokedi udi muakane ne bujitu buanyi budi bupepele.’ (Matayo 11:28-30) Mbapeshe kabidi bena Kristo ‘bikondo bia kubakankamija bifume ku mêsu kua Mukalenge.’ (Bienzedi 3:19) Bushuwa, ukadi mudimuene bipeta bimpe bia dilonga dia malu malelela a mu Bible, mupete ditekemena dimpe bua matuku atshilualua ne mutumikile mêyi a Yehowa mu nsombelu webe.

² Kadi bamue ba ku batendeledi ba Yehowa batu batshioka mu lungenyi bimue bikondo. Mu imue nsombelu bikondo bia diteketa mu mikolo ebi bitu bîpi. Minga misangu diteketa mu mikolo edi didi mua kunenga mutantshi mule. Mu kupita kua matuku, bamue badi mua kumona ne: majitu abu a bena Kristo mmalue kunema bikole, kaatshiyi mapepele bu muvua Yezu mulaye to. Ngenyi mibi ya nunku idi mua kunyanga malanda a muena Kristo ne Yehowa bikole.

3. Bua tshinyi Yezu wakafila mubelu udi mu Yone 14:1?

³ Mutantshi mukese kumpala kua kukuatabu Yezu ne kumushipabu, wakambila bayidi bende ne: ‘Mitshima yenu kayizakadi; nuitabuje Nzambi, nungitabuje meme kabidi.’ (Yone 14:1) Yezu wakamba mêyi aa pakavua bapostolo pabuipi ne kutuilangana ne mianda mitambe bubi. Pashishe bavua ne bua kubakengesha bikole. Yezu uvua mumanye bimpe ne: bapostolo bende bavua mua kulenduka pa kuteketa bikole mu mikolo. (Yone 16:1) Bu bobu kabayi batangile bimpe, kanyinganyinga kavua mua kubatekesha mu nyuma ne kubafikisha ku dibenga kueyemena kabidi Yehowa. Bidi kabidi nanku bua bena Kristo lelu. Diteketa mu mikolo dia mulunguluku didi mua kulela dibungama dia bungi, ne mitshima yetu idi mua kunema bujitu. (Yelemiya 8:18) Dîba adi, muntu utudi bikale munda udi mua kuteketa. Mu nsombelu mukole wa nunku tudi mua kupungila mu lungenyi ne mu nyuma, anyi mene kujimija dijinga dietu dia kutendelela Yehowa.

4. Ntshinyi tshidi mua kutuambuluisha bua kulama mitshima yetu ya mu tshimfuanyi bua kayitshioki?

⁴ Bushuwa, mubelu eu wa mu Bible mmukumbanyine: ‘Ulame mutshima webe ne dilama dionso, bualu bua munda muawu mudi mupatuka mishimi yonso ya muoyo.’ (Nsumuinu 4:23) Bible udi ufila mubelu wa mushinga udi utuambuluisha bua kukuba mutshima wetu wa mu tshimfuanyi bua kauteketshi ne kautshioki mu nyuma. Kadi tshia kumpala, tudi basue kumanya bimpe menemene tshidi tshitukebela dipungi dia mu nyuma.

Buena-Kristo kabutu bukengeshangana to

5. Mmêyi kayi adi mua kumueneka bu adi apangilangana pa bidi bitangila dikala muyidi wa Kristo?

⁵ Bushuwa, bidi bikengela kudienzeja bikole bua kuikala muena Kristo. (Luka 13:24) Yezu wakamba mene ne: ‘Muntu yonso udi kayi utuala mutshi wende [wa makenga], undonda, kêna mumanye mua kuikala muyidi wanyi.’ (Luka 14:27) Mêyi aa adi mua kumueneka pa mutu pa mutu bu adi abengangana ne mêyi a Yezu avua aleja mudi bujitu buende bupepele ne bufila dikisha, kadi mu bulelela, kaena apangilangana to.

6, 7. Bua tshinyi tudi mua kuamba ne: ntendelelu wetu katu utshiokesha bantu?

 ⁶ Didienzeja ne muoyo mujima ne dikuata mudimu mukole nansha biobi bitshiokesha mubidi bidi mua kusankisha ne kufila dikisha padibi bikale ne tshipatshila tshimpe. (Muambi 3:13, 22) Ntshipatshila kayi tshikuabu tshidi mua kuikala tshimpe kupita dimanyisha bantu netu malu malenga ne malelela a mu Bible? Kabidi, masanka atudi tupeta bua didienzeja bua kutumikila mikenji minene ya Nzambi ya malu a bikadilu mmapite didienzeja edi. (Nsumuinu 2:10-20) Nansha padibu batukengesha, bidi bia lumu kutudi bua kukenga bua Bukalenge bua Nzambi.​—1 Petelo 4:14.

⁷ Bujitu bua Yezu budi bufila dikisha, nangananga patudi tubufuanyikija ne mîdima ya mu nyuma idi nayi badi bashale muinshi mua tshikokedi tshia ntendelelu wa dishima. Nzambi mmutunange bikole ne kêna utulomba malu matupite makanda to. ‘Mikenji [ya Yehowa] kayena itunemena bujitu’ to. (1 Yone 5:3) Amu bu mudibi bileja mu Mukanda wa Nzambi, Buena-Kristo kabutu bukengeshangana to. Bulelela, ntendelelu wetu katu utshiokesha bantu anyi ubatekesha mu mikolo to.

‘Tumushayi bujitu buonso’

8. Ntshinyi tshitu tshikebesha dipungi dia mu nyuma misangu ya bungi?

⁸ Tutu tupungila mu nyuma misangu ya bungi bua majitu a pa mutu atutu tupeta bua malu a mu tshikondo etshi tshibi. Bu mudi ‘buloba bujima mu bukokeshi bua mubi,’ tudi banyungulula kudi makole mabi adi mua kututshiokesha ne kukepeshisha nkatshinkatshi wetu wa bena Kristo. (1 Yone 5:19, Muanda Mulenga Lelu) Malu adi kaayi ne mushinga adi mua kukutakaja anyi kunyanga ngenzelu wetu wa midimu ya bena Kristo. Majitu a pa mutu aa adi mua kutupita makanda anyi mene kunyanga lungenyi luetu. Nunku bidi biakanyine bua Bible kutubela bua ‘kumusha bujitu buonso.’​—Ebelu 12:1-3.

9. Mmunyi mudi dikeba dia bintu mua kututshiokesha?

⁹ Tshilejilu, mushindu udi bena panu baditatshisha bua kupeta lumu, makuta, bua manaya, bua kuenza ngendu ya diya kuendakana patupu, ne bua dikeba dia bintu udi mua kunyanga ngelelu wetu wa meji. (1 Yone 2:15-17) Bamue bena Kristo ba mu bidimu lukama bia kumpala bakakeba biuma ne muoyo mujima bakapeta ntatu mikole. Mupostolo Paulo udi wamba ne: ‘Bobu badi basue kuikala babanji badi bapona mu kutetshibua kua munda ne mu buteyi ne mu nkuka ya bungi idi mipote ne idi ibanyanga, bu yoyo mene idi inyisha bantu mu dibashipesha ne mu dibutuka. Bualu bua lukuka lua biuma ludi muji wa malu mabi a mishindu yonso; bidi bantu bakuabu badikebela ne bakasesuishibua mu njila wa ditabuja, bakadisunsula mubidi wonso ne tunyinganyinga tua bungi.’​—1 Timote 6:9, 10.

10. Ntshinyi tshitudi mua kulonga pa bidi bitangila bubanji mu mufuanu wa Yezu wa mumiaminyi wa ntete?

¹⁰ Tudi mua kuikala tudiumvua batshioke anyi batekete mu mikolo mu mudimu utudi tuenzela Nzambi bualu dikeba dia bintu didi dinyanga dinanga dietu dia malu a mu nyuma anyi? Muanda eu mmulelela bualu ke tshivua Yezu muleje mu mufuanu wende wa mumiaminyi wa ntete. Yezu wakafuanyikija ‘meji a malu a pa buloba ne mashimi a biuma ne lukuka lua malu makuabu’ ne meba adi ‘abuela munda, anyengela’ maminu a dîyi dia Nzambi adi mu mitshima yetu. (Mâko 4:18, 19) Ke bualu kayi, Bible udi utubela ne: ‘Mioyo yenu kayikadi ne lukuka lua biuma, nuikale ne disanka ne bintu binudi nabi, bualu  bua Nzambi muine wakuamba ne: Tshiena nkulekela, nansha kakese, tshiena nkushiya tshianana.’​—Ebelu 13:5.

11. Mmunyi mutudi mua kumbusha bintu bidi mua kutunemena bujitu?

¹¹ Minga misangu, tshidi mua kunyanga nsombelu wetu tshidi mua kuikala, ki ndikeba dia bintu bia bungi, kadi tshitudi tuenza ne bintu bitukadi nabi. Bamue badi mua kutshioka mu lungenyi bua masama ne lufu lua bananga babu anyi bua ntatu mikuabu. Mbamone mushinga wa kushintulula nsombelu wabu ku musangu ne ku musangu. Bena dibaka babidi bakapangadika bua kulekela amue malu abu a dipitshisha kapepa ne bipatshila bivua kabiyi ne mushinga. Bakakonkonona bintu biabu ne kuenzabu dibuki dia bintu bionso bivua bitangila bipatshila ebi ne kubiumbushabu ku mêsu kuabu. Ku musangu ne ku musangu, tuetu bonso tudi mua kupeta disanka pa kukonkonona bibidilu bietu ne bintu bietu, kumbusha bujitu buonso bua patupu bua katutshioki ne katuteketshi mu mitshima yetu.

Bidi bikengela kuikala ne nkatshinkatshi ne bupuekele

12. Ntshinyi tshitudi ne bua kumanya pa bidi bitangila bilema bietu?

¹² Bilema bitudi tuenza tuetu nkayetu nansha mu tualu tukese bidi mua kunyanga nsombelu wetu ku kakese ku kakese. Malu adi Davidi wamba aa mmalelela: ‘Malu mabi anyi akuula, akupita pa mutu panyi. Bu bujitu bunene, adi atamba kunnemena bujitu.’ (Musambu 38:4) Misangu ya bungi, mashintuluka makese a mu nsombelu adi mua kutupepejila majitu etu manene.

13. Mmunyi mudi nkatshinkatshi mua kutuambuluisha bua kuikala ne mmuenenu muimpe pa mudimu wetu wa kuyisha?

¹³ Bible udi utukankamija bua kuikala ne ‘meji adi akuatshisha, ne bukole bua kupangadija malu.’ (Nsumuinu 3:21, 22) Bible udi wamba kabidi ne: ‘Meji adi afuma mu diulu adi mapole’ anyi nkatshinkatshi. (Yakobo 3:17) Bamue mbadimone benzejibue bua kuenza mudimu wa kuyisha wa bungi bua muomumue ne wa bakuabu. Kadi Bible udi utubela ne: ‘Muntu ne muntu adijadikile mudimu wende, nunku neamanye mua kuditumbisha bua bualu buende, ki mbualu bua mukuabu. Bualu bua muntu ne muntu neadiambuile bujitu buende.’ (Galatia 6:4, 5) Bushuwa, tshilejilu tshimpe tshia bena Kristo netu tshidi mua kutukankamija bua kusadila Yehowa ne mutshima wetu mujima, kadi meji adi akuatshisha ne nkatshinkatshi nebituambuluishe bua kudifundila bipatshila bilelela bilondeshile nsombelu wetu.

14, 15. Mmunyi mutudi mua kuleja meji adi akuatshisha pa kutabalela majinga etu a ku mubidi ne a mu lungenyi?

¹⁴ Dikala ne nkatshinkatshi nansha mu malu adi mua kumueneka bu a mushinga mukese didi mua kutuambuluisha bua kubabidila ditshioka. Tshilejilu, tudiku ne bibidilu bimpe bidi biambuluisha bua kuikala ne bukole bua mubidi anyi? Angata tshilejilu tshia bena dibaka babidi badi basadila ku biro kampanda bia filiale wa Bantemu ba Yehowa. Mbamone mushinga wa meji adi akuatshisha bua kubabidila ditshioka. Mukaji udi wamba ne: “Nansha mutudi ne mudimu wa bungi, tutu tuditatshisha bua kulala pabuipi ne dîba dia muomumue dituku dionso. Tutu kabidi tuibidija mubidi pa tshibidilu. Ebi mbituambuluishe  bikole. Tudi bafike ku dimanya mikalu yetu, ne tudi tuenza malu bilondeshile mikalu eyi. Katuena tudifuanyikija ne aba badi bamueneka bu kabatu batshioka to.” Tutuku tudia biakudia bimpe ne tuikisha bimpe pa tshibidilu anyi? Misangu ya bungi, ditabalela dimpe dia makanda etu a mubidi didi mua kukepesha dipungi dietu dia mu lungenyi ne dia mu nyuma.

¹⁵ Bamue ba kutudi batu ne majinga a pa buawu. Tshilejilu, muanetu wa bakaji kampanda muena Kristo mmuenze mudimu wa ku dîba ne ku dîba miaba kabukabu ivuaye mupete ntatu mivule. Mmupete masama makole a bungi, kusangisha ne dia kansere. Ntshinyi tshidi tshimuambuluisha bua kupita bimpe ne ntatu? Udi wamba ne: “Bidi bia mushinga buanyi meme bua kuikala ne dîba pandi nkayanyi ne musombe muaba mutalale. Pandi mpeta tunyinganyinga tua bungi ne dipungi dikole ke pandi ntamba kujinga kuikala nkayanyi bua kubala ne kuikisha.” Meji adi akuatshisha ne bukole bua kupangadija malu bidi bituambuluisha bua kumanya majinga etu a muntu pa nkayende ne kuakumbaja bua kuepuka ditshioka dia mu nyuma.

Yehowa Nzambi udi utupesha bukole

16, 17. (a) Bua tshinyi kutabalela makanda etu a mu nyuma kudi ne mushinga mukole? (b) Ntshinyi tshitudi ne bua kubueja mu malu etu a ku dituku ne ku dituku?

¹⁶ Bushuwa, ditabalela bukole buetu bua mu nyuma didi ne mushinga mutambe bunene. Patudi ne malanda mashême ne Yehowa Nzambi, tudi mua kutshioka ku mubidi, kadi katuena mua kutshioka bua kumutendelela to. Yehowa udi ‘ukolesha badi [batshioka], udi ukumbaja bukole bua muntu udi kayi ne ngulu.’ (Yeshaya 40:28, 29) Mupostolo Paulo wakadimuena bulelela bua mêyi aa wakafunda ne: ‘Katuena tupanga; kadi bikala mibidi yetu ifuafua ifuafua, mioyo yetu idi ivuijibua mipiamipia ku dituku ku dituku.’​—2 Kolinto 4:16.

¹⁷ Tangila mêyi aa: “ku dituku ku dituku.” Adi aleja ne: tudi tudiambuluisha ne bintu bidi Yehowa utupesha ku dituku ne ku dituku. Misionere kampanda uvua muenze mudimu ne lulamatu bidimu 43 wakatshioka ne kuteketa mu mikolo mu bimue bikondo. Kadi kakashala muzengele to. Udi wamba ne: “Ntu ne tshibidilu tshia kubika ku tulu kumpala bua mmone mua kupeta dîba dia kusambila Yehowa ne kubala Dîyi diende kumpala kua meme kuenza mudimu kayi wonso. Tshibidilu etshi tshia dituku dionso ntshingambuluishe bua kunanukila too ne mpindieu.” Nunku tudi ne bua kueyemena bukole budi Yehowa utukuatshisha nabu bituikala tumusambila pa tshibidilu anyi “ku dituku ku dituku,” ne tuelangana meji bua ngikadilu yende milenga ne malaya ende.

18. Mbusambi kayi budi Bible ufila bua bena lulamatu bakadi bakulakaje anyi badi basama?

¹⁸ Disambila ditu diambuluisha nangananga badi batekete mu mikolo bua dikulakaja anyi bua tusamasama. Badi mua kuteketa ku muoyo, kabiyi bualu badi badifuanyikija ne bakuabu, kadi bualu badi bafuanyikija tshidibu mpindieu ne tshivuabu kumpala. Bidi bikankamija bikole bua kumanya ne: Yehowa udi wangata bakulakaje ne mushinga! Bible udi wamba ne: ‘Nsuki mitoke too idi tshifulu tshia butumbi, nebatshipete mu njila wa buakane.’ (Nsumuinu 16:31) Yehowa mmumanye mikalu yetu ne udi wangata dimutendelela ne muoyo mujima dietu ne mushinga wa bungi nansha mutudi bena mateketa. Malu mimpe atukadi benze akadi mashale mu lungenyi lua Nzambi kaayi mua kukupuka to. Mukanda wa Nzambi udi utujadikila ne: ‘Nzambi kêna upanga buakane bua kupueye muoyo wa mudimu wenu ne wa dinanga dinuakaleja bua dîna diende, panuakakuatshila bansantu mudimu ne panutshidi nubakuatshilawu.’ (Ebelu 6:10) Tudi ne disanka dia bungi bua kuikala munkatshi muetu ne bantu badi badileje bena lulamatu kudi Yehowa munkatshi mua bidimu bia bungi!

Kulekedi to

19. Mmasanka kayi atudi tupeta patudi tutungunuka ne kuenza malu mimpe?

¹⁹ Bantu ba bungi batu bitaba bua se: mudimu wa bianza mukole muenza pa tshibidilu udi mua kukepesha ditshioka. Bia muomumue, dienza midimu ya mu nyuma pa tshibidilu didi mua kukepesha dipungi dionso dia mu lungenyi ne dia mu nyuma. Bible udi wamba ne: ‘Katupangi mu kuenza kua malu mimpe; bualu bua palua tshikondo tshia kuapuola netuapuole  bituikala katuyi tupanga. Nunku patudi bamanye mua kuenza, tuenzelayi bantu bonso bimpe, kadi tutambe kuenzela bena dîku dia bena kuitabuja bimpe.’ (Galatia 6:9, 10) Tangila miaku eyi: “kuenza kua malu mimpe” ne ‘kuenza bimpe.’ Mêyi aa adi aleja tshitudi ne bua kuenza. Kuenzela bakuabu malu mimpe kudi mua kuambuluisha bua katuyi kuikala bazengele mu mudimu utudi tuenzela Yehowa.

20. Tudi ne bua kuepuka bulunda ne banganyi bua kubenga kuteketa mu mikolo?

²⁰ Kadi didisangisha ne bantu badi bapetula mikenji ya Nzambi ne dienza nabu malu pamue didi mua kulua bujitu budi butshiokesha. Bible udi utubela ne: ‘Dibue didi ne bujitu, lusenga ludi lunema kabidi; kadi tshiji tshia mupote tshidi tshitamba bubidi buabi bujitu.’ (Nsumuinu 27:3) Bua kubenga kuteketa mu mikolo ne kutshioka, tudi ne bua kuepuka bulunda ne badi ne ngenyi mibi ne tshilele tshia kutalula bakuabu bilema ne kubajana.

21. Mmunyi mutudi mua kukankamija bantu mu bisangilu bia bena Kristo?

²¹ Bisangilu bia bena Kristo ngumue mushindu udi Yehowa utupeshila bukole bua mu nyuma. Tudi tupetelamu mushindu muimpe wa kukankamijangana ne dilongesha dilenga ne tudisangisha ne bantu ba malu mimpe. (Ebelu 10:25) Bantu bonso mu tshisumbu badi ne bua kudienzeja bua kuikala bakolesha bakuabu mu mikolo padibu bela nseke mu bisangilu anyi padibu balongesha ku tshiakuidi. Nangananga aba badi bantunga-mulongo mu dilongesha ke badi ne bujitu bua kukankamija bakuabu. (Yeshaya 32:1, 2) Nansha padibi bikengela kubela anyi kukanyina muntu, badi ne bua kufila mibelu eyi mu mushindu muimpe. (Galatia 6:1, 2) Dinanga dietu bua bakuabu nedituambuluishe bushuwa bua kusadila Yehowa katuyi tuzengela.​—Musambu 133:1; Yone 13:35

22. Nansha mutudi bapange bupuangane, bua tshinyi tudi ne bua kuikala ne dikima?

²² Kutendelela Yehowa mu tshikondo etshi tshia nshikidilu kudi kulomba kuenza mudimu. Bena Kristo ki mbepula ku bipeta bidi bifumina ku ditshioka dia mu lungenyi, ku tunyinganyinga ne ntatu to. Bumuntu buetu bupange bupuangane budi butekete anu bu dima. Kadi Bible udi wamba ne: ‘Tshiuma etshi, tudi batshiambule mu ngesu ya dibumba, bua bantu bamone bimpe ne: bukole ebu bupite mbua kudi [Nzambi], kabuena bufuma kutudi to.’ (2 Kolinto 4:7, MMM) Bulelela, netutshioke, kadi katuzengedi ne katupangi nansha. Kadi ‘tuambayi ne dikima ne: Mukalenge udi mukuatshishi wanyi.’​—Ebelu 13:6.

Diambulula mu tshikoso

• Tudi mua kukumbana bua kulekela amue majitu kayi manene?

• Mmunyi mutudi petu mua kuenzela bena Kristo netu ‘bimpe’?

• Mmunyi mudi Yehowa utukuatshisha patudi tutshioka anyi tuteketa mu mikolo?

[Nkonko ya dilonga]

[Tshimfuanyi mu dibeji 23]

Yezu uvua mumanye ne: diteketa mu mikolo dia mulunguluku divua mua kutatshisha bapostolo

[Tshimfuanyi mu dibeji 24]

Bamue mbalekele amue malu a dipitshisha kapepa ne bipatshila biabu bidi kabiyi ne mushinga

[Tshimfuanyi mu dibeji 26]

Nansha mutudi ne mikalu, Yehowa mmusue bikole patudi tumutendelela ne muoyo mujima